Yu Ken Bilip Tru Olsem Jehova i Laikim Yu

1. Wai na yu dediketim yu yet long Jehova? (Lukim tu piksa.)

YU INAP tingim taim yu bin dediketim yu yet long Jehova? Yu mekim dispela disisen bikos yu kisim save long em na yu laikim em. Yu promis long em olsem yu bai putim laik bilong em i stap nambawan samting long laip bilong yu, na yu bai wok yet long laikim em long bel olgeta, laip olgeta, tingting olgeta, na strong olgeta bilong yu. (Mak 12:30) Kirap long dispela taim na i kam, pasin bilong yu long laikim em i kamap strong moa. So bai yu bekim wanem tok sapos wanpela i askim yu olsem, “Tru tru yu laikim Jehova?” Yu no inap surik, wantu tasol yu bai tok, “Mi laikim em moa yet winim olgeta narapela manmeri na ol narapela samting!”

2-3. (a) Jehova i laik bai yumi bilip long wanem samting? (b) Yumi bai stori long wanem samting long dispela atikol? (Jeremaia 31:3)

² Yu bai tok wanem sapos wanpela i askim yu olsem, “Tru tru yu bilip olsem Jehova i laikim yu?” Bai yu surik long bekim dispela askim bikos ating yu kisim tingting olsem tru tru Jehova i laikim yu o nogat? Wanpela sista husat i karim planti hevi taim em i wok long kamap bikpela, em i tok: “Mi save olsem mi laikim Jehova. Mi no gat tupela tingting long dispela samting. Tasol mi save tingting planti olsem Jehova i laikim mi o nogat.” Tasol tru tru Jehova i pilim olsem wanem long yu?

³ Jehova i laik yu bilip olsem em i laikim yu. (Ritim Jeremaia 31:3.) Na yu ken bilip tru long dispela bikos em i kirapim yu long kam long em. Na taim yu dediket long em na kisim baptais, em bai mekim gutpela pasin laikim long yu na em samting i dia tumas. Dispela i makim olsem em i laikim yu tru na em i no inap lusim yu. Na dispela i kirapim em long tingim yu na olgeta manmeri i lotuim em olsem “lain manmeri i dia tumas” long em. (Mal. 3:​17, ftn.) Jehova i laik bai yu bilip tru olsem em i laikim yu wankain olsem aposel Pol i bin bilip tru olsem Jehova i laikim em. Pol i save tru long dispela, olsem na em i tok: “Mi bilip tru olsem dai, laip, ol ensel, ol gavman, ol samting nau i stap, ol samting bai kamap bihain, ol samting i gat strong, ol samting bilong antap, ol samting bilong daunbilo, na ol arapela samting God i bin wokim, olgeta dispela samting i no inap tekewe yumi long pasin laikim bilong God.” (Rom 8:​38, 39) Long dispela atikol, yumi bai stori long risen na yumi mas strongim bilip bilong yumi olsem Jehova i laikim yumi na samting bai helpim yumi long mekim olsem.

RISEN NA YUMI MAS BILIP OLSEM JEHOVA I LAIKIM YUMI

4. Yumi ken mekim wanem bilong daunim wanpela bilong ol pasin trik bilong Satan?

⁴ Taim yumi bilip olsem Jehova i laikim yumi, yumi ken daunim wanpela bilong “ol pasin trik” bilong Satan. (Efe. 6:11) Satan bai mekim olgeta samting bilong stopim yumi long mekim wok bilong Jehova. Wanpela bilong ol pasin trik bilong Satan em long strongim dispela tok giaman olsem Jehova i no laikim yumi. No ken lusim tingting olsem Satan em man bilong painim ol rot bilong nogutim yumi. Planti taim em i save traim yumi long taim yumi no gat strong. Kain olsem long taim yumi bel hevi long ol samting yumi bin mekim long bipo, o ol hevi i painim yumi long nau, o taim yumi tingting planti long ol samting bai kamap bihain. (Prov. 24:10) Satan i olsem wanpela laion na oltaim em i painim rot bilong daunim yumi taim strong bilong yumi i pinis. So taim bel hevi i daunim yumi tru, em i save yusim dispela rot bilong mekim yumi givap. Tasol sapos yumi wok yet long strongim bilip bilong yumi olsem Jehova i laikim yumi, dispela bai helpim yumi long ‘sanap strong na sakim’ Satan na ol pasin giaman na ol pasin trik bilong em.—1 Pita 5:​8, 9; Jems 4:7.

5. Taim yumi pilim olsem Jehova i laikim yumi na tingim yumi tru, dispela bai mekim wanem long yumi?

⁵ Taim yumi bilip olsem Jehova i laikim yumi, yumi ken go klostu moa long em. Tingim risen na yumi tok olsem. Jehova i wokim yumi na em i givim yumi dispela laik bilong laikim ol narapela, na tu, pilim pasin laikim bilong ol narapela. Taim wanpela i laikim yumi, dispela i save kirapim yumi tu long laikim em. So taim yumi pilim olsem Jehova i laikim yumi na tingim yumi tru, pasin bilong yumi long laikim em bai kamap strong moa. (1 Jon 4:19) Na taim yumi laikim em tru, dispela bai kirapim em tu long laikim yumi tru. Baibel i tokaut klia long yumi olsem: “Yupela i mas i go klostu long God, na em bai kam klostu long yupela.” (Jems 4:8) Tasol yumi ken mekim wanem bilong strongim bilip bilong yumi olsem Jehova i laikim yumi?

WANEM SAMTING I KEN HELPIM YUMI LONG BILIP OLSEM JEHOVA I LAIKIM YUMI?

6. Yumi mas beten long wanem samting na bai yumi ken bilip tru olsem Jehova i laikim yumi?

⁶ Beten oltaim na kolim stret ol samting yu laik bai Jehova i helpim yu long en. (Luk 18:1; Rom 12:12) Beten planti taim long de na askim Jehova long helpim yu long holim wankain tingting olsem em i gat long yu. Sampela taim, bel bilong yu inap giamanim yu na i hatwok long yu bilip olsem Jehova i laikim yu. Tasol tingim, Jehova i winim tru bel bilong yu. (1 Jon 3:​19, 20) Em i save gut tru long yu winim save yu gat long yu yet, na em i lukim ol samting long yu em yu yet i no inap long lukim. (1 Sml. 16:7; 2 Sto. 6:30) So no ken surik long “autim olgeta” tingting i stap long bel bilong yu long em na askim em long helpim yu long bilip olsem em i laikim yu. (Sng. 62:8) Na mekim ol samting i stret wantaim beten bilong yu long rot bilong bihainim ol dispela sajesten.

7-8. Olsem wanem ol tok bilong Buk Song i helpim yumi long bilip tru olsem Jehova i laikim yumi?

⁷ Trastim ol tok bilong Jehova. Em i kirapim ol man bilong raitim Baibel long stori long ol pasin tru bilong em. Skelim tok em Devit, man bilong raitim Buk Song, i mekim long gutpela pasin bilong Jehova long tingim tru yumi. Em i tok: “Jehova i save stap klostu long ol manmeri em hevi i daunim tru ol; na em i save kisim bek ol manmeri bel bilong ol i bagarap.” (Sng. 34:18) Taim yu bel hevi tru, yu inap pilim olsem yu stap wanpis. Tasol Jehova i promis olsem, long kain taim olsem, em i stap klostu long yu bikos em i luksave olsem yu nidim em moa yet long dispela taim. Long narapela hap bilong Buk Song, Devit i tok: “Yu mas pulapim aiwara bilong mi long beg wara bilong yu.” (Sng. 56:8) Jehova i save lukim yu taim yu bel hevi tru. Em i tingim yu tru na samting yu pilim. I olsem em i pulapim aiwara bilong yu long beg wara bilong em na em i tingim tru, wankain olsem man bilong travel long ples drai nating i save karim beg wara wantaim em long olgeta hap em i go. Buk Song 139:3 i tok: “[Jehova] yu save long olgeta pasin bilong mi.” Jehova i lukim olgeta pasin bilong yu, tasol em i tingim tasol ol gutpela pasin bilong yu. (Hib. 6:10) Bilong wanem? Long wanem, em i tingim tru olgeta hatwok yu mekim bilong amamasim em.a

⁸ Long rot bilong kain ol gutpela skripsa olsem long Baibel, i olsem Jehova i tok: “Mi laik yu save olsem mi laikim yu tru na mi tingim yu.” Tasol olsem yumi stori pinis, Satan i laik yu bilipim dispela tok giaman olsem Jehova i no save laikim yu. So sapos sampela taim yu gat tupela tingting long pasin bilong Jehova long laikim yu, orait stap isi na askim yu yet olsem, ‘Bai mi bilipim husat—“papa bilong pasin giaman” o “God bilong mekim pasin tru tasol”?’—Jon 8:44; Sng. 31:5.

9. Jehova i mekim wanem gutpela tok promis long ol manmeri husat i laikim em? (Kisim Bek 20:​5, 6)

⁹ Tingim pasin Jehova i save mekim long ol man i laikim em. Lukim tok Jehova i mekim long Moses na lain Israel. (Ritim Kisim Bek 20:​5, 6.) Jehova i tok promis olsem em bai wok yet long mekim gutpela pasin laikim long ol manmeri husat i laikim em. Ol dispela tok i ken mekim gut bel bilong yumi olsem God bilong yumi husat i save stap gut long ol narapela, em bai mekim wankain pasin laikim long ol man i lotuim em, em ol i save laikim em tru. (Neh. 1:5) So sapos sampela taim yu gat tupela tingting long pasin bilong Jehova long laikim yu, orait stop na askim yu yet olsem, ‘Mi laikim tru Jehova?’ Na bihain tingim dispela: Sapos yu laikim Jehova na yu wok strong tru long amamasim em, orait yu ken save tru olsem em i laikim yu tru. (Dan. 9:4; 1 Kor. 8:3) Sapos yu no gat tupela tingting long pasin bilong yu long laikim Jehova, orait wai na yu gat tupela tingting long pasin bilong em long laikim yu? Yu ken save tru olsem oltaim em bai laikim yu na stap gut long yu.

10-11. Jehova i laik bai yu gat wanem tingting long pe bilong baim bek man? (Galesia 2:20)

¹⁰ Tingim tingim long bel pe bilong baim bek man. Ofa bilong Jisas Krais long baim bek yumi em nambawan gutpela presen Jehova i bin givim long ol man. (Jon 3:16) Tasol yu ting em wanpela presen God i givim long yu stret? Yes! Tingim stori bilong aposel Pol. Em i bin mekim sampela bikpela sin paslain long em i kamap wanpela Kristen, na em i mas wok strong yet long daunim sampela pasin kranki bilong em. (Rom 7:​24, 25; 1 Tim. 1:​12-14) Maski i olsem, em i tingim pe bilong baim bek man olsem wanpela presen Jehova i givim long em stret. (Ritim Galesia 2:20.) Tingim olsem Jehova i bin kirapim Pol long raitim ol dispela tok. Na olgeta tok i stap long Baibel i bilong skulim yumi. (Rom 15:4) Ol tok Pol i mekim i soim klia olsem Jehova i laik yu tingim pe bilong baim bek man olsem wanpela presen Em i givim long yu stret. Taim yu holim kain tingting olsem long pe bilong baim bek man, dispela bai strongim bilip bilong yu olsem Jehova i laikim yu stret.

¹¹ Yumi tenkyu olsem Jehova i salim Jisas i kam long graun bilong dai na baim bek yumi. Tasol narapela risen na Jisas i kam long graun em bilong tokim ol manmeri long tok i tru long God. (Jon 18:37) Wanpela bilong ol dispela tok i tru em olsem Jehova i laikim tru ol pikinini bilong em.

JISAS I HELPIM YUMI LONG BILIP OLSEM JEHOVA I LAIKIM YUMI

12. Wai na yumi ken bilip long tok Jisas i mekim long Jehova?

¹² Taim Jisas i stap long graun, em i amamas long kamapim klia ol pasin bilong Jehova. (Luk 10:22) Olsem na i gat as long yumi ken bilip long ol tok Jisas i mekim long Jehova. I stret long yumi mekim olsem bikos Jisas i bin stap long heven wantaim Jehova inap planti bilion yia paslain long em i kam long graun. (Kol. 1:15) Jisas yet i bin lukim na pilim tru pasin bilong Papa bilong em long laikim em na laikim tu ol ensel na ol manmeri long graun. Jisas i mekim wanem bilong helpim yumi long bilip tru olsem God i laikim yumi?

13. Jisas i laik bai yumi holim wanem tingting long Jehova?

¹³ Jisas i laik bai yumi holim wankain tingting olsem em i gat long Jehova. Long Ol Gutnius, winim 160 taim Jisas i kolim Jehova olsem “Papa.” Na taim em i toktok long ol disaipel bilong em, planti taim em i kolim ol kain tok olsem “Papa bilong yupela” o “Papa bilong yupela long heven.” (Mat. 6:​8, 26) Paslain long Jisas i kam long graun, ol gutpela wokman bilong Jehova long bipo i save kolim em olsem ‘God i Gat Olgeta Strong,’ ‘God Antap Tru,’ na ‘Bikpela Man Bilong Wokim’ ol samting, na ol narapela biknem olsem. Tasol planti taim Jisas i kolim em olsem ‘Papa.’ Dispela tok i kamapim klia olsem Jehova i laik bai ol wokman bilong em i pas gut wantaim em wankain olsem wanpela pikinini i pas gut wantaim papa bilong em. I klia tru olsem Jisas i laik bai yumi holim wankain tingting olsem em i gat long Jehova, olsem Jehova em i wanpela gutpela Papa husat i save laikim tru ol pikinini bilong Em. Yumi bai stori long tupela eksampel we Jisas i bin kolim Jehova olsem “Papa.”

14. Jisas i tok wanem bilong soim olsem yumi olgeta wan wan i dia tumas long Papa bilong yumi long heven? (Matyu 10:​29-31) (Lukim tu piksa.)

¹⁴ Yumi ken lukim namba 1 eksampel we Jisas i kolim Jehova olsem “Papa” long ol tok em i mekim long Matyu 10:​29-31. (Ritim.) Ol liklik pisin i no inap laikim Jehova o lotuim em. Tasol Papa bilong yumi i tingim tru wanpela liklik pisin na em i save taim dispela pisin i pundaun long graun. So dispela i makim olsem em i save tingim tru na lukautim olgeta wan wan wokman bilong em husat i laikim em na mekim wok bilong em! Jisas i tok tu olsem Jehova “i kaunim pinis olgeta gras long het bilong yupela.” Stadi nout bilong ves 30 i tok: “Jehova i save long kain liklik samting olsem long yumi, na dispela i makim olsem em i tingim tru yumi olgeta wan wan disaipel bilong Krais.” Tru tumas, Jisas i laik bai yumi olgeta wan wan i save tru olsem yumi dia tumas long ai bilong Papa bilong yumi long heven.

15. Tok bilong Jisas long Jon 6:44 i givim wanem save long yu long Papa bilong yu long heven?

¹⁵ Yumi ken skelim namba 2 eksampel we Jisas i kolim Jehova olsem “Papa.” (Ritim Jon 6:44.) Papa bilong yu long heven i kirapim yu long i kam long tok i tru. Wai na em i mekim olsem? Bikos em i lukim olsem yu gat gutpela bel. (Apo. 13:48) Taim Jisas i mekim dispela tok long Jon 6:​44, ating em i tingim tok Jehova i mekim long Jeremaia 31:1. Long dispela ves, Jehova i tokim lain bilong em olsem: “Mi mekim yu i kam klostu long mi long rot bilong gutpela pasin laikim [o wok yet long soim gutpela pasin laikim long yu].” (Jer. 31:3; ftn.; skelim Hosea 11:4.) Tingim mining bilong dispela tok. Gutpela Papa bilong yumi long heven i wok yet long lukim ol gutpela pasin long yu em ating yu yet i no lukim.

16. (a) Jisas i tok wanem long yumi, na wai na yumi mas bilipim tok bilong em? (b) Yu mas mekim wanem na bai yu bilip tru olsem Jehova em i gutpela Papa bilong yu? (Lukim blok “Em i Gutpela Papa Bilong Helpim Yumi Olgeta.”)

¹⁶ Taim Jisas i kolim Jehova olsem Papa bilong yumi, i olsem em i tokim yumi: “Jehova em i no Papa bilong mi tasol, em i Papa bilong yupela tu. Na mi ken tokim yupela olgeta olsem em i laikim yupela na em i tingim tru yupela olgeta wan wan.” So sapos sampela taim yu pilim olsem Jehova i no laikim yu, orait stop na askim yu yet, ‘I stret mi mas trastim Pikinini Bilong God em man husat i save gut moa long Papa bilong yumi na oltaim em i save mekim tok tru?’—1 Pita 2:22.

WOK YET LONG STRONGIM BILIP OLSEM JEHOVA I LAIKIM YU

17. Wai na yumi mas wok yet long strongim bilip bilong yumi olsem Jehova i laikim yumi?

¹⁷ Yumi mas wok yet long strongim bilip bilong yumi olsem Jehova i laikim yumi. Olsem yumi stori pinis, Satan em dispela birua bilong yumi, em i pulap tru long ol pasin trik na em i wok strong long pasim yumi long lotuim Jehova. Satan i wok strong tru long daunim pasin bilong yumi long bilip olsem God i laikim yumi. Yumi no ken tru bilipim tok giaman bilong Satan!—Jop 27:5.

18. Yu ken mekim wanem bilong strongim bilip bilong yu olsem Jehova i laikim yu?

¹⁸ Bilong strongim bilip bilong yu olsem Jehova i laikim yu, yu mas beten oltaim na bai yu holim wankain tingting olsem Jehova i gat long yu. Tingim ol ves bilong Baibel we i stori long pasin bilong Jehova long tingim tru ol manmeri. Na tingim pasin bilong em long laikim ol manmeri em ol i save laikim em. Tingim tingim long bel pe bilong baim bek man olsem presen Jehova i givim long yu stret. Na trastim tru tok Jisas i mekim olsem Jehova em i Papa bilong yu long heven. Na sapos wanpela i askim yu olsem: “Yu ting tru tru Jehova i laikim yu?” yu bai amamas na tok: “Yes, em i laikim mi! Na long olgeta de mi wok strong long soim em olsem mi laikim em!”