Ol Rot Jehova i Helpim Yumi Long Sanap Strong

1. (a) Wai na yumi mas sanap strong? (b) Husat bai helpim yumi long sanap strong? (1 Pita 5:10)

DISPELA taim bilong las de bai i gat planti hevi, olsem na em i bikpela samting long lain bilong Jehova i mas sanap strong. Sampela i karim hevi bilong wanpela bikpela sik inap longpela taim. Ol narapela i karim hevi bilong wanpela ol i laikim tru i dai. Na ol narapela i karim hevi long ol wanfamili na ol ofisa bilong gavman i birua long ol. (Mat. 10:​18, 36, 37) Yu ken save tru olsem maski yu karim wanem hevi, Jehova i ken helpim yu long sanap strong na karim dispela hevi.—Ritim 1 Pita 5:10.

2. Bilong wanem yumi ol Kristen inap sanap strong?

² Pasin bilong sanap strong i makim olsem yumi no givap na yumi bilip yet olsem gutpela samting bai kamap maski yumi karim ol hevi, ol man i birua long yumi, o ol traim i painim yumi. Yumi inap sanap strong bikos Jehova i givim yumi “dispela strong i winim strong bilong yumi ol man.” Yumi no inap mekim olsem long strong bilong yumi yet, nogat. (2 Kor. 4:7) Long dispela atikol, yumi bai stori long fopela rot Jehova i save helpim yumi long sanap strong. Yumi bai stori tu long ol samting yumi ken mekim bilong kisim helpim long ol dispela rot.

BETEN

3. Wai na yumi ken tok olsem beten em wanpela mirakel?

³ Jehova i givim yumi wanpela samting bilong helpim yumi long sanap strong na karim ol hevi, na dispela em i wanpela mirakel. Em i opim rot long yumi inap toktok wantaim em, maski yumi ol sinman. (Hib. 4:16) Tingim dispela: Yumi ken beten long Jehova long olgeta kain taim na long olgeta kain samting. Em i ken harim ol beten bilong yumi long olgeta kain tokples na long wanem hap yumi stap long en, maski yumi stap long wanpela hap i no gat ol bratasista o yumi stap long kalabus. (Jna. 2:​1, 2; Apo. 16:​25, 26) Sapos yumi tingting planti na yumi no save long wanem tok yumi bai mekim, orait long kain taim olsem Jehova inap kliagut long ol tok yumi laik mekim. (Rom 8:​26, 27) Tru tumas, beten em i wanpela mirakel we i opim rot long yumi ken toktok wantaim Jehova!

4. Taim yumi beten askim Jehova long helpim yumi long sanap strong, wai na yumi ken tok dispela i stret wantaim laik bilong em?

⁴ Long Baibel, Jehova i tokim yumi olsem “maski wanem wanem samting yumi askim em long en na i stret wantaim laik bilong em, em bai harim yumi.” (1 Jon 5:14) Yu ting yumi inap askim Jehova long helpim yumi long sanap strong? Yes, yumi inap mekim olsem! Dispela i stret wantaim laik bilong em. Wai na yumi tok olsem? Bikos taim yumi sanap strong na karim ol hevi, rot i op long Jehova inap bekim tok long Satan em dispela Devil, em man husat i save sutim tok long Em. (Prov. 27:11) Na tu, Baibel i tok olsem Jehova i laik tru long “soim strong bilong em long helpim ol man husat i givim bel olgeta long em.” (2 Sto. 16:9) So yumi ken save tru olsem Jehova i gat strong na laik long helpim yumi long sanap strong.—Ais. 30:18; 41:10; Luk 11:13.

5. Hau na beten i ken mekim isi bel na tingting bilong yumi? (Aisaia 26:3)

⁵ Baibel i tok taim yumi beten na kamapim bel na tingting bilong yumi long Jehova, ‘dispela bel isi bilong God i winim tru tingting bilong man, em bai lukautim bel bilong yumi na tingting bilong yumi.’ (Fili. 4:7) Beten em i rot bilong kisim bel isi. Ol man i no lotuim Jehova i traim kain kain rot bilong kisim bel isi taim hevi i painim ol. Olsem, sampela i save wok strong long rausim olgeta samting long tingting bilong ol, na rausim tu ol wari tingting. Dispela kain pasin olsem inap nogutim ol bikos em i opim rot long ol spirit nogut i bosim tingting bilong ol. (Skelim Matyu 12:​43-45.) Tasol bel isi Jehova i save givim long yumi taim yumi beten long em, dispela i winim tru olgeta kain bel isi em wanpela i kisim long rot bilong mekim kain pasin olsem. Taim yumi beten long Jehova, yumi soim olsem yumi trastim em tru na ‘oltaim em bai givim bel isi’ long yumi olsem em i promis long mekim. (Ritim Aisaia 26:3.) Wanpela rot Jehova i mekim olsem em long helpim yumi long tingim gen ol tok i tru bilong Baibel em yumi lainim pinis. Ol dispela tok i tru i mekim isi bel na tingting bilong yumi bikos yumi save olsem Jehova i save tingim yumi tru na em i laik bai yumi stap gut.—Sng. 62:​1, 2.

6. Yu ken mekim wanem na bai yu kisim gutpela helpim long rot bilong beten? (Lukim tu piksa.)

⁶ Samting yu ken mekim. Taim yu wok long sanap strong na karim wanpela hevi i traim bilip bilong yu, “yu mas putim [dispela hevi] long han bilong Jehova” na beten askim em long givim yu bel isi. (Sng. 55:22) Na tu, beten askim em long givim yu savetingting yu nidim na bai yu ken karim dispela hevi. (Prov. 2:​10, 11) Mekim ol prea we yu beten strong long God na askim em long helpim yu long sanap strong, na tu, no ken lusim tingting long mekim ol beten bilong tok tenkyu long em. (Fili. 4:6) Luksave long ol rot Jehova i wok long helpim yu long karim ol hevi, na tok tenkyu long em i sambai long yu. Na no ken larim ol hevi i mekim na yu lusim tingting long ol blesing yu kisim pinis.—Sng. 16:​5, 6.

TOK BILONG GOD

7. Olsem wanem pasin bilong stadi long Baibel i ken helpim yumi long sanap strong?

⁷ Jehova i givim yumi ol tok bilong em long Baibel bilong helpim yumi long sanap strong. I gat planti skripsa long Baibel we i ken helpim yumi long save tru olsem Jehova bai helpim yumi long karim ol hevi. Tingim wanpela eksampel. Matyu 6:8 i tok: “Papa bilong yupela i save long ol samting yupela i nidim paslain long yupela i askim em.” Jisas i mekim ol dispela tok bikos em i save gut tru long Jehova winim olgeta narapela man. Olsem na yumi ken bilip tru olsem taim yumi karim ol hevi, Jehova bai helpim yumi long rot bilong givim yumi ol samting yumi nidim. Baibel i stori long planti gutpela tok promis bilong Jehova, na ol dispela tok promis inap helpim yumi long wok yet long sanap strong na karim ol hevi.—Sng. 94:19.

8. (a) Olsem wanem ol stiatok bilong Baibel inap helpim yumi long sanap strong? Stori long wanpela eksampel. (b) Yumi mas mekim wanem na bai yumi inap tingim ol stiatok bilong Baibel we inap helpim yumi?

⁸ Ol stiatok bilong Baibel i ken helpim yumi long sanap strong na karim ol hevi. Bilong wanem yumi tok olsem? Long wanem, ol i kamapim ol savetingting we inap stiaim yumi long mekim ol gutpela disisen. (Prov. 2:​6, 7) Tingim wanpela eksampel. Baibel i kirapim yumi long tingim ol wari bilong wan wan de na yumi no ken wari long ol samting bai kamap o i no inap kamap long tumora. (Mat. 6:34) Yumi mas i gat pasin bilong ritim Baibel na tingim tingim long bel ol tok bilong en. Long dispela rot, em bai isi moa long yumi tingim ol stiatok bilong Baibel bilong helpim yumi taim yumi laik mekim wanpela disisen o karim wanpela hevi.

9. Olsem wanem ol stori i stap long Baibel inap strongim bilip bilong yumi olsem Jehova bai helpim yumi?

⁹ Baibel i kamapim tu stori bilong ol manmeri em ol i trastim Jehova na kisim helpim long em. (Hib. 11:​32-34; Jems 5:17) Taim yumi tingim tingim long bel ol kain stori olsem, yumi bai strongim bilip bilong yumi olsem Jehova “em i ples hait bilong yumi na em i save strongim yumi. Long taim hevi i painim yumi, em i save redi long helpim yumi.” (Sng. 46:1) Na taim yumi tingim strongpela bilip bilong ol gutpela wokman bilong Jehova long pastaim, dispela bai kirapim yumi long bihainim pasin bilong ol long bilip na sanap strong.—Jems 5:​10, 11.

10. Yu ken mekim wanem bilong kisim gutpela helpim long ol tok bilong Baibel?

¹⁰ Samting yu ken mekim. Ritim Baibel long olgeta de, na wokim lista bilong ol ves em yu pilim olsem ol i bin helpim yu. Planti i luksave olsem wanpela gutpela rot bilong kirapim de em long skelim teks bilong de na bai ol i ken tingim ol gutpela tok bilong Baibel long de olgeta. Wanpela sista em nem bilong em Marie,a em i bin mekim olsem taim papamama bilong em i kisim sik kensa. Wanem samting i helpim em long sanap strong na karim dispela hevi taim em i lukautim ol insait long ol mun paslain long ol i dai? Em i tok: “Long olgeta moning, mi save ritim skripsa teks bilong Skelim Sampela Tok Bilong Baibel Long Olgeta De na bihain mi save tingim tingim long bel ol dispela tok. Oltaim mi mekim olsem, na dispela i helpim mi long tingim Jehova na ol gutpela tok bilong em long Baibel na mi no tingim tumas hevi mi wok long karim.”—Sng. 61:2.

OL WANBILIP

11. Yumi save olsem ol wanbilip bilong yumi tu i sanap strong na karim ol hevi, na dispela i mekim wanem long yumi?

¹¹ Jehova i givim yumi bikpela lain brata Kristen em ol i save helpim yumi long sanap strong. Yumi save olsem ‘ol wanbilip bilong yumi i karim wankain pen na hevi olsem yumi’ na dispela i mekim na yumi no pilim olsem yumi stap wanpis. (1 Pita 5:9) Tru tumas, yumi ken bilip tru olsem maski yumi karim wanem ol hevi, ol wanbilip i bungim ol dispela wankain hevi na ol i sanap strong yet. Olsem na yumi tu i ken mekim olsem!—Apo. 14:22.

12. Ol wanbilip i ken mekim wanem bilong helpim yumi, na hau yumi tu i ken helpim ol? (2 Korin 1:​3, 4)

¹² Ol wanbilip i ken helpim yumi long sanap strong yet na karim ol hevi. Dispela samting i bin kamap long aposel Pol. Long ol pas em i raitim, em i kolim nem bilong sampela wanbilip na em i tok tenkyu long ol i bin helpim em taim em i kalabus long haus. Ol i mekim isi bel bilong Pol, strongim em, na helpim em. (Fili. 2:​25, 29, 30; Kol. 4:​10, 11) Long nau, wankain samting inap kamap long yumi. Ol bratasista i save redi long helpim yumi taim yumi nidim helpim long sanap strong na karim ol hevi. Na taim ol i nidim helpim, yumi tu i redi long helpim ol.—Ritim 2 Korin 1:​3, 4.

13. Wanem samting i helpim Maya long sanap strong?

¹³ Ol bratasista i bin strongim tru wanpela sista long Rasia, nem bilong em Maya. Long 2020, ol polis i go painim ol samting long haus bilong em, na bihain ol i kotim em bikos em i autim bilip bilong em long ol narapela. Maya i tok: “Long dispela taim mi wari na tingting planti na strong bilong mi i pinis olgeta, tasol ol bratasista i ringim mi, salim ol pas long mi, na ol i tokim mi olsem ol i laikim mi. Mi save olsem mi gat bikpela lain famili em ol i laikim mi tru. Tasol kirap long 2020 na i kam, mi luksave tru long dispela.”

14. Yumi ken mekim wanem bilong kisim helpim long ol bratasista taim yumi wok long sanap strong na karim ol hevi? (Lukim tu piksa.)

¹⁴ Samting yu ken mekim. Pas gut wantaim ol bratasista Kristen bilong yu taim yu wok long sanap strong na karim ol hevi. No ken surik long askim ol elda long helpim yu. Ol inap stap olsem “ples hait long win, olsem ples bilong haitim man long bikpela win na ren.” (Ais. 32:2) Tingim tu olsem ol wanbilip Kristen bilong yu, ol tu i wok long sanap strong na karim ol hevi. Taim yu mekim gutpela pasin na helpim wanpela i nidim helpim, dispela bai helpim yu long holim yet stretpela tingting na stap amamas taim yu karim ol hevi i painim yu.—Apo. 20:35.

OL SAMTING YUMI BILIP NA WET LONG EN

15. (a) Olsem wanem pasin bilong bilip na wet i bin helpim Jisas? (b) Olsem wanem pasin bilong bilip na wet i helpim yumi? (Hibru 12:2)

¹⁵ Ol samting yumi bilip na wet long en em Jehova i tok promis long kamapim bihain i helpim yumi long sanap strong na karim ol hevi i go inap long pinis i kamap. (Rom 15:13) Tingim olsem wanem pasin bilong bilip na wetim ol gutpela samting bai kamap bihain i bin helpim Jisas long sanap strong na karim bikpela pen na hevi taim ol i kilim em i dai. (Ritim Hibru 12:2.) Jisas i save olsem pasin bilong em long stap gut long God bai helpim wok bilong stretim bek gutnem bilong Jehova. Na tu, Jisas i amamas olsem em bai go bek long Papa bilong em na bihain mekim wok king na pris long Kingdom long heven wantaim ol Kristen God i bin anointim. Olsem tasol, yumi bilip na wet long stap laip oltaim long nupela taim God bai kamapim bihain. Dispela i helpim yumi long sanap strong long nau na karim ol hevi long dispela graun em Satan i bosim.

16. (a) Olsem wanem pasin bilong bilip na wet i helpim wanpela sista long sanap strong? (b) Yu kisim wanem skul long ol tok em dispela sista i mekim?

¹⁶ Lukim olsem wanem pasin bilong bilip na wet long nupela taim bai kamap i helpim Alla, em wanpela sista long Rasia. Ol polis i bin arestim man bilong em na kalabusim em na em i wetim kot. Taim dispela samting i kamap, Alla i tok: “Mi save beten na tingim ol gutpela samting bai kamap bihain na dispela i mekim na mi no bel hevi tumas. Mi save olsem ol hevi bai pinis. Jehova bai winim pait, na yumi tu bai mekim olsem.”

17. Hau yumi ken soim olsem yumi amamas long ol samting yumi bilip na wet long en? (Lukim tu piksa.)

¹⁷ Samting yu ken mekim. Lusim sampela haptaim long tingim gutpela sindaun em Jehova i tok promis long kamapim long bihain. Lukim yu yet long nupela taim God bai kamapim na piksaim long tingting ol blesing yumi bai kisim. Taim yumi mekim olsem, yumi bai pilim olsem ol hevi yumi karim long nau, “ol i bilong sotpela taim na ol i no bikpela tumas.” (2 Kor. 4:17) Na tu, tokim ol narapela long ol samting yu bilip na wet long en. Traim long tingim laip bilong ol man em ol i no lotuim Jehova i olsem wanem long nau. Ol i no save long samting God i tingting pinis long mekim long bihain, olsem na ol i pilim hatwok tru long karim ol hevi bilong nau. Yu ken stori liklik wantaim ol na helpim ol long kisim save long ol gutpela samting Kingdom bai kamapim bihain.

18. Wai na yumi ken trastim ol tok promis bilong Jehova?

¹⁸ Jop i sanap strong na karim planti hevi, na bihain long dispela em i tokim Jehova olsem: “Nau mi save olsem yu tasol inap mekim olgeta samting na taim yu laik mekim wanpela samting, i no gat wanpela inap pasim yu.” (Jop 42:2) Jop i kisim skul olsem i no gat wanpela samting inap pasim Jehova long mekim samting em i tingting pinis long mekim. Dispela save i strongim yumi long wok yet long sanap strong na karim hevi. Tingim dispela tok piksa: Piksaim olsem wanpela sikmeri i bel hevi tru bikos em i bin lukim planti dokta, tasol ol i no inap long oraitim sik bilong em. Tasol bihain wanpela dokta i gat ekspiriens na ol narapela i trastim em, em i painimaut long sik bilong dispela meri na em i tokim em long medikal tritmen em bai givim bilong oraitim sik bilong em. Nau dispela meri i kisim bel isi, maski em i mas wet inap sampela haptaim bilong kamap orait. Em i save olsem em bai kamap orait na dispela i mekim na em inap sanap strong na karim dispela hevi. Olsem tasol, yumi bilip na wet olsem Paradais bai kamap long bihain na dispela i helpim yumi long sanap strong yet na karim ol hevi long nau.

19. Yumi mas mekim wanem na bai yumi ken sanap strong?

¹⁹ Olsem yumi stori pinis, Jehova i save helpim yumi long sanap strong na karim ol hevi long rot bilong beten, ol tok bilong em long Baibel, ol wanbilip bilong yumi, na ol samting yumi bilip na wet long en. Sapos yumi kisim helpim long ol dispela fopela rot, Jehova bai helpim yumi long karim olgeta hevi i painim yumi long nau na i go inap long dispela taim we olgeta hevi long graun bilong Satan bai pinis olgeta.—Fili. 4:13.