Rot Bilong Mekim Beten Bilong Yu i Kamap Gutpela Moa

1-2. (a) Wanem samting inap pasim yumi long kamapim bel na tingting bilong yumi long Jehova long beten? (b) Olsem wanem yumi ken save olsem Jehova i save amamas long putim yau long ol beten bilong yumi?

SAMPELA taim yu save pilim olsem yu kolim ol wankain tok planti taim long beten, kolim nating ol tok, o yu bihainim nating tasol wanpela pasin bilong beten? Sapos olsem, orait i no yu wanpela i pilim olsem. I gat planti samting inap kamap long laip na sampela taim dispela inap mekim na yumi hariap long beten. O yumi inap pilim hatwok long kamapim bel na tingting bilong yumi long Jehova long beten bikos yumi pilim olsem yumi no gutpela inap long toktok wantaim em.

² Baibel i tokim yumi olsem bikpela samting long Jehova, em taim yumi bihainim pasin daun na beten long em, i no long taim yumi kolim olkain tok bilong bilasim beten bilong yumi. Em i save “harim singaut bilong ol man i gat pasin daun.” (Sng. 10:17) So em i save putim yau long olgeta tok yumi kolim long beten bilong yumi bikos em i tingim tru yumi wan wan.—Sng. 139:​1-3.

3. Bai yumi skelim wanem ol askim long dispela atikol?

³ Long dispela atikol, yumi bai stori long ol dispela askim: Wai na yumi no ken larim wanpela samting i pasim yumi long beten? Olsem wanem yumi ken mekim ol beten bilong yumi i kamap gutpela moa? Olsem wanem pasin bilong tingim ol gutpela beten long Baibel i ken helpim yumi long mekim beten bilong yumi i kamap gutpela moa? Na yumi ken mekim wanem taim yumi pilim hatwok long kolim ol samting yumi pilim long bel taim yumi beten? Yumi ken skelim ol bekim bilong ol dispela askim.

NO KEN LARIM WANPELA SAMTING I PASIM YU LONG BETEN

4. Yumi ken mekim wanem na bai yumi no larim wanpela samting i pasim yumi long beten long Jehova? (Buk Song 119:145)

⁴ Taim yumi kliagut olsem Jehova em wanpela gutpela pren husat i laik helpim yumi, yumi bai luksave olsem yumi inap toktok wantaim em long beten na yumi no larim wanpela samting i pasim yumi. Man bilong raitim Buk Song 119 i laik i gat kain pasin pren wantaim Jehova. I gat planti hevi i bin painim em long laip bilong em. Na ol man bilong giaman i bin rongim em. (Sng. 119:​23, 69, 78) Na tu, em i mas karim hevi long sampela pasin kranki bilong em yet. (Sng. 119:5) Maski i olsem, em i no pret long kamapim bel na tingting bilong em long Jehova long rot bilong beten.—Ritim Buk Song 119:145.

5. Wai na yumi no ken larim tingting kranki i pasim yumi long beten? Stori long tok piksa.

⁵ Jehova i tokim yumi olgeta, na dispela i makim tu ol man i bin mekim ol bikpela sin long beten long em. (Ais. 55:​6, 7) So yumi no ken larim ol tingting kranki i pasim yumi long beten long em. Tingim dispela tok piksa: Wanpela pailot bilong balus i save olsem em i mas toktok wantaim ol trafik kontrola long ples balus taim em i nidim helpim. Yu ting em bai surik long toktok wantaim ol bikos em i sem long em i paul o long em i mekim popaia? Nogat, dispela inap kamapim bikpela hevi tru! Olsem tasol, taim yumi pilim olsem yumi no save long wanem samting long mekim o taim yumi mekim sin, yumi mas beten long Jehova.—Sng. 119:​25, 176.

MEKIM OL BETEN BILONG YU I KAMAP GUTPELA MOA

6-7. Taim yumi tingim ol pasin bilong Jehova, olsem wanem dispela inap helpim yumi long mekim ol beten bilong yumi i kamap gutpela moa? Stori long wanpela eksampel.(Lukim tu futnot.)

⁶ Taim yumi beten long Jehova na kamapim tru ol samting i stap long bel na tingting bilong yumi long em, dispela bai mekim beten bilong yumi i kamap gutpela moa. So yumi ken mekim wanem na bai beten bilong yumi i kamap olsem?

⁷ Tingim ol gutpela pasin bilong Jehova.a Taim yumi lusim bikpela haptaim moa long tingim ol pasin bilong Jehova, dispela bai mekim na em bai isi moa long yumi kamapim tingting bilong yumi long em. (Sng. 145:​8, 9, 18) Tingim stori bilong wanpela sista nem bilong em Kristine, papa bilong em i gat pasin bilong pait. Em i tok: “I hatwok long mi toktok long Jehova olsem wanpela Papa. Mi pilim olsem ol pasin kranki bilong mi bai mekim na em bai givim baksait long mi.” Wanem pasin bilong Jehova i bin helpim Kristine? Em i tok: “Gutpela pasin laikim bilong Jehova i mekim mi pilim olsem em i laikim mi. Mi save olsem em bai i no inap lusim han bilong mi. Maski mi pundaun, kwiktaim em bai helpim mi long kirap gen. Dispela i helpim mi long kamapim ol amamas mi pilim long bel, na tu, long kamapim ol bel hevi bilong mi long em.”

8-9. Pasin bilong tingim ol tok yu bai mekim paslain long yu beten, dispela bai helpim yu olsem wanem? Stori long tok piksa.

⁸ Tingim ol samting yu bai beten long en. Paslain long yu beten, i gutpela yu givim ol dispela askim long yu yet. Olsem: ‘Mi wok long karim wanem hevi long nau? I gat wanpela em mi mas fogivim em? I gat sampela samting i senis long laip bilong mi na mi nidim helpim bilong Jehova long en?’ (2 Kin. 19:​15-19) Yumi ken bihainim tu pasin bilong Jisas long beten long rot bilong tingim ol samting yumi ken beten askim Jehova long en olsem nem bilong Em, Kingdom bilong Em, na laik bilong Em.—Mat. 6:​9, 10.

⁹ Wanpela sista nem bilong em Aliska, taim em i kisim save olsem man bilong em i gat sik kensa bilong kru, em i pilim hatwok tru long beten. Em i tok: “Mi bel hevi tru na mi pilim hatwok long tingting klia na mekim beten.” Wanem samting i helpim em? Em i tok: “Mi lusim sampela haptaim long skelim gut tingting na tingim ol samting mi laik beten long en, na dispela i helpim mi na mi no beten tasol long mi yet na sik bilong man bilong mi. Dispela pasin i helpim mi long stap bel isi na holim stretpela tingting taim mi beten.”

10. Bilong wanem yumi mas lusim haptaim long beten na yumi no ken hariapim? (Lukim tu ol piksa.)

¹⁰ Lusim haptaim long beten na no ken hariapim. Sampela taim yumi inap beten sotpela taim tasol na kamapim ol samting yumi pilim long bel, tasol yumi inap kamapim olgeta samting yumi pilim long bel sapos yumi lusim sampela haptaim long beten longpela taim na yumi no hariapim.b Man bilong Aliska em Elijah, em i tok: “Mi traim long beten planti taim long wanpela de, na mi pas gut moa wantaim Jehova taim mi lusim haptaim long beten na mi no hariapim. Jehova i no wetim mi long pinisim hariap beten bilong mi, so mi ken lusim sampela haptaim long beten na mi no hariapim.” Traim mekim dispela, painim wanpela taim na ples we yu ken beten, yu ken kolim strong ol tok long beten, na no ken larim ol samting i pulim nabaut tingting bilong yu, na beten longpela taim na no ken hariapim.

TINGIM OL GUTPELA BETEN I STAP LONG BAIBEL

11. Taim yumi tingim ol gutpela beten i stap long Baibel, olsem wanem dispela inap helpim yumi? (Lukim tu blok “Yu Pilim Wankain Olsem Ol?”)

¹¹ Yu inap kisim gutpela helpim taim yu skelim ol gutpela beten na ol song i stap long Baibel. Taim yu skelim hau ol gutpela wokman bilong God i bin kamapim tingting bilong ol long God, dispela inap helpim yu tu long kamapim bel na tingting bilong yu long Jehova. Na tu, yu inap kisim save long ol nupela tok bilong preisim God em yu ken kolim long beten bilong yu. Na ating yu inap painim ol beten long Baibel we i stret long sindaun bilong yu tu.

12. Yumi inap mekim wanem ol askim taim yumi tingim ol tok bilong wanpela beten i stap long Baibel?

¹² Taim yu tingim ol tok bilong wanpela beten i stap long Baibel, askim yu yet: ‘Husat i mekim ol dispela tok, na wai na em i beten olsem? Mi holim wankain tingting olsem ol tok i stap long dispela beten? Mi inap kisim wanem skul long dispela beten?’ Ating yu mas mekim sampela moa wok painimaut bilong kisim bekim bilong ol dispela askim, tasol hatwok bilong yu bai i no inap lus nating. Skelim sampela eksampel.

13. Yumi inap kisim wanem wanpela skul long beten bilong Hana? (1 Samuel 1:​10, 11) (Lukim tu piksa.)

¹³ Ritim 1 Samuel 1:​10, 11. Taim Hana i mekim dispela beten, em i wok long karim tupela bikpela hevi. Em i no inap long karim pikinini, na narapela meri bilong man bilong em i wok long tok bilas long em na mekim laip bilong em i hatwok moa. (1 Sml. 1:​4-7) Sapos yu wok long karim wanpela hevi i no pinis hariap, yu inap kisim wanem skul long beten bilong Hana? Hana i kisim bel isi taim em i beten longpela taim na kamapim olgeta bel hevi bilong em long God. (1 Sml. 1:​12, 18) Yumi tu i ken kisim bel isi taim yumi putim olgeta hevi bilong yumi long han bilong Jehova long rot bilong tokim em long ol samting yumi pilim long wanpela hevi i wok long painim yumi.—Sng. 55:22.

14. (a) Yumi inap kisim wanem narapela skul long stori bilong Hana? (b) Taim yumi tingim tingim long bel ol tok bilong Baibel, olsem wanem dispela inap mekim ol beten bilong yumi i kamap gutpela moa? (Lukim futnot.)

¹⁴ Sampela yia bihain long Hana i karim pikinini man bilong em Samuel, em i kisim Samuel i go lusim em wantaim Hetpris Eli. (1 Sml. 1:​24-28) Long wanpela beten em i pilim tru long bel, em i kamapim bilip bilong em long pasin bilong Jehova long lukautim na tingim tru ol gutpela wokman bilong em.c (1 Sml. 2:​1, 8, 9) Maski ol hevi bilong Hana long haus i no pinis, em i putim tingting olgeta long hau Jehova i blesim em. Yumi inap kisim wanem skul long stori bilong em? Yumi inap sanap strong na karim wanpela hevi i stap longpela taim sapos yumi putim tingting olgeta long hau Jehova i wok long sapotim yumi i kam inap long nau.

15. Yumi inap kisim wanem skul long beten bilong profet Jeremaia taim wanpela i mekim pasin i no stret long yumi? (Jeremaia 12:1)

¹⁵ Ritim Jeremaia 12:1. Wanpela taim long laip bilong Jeremaia, em i bin bel hevi tru long lukim ol man nogut i stap amamas na i no gat hevi long laip bilong ol. Na tu em i bel hevi long pasin em ol wanlain Israel i mekim long em. (Jer. 20:​7, 8) Yumi tu i save pilim olsem taim yumi lukim ol man bilong mekim pasin giaman i stap gut o taim ol man i tok bilas long yumi. Maski Jeremaia i kamapim bel hevi bilong em long God, em i no sutim tok long God olsem God i save mekim pasin i no stret, nogat. Taim em i lukim Jehova i givim strafe long ol manmeri i bikhet, dispela i strongim pasin bilong em long trastim stretpela pasin bilong God. (Jer. 32:19) Yumi tu i ken kamapim bel hevi bilong yumi long God long rot bilong beten, na bilip tru olsem Jehova bai stretim ol pasin i no stret yumi lukim long nau long taim stret bilong en.

16. Sapos sindaun bilong yumi i pasim yumi long mekim bikpela wok moa, yumi inap kisim wanem skul long wanpela Livai husat i bin stap kalabus? (Buk Song 42:​1-4) (Lukim tu ol piksa.)

¹⁶ Ritim Buk Song 42:1-4. Wanpela Livai husat i bin stap kalabus na em i no gat rot bilong bung wantaim ol wanbilip bilong em i bin raitim dispela song. Long dispela song, em i kolim ol samting em i pilim long bel. Na ating yumi inap pilim wankain olsem em sapos yumi kalabus long haus o ol i kalabusim yumi bikos long ol bilip bilong yumi. Ol samting yumi pilim long bel inap senis senis, tasol yumi ken tokim God long olgeta dispela samting long rot bilong beten. Dispela inap helpim yumi long skelim gen ol tingting bilong yumi na holim stretpela tingting. Olsem, dispela Livai i luksave olsem i gat ol narapela rot we em inap preisim Jehova. (Sng. 42:5) Na tu, em i tingim tingim long bel hau Jehova i lukautim em. (Sng. 42:8) So pasin bilong beten strong long God inap helpim yumi long skelim gen ol samting yumi pilim long bel, holim stretpela tingting, na sanap strong na karim ol hevi.

17. (a) Yumi inap lainim wanem samting long beten bilong profet Jona? (Jona 2:​1, 2) (b) Olsem wanem sampela tok bilong Buk Song inap helpim yumi taim yumi karim hevi? (Lukim tu futnot.)

¹⁷ Ritim Jona 2:​1, 2. Profet Jona i bin mekim dispela beten taim em i stap long bel bilong bikpela pis. Maski em i bin sakim tok bilong Jehova, em i bilip tru olsem God bai harim beten bilong em. Jona i kolim planti tok i kam long Buk Song long beten bilong em.d I luk olsem em i kliagut long ol dispela tok. So em i wok long tingim ol dispela tok, na em i bilip tru olsem Jehova bai helpim em. Olsem tasol, taim yumi traim long holim sampela ves bilong Baibel long tingting, yumi inap tingim ol dispela tok na dispela inap givim bel isi long yumi taim yumi beten long Jehova long taim bilong hevi.

WOK YET LONG GO KLOSTU LONG JEHOVA LONG ROT BILONG BETEN

18-19. Sapos yumi pilim hatwok long beten na tokim God long ol samting yumi pilim long bel, olsem wanem tok bilong Rom 8:​26, 27 i ken mekim gut bel bilong yumi? Stori long wanpela eksampel.

¹⁸ Ritim Rom 8:​26, 27. Sampela taim pasin bilong tingting planti inap daunim yumi tru na i hatwok long kamapim bel bilong yumi long God long rot bilong beten. Tasol i gat helpim i stap. Long kain taim olsem, holi spirit bilong God i save “askim” God long helpim yumi. Hau dispela samting i kamap? Long rot bilong holi spirit, Jehova i kirapim ol man bilong raitim Baibel long raitim ol beten em ol i stap long Baibel. Taim yumi hatwok long kamapim klia ol samting yumi pilim long beten, Jehova inap tingim wanpela bilong ol dispela beten olsem askim we yumi laik mekim, na em inap bekim dispela askim bilong yumi.

¹⁹ Dispela tingting i bin helpim wanpela sista long Rasia, nem bilong em Yelena. Polis i arestim em long em i beten na ritim Baibel. Yelena i karim bikpela hevi tru na em i pilim hatwok long beten. Em i tok: “Mi tingim olsem taim bel hevi i daunim mi tru na mi no save long wanem samting bai mi beten long en, i olsem Jehova bai tingim beten bilong wanpela wokman bilong em i stap long Baibel olsem wanpela beten em mi yet i mekim. . . . Dispela tingting i bin mekim gut bel bilong mi taim mi karim bikpela hevi tru.”

20. Yumi ken mekim wanem bilong redim tingting bilong yumi long beten taim yumi stap long presa?

²⁰ Taim yumi stap long presa, em bai hatwok long tingting gut na beten. Bilong redim tingting bilong yumi, yumi ken harim ol odio rekoding bilong ol tok bilong Buk Song. Na tu, yumi ken traim raitim ol samting yumi pilim long bel, olsem King Devit i bin mekim. (Sng. 18, 34, 142, supaskripsen.) Tru tru i no gat wanpela pasin stret yumi mas bihainim bilong redim bel na tingting bilong yumi long beten. (Sng. 141:2) So yu ken bihainim wanem pasin i wok gut long yu.

21. Wai na yumi mas givim bel olgeta long beten?

²¹ Yumi belgut long save olsem Jehova i kliagut long ol samting yumi pilim long bel paslain long yumi mekim wanpela tok. (Sng. 139:4) Maski i olsem, em i amamas long harim yumi kolim ol tok i kamapim bilip bilong yumi. So yumi no ken surik long beten long Papa bilong yumi long heven. Kisim gutpela skul long ol beten em Baibel i stori long en long mekim beten bilong yumi yet i kamap gutpela moa. Na givim bel olgeta long beten. Tokim Jehova long ol samting yu amamas long en na ol samting yu bel hevi long en. Jehova i stap olsem gutpela Pren bilong yu, na oltaim em bai redi long helpim yu!