Yumi Mas Beten Bilong Helpim Ol Narapela

1. Wai na yumi ken tok ol beten bilong yumi em i bikpela samting long Jehova?

BETEN em i wanpela gutpela presen tru. Tingim dispela: Jehova i givim sampela wok long ol ensel long mekim. (Sng. 91:11) Na tu, em i givim ol bikpela wok long Pikinini bilong em long mekim. (Mat. 28:18) Tasol olsem wanem long wok bilong harim ol prea? Dispela em samting Jehova yet i makim long em i mas mekim. Jehova em i “Man Bilong Harim ol prea” na em yet i save putim yau long ol beten bilong yumi wan wan.—Sng. 65:2.

2. Olsem wanem aposel Pol i stap gutpela eksampel long pasin bilong beten bilong helpim ol narapela?

² Em tru olsem yumi ken beten long Jehova na kamapim bel na tingting bilong yumi long em, tasol yumi mas mekim tu ol beten bilong helpim ol narapela. Aposel Pol i bin mekim olsem. Olsem, em i raitim pas i go long kongrigesen long Efesus na em i tok: “Oltaim mi tingim yupela long ol beten bilong mi.” (Efe. 1:16) Pol i bin mekim tu ol beten bilong helpim wan wan Kristen. Olsem, em i tokim Timoti: “Mi tenkyu long God olsem mi no lusim pasin bilong tingim yu taim mi mekim ol prea we mi beten strong long God, na mi mekim olsem long san na long nait.” (2 Tim. 1:3) Pol i gat ol wari bilong em yet na em inap beten long God long ol dispela samting. (2 Kor. 11:23; 12:​7, 8) Maski i olsem, em i lusim haptaim long mekim ol beten bilong helpim ol narapela.

3. Wai na yumi inap lusim tingting long mekim ol beten bilong helpim ol narapela?

³ Ating sampela taim yumi inap lusim tingting long mekim ol beten bilong helpim ol narapela. Wai na yumi inap mekim olsem? Wanpela sista Kristen em nem bilong em Sabrina,a em i luksave long wanpela risen yumi inap mekim olsem. Em i tok: “Laip long nau i pulap long ol hatwok. Yumi inap tingting tasol long ol hevi yumi karim na yumi beten askim God long ol samting yumi nidim na em tasol.” Olsem wanem? Yu luksave olsem yu gat kain pasin olsem? Sapos olsem, orait dispela atikol i ken helpim yu. Em bai (1) stori long wai em i bikpela samting long mekim ol beten bilong helpim ol narapela na (2) stori long hau yu inap mekim olsem.

BILONG WANEM YUMI MAS BETEN BILONG HELPIM OL NARAPELA?

4-5. Olsem wanem ol beten yumi mekim bilong helpim ol narapela “i gat bikpela pawa na i mekim gutpela wok”? (Jems 5:16)

⁴ Ol beten yumi mekim bilong helpim ol narapela “i gat bikpela pawa na i mekim gutpela wok.” (Ritim Jems 5:16.) Taim yumi mekim ol beten bilong helpim ol narapela, yu ting dispela inap mekim sampela samting long laip bilong ol? Yes, dispela inap mekim sampela samting long ol. Jisas i save olsem klostu taim aposel Pita bai givim baksait long em, olsem na em i tok: “Mi beten strong bilong helpim yu bai bilip bilong yu i no ken pundaun.” (Luk 22:32) Pol i save olsem ol beten yumi mekim bilong helpim ol narapela inap mekim sampela samting long laip bilong ol. Taim ol i mekim pasin i no stret long em na kalabusim em long Rom, em i raitim pas i go long Filemon na em i tok: “Mi bilip olsem ol beten bilong yupela bai mekim mi kamap fri bilong helpim yupela.” (File. 22; lukim stadi nout “for I am hoping that through your prayers” long Study Bible.) I no longtaim bihain long dispela, Pol i lusim kalabus na em i kirap gen long autim tok.

⁵ Tasol dispela i no makim olsem taim yumi beten, yumi mas subim Jehova long mekim sampela samting, nogat. Em i luksave olsem yumi tingim tru ol wanbilip bilong yumi, na sampela taim em inap mekim samting em yumi askim em long en. Em as na yumi mas beten strong long Jehova taim wanpela hevi i kamap na lusim long han bilong em, na bilip tru olsem em i save long rot bilong stretim dispela hevi.—Sng. 37:5; lukim 2 Korin 1:11 na ol stadi nout long Study Bible.

6. Taim yumi mekim ol beten bilong helpim ol narapela, dispela inap kirapim yumi long pilim olsem wanem long ol? (1 Pita 3:8)

⁶ Taim yumi mekim ol beten bilong helpim ol narapela, dispela inap kirapim yumi long kisim pasin bilong “sori tru long ol.” (Ritim 1 Pita 3:8.) Pasin bilong sori tru long ol narapela i makim olsem yumi luksave long pen na hevi wanpela i karim na yumi gat laik tru long helpim em. (Mak 1:​40, 41) Wanpela elda em nem bilong em Michael, em i tok: “Taim mi beten askim Jehova long givim helpim long ol narapela long ol samting ol i nidim, dispela i helpim mi long kliagut moa long ol hevi ol i karim na mi kisim pasin bilong laikim tru ol. Mi pilim olsem mi pas gut moa wantaim ol, maski ol i no luksave long dispela.” Narapela elda em nem bilong em Richard, em i stori long narapela gutpela samting i save kamap taim yumi beten bilong helpim ol narapela. Em i tok: “Taim yumi tingim wanpela long beten bilong yumi, dispela bai kirapim yumi long mekim sampela samting bilong helpim em.” Em i tok moa: “Taim yumi helpim wanpela em yumi beten long em, i olsem yumi yet i mekim samting bilong bekim beten em yumi mekim bilong helpim em.”

7. Taim yumi beten long helpim ol narapela, olsem wanem dispela i helpim yumi long holim stretpela tingting long ol hevi bilong yumi yet? (Filipai 2:​3, 4) (Lukim tu ol piksa.)

⁷ Taim yumi beten bilong helpim ol narapela, dispela i helpim yumi long holim stretpela tingting long ol hevi bilong yumi yet. (Ritim Filipai 2:​3, 4.) Yumi stap long graun em Satan i kontrolim, olsem na yumi olgeta wan wan bai karim ol hevi. (1 Jon 5:19; Rev. 12:12) Taim yumi kisim pasin bilong mekim ol beten bilong helpim ol narapela, dispela i helpim yumi long tingim olsem ‘ol wanbilip bilong yumi i stap long olgeta hap bilong graun, ol i karim wankain pen na hevi olsem yumi.’ (1 Pita 5:9) Wanpela painia em nem bilong em Katherine, em i tok: “Taim mi beten bilong helpim ol narapela, dispela i helpim mi long tingim olsem ol narapela tu i karim ol hevi. Na dispela i helpim mi long no ken tingting tumas long ol hevi bilong mi yet.”

BETEN BILONG YUMI BAI HELPIM OL NARAPELA

8. Husat sampela lain em yumi ken tingim ol long ol beten bilong yumi?

⁸ Husat sampela lain em yumi ken tingim ol long ol beten bilong yumi? Sampela lain em yumi ken beten askim Jehova long helpim ol em ol lain i gat hevi bilong helt, ol yangpela long skul em ol wanlain i tok bilas long ol na i laik pulim ol long mekim pasin i no stret, o ol lain em ol i karim hevi bilong i go lapun. Planti wanbilip bilong yumi i karim hevi bilong pasin birua long han bilong ol wanfamili o ol gavman. (Mat. 10:​18, 36; Apo. 12:5) Sampela wanbilip bilong yumi i mas lusim ol haus bilong ol na i go stap long ol narapela hap, long wanem, pait i kamap long ples ol i stap long en. Ol narapela i karim hevi bilong ol netrol disasta. Ating yumi yet i no save long ol dispela bratasista. Tasol taim yumi beten bilong helpim ol, yumi soim olsem yumi bihainim lo Jisas i givim long yumi, em long “laikim narapela narapela.”—Jon 13:34.

9. Wai na yumi mas beten bilong helpim ol brata i go pas long mekim wok long oganaisesen bilong Jehova na ol meri bilong ol tu?

⁹ Yumi ken beten tu bilong helpim ol brata i go pas long mekim wok insait long oganaisesen bilong Jehova. Dispela i makim lain Gavening Bodi na ol helpim bilong ol, ol Brens Komiti, ol ovasia long ol brens ofis, ol wasman sekit, ol elda long kongrigesen, na ol kongrigesen sevan. Planti bilong ol dispela brata i gat ol hevi bilong ol yet, tasol ol i givim bel long mekim ol wok bilong helpim yumi. (2 Kor. 12:15) Olsem, wanpela wasman sekit em nem bilong em Mark, em i tok: “Wanpela bikpela hatwok mi feisim em olsem, mi stap longwe long lapun papamama bilong mi. Tupela wantaim i gat hevi bilong helt. Maski susa bilong mi na man bilong em i lukautim gut tupela, mi save bel hevi olsem mi no inap mekim planti samting moa bilong lukautim tupela.” Maski yumi save long ol hevi ol bratasista i karim o nogat, i gutpela long yumi tingim ol long ol beten bilong yumi. (1 Tes. 5:​12, 13) Na yumi ken beten tu bilong helpim ol meri bilong ol dispela brata em ol i stap gutpela poroman bilong sapotim ol man bilong ol long mekim yet asainmen bilong ol.

10-11. Taim yumi beten bilong helpim olgeta wanbilip bilong yumi, yu ting Jehova i amamas long kain beten olsem? Stori long dispela.

¹⁰ Olsem yumi stori pinis, planti taim yumi save beten bilong helpim olgeta wanbilip bilong yumi. Olsem, ating yumi beten askim Jehova long helpim olgeta wanbilip i stap long kalabus, o long mekim isi bel bilong ol wanbilip em wanpela ol i laikim tumas i dai, tasol yumi no tingim o kolim stret nem bilong wanpela. Wanpela elda em nem bilong em Donald, em i tok: “Planti bratasista Kristen bilong yumi i karim ol hevi, olsem na sampela taim yumi save beten bilong helpim olgeta em ol i save karim ol hevi, na yumi no kolim stret nem bilong wanpela.”

¹¹ Yu ting Jehova i save amamas long ol kain beten olsem? Yes, em i save amamas long ol kain beten olsem! Yumi no save long wanem samting stret em ol wanbilip bilong yumi i nidim helpim long en. Olsem na i stret long yumi mekim ol beten bilong helpim olgeta bratasista bilong yumi. (Jon 17:20; Efe. 6:18) Taim yumi mekim ol kain beten olsem, dispela i soim olsem yumi “laikim tru olgeta wanbilip bilong [yumi].”—1 Pita 2:17.

TAIM YUMI BETEN BILONG HELPIM WANPELA

12. Taim yumi skelim gut ol samting yumi lukim, hau dispela bai helpim yumi long tingim stret wanpela long beten bilong yumi?

¹² Skelim gut ol samting yu lukim. Yumi mas mekim ol beten bilong helpim olgeta bratasista bilong yumi, na tu, i stret long yumi mekim ol beten we yumi kolim stret nem bilong wanpela husat i nidim helpim. Olsem wanem? Wanpela long kongrigesen bilong yu i karim hevi bilong wanpela bikpela sik? Wanpela yangpela long kongrigesen i bel hevi bikos ol wanskul i putim presa long em long mekim pasin i no stret? Wanpela papa o mama wanpis i wok strong long mekim bikpela long ol pikinini bilong em “na trenim ol olsem Jehova i makim, na putim tingting bilong em long bel bilong ol”? (Efe. 6:4) Taim yu skelim gut ol samting yu lukim, dispela bai helpim yu long pilim tru hevi bilong ol narapela, na yu bai laik tru long beten bilong helpim ol.b—Rom 12:15.

13. Olsem wanem yumi ken mekim ol beten bilong helpim ol wanbilip em yumi yet i no save long ol?

¹³ Kolim nem bilong ol narapela long ol beten bilong yumi. Yumi ken mekim olsem maski yumi yet i no bin bungim ol. Olsem, tingim ol bratasista bilong yumi i stap long kalabus long ol kantri olsem Kraimia, Eritrea, Rasia na Singapo. Long jw.org, yu ken painim ol nem bilong ol wanbilip i stap long kalabus.c Wanpela wasman sekit em nem bilong em Brian, em i tok: “Mi luksave olsem taim mi raitim nem bilong ol wanbilip i stap long kalabus na mi kolim ol dispela nem, dispela i helpim mi long tingim ol na kolim nem bilong ol long ol beten bilong mi.”

14-15. Taim yumi beten, olsem wanem yumi ken kolim stret ol samting em ol narapela i nidim helpim long en?

¹⁴ Kolim stret ol samting ol narapela i nidim helpim long en. Michael em yumi stori pinis long em, em i tok: “Taim mi ritim stori bilong ol bratasista long jw.org em ol i stap kalabus, mi traim long tingim hau mi bai pilim sapos mi stap kalabus. Mi save olsem mi bai wari tru long meri bilong mi, na mi bai laik olsem ol narapela i lukautim em na helpim em long ol samting em i nidim. Long dispela rot, taim mi beten bilong helpim ol brata i marit em ol i stap long kalabus, mi save pinis long ol samting mi ken askim Jehova long helpim ol long en.”—Hib. 13:​3, ftn.

¹⁵ Taim yumi tingim ol samting i painim ol wanbilip i stap long kalabus long olgeta wan wan de, dispela bai helpim yumi long tingim ol narapela samting em yumi ken beten stret long en bilong helpim ol. Olsem, yumi ken beten olsem ol gad bilong haus kalabus ken mekim gutpela pasin long ol, na ol man i gat namba bai larim ol wanbilip bilong yumi i stap fri long mekim lotu. (1 Tim. 2:​1, 2) Yumi inap beten tu olsem ol kongrigesen long ol dispela ples i kisim strong taim ol i lukim gutpela eksampel bilong ol bratasista i stap kalabus em ol i holimpas bilip. Na yumi ken beten tu olsem ol lain i no Witnes, ol i ken lukim gutpela pasin bilong ol bratasista bilong yumi i stap long kalabus na dispela bai kirapim ol long putim yau long tok yumi autim. (1 Pita 2:12) Yumi inap mekim wankain samting taim yumi mekim ol beten bilong helpim ol bratasista em ol i sanap strong na karim ol hevi long nau. Taim yumi skelim gut ol samting yumi lukim, kolim nem bilong ol narapela long ol beten bilong yumi, na beten na kolim stret ol samting ol narapela i nidim helpim long en, yumi bai soim olsem yumi “mekim moa yet pasin bilong laikim ol wanbilip.”—1 Tes. 3:12.

HOLIM STRETPELA TINGTING LONG OL BETEN BILONG YUMI

16. Hau yumi ken holim stretpela tingting long ol beten bilong yumi? (Matyu 6:8)

¹⁶ Olsem yumi stori pinis, ol beten yumi mekim inap mekim sampela samting long laip bilong ol narapela. Tasol yumi mas holim stretpela tingting long pasin bilong beten. Taim yumi beten, i no olsem yumi tokim Jehova long samting em i no save long en. Na tu, yumi no ken tokim em long samting em i mas mekim bilong stretim wanpela hevi. Jehova i save pinis long samting ol wokman bilong em i nidim, paslain long yumi yet i save o ol yet i save long dispela. (Ritim Matyu 6:8.) Sapos olsem, orait bilong wanem yumi mas beten bilong helpim ol narapela? Dispela atikol i stori pinis long ol risen yumi mas mekim olsem, na wanpela narapela risen em bikos yumi laik soim olsem yumi tingim ol narapela. Pasin laikim i save kirapim yumi long beten bilong helpim narapela narapela. Na Jehova i save amamas long lukim ol wokman bilong em i kamapim pasin laikim bilong em.

17-18. Ol beten yumi mekim bilong helpim ol wanbilip i kamapim klia wanem samting? Stori long tok piksa.

¹⁷ Yumi save beten bilong helpim ol narapela, tasol sampela taim hevi bilong ol bai stap yet. Maski i olsem, ol beten bilong yumi i kamapim klia olsem yumi laikim tru ol bratasista bilong yumi, na Jehova i luksave long dispela samting. Yumi ken tok piksa olsem: Piksaim long tingting wanpela famili em ol i gat tupela liklik pikinini—wanpela boi na wanpela gel. Dispela liklik boi i sik na em i slip long bet. Na liklik gel i askim papa olsem: “Plis mekim sampela samting long helpim brata bilong mi. Em i sik nogut tru!” Papa i wok long mekim ol samting bilong helpim liklik boi bilong em; em i laikim tru pikinini boi bilong em na em i lukautim em gut. Tasol em i amamas tru olsem liklik gel bilong em i wari na tingim tru brata bilong em na em i askim papa long helpim em.

¹⁸ Dispela em samting Jehova i laik yumi mas mekim—yumi mas tingim tru narapela narapela na beten bilong helpim narapela narapela. Taim yumi mekim olsem, ol beten bilong yumi bai soim klia olsem yumi no tingim yumi yet tasol, nogat. Yumi tingim tru ol narapela na Jehova i luksave long dispela samting. (2 Tes. 1:3; Hib. 6:10) Na tu, olsem yumi stori pinis, sampela taim ol beten yumi mekim inap mekim sampela samting long laip bilong ol narapela. Olsem na em i bikpela samting long yumi mas tingting oltaim long mekim ol beten bilong helpim narapela narapela.