Mekim Ol Beten Bilong Yu i Kamap Gutpela Moa Long Rot Bilong Stadi Long Baibel
“Mi laik bai yu harim dispela prea nau mi mekim.”—NEH. 1:11.
1, 2. Bilong wanem i gutpela long skelim sampela beten i stap long Baibel?
BETEN na stadi long Baibel ol i bikpela hap bilong lotu i tru. (1 Te. 5:17; 2 Ti. 3:16, 17) Tru, Baibel i no wanpela prea buk, tasol insait long en, olsem long Buk Song, i gat planti beten.
2 Taim yu ritim na stadi long Baibel, ating yu bai painim planti beten i stret long yu yet. Taim yu kolim sampela hap bilong ol dispela beten long ol beten bilong yu yet, ol beten bilong yu bai kamap gutpela moa. Yu inap lainim wanem samting long ol manmeri em God i bin harim beten bilong ol na helpim ol, na yu inap lainim wanem samting long ol tok ol i kamapim insait long beten bilong ol?
Askim God Long Stiaim Yu
3, 4. Abraham i givim wanem wok long wokboi bilong em? Ol samting Jehova i mekim long wokboi i lainim yumi long wanem samting?
3 Long stadi yu mekim long Baibel yu kisim save olsem oltaim yu mas beten long God i stiaim yu. Tingim samting i bin kamap taim Abraham i salim wokboi bilong em—ating em Eliesa—i go long Mesopotemia long painim wanpela gutpela meri bilong maritim Aisak. Taim ol meri i wok long kisim wara long hulwara, dispela wokboi i beten: “Bikpela . . . , bai mi tokim wanpela yangpela meri olsem, ‘Plis, yu daunim sospen wara bilong yu na bai mi dring liklik wara.’ Na sapos em i tok, ‘Yu dring, na bai mi givim wara long ol kamel bilong yu tu,’ orait mi laik bai em dispela meri tasol yu makim bilong wokman bilong yu Aisak. Sapos ol samting i kamap olsem, orait bai mi save yu marimari long bikman bilong mi, na yu laik helpim em.”—Stt. 24:12-14.
4 Taim Rebeka i givim wara long ol kamel bilong wokboi bilong Abraham, wokboi i save olsem God i harim pinis beten bilong em. Rebeka i bihainim wokboi i go bek long Kenan na em i kamap meri bilong Aisak. Tru, yu no ken ting olsem God bai givim wanpela mak long yu, tasol em bai stiaim yu long laip bilong yu sapos yu beten na larim spirit bilong em i stiaim yu.—Ga. 5:18.
Beten Inap Daunim Pasin Bilong Tingting Planti
5, 6. Taim Jekop i go bungim Iso, wanem sampela samting long beten bilong em yumi mas tingim?
5 Beten inap daunim pasin bilong tingting planti. Jekop i tingting planti, nogut brata bilong em, Iso, i kilim em i dai, olsem na em i beten: “Bikpela, . . . yu bin marimari long mi na yu bin mekim gut tru long mi. . . . Mi prea long yu, bai yu ken sambai long mi, na bai brata bilong mi, Iso, i no ken i kam pait long mi. Mi pret, nogut em i kam pait long mipela na pinisim mipela olgeta, na ol meri na pikinini wantaim. Bipo yu bin tok olsem, bai yu was gut long mi na bai yu givim planti lain tumbuna pikinini long mi. Na bai ol i kamap bikpela lain tru olsem wesan bilong nambis, na i no gat man inap long kaunim.’ ”—Stt. 32:9-12.
6 Jekop yet i mekim sampela samting bilong daunim pait, na em i save Jehova i bin harim beten bilong em taim em na Iso i kamap wanbel gen. (Stt. 33:1-4) Ritim gut ol tok bilong dispela beten, na yu bai save olsem Jekop i no beten long kisim helpim na em tasol, nogat. Em i mekim tu tok i kamapim bilip bilong em long Pikinini bilong promis na em i tok tenkyu long marimari bilong God. Olsem wanem? Sampela taim ‘bel bilong yu i pret’? (2 Ko. 7:5) Sapos olsem, orait dispela beten bilong Jekop inap kirapim yu long tingim olsem pasin bilong beten inap daunim pasin bilong tingting planti. Tasol yu no ken askim tasol long ol samting, yu mas kamapim tu ol tok i kamapim bilip bilong yu.
Beten Long Kisim Savetingting
7. Bilong wanem Moses i beten askim God long tokim em long tingting bilong Em?
7 Laik bilong yu long mekim ol samting Jehova i laikim, dispela i mas kirapim yu long beten long kisim savetingting. Moses i beten askim God long tokim em long tingting bilong Em. Em i tok: “Yu bin tokim mi long bringim ol dispela manmeri i go [lusim Isip] . . . Sapos yu laikim mi, orait mi laik yu tokim mi long tingting bilong yu na bai . . . oltaim mi ken mekim pasin yu save laikim.” (Kis. 33:12, 13) God i harim na i tokim Moses long tingting bilong Em—em samting Moses i mas save gut long en bambai em inap lukautim lain bilong Jehova.
8. Olsem wanem tok bilong 1 King 3:7-14 inap helpim yu?
8 Devit tu i beten: “God, yu mas skulim mi long gutpela pasin bilong yu.” (Sng. 25:4) Solomon, pikinini man bilong Devit, i beten askim God long givim em savetingting na bai em inap mekim wok olsem king long Israel. Jehova i amamas long dispela beten na em i givim Solomon savetingting, na planti mani kago na biknem tu. (Ritim 1 King 3:7-14.) Sapos yu kisim wanpela wok insait long kongrigesen yu ting i hatwok tumas, orait beten askim God long givim yu savetingting, na yu mas bihainim pasin daun. Sapos yu mekim olsem, God bai helpim yu long kisim save na helpim yu long bihainim savetingting bambai yu inap long mekim ol wok bilong yu long pasin i stret na long pasin laikim.
Mekim Ol Beten Yu Pilim Tru Long Bel
9, 10. Beten Solomon i mekim long taim ol i dediketim tempel, i kamapim wanem bikpela samting bilong beten?
9 Bilong Jehova i ken harim beten bilong yumi, yumi mas mekim long pasin i makim olsem yumi pilim tru long bel. Long 1 King sapta 8, Solomon i mekim kain beten olsem, long ai bilong ol man i bung long Jerusalem long taim ol i dediketim tempel bilong Jehova long 1026 B.C.E. Taim ol i putim pinis Bokis Kontrak long Rum Tambu Tru na klaut bilong Jehova i pulapim tempel, Solomon i litimapim nem bilong God.
10 Skelim gut dispela beten, na lukim ol tok i makim bel na tingting bilong man. Solomon i tok Jehova tasol i save long tingting bilong man. (1 Kin. 8:38, 39) Long dispela wankain beten, em i tok, sapos man i “tingting long [God] tasol na tanim bel tru,” Jehova bai marimari long em. Sapos lain bilong God i stap long han bilong ol birua na ol i tingting long God tasol na beten, God bai harim. (1 Kin. 8:47-49, 58, 61) Tru tumas, yumi mas mekim ol beten em yumi pilim tru long bel.
Ol Song Inap Helpim Beten Bilong Yu i Kamap Gutpela Moa
11, 12. Yu lainim wanem samting long beten bilong wanpela Livai husat i no inap go long haus bilong God inap sampela yia?
11 Sapos yu skelim ol tok i stap long Buk Song, dispela bai helpim ol beten bilong yu i kamap gutpela moa na em bai strongim yu long wetim God i helpim yu. Tingim pasin bilong wanpela Livai i stap kalabus longwe long ples bilong em. Em i stap isi na wetim God i helpim em. Maski inap sampela yia em i no inap go long haus bilong Jehova, em i tok: “Bilong wanem mi bel hevi oltaim? Bilong wanem bel bilong mi i kirap nogut? Mi mas bilip long God na wetim em i helpim mi. Em i God bilong mi na em i save helpim mi. Olsem na bai mi litimapim nem bilong en gen.”—Sng. 42:5, 11; 43:5.
12 Yu kisim wanem skul long dispela Livai? Sapos bilip bilong yu i as na yu stap long kalabus na inap sampela mun o yia yu no inap bung wantaim ol wanbilip long ples lotu bilong ol, orait yu mas stap isi na wet long God i helpim yu. (Sng. 37:5) Tingim ol amamas yu bin kisim bipo taim yu mekim wok bilong God, na beten askim God long helpim yu long sanap strong taim yu “wetim” em i opim rot long yu ken bung gen wantaim lain bilong em.
Bilip Tru na Beten
13. Olsem Jems 1:5-8 i tok, bilong wanem yu mas bilip tru na beten?
13 Maski wanem hevi i painim yu, oltaim bilip tru na beten. Sapos wanpela samting i traim bilip bilong yu, bihainim skultok bilong Jems. Beten long Jehova, na bilip tru olsem em inap givim yu savetingting na bai yu inap sanap strong na karim hevi. (Ritim Jems 1:5-8.) God i save long ol hevi i painim yu, na long rot bilong spirit bilong em, em inap stiaim yu na mekim gut bel bilong yu. Yu “no ken holim tupela tingting,” yu mas bilip tru na kamapim olgeta tingting i stap long bel bilong yu, na larim holi spirit na ol skultok bilong God i stap long Baibel i stiaim yu.
14, 15. Olsem wanem yumi ken tok olsem Hana i bilip tru na beten?
14 Hana, wanpela bilong tupela meri bilong Elkana bilong lain Livai, em i bilip tru na beten. Penina, narapela meri bilong Elkana, husat i karim pinis sampela pikinini, em i save tok bilas long Hana husat i no karim yet pikinini. Long haus lotu sel, Hana i tok promis olsem sapos em i karim wanpela pikinini man, em bai givim dispela pikinini long Jehova. Taim em i beten, maus bilong em i meknais, olsem na Hetpris Eli i ting em i spak. Taim Eli i kisim save olsem em i no spak, em i tok: “God bilong yumi Israel i ken givim yu dispela samting yu bin askim em.” Maski Hana i no save wanem samting tru bai kamap, em i bilip tru olsem God bai harim beten bilong em. Olsem na “bihain em i no moa bel hevi.”—1 Sml. 1:9-18.
15 Taim Samuel i bon pinis na i lusim susu, Hana i givim em long Jehova long mekim wok long haus lotu. (1 Sml. 1:19-28) Sapos yu tingim tingim long bel ol tok bilong dispela beten, ating dispela bai helpim ol beten bilong yu i kamap gutpela moa na yu bai save olsem sapos yu bel hevi long wanpela samting, yu inap daunim dispela bel hevi sapos yu beten na bilip tru olsem Jehova bai harim.—1 Sml. 2:1-10.
16, 17. Wanem samting i kamap, long wanem, Nehemia i bilip tru na beten?
16 Stretpela man Nehemia, em i bin stap 400 yia samting paslain long Krais, em i bilip tru na beten. Em i prea olsem: “Mi laik bai yu harim dispela prea nau mi mekim. Na taim mi go lukim king, orait yu ken mekim king i sori long mi na em i ken helpim mi.” Dispela “king” em husat? Em King Artaserksis bilong Persia, na Nehemia i save lukautim wain bilong em.—Neh. 1:11.
17 Nehemia i bilip tru na inap sampela de em i wok long beten taim em i kisim save olsem ol lain haiden “i wok long rabisim” ol Juda husat i bin lusim Babilon; na “banis bilong Jerusalem i bagarap i stap olsem yet.” (Neh. 1:3, 4) God i harim beten bilong Nehemia. King Artaserksis i larim em i go long Jerusalem na wokim gen banis bilong en. (Neh. 2:1-8) Insait long sotpela taim tasol, banis i sanap pinis. God i bin harim ol beten bilong Nehemia, long wanem, lotu i tru i bin stap nambawan samting long ol dispela beten na Nehemia i bilip tru. Olsem wanem? Yu save mekim ol kain beten olsem?
Givim Biknem na Tok Tenkyu
18, 19. I gat wanem ol as na ol wokboi bilong Jehova i mas givim biknem na tok tenkyu long em?
18 Taim yu beten yu mas givim biknem long Jehova na tok tenkyu long em. I gat planti as na yu mas mekim olsem! Devit i amamas long litimapim wok king bilong Jehova. (Ritim Song 145:10-13.) Olsem wanem? Ol beten bilong yu i kamapim olsem yu pilim tru gutpela wok yu holim long tokaut long Kingdom Bilong Jehova? Ol tok bilong ol man i raitim ol song inap helpim yu tu long tokim God olsem yu tenkyu tru long ol miting Kristen na ol kibung.—Sng. 27:4; 122:1.
19 Taim yu gat pasin bilong tenkyu tru long yu pas gut wantaim God, dispela inap kirapim yu long beten olsem: “Bikpela, bai mi tenkyu long yu namel long ol arapela lain. . . . Yu save laikim mipela moa yet. Sapos mipela i laik makim dispela, bai mak i go inap long skai. Oltaim yu save bihainim gutpela tok bilong yu. Sapos mipela inap kaunim olgeta taim yu bin mekim gut long mipela, bai mak i go antap inap long ol klaut. God, mi laik bai ol manmeri i litimapim nem bilong yu antap tru.” (Sng. 57:9-11) Em gutpela tok tru! Kain tok olsem i kam long ol Song em inap helpim ol beten bilong yu i kamap gutpela moa.
Beten Long Pasin i Soim Bikpela Rispek
20. Maria i tok wanem bilong kamapim pasin bilong em long givim bel tru long God?
20 Ol beten bilong yu i mas kamapim olsem yu gat bikpela rispek long God. Ol tok Maria i kamapim taim em i save olsem em bai kamap mama bilong Mesaia, ol i wankain long tok Hana i mekim taim em i givim yangpela Samuel long mekim wok long haus lotu. Maria i gat bikpela rispek long God, na dispela i kamap ples klia long dispela tok bilong em: “Bel bilong mi em i litimapim nem bilong Bikpela. Na spirit bilong mi em i amamas long God, em i Helpim bilong mi na em i save mekim mi i stap gut tru.” (Lu. 1:46, 47) Olsem wanem? Yu inap kamapim kain tok olsem bilong mekim ol beten bilong yu i kamap gutpela moa? Maria i daun long God, olsem na God i makim Maria long kamap mama bilong Mesaia!
21. Olsem wanem ol beten bilong Jisas i kamapim olsem em i bilip tru na em i gat bikpela rispek long God?
21 Jisas i bilip tru na beten long pasin i soim rispek. Paslain long em i kirapim bek Lasarus, “Jisas i lukluk i go antap na em i tok olsem, ‘Papa, mi tenkyu long yu, long wanem, yu harim pinis beten bilong mi. Mi save pinis oltaim yu save harim beten bilong mi.’ ” (Jo. 11:41, 42) Olsem wanem? Ol beten bilong yu i kamapim olsem yu bilip tru na yu gat bikpela rispek long God? Skelim dispela beten Papa Bilong Mipela em Jisas i mekim, na yu bai save olsem Jisas i beten long nem bilong Jehova i ken i stap holi, Kingdom bilong em i mas i kam, na laik bilong em i mas kamap. (Mt. 6:9, 10) Tingim ol beten bilong yu yet. Ol i kamapim olsem yu tingim Kingdom Bilong Jehova, pasin bilong bihainim laik bilong em, na nem bilong em i mas i stap holi? Ol i mas kamapim ol dispela samting.
22. Olsem wanem yumi ken save olsem Jehova bai strongim yumi long autim gutnius na yumi no ken pret?
22 Sampela taim pasin birua i mekim na yumi beten askim Jehova long strongim bel bilong yumi na bai yumi inap mekim wok bilong em na no ken pret. Taim Sanhedrin i tambuim Pita na Jon long “no ken mekim wanpela tok moa long nem bilong Jisas,” tupela i tokaut olsem ol i no inap pasim maus. (Ap. 4:18-20) Taim Sanhedrin i lusim tupela i go, tupela i tokim ol wanbilip long samting i bin kamap. Orait nau olgeta i beten askim God long helpim ol long autim tok bilong em na no ken pret. God i harim beten bilong ol na ‘holi spirit i pulap long ol na ol i autim tok bilong God na ol i no pret.’ (Ritim Aposel 4:24-31.) Dispela i mekim na planti manmeri i kamap man i lotuim Jehova. Pasin bilong beten inap strongim yu tu long autim gutnius na no ken pret.
Wok Yet Long Mekim Ol Beten Bilong Yu i Kamap Gutpela Moa
23, 24. (a) Kamapim sampela eksampel bilong soim olsem pasin bilong stadi long Baibel inap mekim ol beten bilong yu i kamap gutpela moa. (b) Yu bai mekim wanem bilong mekim ol beten bilong yu i kamap gutpela moa?
23 I gat planti eksampel moa em ol i soim olsem pasin bilong ritim na stadi long Baibel inap helpim ol beten bilong yu i kamap gutpela moa. Olsem Jona i bin mekim, yu ken beten: “Bikpela, yu wanpela tasol yu save kisim bek mipela, na mipela i stap laip.” (Jna. 2:1-10) Sapos yu bel hevi na tingting planti long wanpela bikpela rong yu bin mekim na yu bin askim ol elda long helpim yu, ol tok Devit i kolim long ol song bilong em inap helpim yu long kolim sampela tok long beten bilong yu yet bilong kamapim olsem yu tanim bel tru. (Sng. 51:1-12) Long sampela beten, yu ken litimapim nem bilong Jehova olsem Jeremaia i bin mekim. (Jer. 32:16-19) Sapos yu laik painim wanpela poroman bilong maritim, pasin bilong skelim beten i stap long Esra sapta 9, wantaim beten bilong yu yet, inap strongim yu long bihainim yet tok bilong God na “maritim man i bilip long Bikpela.”—1 Ko. 7:39; Esr. 9:6, 10-15.
24 Wok yet long ritim na stadi long Baibel. Wok long painim ol tok em yu ken kamapim long ol beten bilong yu yet—ol beten we yu askim God long helpim yu, na ol beten we yu givim biknem long God na tok tenkyu long em. Bai yu go klostu moa long God Jehova taim ol beten bilong yu i kamap gutpela moa long rot bilong stadi long Baibel.
Bai Yu Bekim Olsem Wanem?
• I gat wanem as na yumi mas askim God long stiaim yumi?
• Wanem samting i mas kirapim yumi long beten askim God long givim savetingting long yumi?
• Olsem wanem Buk Song inap helpim ol beten bilong yumi i kamap gutpela moa?
• Taim yumi beten, bilong wanem yumi mas bilip na soim bikpela rispek?
[Piksa long pes 8]
Wokboi bilong Abraham i beten askim God long stiaim em. Yu tu i save mekim olsem?
[Piksa long pes 10]
Famili Lotu inap mekim ol beten bilong yu i kamap gutpela moa