Olsem Wanem Beten Bilong Yu Inap Kamap Gutpela Moa?
BETEN em i wanpela gutpela samting tru God Jehova i givim long yumi. Ol birua bilong tok i tru ol inap kisim Baibel bilong yu o pasim yu long bung wantaim ol wanlotu bilong yu, tasol i no gat wanpela man inap pasim yu long beten. Beten em i wanpela bikpela samting tru bilong helpim yumi. Olsem na yumi olgeta wan wan i mas laikim tru na mekim wok long en long olgeta taim. Orait, wanem samting inap helpim yu na bai beten bilong yu i kamap gutpela moa?
Baibel i no wanpela buk beten. Tasol yumi ken tok, em i nambawan buk tru bilong skulim yumi long beten. Long Olpela Testamen i gat olsem 150 beten. Sampela i sotpela beten, na sampela i longpela. Sampela beten, ol i bin mekim long ai bilong ol man, na sampela ol i bin mekim insait long rum, na sampela king i bin mekim long taim ol i winim pait, na sampela kalabusman i bin mekim long taim ol i gat hevi. Long Song 65:2, Devit i mekim wanpela song i tok “olgeta manmeri” i save go long Jehova, em Man bilong “harim beten.” Orait, bilong wanem God i bin kirapim ol man bilong raitim Baibel long raitim kain kain beten?
Bilong bekim dispela askim, tingim tok bilong 2 Timoti 3:16. Em i tok: “Spirit bilong God yet i bin kamapim olgeta tok i stap long buk bilong God.” Olsem na ol beten i stap long Baibel ol i bilong helpim yumi, wankain olsem ol tok profet na ol lo na stori bilong Baibel ol i bilong helpim yumi. Orait, ol dispela beten inap helpim yumi olsem wanem?
Sapos yumi glasim gut ol beten i stap long Baibel, yumi inap luksave long ol beten ol man i bin mekim taim wankain samting i painim ol olsem i painim yumi. Na yumi ken save, ol dispela beten i gat kain kain wok bilong en na ol i bin mekim long kain kain taim. Na tu, bai yumi lainim ol nupela tok bilong litimapim nem bilong Jehova na tok tenkyu long em, na bai yumi inap painim ol narapela narapela kain tok bilong mekim insait long beten. Tru tumas, ol beten i stap long Baibel ol inap tru long helpim yumi long mekim ol beten i gutpela moa.
Maria, em i bin kamap mama bilong Jisas, ating em i bin lukim sampela tok long wanpela beten i stap long Baibel na dispela i bin helpim em long taim em i beten. Em i bin i go lukim wanblut bilong em, Elisabet, taim God i helpim tupela na pikinini man i kamap long bel bilong tupela. Maria i mekim beten bilong litimapim nem bilong God na tok tenkyu long em, na sampela tok bilong em i wankain olsem ol tok bilong wanpela beten i stap long Olpela Testamen. Ating Maria i save pinis long wanpela beten Hana i bin mekim, em mama bilong profet Samuel. Inap 1,000 yia paslain long taim bilong Maria, God i bin helpim Hana tu na em i gat bel na karim wanpela pikinini man. Ating Maria i bin tingim tingim dispela beten, long wanem, tok bilong en i wankain olsem tingting bilong em yet.—1 Samuel 2:1-10; Luk 1:46-55.
Orait, olsem wanem long yu? Yu inap tingim wanpela beten long Baibel i stret wantaim ol samting i bin painim yu? Sapos yu inap painim na kaunim na tingim ol kain beten olsem, dispela bai helpim yu taim yu laik toktok wantaim God long rot bilong beten. Long stori i kamap bihain long dispela, bai yumi skelim 3-pela beten i stap long Baibel. I gat narapela narapela as na ol i bin mekim dispela 3-pela beten, na ating i wankain olsem samting i bin painim yu, olsem na ol inap helpim yu.