Tupela Nupela Brata Long Lain Gavening Bodi
LONG Oktoba 5, 2024, ol i bin mekim wanpela spesel toksave long anual miting: Ol i bin makim Brata Jody Jedele na Brata Jacob Rumph long insait long lain Gavening Bodi Bilong Ol Witnes Bilong Jehova. Tupela brata wantaim i bin mekim wok bilong Jehova inap planti yia.
Jody Jedele na meri bilong em, Damaris
Brata Jedele em i bon long Missouri, Amerika na em i kamap bikpela long tok i tru. Famili bilong em i stap klostu long wanpela teritori we ol i no save autim tok planti taim tumas long en. Planti bratasista bilong kain kain bekgraun i save kam bilong helpim wok bilong autim gutnius long dispela hap. Em i lukim pasin laikim na pasin wanbel bilong ol dispela bratasista na dispela i mekim bikpela samting long em. Em i kisim baptais long Oktoba 15, 1983, taim em i tineja yet. Em i amamas long wok autim tok, na bihain em i pinis long haiskul na em i kirap mekim wok painia oltaim long Septemba 1989.
Long taim Brata Jedele i yangpela yet, papamama bilong em i save kisim em na susa bilong em i go long visitim Betel. Dispela ol visit i kirapim ol pikinini long putim mak long i go wok long Betel, na tupela i winim dispela mak long wok long Betel. Brata Jedele i go wok long Wallkill Betel long Septemba 1990. Fes em i kirap mekim wok long Klining Dipatmen na bihain em i go wok long Medikal Sevis.
Long dispela taim, planti kongrigesen long tokples Spen i kamap long dispela hap na ol i nidim ol brata. So Brata Jedele i go long wanpela bilong ol dispela kongrigesen na em i kirap long lainim tokples Spen. Na bihain liklik em i bungim Damaris, em wanpela painia sista long dispela sekit. Na bihain ol i marit na sista i go wok wantaim em long Betel.
Long 2005, ol i lusim Betel na ol i go lukautim papamama bilong ol. Long dispela taim, ol i mekim wok olsem ol painia oltaim. Brata Jedele i mekim wok tisa long Skul Bilong Wok Painia. Na em i insait tu long Hospital Lieson Komiti na Komiti Bilong Wokim Ol Haus Kingdom.
Long 2013, ol brata i singautim Brata na Sista Jedele long go wok gen long Betel long Warwick konstraksen projek. Kirap long dispela taim na i kam, ol i mekim wok tu long Patterson na Wallkill. Brata Jedele i wok long Lokol Disain/Konstraksen Dipatmen, na tu, long Hospital Infomesen Sevis. Long Mas 2023, ol i makim em long stap olsem helpim bilong Sevis Komiti. Em i tingim bek ol asainmen em i bin mekim na em i tok: “Taim yu kisim ol nupela asainmen, dispela inap mekim yu pret na tingting planti. Long kain taim olsem, yu mas bilip na wet long Jehova i helpim yu, long wanem, em i save mekim i kamap olsem i stret wantaim nem bilong em.”
Jacob Rumph na meri bilong em, Inga
Brata Rumph i bon long California, Amerika. Taim em i liklik yet, mama bilong em i bin slek long bilip, tasol em i wok strong long skulim em long ol tok i tru bilong Baibel. Na tu, long olgeta wan wan yia em i save i go lukim bubu meri bilong em, em i wanpela strongpela Witnes. Em i helpim em long kirapim laik bilong em long kisim save long tok i tru, na taim em i gat 13 krismas, em i askim long stadi long Baibel. Em i kisim baptais long Septemba 27, 1992, taim em i tineja. Gutpela samting em i olsem, mama bilong em i kamap strong gen long bilip na papa bilong em na ol bratasusa bilong em ol i stadi na kisim baptais.
Taim Brata Rumph i yangpela yet, em i luksave olsem ol painia i stap amamas tru. So taim em i pinis long haiskul, em i kirap mekim wok painia long Septemba 1995. Long yia 2000, em i muv i go long Ekwado, em i go mekim wok long hap i sot long ol pablisa. Long dispela hap em i bungim Inga, em wanpela painia sista long Kanada na bihain tupela i marit. Bihain long ol i marit, ol i mekim wok long wanpela taun long Ekwado we i no gat planti pablisa. Long nau i gat wanpela kongrigesen long dispela hap.
Bihain ol i makim Brata na Sista Rumph olsem spesel painia na bihain ol i mekim wok sekit. Long 2011, ol i singautim ol i go long klas namba 132 bilong Skul Gileat. Bihain long ol i grediuet, ol i go mekim wok long ol narapela narapela kantri na ol i insait long fultaim sevis olsem wok long Betel, mekim wok misineri, na sekit wok tu. Brata Rumph i mekim wok tisa tu long Skul Bilong Ol Kingdom Evanselis.
Taim COVID-19 pendemik i kamap, Brata na Sista Rumph i go bek long Amerika. Ol i singautim tupela long Wallkill Betel we Brata Rumph i kisim trening long Dipatmen Bilong Wok Autim Tok. Na bihain, ol i salim tupela i go bek long Ekwado brens we Brata Rumph i wok long Brens Komiti. Long 2023, ol i go bek long Warwick. Long Janueri 2024, ol i makim Brata Rumph long mekim wok olsem helpim bilong Sevis Komiti. Brata Rumph i bin tingim ol ples em i bin mekim wok long en na em i tok: “Samting i mekim asainmen i spesel moa em i no ples, tasol em ol manmeri yumi wok wantaim.”
Yumi amamas long ol hatwok ol dispela brata i mekim na yumi “no ken lusim pasin bilong tingim tru ol kain man olsem.”—Fili. 2:29.