Yu Tingim Yet?
Yu bin ritim gut ol Wastaua bilong dispela yia? Orait, lukim sapos yu inap bekim ol dispela askim:
Wanem samting i kirapim yumi long givim glori long Jehova?
Yumi mekim olsem bikos yumi rispektim tru Jehova na yumi laikim em tru. Na tu, yumi givim glori long em bikos yumi laik bai ol narapela i kisim save long em.—w25.01, p. 3.
Sapos wanpela i bagarapim bel bilong yumi, olsem wanem yumi ken fogivim em?
Yumi no lusim tasol ol samting yumi pilim long bel, tasol taim yumi lusim pasin bilong holim yet belhat na bel kros, yumi no larim pasin bilong bel nogut i bagarapim pasin yumi mekim long ol narapela.—w25.02, p. 15-16.
Wai na disaipel Mak i stap gutpela eksampel long ol yangpela brata?
Mak i redi long kisim asainmen bilong helpim ol narapela. Maski em i bin bel hevi long wanpela samting i kamap, em i no givap. Em i pas gut wantaim Pol na ol narapela Kristen i strong long bilip.—w25.04, p. 27.
Wanem mining bilong dispela tok Jisas i mekim olsem: “Mi bin kamapim nem bilong yu long ol”? (Jon 17:26)
Ol disaipel bilong Jisas i save pinis long nem bilong God. Tasol Jisas i helpim ol long save gut tru long Jehova, olsem ol samting em i tingting pinis long mekim, ol wok bilong em, na ol pasin bilong em.—w25.05, p. 20-21.
Sapos yumi gat pasin daun, yumi bai luksave long wanem samting?
Yumi bai luksave olsem yumi no save long sampela samting. Olsem, yumi no save long wanem taim pinis bai kamap o yumi no save long hau Jehova bai helpim yumi long dispela taim. Na tu, yumi no save long wanem samting bai kamap tumora o yumi no save long hau Jehova i save gut long yumi.—w25.06, p. 15-18.
Wanem samting i ken helpim yumi long kisim helpim long wanpela atikol o pablik tok?
Yumi ken askim yumi yet olsem: ‘Ol i yusim wanem evidens long kirapim ol lain i putim yau long bilipim dispela tok? I gat wanpela gutpela tok piksa mi ken yusim taim mi skulim wanpela? Husat inap amamas long putim yau long dispela topik?’—w25.07, p. 19.
Yumi inap kisim wanem skul long pasin bilong God long lusim rong long samting em i mekim long Devit?
Maski Devit i mekim ol bikpela sin tru, taim em i tanim bel, Jehova i fogivim em. (1 Kin. 9:4, 5) Taim God i fogivim sin bilong wanpela man, em i no save tingim yet sin bilong em o kotim em gen long dispela sin.—w25.08, p. 17.
Sapos wanpela Baibel sumatin i no kliagut long wanpela poin, yu ken mekim wanem?
Sapos em i hatwok yet long kliagut long wanpela poin maski yu yusim Baibel long stori gut long em, go long neks poin na bihain kam bek na skelim gen dispela hap.—w25.09, p. 24.
Baibel i tok sin i gat “strong . . . long giamanim man.” (Hib. 3:13) Wai na Baibel i tok olsem?
Sin inap kirapim yumi long mekim ol pasin nogut. Na tu, em inap giamanim yumi long kisim tupela tingting long ol samting, olsem tru tru God i laikim yumi o nogat.—w25.10, p. 16.
Yumi ken tingim wanem 3-pela samting taim yumi beten?
(1) Yumi ken tingim ol pasin bilong Jehova. (2) Yumi ken tingim ol hevi yumi karim na kamapim long beten, kain olsem sapos yumi pilim hatwok long fogivim wanpela. (3) Yumi ken lusim sampela haptaim long beten. Dispela bai helpim yumi long kamapim samting yumi pilim tru long bel.—w25.10, p. 19-20.
Hau yumi ken helpim ol lapun?
Yumi ken visitim ol lapun o ringim ol. Na tu, yumi ken go wantaim ol long ol medikal apoinmen bilong ol. O yumi ken autim tok wantaim ol long ol narapela narapela rot bilong autim tok.—w25.11, p. 6-7.
Bilong weding Kristen i ken givim ona long God, man na meri i laik marit i mas mekim wanem?
Bihainim ol lo bilong gavman long sait bilong marit. Oganaisim gut ol samting na bai ol samting long bung bilong marit na risepsen i kamapim pasin bilong holi spirit bilong God. Makim gut ol bilas yu werim na bai dispela i soim pasin daun, na sakim ol kastam i no stret wantaim ol tok bilong Baibel. Toktok gut wantaim taim yupela i plenim weding.—w25.12, p. 21-24.