Seifti Bilong Ol Meri​—⁠Tok Baibel i Mekim Long Dispela

“Taim mi liklik, long olgeta de bikpela brata bilong mi i save paitim mi na mekim ol tok bilong rabisim mi. Bihain mi marit na tambu mama bilong mi i mekim olsem tu long mi. Em na tambu papa bilong mi i save tritim mi olsem wanpela sleiv. Planti taim mi tingting long suasaid.”—Madhu,a India.

Lain Wol Helt Oganaisesen i tok: “Vailens agensim ol meri i stap long olgeta hap bilong graun.” Dispela oganaisesen i tok, ating 1-pela long olgeta 3-pela 3-pela meri i bin ekspiriensim hevi bilong man i paitim ol o mekim pasin sem long ol sampela taim long laip bilong ol.

Sapos dispela hevi i bin painim yu, yu inap pret yet olsem ol man bai tok nogutim yu o mekim ol tok bilong rabisim yu, paitim yu, o mekim pasin sem long yu long ol hap yu go long en. Bikos yu wanpela meri, yu inap pilim olsem planti man i gat kain tingting olsem ‘Ol meri ol i samting nating.’ Tasol olsem wanem? Yu ting God i save tingim ol meri?

God i gat wanem tingting long ol meri?

Skripsa: “God . . . i wokim man na meri.”—Stat 1:27.

Mining: God i wokim ol man na ol meri. Long tingting bilong God, i stret long ol narapela i rispektim ol man na meri wantaim. Na tu, em i laik bai ol man marit i mas ‘laikim ol meri bilong ol olsem ol i save laikim ol yet.’ (Efesus 5:33; Kolosi 3:19) I klia tru olsem God i tingim tru seifti bilong ol meri.

“Taim mi liklik, sampela wanblut i mekim pasin sem long mi. Taim mi gat 17 krismas, bos bilong mi i tok em bai pinisim mi long wok sapos mi no slip wantaim em. Na taim mi kamap bikpela meri, man bilong mi, papamama bilong em, na ol neiba i no save rispektim mi liklik. Tasol bihain mi kisim save long Jehova,b em Krieta. Em i save rispektim tru ol meri. Dispela i mekim isi bel bilong mi bikos mi save olsem em i laikim mi na mi dia tumas long ai bilong em.”—Maria, Ajentina.

Wanem samting inap helpim yu long kamap orait gen long sait bilong bel na tingting?

Skripsa: “I gat ol pren husat i save pas gut tru wantaim, winim pasin i stap namel long tupela brata.”—Provep 18:24.

Mining: Ol pren tru bai sapotim yu. Tokim wanpela yu trastim long ol filings bilong yu, sapos yu pilim olsem dispela bai helpim yu.

“Inap 20 yia, mi no tokim wanpela olsem wanpela i bin mekim pasin sem long mi. Dispela i mekim na taim mi kamap bikpela meri, mi no amamas, mi save tingting planti, na mi kisim dipresen. Tasol taim mi tokim wanpela husat i redi long putim yau long mi long dispela hevi mi karim, mi pilim bikpela bel isi tru.”—Elif, Tekiye.

Skripsa: “God i save wari long yupela, olsem na yupela i mas putim olgeta hevi bilong yupela long han bilong em.”—1 Pita 5:7.

Mining: Taim yu beten, God i save putim gut yau long yu. (Buk Song 55:22; 65:2) Em i save tingim yu tru, olsem na em i ken helpim yu long save tru olsem yu dia tumas long em.

“Bel na tingting bilong mi i bagarap tru, tasol taim mi kisim save long Jehova, dispela i helpim mi long pilim orait gen. Nau mi ken beten long God na tokim em long olgeta tingting na filings bilong mi. Em i olsem wanpela pren husat i kliagut tru long ol filings bilong mi.”—Ana, Belis.

Yu ting wanpela taim bai kamap we God bai pinisim pasin bilong mekim nogut long ol meri?

Skripsa: “Jehova . . . bai helpim ol pikinini i no gat papa na ol man i bel hevi tru na ol i winim kot, na bai ol man nating bilong graun i no ken mekim ol i pret.”—Buk Song 10:​17, 18.

Mining: Klostu nau God bai pinisim olgeta pasin i no stret, dispela i makim tu pasin bilong mekim nogut long ol meri na pasin bilong paitim na bagarapim ol meri.

“Mi kisim save olsem klostu nau Jehova bai pinisim pasin bilong mekim nogut long ol meri na ol liklik gel, na dispela save i olsem marasin i mekim gut bel bilong mi. Dispela i mekim na tingting bilong mi i stap isi.”—Roberta, Meksiko.

Bilong kisim sampela save moa long hau Baibel i helpim yumi long wetim gutpela samting bai kamap bihain, risen na yu ken trastim ol tok promis bilong en, na hau ol Witnes Bilong Jehova i save yusim Baibel long helpim ol narapela, yu ken rikwes long wanpela i kam lukim yu—i no gat pe long dispela—.

Daunlodim dispela atikol na prinim.