Ol Witnes Bilong Jehova i Sapotim Wok Saion?

Nogat. Ol Witnes Bilong Jehova ol i Kristen, na ol bilip bilong ol i kam long Baibel. Sampela lotu i skulim ol man olsem Baibel i bin tok profet long wok bilong bungim ol Juda long Palestain, tasol ol Witnes Bilong Jehova i no holim dispela bilip. Ol i no bilip olsem Baibel i tok profet long dispela kain samting bilong wok politik. Baibel i no sapotim wanpela gavman bilong graun o tok olsem wanpela lain pipol i winim ol narapela, nogat. Wastaua, em ofisel magasin bilong ol Witnes Bilong Jehova, em i bin tokaut klia stret olsem: “Tok bilong Baibel i no sapotim ol politik tingting bilong Wok Saion.”

Encyclopædia Britannica i tok Wok Saion em “plen bilong lain Juda long kamapim na sapotim ples sindaun bilong ol Juda long Palestain.” Dispela plen i kamap long rot bilong wok lotu na wok politik. Ol Witnes Bilong Jehova i no tingim Wok Saion olsem wanpela bilip bilong lotu, na tu, ol i no insait long wok politik bilong Wok Saion.

Lain Witnes Bilong Jehova i stap olsem oganaisesen bilong mekim wok lotu tasol, na ol i no sapotim wanpela wok politik, na ol i no sapotim tu Wok Saion. Planti lain tru i save olsem ol Witnes Bilong Jehova i no save insait long wok politik, na long sampela kantri ol man i birua na mekim nogut tru long ol Witnes bikos ol i no insait long wok politik. Mipela i bilip olsem Kingdom Bilong God long heven tasol bai kamapim bel isi tru long dispela graun; i no gat wanpela gavman o wok bilong ol man bai kamapim bel isi.

Maski ol Witnes Bilong Jehova i stap long wanem hap bilong graun, wanpela bikpela skultok bilong Baibel we ol i tingim tru em olsem, ol i mas bihainim ol lo bilong gavman. Ol i no save sakim tok o bikhet long ol lida bilong gavman o insait long ol pait.