Ol Witnes Bilong Jehova i Save Brukim Ol Famili o Strongim Ol?
Olsem ol Witnes Bilong Jehova, mipela i save mekim ol samting bilong strongim ol famili, bilong mipela yet na bilong ol narapela. Mipela i rispektim God olsem Man i as bilong Famili. (Stat 2:21-24; Efesus 3:14, 15) Em i skulim ol man long olgeta hap long ol stiatok bilong Baibel we i helpim ol long strongim marit bilong ol na stap amamas.
Ol Rot We Ol Witnes Bilong Jehova i Mekim Ol Samting Bilong Strongim Ol Famili
Mipela i save givim bel long bihainim ol tok bilong Baibel, long wanem, dispela i helpim mipela long kamap gutpela maritman, maritmeri, na papamama. (Provep 31:10-31; Efesus 5:22–6:4; 1 Timoti 5:8) Ol savetingting bilong Baibel inap helpim tu ol lain insait long famili em ol i gat narapela narapela bilip long stap gut wantaim. (1 Pita 3:1, 2) Skelim ol dispela tok bilong ol man o meri we ol poroman marit bilong ol i kamap Witnes Bilong Jehova:
Bihain long Ivete i kamap wanpela Witnes Bilong Jehova, em i kamapim moa yet pasin laikim na em i no les kwik. Ol senis em i mekim i strongim marit bilong mipela.”—Clauir, long Brasil.
Kirap long dispela taim, mi luksave olsem Baibel i helpim marit bilong mipela.”—Agness, long Sambia.
Long wok autim tok bilong mipela, mipela i skulim ol manmeri long hau ol inap bihainim ol savetingting bilong Baibel na dispela inap helpim ol long
Yu ting nupela bilip inap kamapim hevi long marit?
Yes, sampela taim dispela inap kamapim hevi. Olsem, long 1998 ripot bilong wanpela kampani bilong mekim wok painimaut em Sofres i tok olsem, long olgeta 20 marit 1-pela marit i save karim bikpela hevi taim wanpela poroman marit i kamap wanpela Witnes.
Jisas i tok profet olsem ol man i bihainim tok bilong em ol famili bai birua long ol. (Matyu 10:32-36) Saveman Will Durant i tok, aninit long wok bos bilong Gavman Rom, “Kot i sasim ol Kristen olsem ol i save brukim ol famili,”a na sampela Witnes Bilong Jehova i bungim wankain hevi long nau. Yu ting dispela i makim olsem ol Witnes i save brukim ol famili?
Yuropian Kot ov Human Raits
Taim kot i skelim tok ol man i sutim long ol Witnes Bilong Jehova olsem ol i brukim ol famili, Yuropian Kot ov Human Raits i tok wanblut husat i no Witnes i save kamapim hevi taim em i no “rispektim rait bilong wanblut long makim lotu em i laik bihainim na mekim wok lotu bilong em.” Na Kot i tok moa: “Planti taim dispela samting i save kamap long ol marit i gat narapela narapela bilip, na dispela i save kamap tu long ol Witnes Bilong Jehova.”b Maski hevi i kamap, ol Witnes Bilong Jehova i strong long bihainim dispela tok bilong Baibel: “No ken bekim pasin nogut long man i mekim pasin nogut long yupela. . . . Yupela i mas mekim olgeta samting yupela inap mekim bilong i stap wanbel wantaim olgeta man.”—Rom 12:17, 18.
Risen na ol Witnes Bilong Jehova i bilip olsem ol i mas maritim wanbilip bilong ol
Ol Witnes i bihainim tok bilong Baibel long maritim “man i bihainim Bikpela,” olsem maritim wanpela i gat wankain bilip long em. (1 Korin 7:39) Dispela em lo bilong Baibel na i gutpela long bihainim. Olsem, long 2010 wanpela atikol long Journal of Marriage and Family i tok olsem “ol marit we tupela wantaim i bilong wankain lotu, bilip, na ol i bihainim wankain pasin bilong lotu” ol i pas gut wantaim.c
Tasol ol Witnes i no kirapim ol wanlotu bilong ol long lusim poroman marit husat i no wanpela Witnes. Baibel i tok: “Sapos brata i gat meri husat i no bilip, tasol meri i orait long i stap yet wantaim em, orait em i no ken lusim meri; na sapos meri i gat man husat i no bilip, tasol man i orait long i stap yet wantaim meri, orait em i no ken lusim man bilong em.” (1 Korin 7:12, 13) Ol Witnes Bilong Jehova i bihainim dispela lo.
a Lukim Caesar and Christ, pes 647.
b Lukim tok bilong kot long Jehovah’s Witnesses of Moscow and Others v. Russia, pes 26- 27, paragraf 111.
c Lukim Journal of Marriage and Family, Volume 72, Number 4, (August 2010), pes 963.