Sin Em Wanem Samting?

Bekim Bilong Baibel:

Sin em pasin, filings o tingting i pait wantaim ol lo bilong God. Dispela i makim man i brukim lo bilong God taim em i mekim rong, o em i mekim pasin i no stret long ai bilong God. (1 Jon 3:4; 5:​17) Baibel i stori tu long narapela sin​—man i save pinis long samting i stret em i mas mekim tasol em i no mekim.​—Jems 4:​17.

Long tokples ol i bin raitim Baibel long en long pastaim, dispela tok sin i makim “i no winim mak.” Olsem, wanpela lain bilong ol soldia long Israel bilong bipo i save gut long sutim ston long katapel i go stret long mak na ol “i no save popaia.” Sapos yumi trensletim dispela hap tok em bai olsem “i no save sin.” (Hetman 20:16 ) Olsem na man i mekim sin, dispela i makim olsem em i no winim mak bilong bihainim ol stretpela lo bilong God.

God em i Man Bilong Wokim yumi, olsem na em i gat rait long makim wanem pasin i stret na wanem pasin i no stret em ol man i mas bihainim. (Revelesen 4:​11) Em bai skelim yumi long ol pasin yumi mekim.​—Rom 14:12.

Yu ting yumi inap abrusim pasin bilong mekim sin?

Nogat. Baibel i tok “olgeta man i bin mekim sin na ol i sot long kamapim ol gutpela pasin bilong God.” (Rom 3:​23; 1 King 8:​46; Eklisiastis 7:​20; 1 Jon 1:8) Bilong wanem i olsem?

Namba wan man na meri, Adam na Iv, i no gat sin long pastaim bikos God i wokim ol i gutpela olgeta, olsem God yet. (Stat 1:​27) Tasol taim ol i sakim tok bilong God, ol i no stap gutpela olgeta moa. (Stat 3:5, 6, 17-19) Taim ol i kamapim ol pikinini, sin bilong ol i kalap long ol pikinini bilong ol. (Rom 5:​12) Olsem King Devit bilong Israel i tok: “Mi bon wantaim sin.”​—Buk Song 51:5.

Yu ting sampela sin i winim ol narapela sin?

Yes. Olsem, Baibel i tok ol man bilong Sodom long bipo, ol i “man nogut  . .  i save mekim ol pasin i nogut tru” we sin bilong ol “i go nogut tru.” (Stat 13:13; 18:20) Yumi ken skelim 3-pela samting we inap helpim yumi long luksave olsem wanem wanpela sin i bikpela.

1. Bikpela sin. Baibel i givim tok lukaut long abrusim ol bikpela sin olsem pasin pamuk, lotuim ol imis, stil, dring spak, pulim ol samting bilong ol arapela, na wok bilong spirit nogut. (1 Korin 6:​9-​11; Revelesen 21:8) Baibel i tok ol bikpela sin i no wankain long sin we man i no tingting gut na mekim, na i no min long mekim, kain olsem, ol toktok na pasin we i bagarapim bel bilong narapela. (Provep 12:18; Efesus 4:​31, 32) Maski i olsem, Baibel i kirapim yumi long no ken ting pasin bilong mekim sin em i liklik samting, long wanem, dispela inap mekim na bihain yumi mekim ol bikpela rong we i brukim lo bilong God.​—Matyu 5:​27, 28.

2. Wanem as bilong sin. Sampela manmeri i mekim sin bikos ol i no save long God i laik ol i mas mekim wanem. (Aposel 17:30; 1 Timoti 1:​13) Baibel i no tok em orait long mekim kain sin olsem, tasol Baibel i kamapim klia olsem ol i no wankain long sin em man i min long mekim we i brukim lo bilong God. (Namba 15:30, 31) Man i min long mekim sin em “laik nogut bilong bel” i kirapim em long mekim.​—Jeremaia 16:12.

3. Hamas Taim. Baibel i kamapim klia tu olsem sin man i mekim wanpela taim i no wankain long sin man i mekim inap longpela taim liklik. (1 Jon 3:​4-8) Ol man em ‘long laik bilong ol yet i bihainim pasin bilong mekim sin,’ maski ol i save pinis long stretpela pasin ol i mas mekim, ol bai sanap long kot bilong God.​—Hibru 10:26, 27.

Ol man i bin mekim bikpela rong, bel bilong ol inap kotim ol na ol inap pilim bel bikpela hevi stret long sin ol i bin mekim. Olsem, King Devit i tok: “Ol rong bilong mi i daunim mi stret. Ol i olsem kago i hevi tru, na i hevi tumas long mi karim.” (Buk Song 38:4) Tasol Baibel i kamapim dispela gutpela tok: “Man nogut i mas lusim pasin nogut bilong em na man i gat tingting nogut i mas rausim tingting nogut bilong em; em i mas kam bek long Jehova, em man husat bai marimari long em, em i mas kam bek long God bilong yumi, bikos em bai fogivim em olgeta.”​—Aisaia 55:7.