Liklik Boks i Givim Ol Kaikai Bilong Strongim Bilip

Long nau, ol Witnes Bilong Jehova i kisim planti samting bilong strongim bilip i long rot bilong dijitel fom winim olgeta taim bipo. Tasol long planti hap, i hatwok long ol brata i gat ekses long intenet. Ol narapela i stap long hap i no gat netwok, intenet i no spid tumas, o planti taim intenet i aut.

Maski i olsem, planti bratasista inap daunlodim ol pablikesen na i no gat wok long yusim intenet long mekim olsem! Hau ol i mekim?

JW Boks em wanpela liklik boks ol i givim long ol kongrigesen i no gat intenet. Em i gat rauta em ol i bin baim long wanpela kampani, na em i gat program em ol brata long Computer Department long Betel i bin kamapim, na em i gat ol pablikesen bilong yumi long digitel fom na ol vidio i stap long jw.org. Pe bilong wanpela boks em K250.

Long Haus Kingdom, ol bratasista i save yusim mobail fon samting long konekt long dispela JW Boks na daunlodim ol pablikesen na ol vidio. Maski ol i gat olpela fon o fon i no gutpela tumas, ol i ken stil konekt. Tasol hau na JW Boks i ken apdeit na kisim ol nupela pablikesen sapos kongrigesen i no gat intenet ekses? Brens i save salim fles draiv i gat ol nupela pablikesen i kam long jw.org i go bilong apdeitim JW Boks—fles draiv em K10 long wanpela.

Dispela JW Boks i bin helpim ol brata olsem wanem? Nathan Adruandra, wanpela papa i stap long Democratic Republic of Congo, em i tok: “Inap longpela taim nau mi bin traim long daunlodim ol drama ‘O Jehova, . . . Mi Trastim Yu’ na Tingim Meri Bilong Lot. Tasol mi no bin kisim, na dispela i mekim mi bel hevi. Nau mi ken daunlodim ol dispela vidio i go long fon bilong mi, na dispela helpim mipela ol papamama long skulim gut ol pikinini bilong mipela.”

Wanpela brata husat i bin helpim long setim ap ol JW Boks long ol kongrigesen long Nigeria, em i tok: “Ol bratasista i tingim JW Boks olsem wanpela presen i kam long Jehova. Ol bratasista i amama tru olsem nau em i isi long daunlodim ol pablikesen na ol vidio long Tul Bilong Skulim Man.”

Ol brata i bin salim winim 1,700 boks i go long ol brata i stap long Afrika, Oceania, na Saut Amerika, na nau ol i mekim plen long salim sampela moa i go long planti narapela kongrigesen. Ol i kisim mani we bilong mekim dispela wok? Ol i kisim long rot bilong donesen ol bratasista i putim bilong sapotim wok bilong olgeta hap bilong graun long rot bilong donate.jw.org. Tenkyu tru long ol donesen yupela i givim.