Ol Litresa Kat i Opim Rot Long “Olgeta Lain Man i Ken Harim”

Winim 10-pela yia nau, long wok autim tok bilong yumi ol litresa kat i mekim gutpela wok long pulim ai bilong planti manmeri. Long olgeta hap bilong graun, em isi tru long ol manmeri i luksave ol dispela kat i bilong husat. Disain bilong ol i luk nais tru na em isi long yusim ol. Yu bai wanbel long tok bilong Asenata, em wanpela sista long Polan. Em i tok: “Ol disain bilong ol kat em simpol na i luk nais. Em isi tru long sanapim na muvim ol kat.”

Yu laik save hau ol i disainim na wokim ol dispela kat?

Wanpela Gutpela Disain Tru

Long 2001, Gavening Bodi i tok orait long ol bratasista long Frans long traim ol narapela narapela rot bilong autim tok long ol pablik ples, na long autim tok long rot bilong ol kat tu. Ol i traim sampela disain. Olsem, ol i mekim sampela senis long disain bilong ol sutkeis na ol troli bambai ol i ken edvetaisim ol litresa na putim ol litresa long ol. Bihain, Frans brens i makim wanpela disain na ol pablisa i bin yusim inap planti yia.

Ol bratasista long Frans i amamas long ol gutpela samting i kamap long dispela wok traim ol i mekim bilong autim tok long ol pablik ples. Olsem na long 2011, Gavening Bodi i tok orait long traim wanpela nupela rot bilong autim tok long ol pablik ples long New York City, Amerika, em long rot bilong yusim ol kat na ol tebol. Ol painia i insait long dispela nupela rot bilong autim tok i luksave olsem planti gutpela samting i kamap taim ol i yusim ol kat, wanpela em olsem em isi long muvim ol kat. Na tu, ol painia i kamapim sampela tingting long hau long mekim i kamap gutpela moa disain bilong ol kat. Pastaim ol i wokim ol kat long diwai na ol i hevi tumas, dispela i mekim na i hatwok long muvim ol kat i go antap o kam daun long ol step. So ol i senisim disain bilong ol bambai ol i no hevi tumas, tasol long wankaim taim ol kat i no inap pundaun sapos win i blo. Nupela disain bilong ol i gat tu ol bikpela na strongpela taia so em isi long rolim ol kat long ol hap we graun i no level o flet. Na tu, ol nupela kat i gat likik boks we ol i ken putim ol litresa long en.

Dispela wok traim long nupela rot bilong autim tok i kamap gut! Olsem na long 2012, Gavening Bodi i tok orait long ol bratasista long graun olgeta long yusim ol litresa kat. Ol brata i painim wanpela kampani em ol i wokim planti bilong ol dispela kat.

Insait long ol yia i go pinis, ol i mekim sampela liklik senis long disain bilong ol kat. Olsem, long 2015 ol i putim plestik long karamapim fran bilong kat. Dina i stap long kantri Jojia i laikim tru dispela disain. Em i tok: “Ol kat i gat ren-kot bilong ol yet bilong lukautim ol pablikesen.” Long 2017, ol i wokim ol megnet posta long sampela tokples. Tomasz em wanpela brata long Polan, em i tok: “Bipo mipela i yusim ol posta we mipela i mas gluim na dispela i bin mekim na i hatwok long senisim ol posta. Em gutpela aidia long wokim ol megnet posta.” Long 2019, ol i mekim sampela moa senis long ol samting ol i yusim bilong wokim ol kat na wei bilong wokim ol bambai ol i stap strong na yumi inap yusim longpela taim.

Wokim Ol Litresa Kat

Wanpela kampani i wokim olgeta litresa kat na bihain ol i salim i go long olgeta kongrigesen long graun olgeta. Long nau, pe bilong baim wanpela kat em 43 dola bilong Amerika, tasol pe bilong baim siping na ol narapela samting i no insait long en. I kam inap long nau, yumi peim 16 milion dola bilong Amerika long baim ol kat, na ol i bin sipim winim 420,000 kat long ol kongrigesen long graun olgeta.

Bilong yusim gut mani em yumi kisim long rot bilong donesen, yumi save odaim planti planti kat long wanpela taim. Na tu, nau ol kongrigesen i ken odaim ol speapat na stretim ol kat na i no gat wok long odaim ol nupela kat.

Yusim Ol Kat Long Autim Tok

Ol pablisa long graun olgeta i amamas long yusim ol litresa kat. Martina em bilong Gana, em i tok: “I gat kain kain rot bilong autim tok; planti taim yumi save go stret long man na toktok wantaim ol. Samting mi laikim long kat witnesing em olsem ol manmeri i save kam long yumi. Na yumi ken autim tok tu long ol man i wokabaut i go i kam long hap yumi sanapim ol kat.”

Long narapela kantri long Afrika, wanpela man i kam long wanpela kat na em i kisim ol pablikesen long tokples bilong em. Wanpela wik bihain em i kam bek na em i tok: “Mi ritim pinis olgeta litresa. Ol tok i stap long ol em ol bikpela tok. Mi bai tokim famili bilong mi na ol manmeri long viles long ol dispela tok.” Viles bilong em i stap inap olsem 500 kilomita longwe. Tupela mun bihain, em i kam bek na em i tok: “Ol manmeri long viles bilong mi i ritim olgeta litresa, na ol i amamas tru long ol tok ol i ritim. Ol i laik kamap ol Witnes Bilong Jehova. Tasol ol i gat sampela askim. Olsem, ol i klia olsem bilong kisim baptais, ol i mas go insait olgeta long wara. Tasol i no gat riva klostu long viles bilong mipela. Mipela i mas kam long hia bilong baptais?” Ol pablisa i stretim rot long dispela man i ken kontektim wanpela painia i mekim tokples bilong em. Dispela painia i amamas long stori wantaim dispela man long ol tok bilong Baibel long olgeta taim.

Yumi amamas tru long yusim ol litresa kat bilong autim tok “long olgeta hap bilong graun na bai olgeta lain man i ken harim.” (Matyu 24:14) Yumi kisim mani we bilong baim dispela kampani i wokim ol kat? Long rot bilong ol donesen yumi kisim bilong sapotim wok i kamap long olgeta hap bilong graun, na planti donesen i kam long rot bilong donate.jw.org. Tenkyu tru long gutpela pasin bilong yupela long givim donesen.