Husat i Kamapim Kol Bilong Nait?
WANPELA man bilong raitim nius em i bin stap olsem wan handet yia samting bipo, em i stori long kol bilong nait olsem “gutpela bilas wara bilong graun, em win i save kamapim.” Man bilong wokim yumi i askim wanpela man bilong bipo, em Jop: “Olsem wanem? Ating ren na wara bilong nait i gat papa, a?” (Jop 38:28) God i kirapim Jop long tingim olsem God i bin wokim dispela kol bilong nait.
Kol bilong nait i save lait tru na i olsem gutpela bis, na i no dispela tasol, nogat. Baibel i stori long kol bilong nait i olsem gutpela blesing, na i save mekim kaikai i kamap long gaden, na lukautim laip bilong ol samting. (Stat 27:28; Lo 33:13, 28; Sekaraia 8:12) Long taim bilong bikpela san na no gat ren long Israel, ‘wara bilong nait i kamap long maunten Hermon’ i bin givim wara long ol diwai gras samting long dispela hap na ol manmeri bilong Israel. Long nau tu, ais na sno antap long maunten Hermon i save mekim na sno bilong nait i save tanim i kamap wara na pundaun long graun. Man bilong raitim Song, em Devit, em i tok, bel isi dispela kol bilong nait i save kamapim i wankain olsem bel isi yumi save kisim taim yumi stap wanbel wantaim ol narapela i save lotuim Jehova.—Song 133:3.
Tok em profet Moses i givim long ol Israel em tok isi na i mekim gut long man, olsem kol bilong nait. Em i tok: “Tok bilong mi bai i mekim gut long yupela olsem ren i kam daun na mekim gras i kamap gutpela. Tok bilong mi bai i olsem ren i kam daun na mekim ol nupela kru bilong kaikai i kamap strong na i go bikpela.” (Lo 32:2) Long nau, ol Witnes Bilong Jehova i autim gutnius bilong Kingdom bilong God long olgeta hap bilong graun, em gutpela tok i save givim laip long man. (Matyu 24:14) God i wok yet long singaut: “ ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.” (KTH 22:17) Planti milion manmeri bilong olgeta lain ol i bihainim dispela singaut bilong kisim dispela gutpela wara bilong spirit i kam long God, em dispela samting inap givim laip oltaim long ol man.