Yu Ting Olgeta Man Inap Laikim Ol Narapela?
WANPELA loya i bekim tok bilong Jisas na i tok, bilong kisim “laip oltaim” yumi mas laikim God long bel olgeta, na laikim narapela man olsem yumi laikim yumi yet. Jisas i tok amamas long dispela loya na i tokim em olsem: “Em nau. Yu bekim tok stret. Yu mekim olsem, na bai yu kisim laip.” (Luk 10:25-28; Wok Pris 19:18; Lo 6:5) Tasol dispela loya i laik kamapim long ples klia olsem em i stretpela man, olsem na em i askim Jisas: “Na taim lo i tok long wantok bilong mi, em i tok long husat tru?”
Ating dispela loya i ting Jisas bai tok, “Em ol narapela Juda.” Tasol Jisas i stori long wanpela man bilong Samaria i bin mekim gut long wanpela man, na dispela stori i kamapim klia olsem ol manmeri i no bilong lain bilong yumi, ol tu i wantok bilong yumi. (Luk 10:29-37; Jon 4:7-9) Taim Jisas i mekim wok bilong em, em i kamapim klia olsem pasin bilong laikim tru God na ol narapela man, em ol nambawan lo bilong Man bilong wokim yumi.—Matyu 22:34-40.
Tasol olsem wanem? Kirap long bipo yet na i kam inap nau, i gat wanpela lain manmeri i save laikim tru ol narapela? Olgeta manmeri inap laikim tru ol narapela?
Wanpela Mirakel Bilong Bipo
Jisas i tokim lain bilong em olsem, ol man bai luksave long pasin bilong ol long laikim tru ol narapela, maski ol i bilong narapela lain, kantri, o sindaun samting, na long dispela ol bai save ol i lain bilong em. Em i tok: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” Na em i tok moa: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:34, 35; 15:12, 13.
Ol tok bilong Jisas bilong lainim ol man long pasin sori, na gutpela pasin bilong em yet, dispela i kamapim wanpela mirakel long taim bilong em. Ol disaipel bilong em ol i bihainim Bikpela bilong ol, na narapela i lain long laikim tru narapela, olsem na planti man i lukim dispela na ol i laikim pasin bilong ol disaipel. Tetulian, wanpela man bilong raitim ol buk, na em i bin stap 200 yia samting bihain long Krais, em i kamapim tok bilong ol haiden i stori long ol disaipel bilong Jisas, olsem: ‘Ol Kristen i laikim tru ol narapela Kristen na ol i redi long i dai bilong helpim ol.’
Tru tumas, aposel Jon i tok: “Yumi tu yumi mas lusim laip bilong yumi bilong helpim ol Kristen brata.” (1 Jon 3:16) Na Jisas i lainim ol disaipel bilong em long laikim tru birua bilong ol. (Matyu 5:43-45) Wanem samting bai kamap taim ol man i laikim tru ol narapela olsem Jisas i lainim ol long mekim?
Wanpela profesa bilong wok politik em i skelim dispela askim. Olsem na em i kamapim wanpela askim, na nius The Christian Century i stori long en: “Yu ting Jisas bai tromoi ol liklik bom long ol birua bilong em, o mekim wok long masin-gan o marasin nogut i save bagarapim skin bilong ol man, o mekim wok long bom nuklia bilong kilim o bagarapim skin bilong planti tausen mama na pikinini?”
Bilong bekim dispela askim, profesa i tok: “Dispela askim i no stret liklik long Jisas, na yumi no gat wok long bekim.” Olsem na em i kamapim dispela askim: ‘Sapos Jisas i no inap mekim olsem, long wanem, dispela bai pait wantaim pasin tru bilong em, orait, olsem wanem yumi inap mekim olsem na stap gut long em?’ Olsem na yumi no kirap nogut long pasin bilong ol disaipel bilong Jisas em ol i no insait long ol pait samting, na planti buk i stori long ol samting bilong bipo ol i kamapim klia dispela samting. Tingim tupela stori olsem.
Wanpela buk (Our World Through the Ages), em N. Platt na M. J. Drummond ol i raitim, i tok: “Pasin bilong ol Kristen i narapela kain tru long pasin bilong ol Rom. . . . Krais i bin tokim ol long stap wanbel wantaim, olsem na ol i no laik kamap soldia.” Na wanpela buk (The Decline and Fall of the Roman Empire), em Edward Gibbon i raitim, i tok: “[Ol Kristen long taim bilong ol aposel], ol i no laik insait long wok gavman o wok ami. . . . Ol Kristen i mas mekim wok bilong God, olsem na ol i no inap kamap soldia.”
Olsem Wanem Long Nau?
Olsem wanem? Long nau i gat sampela man i bihainim pasin sori olsem bilong Krais? Wanpela buk (Encyclopedia Canadiana) i tok: “Dispela wok ol Witnes Bilong Jehova i mekim i kamapim bek wok Kristen bilong pastaim em Jisas na ol disaipel bilong em i bin mekim . . . Olgeta i stap olsem brata brata.”
Wanem insait bilong dispela tok? Olsem: Ol Witnes Bilong Jehova i no save larim wanpela samting—skin, kantri, o lain—i kirapim ol long birua long ol narapela i stap long hap bilong ol. Na ol i no ken kilim i dai wanpela man, long wanem, i olsem ol i paitim pinis ol bainat bilong ol i kamap olsem ol ain bilong brukim graun, na ol spia bilong ol i kamap olsem ol naip, olsem Baibel i tok profet ol trupela wokman bilong God bai mekim.—Aisaia 2:4.
Long dispela as wanpela nius (Sacramento Union) bilong Kalifonia i tok: “Tru tumas, sapos olgeta man long graun i bihainim bilip bilong ol Witnes Bilong Jehova, pasin bilong kilim man i dai na pasin birua bai pinis, na pasin sori bai kamap strong”!
Wanpela man long Hangari i save raitim ol stori long wanpela nius (Ring), em tu i tok: “Mi ting, sapos ol Witnes Bilong Jehova tasol i stap long graun, bai i no gat pait moa, na ol polis bai i gat wok tasol long soim rot long ol ka na wokim ol paspot.”
Long wanpela nius (Andare alle genti) bilong lotu long Itali, wanpela sister bilong Misin Katolik i tok amamas long ol Witnes, olsem: “Ol i no save pait liklik, na ol i no save bikhet, maski ol bilip bilong ol i mekim na ol man i mekim nogut long ol. Sindaun bilong yumi bai i narapela kain tru sapos yumi olgeta i kirap wantaim na pasim tok long bel olsem yumi no ken insait gen long pait, maski wanem samting i painim yumi o maski i gat wanem as na yumi mekim olsem—olsem ol Witnes Bilong Jehova i save mekim!”
Ol Witnes i gat nem olsem lain i go pas long helpim ol man i sindaun klostu long ol. (Galesia 6:10) Long buk bilong em (Women in Soviet Prisons), wanpela meri bilong Latvia em i tok, bikpela sik i kisim em taim em i stap long banis kalabus long Potma, long 1965 samting. Em i tok: “Long olgeta taim mi sik [ol Witnes] i wok strong long lukautim mi. Ol i lukautim mi gut tru, maski i stap bilong mipela long banis kalabus i nogut tru.” Em i tok moa: “Ol Witnes Bilong Jehova i ting em i wok bilong ol long helpim ol narapela, maski ol i bilong narapela lotu o kantri.”
I no longtaim i go pinis na sampela man bilong raitim ol nius long Ripablik Sek, ol i tingim pasin bilong ol Witnes i stap long ol banis kalabus. Wanpela nius (Severočeský deník) i stori long wanpela piksa wokabaut (“The Lost Home”), ol i bin wokim long biktaun Burno. Nius i tok: ‘Ol man yumi inap bilip long tok bilong ol [em ol Juda bilong Sek na Slovak ol i bin abrusim bagarap] na ol i bin kalabus wantaim ol Witnes Bilong Jehova, ol i litimapim nem bilong ol dispela Witnes i bin stap long kalabus. Planti man i tok: “Ol Witnes i gat strongpela bel na oltaim ol i helpim mipela, maski ol soldia inap kilim ol i dai. Ol i beten askim God long helpim mipela olsem mipela tu i insait long famili bilong ol; ol i strongim mipela long stap strong na no ken les maski i gat ol hevi.” ’
Tasol olsem wanem? Yumi inap laikim tru ol man i birua long yumi?
Pasin Sori i Winim Pasin Birua
Tok bilong Jisas long laikim ol birua i stret wantaim tok bilong Baibel long Buk Sindaun: “Sapos birua bilong yu i hangre, orait yu mas givim kaikai long em. Sapos em i dai long wara, orait yu mas givim wara long em.” (Sindaun 25:21; Matyu 5:44) Wanpela meri blakskin i kamap wanpela Witnes Bilong Jehova, em i stori long pasin sori ol man em bipo ol i bin stap olsem birua bilong em, ol i bin mekim long em. Em i tok: “Pastaim mi bel nogut long ol waitskin na mi redi long kilim ol i dai bambai mipela i ken mekim wok bilong mipela na daunim gavman. Tasol ol Witnes waitskin i mekim gut tru long mi olsem ol i laikim mi tru, dispela i mekim na mi krai.”
Wanpela Witnes long Frans i stori long wanpela meri i bin sindaun klostu long ol na em i bin kotim mama bilong em long polis Gestapo long taim bilong Namba Tu Pait. Dispela meri i tok: “Dispela i mekim na mama i stap inap 2-pela yia long ol kalabus nogut long Jemani, na klostu em i dai. Taim pait i pinis, ol polis bilong Frans i laik mama i sainim wanpela pepa i tok dispela meri em i bin wok wantaim ol Jeman. Tasol mama i no laik mekim olsem.” Bihain, dispela meri i kisim sik kensa na marasin i no inap helpim em. Meri i tok: “Mama i lusim planti aua bilong lukautim dispela meri na helpim em i go inap long em i dai. Mi no inap lusim tingting olsem pasin sori i bin daunim tru pasin birua.”
Tru tumas, ol man inap lain long laikim tru ol narapela. Bipo ol Tutsi na Hutu, ol Juda na Arap, ol Amenia na Turki, ol Japan na Amerika, ol Jeman na Rasia, ol Talatala na Katolik, ol i stap birua birua. Tasol tok i tru bilong Baibel i mekim na olgeta i stap wanbel wantaim!
Bipo planti milion manmeri i nolaik tru long ol narapela, tasol nau narapela i laikim tru narapela, olsem na olgeta manmeri bilong graun inap mekim olsem. Tru, bikpela senis i mas kamap long olgeta hap bilong graun bambai olgeta manmeri i ken laikim tru ol narapela. Dispela senis bai kamap olsem wanem?
[Ol Piksa long pes 17]
Ol waitskin na blakskin long Saut Afrika
Ol Juda na Arap
Ol Hutu na Tutsi
I olsem ol Witnes i bin paitim ol bainat bilong ol i kamap ol ain bilong brukim graun