Was Gut, No Ken Kisim Pasin Antap
“God i save daunim ol man bilong litimapim nem bilong ol yet.”—JEMS 4:6.
1. Stori long wanem kain amamas i stret.
OLSEM WANEM? I gat wanpela samting i bin kamap na bel bilong yu i amamas tru? Ating yumi olgeta i kisim pinis gutpela amamas olsem. I no gat rong long yumi pilim dispela kain amamas. Olsem: Taim tupela marit Kristen i ritim skul ripot bilong pikinini meri bilong ol na ripot i tokaut long gutpela pasin bilong pikinini na hatwok em i save mekim, pes bilong ol i lait na ol i amamas tru long dispela. Aposel Pol na ol poroman bilong em i bin amamas tru long wanpela nupela kongrigesen ol i bin helpim wok bilong kamapim. Ol i amamas tru, long wanem, ol brata long dispela kongrigesen i sanap strong maski ol man i mekim nogut long ol.—1 Tesalonaika 1:1, 6; 2:19, 20; 2 Tesalonaika 1:1, 4.
2. Bilong wanem pasin hambak i no stret?
2 Long ol stori yumi kamapim pinis, yumi kisim save olsem man inap kisim amamas long samting em i mekim o holim. Tasol sampela taim save bilong man, gutpela skin, planti mani, o bikpela namba man i holim i mekim na em i hambak, olsem litimapim nem bilong em yet, pilim olsem em i winim ol narapela, na ting olsem em i samting tru. Dispela kain pasin em samting yumi ol Kristen i mas wok strong long sakim. Bilong wanem? Long wanem, yumi gat pasin bilong tingim yet tasol—yumi bin kisim dispela pasin long tumbuna bilong yumi, Adam. (Stat 8:21) Dispela inap mekim na bel i giamanim yumi na yumi hambak. Olsem: Ol Kristen i mas sakim pasin bilong hambak long lain, mani kago, ediukesen, save bilong mekim ol samting, o skelim wok bilong ol wantaim wok bilong ol narapela. I no stret long yumi hambak long ol dispela samting, na tu, Jehova i no orait long dispela pasin.—Jeremaia 9:23; Aposel 10:34, 35; 1 Korin 4:7; Galesia 5:26; 6:3, 4.
3. Pasin antap em wanem samting? Jisas i tok wanem long en?
3 I gat narapela as na yumi mas sakim pasin hambak. Sapos yumi larim dispela pasin i kamap long bel bilong yumi, em inap kamapim wanpela pasin nogut tru, em pasin antap. Pasin antap em wanem samting? Man i gat pasin antap em i save pilim olsem em i winim ol narapela, na tu, em i tingim ol i olsem samting nating. (Luk 18:9; Jon 7:47-49) Jisas i kolim pasin “hambak” olsem wanpela pasin nogut “i stap insait long man” na i “mekim man i doti.” (Mak 7:20-23) Ol Kristen i luksave olsem em i bikpela samting long sakim pasin antap.
4. Taim yumi skelim ol stori bilong Baibel long ol man i bin mekim pasin antap, olsem wanem dispela inap helpim yumi?
4 Sapos yu skelim sampela stori bilong Baibel long ol man i bin mekim pasin antap, dispela inap helpim yu long abrusim dispela pasin. Yu bai inap tru long luksave sapos yu gat sampela tingting i no stret, olsem tingting hambak, na tu, yu bai luksave sapos dispela pasin i wok long kamap. Em inap helpim yu long sakim ol tingting em ol inap kamapim pasin antap. Dispela bai mekim na yu no inap kisim hevi taim God i mekim ol samting em i bin tok lukaut long en, olsem: “Bai mi rausim olgeta man bilong yupela i save hambak na bikhet. Na bai yupela i stap long Jerusalem long dispela maunten bilong mi, na bai yupela i no bikhet moa long mi.”—Sefanaia 3:11.
God Bai Givim Strafe Long Ol Man i Gat Pasin Antap
5, 6. Olsem wanem King Fero i kamapim pasin antap? Wanem samting i kamap long dispela?
5 Yu inap save tu long tingting bilong Jehova long pasin antap long samting em i bin mekim long strongpela King Fero. Dispela king i gat pasin antap. Em i tingim em yet i olsem wanpela god ol man i mas lotuim, olsem na em i tingim ol wokboi bilong em, ol Israel, ol i samting nating. Tingim samting em i mekim taim Moses i tokim em long larim ol Israel i go long ples drai nating bilong “litimapim nem” bilong Jehova. Fero i mekim pasin antap na em i bekim tok olsem: “Bikpela em i husat? Bilong wanem mi mas harim tok bilong en na larim yupela Israel i go?”—Kisim Bek 5:1, 2.
6 Taim 6-pela hevi i painim pinis Fero, Jehova i tokim Moses long tokim dispela king bilong Isip: “Yu wok long bikhet long ol manmeri bilong mi na yu no larim ol i go.” (Kisim Bek 9:17) Orait nau Moses i tokaut long namba 7 hevi—ren ais i kam daun na bagarapim graun bilong ol. Bihain long namba 10 hevi, ol Israel i lusim Isip na i go, tasol Fero i senisim tingting na ron bihainim ol. Taim Fero na ami bilong em i go daun long solwara Retsi, ol i no gat rot bilong ranawe. Man! Tingim tingting bilong ol taim wara i kam bek na karamapim ol! Pasin antap bilong Fero i kamapim wanem samting? Ol nambawan gutpela soldia bilong em i tok: “Harim. Bikpela i helpim ol Israel na i pait long yumi. Hariap, yumi ranawe i go. Yumi lusim ol kwik.”—Kisim Bek 14:25.
7. Olsem wanem ol king bilong Babilon i kamapim pasin antap?
7 Jehova i semim tu sampela narapela king i gat pasin antap. Wanpela bilong ol em Senakerip, king bilong Asiria. (Aisaia 36:1-4, 20; 37:36-38) Bihain ol Babilon i daunim ol Asiria, tasol Jehova i semim tu tupela king bilong Babilon. Tingim bikpela kaikai King Belsasar i bin mekim na em wantaim ol pren i dring wain long ol kap ol i bin kisim long tempel, na ol i litimapim nem bilong ol god bilong Babilon. Wantu wanpela han i kamap na i raitim wanpela tok long banis bilong haus. Taim ol i askim profet Daniel long kamapim insait bilong dispela narapela kain rait, em i tokim Belsasar: “God Antap Tru i bin mekim papa bilong yu, Nebukatnesar, i kamap strongpela na bikpela king. . . . Tasol papa bilong yu i ting em i moa yet, . . . na God i bin rausim em na em i no moa i stap king na biknem bilong en i pundaun. ‘Yu pikinini bilong Nebukatnesar na yu save pinis long ol dispela samting. Tasol yu no bin daunim yu yet. Nogat.’ ” (Daniel 5:3, 18, 20, 22) Long dispela nait yet, ami bilong Midia na Persia i daunim Babilon, na ol i kilim i dai Belsasar.—Daniel 5:30, 31.
8. Jehova i mekim wanem long sampela man i gat pasin antap?
8 Orait, tingim sampela narapela man i gat pasin antap na ol i ting lain bilong Jehova i samting nating: em traipela man Goliat bilong ol Filistia, na Haman, praim-minista bilong Persia, na King Herot Agripa, husat i bin bosim provins Judia. Ol i gat pasin antap, olsem na God i kilim i dai dispela 3-pela man, na dispela i semim tru ol. (1 Samuel 17:42-51; Esta 3:5, 6; 7:10; Aposel 12:1-3, 21-23) Samting Jehova i bin mekim long ol dispela man i gat pasin antap i kamapim klia olsem: “Pasin bilong hambak na litimapim nem bilong yu yet bai i mekim yu i pundaun na bagarap.” (Sindaun 16:18) Tru tumas, yumi ken save tru olsem “God i save daunim ol man bilong litimapim nem bilong ol yet.”—Jems 4:6.
9. Olsem wanem ol king bilong Tair i kamap birua?
9 King bilong Tair i no olsem ol king bilong Isip, Asiria, na Babilon. I gat wanpela taim we dispela king i bin helpim lain bilong God. Long taim Devit na Solomon i mekim wok king, em i givim sampela gutpela wokman na ol samting bilong wokim ol haus bilong king na tempel bilong God. (2 Samuel 5:11; 2 Stori 2:11-16) Tasol sori tru, bihain ol Tair i birua long lain bilong Jehova. Bilong wanem ol i kamap birua?—Song 83:3-7; Joel 3:4-6; Amos 1:9, 10.
“Yu Bin Hambak”
10, 11. (a) Husat i olsem ol king bilong Tair? (b) Wanem samting i senisim tingting bilong ol Tair long ol Israel?
10 Jehova i bin kirapim profet Esekiel long tokaut long rong bilong ol lain king bilong Tair. Tok em i mekim long “king bilong Tair” i gat ol tok i stret long ol lain king bilong Tair na long dispela birua bilong bipo, Satan, “em i no bihainim pasin i tru.” (Esekiel 28:12; Jon 8:44) Bipo Satan i wanpela gutpela ensel insait long lain pikinini bilong Jehova long heven. Long rot bilong Esekiel, God Jehova i kamapim as na Satan na ol lain king bilong Tair i hambak. Esekiel i tok:
11 “I olsem yu bin i stap long gaden Iden, dispela gutpela gaden bilong God. Na yu bin bilas long olkain ston i dia tumas . . . Mi bin makim yu olsem wanpela ensel bilong was, . . . Long taim mi mekim yu i kamap long graun, pasin bilong yu i nambawan tru, na yu no gat asua long wanpela samting. Tasol bihain yu mekim pasin nogut na yu gat asua long ai bilong mi. Yu bin mekim bikpela wok bisnis long planti hap, na yu bin pait long ol manmeri bilong helpim dispela bisnis bilong yu, na yu mekim sin. Tru, yu olsem ensel bilong was, tasol yu kamap doti tru long ai bilong mi, na mi rausim yu . . . Yu bin ting pes bilong yu i naispela, na yu bin hambak na litimapim nem bilong yu yet. Yu gat bikpela save tumas, na yu ting dispela save i bilong kisim biknem tasol. Long dispela as tasol mi bin daunim yu tru.” (Esekiel 28:13-17) Tru tumas, pasin hambak i mekim na ol lain king bilong Tair i birua long lain bilong Jehova. Ol Tair i bin kisim bikpela mani kago long rot bilong wok bisnis na ol i kisim biknem long ol gutpela samting bilong ol. (Aisaia 23:8, 9) Ol king bilong Tair i ting ol i samting tru, na ol i kirap daunim lain bilong God.
12. Wanem samting i mekim na Satan i kamap birua bilong Jehova? Em i wok yet long mekim wanem?
12 Wankain olsem ol king bilong Tair, dispela ensel husat i bin kamap Satan, pastaim em i gat savetingting inap long em i ken mekim olgeta wok God i givim long em. Tasol em i no tenkyu long dispela, na em i “bikhet” na sakim pasin bilong God long bosim ol man. (1 Timoti 3:6) Em i ting em i samting tru na em i laik Adam na Iv i lotuim em. Dispela laik nogut i kamap strong na i kamapim sin. (Jems 1:14, 15) Satan i giamanim Iv long kaikai prut bilong dispela wanpela diwai em God i bin tambuim. Bihain, Satan i mekim wok long Iv bilong pulim Adam long kaikai dispela prut tambu. (Stat 3:1-6) Olsem na namba wan man na meri i sakim wok bilong God long bosim ol, na ol i kamap lain bilong lotuim Satan. Pasin antap bilong Satan i bikpela tru, i no gat pinis bilong en. Em i bin traim long giamanim olgeta man long heven na graun, na Jisas Krais tu, long ol i mas lotuim em na sakim wok bos bilong Jehova.—Matyu 4:8-10; KTH 12:3, 4, 9.
13. Pasin antap i kamapim wanem kain kaikai?
13 Olsem na yu inap save olsem Satan em i as bilong pasin antap; dispela pasin i kamapim sin, pen na hevi, na korapsen long nau. Satan em i “god bilong dispela graun,” na em i wok yet long kirapim ol man long hambak na mekim pasin antap. (2 Korin 4:4) Em i save olsem taim bilong em i sot, olsem na em i pait long ol Kristen tru. Em i laik ol i mas lusim God, na laikim ol yet tasol, litimapim nem bilong ol yet, na hambak. Baibel i bin tok profet olsem long “taim bilong las de” ol man bai bihainim ol kain pasin olsem.—2 Timoti 3:1, 2; KTH 12:12, 17.
14. Jehova i save bihainim wanem lo long pasin em i mekim long ol man?
14 Jisas i tokaut long ol samting nogut pasin antap bilong Satan i bin kamapim. Inap 3-pela taim, na long ai bilong ol birua em ol i ting ol i stretpela man, Jisas i tokaut long lo Jehova i save bihainim long pasin em i mekim long ol man. Jisas i tok: “Man i litimapim nem bilong em yet, bai God i daunim em. Tasol man i daunim em yet, bai God i litimapim em i go antap.”—Luk 14:11; 18:14; Matyu 23:12.
Was Gut, No Ken Kisim Pasin Antap
15, 16. Wanem samting i mekim na Hagar i kisim pasin antap?
15 Ol dispela man i bin mekim pasin antap na yumi bin stori long ol, em ol man i gat namba. Olsem wanem? Ol man nating i no inap kisim pasin antap? Nogat, ol inap kisim. Tingim samting i bin kamap long famili bilong Abraham. Abraham i no gat pikinini man bilong kisim ples bilong em, na meri bilong em, Sera, em i lapun pinis na em i no inap moa long karim pikinini. Em pasin bilong ol man long dispela taim bipo olsem, sapos ol i no gat pikinini, ol inap kisim namba 2 meri na kamapim pikinini. Long dispela taim, God i bin orait long kain marit olsem, long wanem, i no taim yet bilong em i kamapim bek lo bilong marit em i bin makim bilong ol man i lotu tru long em.—Matyu 19:3-9.
16 Sera i tokim Abraham na Abraham i orait long kamapim wanpela pikinini man long rot bilong wokmeri bilong Sera, em Hagar. Hagar, wanpela meri Isip, em i kamap namba 2 meri bilong Abraham na em i kisim bel. I stret sapos em i bin amamas long bikpela namba em i kisim. Tasol em i no mekim, nogat, em i kisim pasin antap. Baibel i tok: “Taim Hagar i save long em i gat bel, em i bikhet long [Sera].” Dispela pasin i kamapim bikpela hevi long famili bilong Abraham, olsem na Sera i rausim Hagar. Tasol i gat rot bilong stretim dispela hevi. Ensel bilong God i tokim Hagar, olsem: “Yu go bek long [Sera] na bihainim olgeta tok bilong en.” (Stat 16:4, 9) Hagar i bihainim dispela tok, na em i daun long Sera, na long dispela rot em i kamap tumbuna bilong bikpela lain manmeri.
17, 18. Bilong wanem yumi olgeta i mas was gut, nogut yumi kisim pasin antap?
17 Samting i painim Hagar i kamapim olsem taim sindaun bilong wanpela man o meri i senis na i kamap gutpela moa, em inap kisim pasin antap. Dispela i lainim yumi olsem maski sapos wanpela Kristen i mekim gut wok bilong God, em inap kisim pasin antap taim em i kisim planti mani kago o bikpela namba. Na tu, em inap kisim dispela pasin sapos ol narapela i litimapim nem bilong em long savepasin o save bilong em, o long ol gutpela wok em i mekim. Em nau, ol Kristen i mas was gut, nogut ol i kisim pasin antap. Na em i bikpela samting moa yet long ol i mas was gut sapos wok bilong ol i kamap gutpela o ol i kisim bikpela wok moa.
18 Tingting bilong God long dispela pasin i mas i stap olsem nambawan as na yumi laik sakim pasin antap. Baibel i tok: “Ol man bilong mekim pasin nogut i save bikhet na hambak oltaim. Olsem na sin i pulap long laip bilong ol.” (Sindaun 21:4) Na Baibel i givim tok lukaut long ol Kristen “i gat planti mani samting bilong dispela graun,” long ol i no ken “bikhet na litimapim nem bilong ol yet,” olsem kisim pasin antap. (1 Timoti 6:17; Lo 8:11-17) Ol Kristen i no gat planti mani samting ol i mas abrusim “pasin bilong bel nogut,” na ol i mas tingim olsem olgeta man, maski ol i maniman o rabisman, ol inap kisim pasin antap.—Mak 7:21-23; Jems 4:5.
19. Long wanem rot Usia i bagarapim gutnem bilong em?
19 Pasin antap na sampela narapela pasin nogut inap bagarapim gutpela pasin pren wantaim Jehova. Tingim ol yia taim King Usia i kirap mekim wok king. Baibel i tok: “King Usia i gat strongpela tingting long bihainim laik bilong God, na em i mekim gutpela pasin long ai bilong Bikpela . . . Taim Usia i strong yet long bihainim laik bilong God, orait God i helpim em na olgeta samting Usia i mekim, i kamap gutpela.” (2 Stori 26:4, 5) Tasol sori tru, King Usia i bagarapim gutnem bilong em, long wanem, “em i ting em i strongpela king tru, olsem na em i bagarap.” Em i ting em i moa yet, olsem na em i go insait long tempel bilong mekim ofa bilong smok i gat gutpela smel. Taim pris i tokim em olsem em i no ken mekim dispela pasin antap, “em i kros tru.” Olsem na Jehova i givim sik lepra long em, na taim em i dai, God i no orait long em.—2 Stori 26:16-21.
20. (a) Bilong wanem gutnem bilong King Hesekia i laik bagarap? (b) Bai yumi stori long wanem samting long stadi i kamap bihain long dispela?
20 Yu ken skelim dispela samting wantaim stori bilong King Hesekia. Wanpela taim gutnem bilong king i laik bagarap, long wanem, “em i bikhet.” Tasol gutpela tru, Hesekia “i lusim pasin bikhet na i daunim [em] yet” na God i orait gen long em. (2 Stori 32:25, 26) Samting i helpim Hesekia long lusim pasin antap em pasin daun. Tru tumas, pasin daun i narapela kain long pasin antap. Olsem na long stadi i kamap bihain long dispela, yumi bai stori long olsem wanem yumi ken kisim pasin daun na holimpas dispela pasin.
21. Ol Kristen i gat pasin daun ol inap tingting long wanem gutpela samting?
21 Tasol yumi no ken lusim tingting long ol samting nogut i bin kamap long pasin antap. “God i save daunim ol man bilong litimapim nem bilong ol yet,” olsem na yumi mas tingting strong long sakim pasin hambak. Taim yumi wok strong long stap olsem Kristen i gat pasin daun, yumi ken tingting long abrusim bagarap long bikpela de bilong God, we ol man bilong pasin antap na ol wok nogut bilong dispela pasin bai pinis olgeta. Long dispela taim Bikpela “bai i daunim olgeta hambakpasin bilong ol man i save litimapim nem bilong ol yet, na bai ol i sem nogut tru. Na tu ol giaman god bai i pinis olgeta, na Bikpela tasol bai i kisim biknem long dispela taim.”—Aisaia 2:17.
Sampela Tok Bilong Tingim Gut
• Man i gat pasin antap em i wanem kain man?
• Wanem samting i as bilong pasin antap?
• Wanem samting inap kirapim man long kisim pasin antap?
• Bilong wanem yumi mas was gut, nogut yumi kisim pasin antap?
[Piksa long pes 23]
Fero i gat pasin antap na em i kisim sem long dispela
[Piksa long pes 24]
Hagar i kisim namba na dispela i mekim na em i kisim pasin antap
[Piksa long pes 25]
Hesekia i daunim em yet na God i orait gen long em