Sampela Ples long Graun Bilong Promis

Jopa–Gutpela Pasis Bilong Bipo

LONG nambis bilong kantri Israel i gat wesan tasol, na i no gat ol gutpela pasis bilong ol sip i ken sua long en. Olsem na ol Israel ol i no man bilong raun long solwara.

Wara Nail i karim wesan i go daun long solwara, na solwara na win i hipim ol dispela wesan na long nambis bilong Israel i gat wesan tasol.a Olsem na sapos yu kalap long sip na sip i bihainim nambis bilong Israel kirap long boda bilong Isip na i go inap long Maunten Karmel, bai yu no lukim wanpela gutpela pasis i stap.

Tasol long nambis bilong Israel, namel long boda bilong Isip na Maunten Karmel, bai yu lukim wanpela liklik maunten i stap na taun Jopa i stap long en. Long piksa hia yu ken lukim ol traipela ston i stap long solwara longwe liklik long nambis na i olsem pasis i stap. Pasis bilong Jopa i no gutpela olsem pasis bilong Tolemes long hap bilong not, tasol Jopa i kisim nem long pasis bilong en. (Aposel 21:⁠7) Pasis bilong Jopa i stap nambawan gutpela pasis bilong ol sip i ken sua long en i go inap long taim King Herot i wokim pasis long Sisaria na dispela pasis i winim pasis bilong Jopa. Dispela i helpim yumi long save long sampela tok Baibel i mekim long Jopa.

Taim King Hiram bilong Tair i tok long helpim Solomon long wokim haus lotu, em i tok: “Bai [mipela] i bungim bungim ol dispela diwai [bilong Lebanon] long solwara na pasim strong, na bringim i go long taun Jopa. Orait ol wokman bilong yu i ken kisim ol dispela diwai long Jopa na bringim i go antap long Jerusalem.” (2 Stori 2:​1, 11, 16) Ating ol i bungim bungim ol dispela diwai long solwara long ples Tair o Saidon long hap bilong Fonisia na salim i go long Jopa. (Aisaia 23:​1, 2; Esekiel 27:​8, 9) Ol i putim ol diwai long solwara na diwai i abrusim Karmel na i go kamap long Jopa. Nau ol wokman i kisim ol dispela diwai na bringim i go long Jerusalem, em i stap longwe long Jopa inap 55 kilomita. Taim ol Israel i lusim kalabus long Babilon na ol i wokim gen haus lotu bilong God long Jerusalem, ol i kisim ol diwai sida long hap bilong Lebanon na bringim ol i kam long taun Jopa.​—⁠Esra 3:⁠7.

Piksa bilong sip long narapela pes hia em i makim ol sip bilong ol Fonisia. Ol wokman i bringim ol dispela diwai i kam long Jopa, ating ol i bin kalap long kain sip olsem. Taim yu lukim dispela piksa bilong sip, yu ken tingim Jona. Jehova i bin tokim Jona long i go long Ninive, tasol Jona i ranawe i go long taun Tarsis. “[Jona] i go long liklik taun Jopa, na em i painim wanpela sip i laik i go long Tarsis. Em i baim sip na i go antap long en. Em i laik lusim Bikpela na ranawe i go.”​—⁠Jona 1:​1-3.

Ating Jona i kalap long kain sip olsem. Dispela kain sip i save karim kago, na em inap raun longwe lusim Jopa i go kamap long Tarsis (ating em kantri Spen long bipo). Poret bilong sip em i longpela na i antap, na i gat anka ston i hangamap klostu long en. Ol pasendia na ol man i wok long pul na sampela kago i sindaun long plua bilong sip. Yu no inap lukim plua bilong sip long dispela piksa. Aninit long plua bilong sip, hasis i stap, na ol i pulimapim sampela kago moa long dispela hap. Jona i go daun insait long hasis bilong sip na em i slip. Ol i wokim sip long ol plang bilong strongpela diwai pain, na ol i kisim diwai sida na sapim wanpela longpela mas bilong taitim sel long en. Lukim piksa bilong dispela sip, long tupela arere bilong en yu inap lukim ol pul bilong sip. (Ating ol i kisim diwai ok long Basan na wokim ol dispela pul.) Long tingting bilong yu, tingim ol samting i kamap taim Jona i stap long dispela sip na sip i ron long solwara na i gat bikpela win na si i sakim sip na sip i laik bagarap. Ol boskru i pret nogut tru, na olgeta wan wan i singaut long god bilong ol yet, i go inap long taim ol i kisim Jona na tromoi em i go daun long solwara, long wanem ol i no laik bagarap.​—⁠Esekiel 27:​5-9; Jona 1:​4-15.

Long taim bilong ol aposel, i gat wanpela kongrigesen Kristen i stap long Jopa, na ating sampela long dispela kongrigesen ol i wok long bris, na sampela, ating pastaim ol i wok olsem boskru long sip. Wanpela meri bilong lain Juda i stap long dispela kongrigesen, nem bilong em Dorkas (Tabita). “Oltaim em i save mekim ol gutpela pasin na em i save helpim ol manmeri i sot long ol samting.” Long yia 36, sik i painim Dorkas na em i dai, na planti manmeri i krai nogut tru, long wanem ol i tingim ol gutpela wok em i bin mekim. Olsem na ol Kristen i go long taun Lida (long nau ol i kolim Lod na i stap klostu long ples balus bilong Tel Aviv), na bringim aposel Pita i kam long Jopa. Pita i kirapim bek dispela gutpela meri, na “tok bilong dispela samting Pita i mekim i go nabaut long olgeta hap bilong taun Jopa, na ol manmeri i harim. Na planti ol i bilip long Bikpela.”​—⁠Aposel 9:​36-42.

Pita i stap planti de long Jopa. Em i stap wantaim wanpela man nem bilong em Saimon. Dispela man i save kisim ol skin bilong bulmakau samting na redim bilong mekim ol arapela kain wok. Taim Pita i stap long Jopa em i lukim wanpela samting olsem driman, na dispela i kirapim em long kisim sampela brata long kongrigesen bilong Jopa na ol i wokabaut i go long taun Sisaria long hap bilong not. Long dispela hap, Pita i autim tok long Kornilius, em kepten bilong wanpela lain soldia bilong Rom, na Kornilius i kisim baptais. Em i namba wan man bilong ol arapela lain i kamap Kristen na God i makim em long spirit holi. (Aposel 9:​43–10:48) Taim ol brata i go bek long Jopa na tokim ol Kristen long dispela samting, ol Kristen i amamas nogut tru, long wanem dispela samting em i wanpela nupela samting i kamap long lain Kristen!

Long nau, Jopa em i hap bilong taun Tel Aviv-Jaffa, na planti manmeri ol i go lukim dispela ples na ol inap tingim bek ol samting i bin kamap long dispela gutpela pasis bilong bipo, em Baibel i stori long en.

[Futnot]

[Piksa Kredit Lain long pes 16]

Pictorial Archive (Near Eastern History) Est.

[Piksa Kredit Lain long pes 17]

Pictorial Archive (Near Eastern History) Est.