Ol Man i Gat Pasin Daun Bai Kisim Graun
“Mi ting graun wantaim ol diwai na wara samting bai kamap gutpela gen. . . . I no tumora long moningtaim, nogat; em bai kamap bihain bihain, taim i gat nupela skai na nupela graun.”—Em tok bilong Jean-Marie Pelt bilong Frans, em wanpela saveman bilong ol samting bilong graun.
PLANTI man i bel hevi long graun i wok long bagarap na sindaun bilong planti man i nogut, olsem na ol i gat laik tru long lukim graun i kamap gutpela ples paradais. Tasol dispela laik i no wanpela driman nating bilong ol man long nau, nogat. Long bipo yet Baibel i tok promis long Paradais bai kamap bek long graun. Ol tok bilong Jisas olsem “ol manmeri i save daunim nem bilong ol yet . . . bai God i givim olgeta graun long ol,” na “mipela i mas bihainim laik bilong yu long graun olsem ol i save bihainim long heven,” em ol tok bilong Baibel planti man i save long en. (Matyu 5:5; 6:10) Tasol long nau i no gat planti man i bilip olsem graun bai kamap Paradais na ol man i gat pasin daun bai i stap long en. Planti man i tok ol i Kristen ol i ting Paradais i lus pinis.
Wanpela nius bilong Frans (La Vie) i kamapim as na planti man bilong Misin Katolik i no bilip moa long wanpela paradais long graun o long heven. Nius i tok: “Inap 1,900 yia Misin Katolik i bin skulim ol man long paradais, tasol long nau [dispela tok long] paradais i no kamap moa namel long ol lain bilong mekim lotu, na long ol tok bilong lotu long Sande, na long ol skul bilong lotu.” Ol i tok, dispela tok paradais em wanpela tok hait na ol man i paul tru long en. Sampela man bilong autim tok bilong lotu i save abrusim dispela tok, long wanem, em i “kirapim ol man long piksaim long tingting ol amamas ol inap kisim long graun.”
Frédéric Lenoir, em saveman bilong skelim sindaun bilong ol man long ol samting bilong lotu, em i tok, paradais em wanpela piksa nating i stap long tingting bilong ol man. Na Jean Delumeau, wanpela saveman na em i bin raitim planti buk long dispela samting, em i ting truim bilong ol tok promis bilong Baibel em i olsem tok piksa tasol. Em i tok: “Dispela askim olsem, ‘I gat wanpela hap bilong Paradais i stap yet?’ Bilip Kristen i bekim olsem: Man Bilong Kisim Bek yumi em i kirap bek pinis, olsem na long wanpela taim bihain, yumi olgeta bai bungim han na stap amamas.”
Orait yu ting yumi ol man bilong nau inap bilip olsem graun bai kamap Paradais? Wanem samting bai painim graun long bihain? Ol samting bilong bihain i no klia tumas long yumi o yumi inap lukim klia? Stori i kamap bihain long dispela bai bekim ol dispela askim.
[Piksa Kredit Lain long pes 2]
COVER: Emma Lee/Life File/Getty Images