Yu Tingim Yet?

Olsem wanem? Yu bin tingim gut ol tok bilong ol nupela Wastaua? Sapos olsem, yu bai amamas long tingim gen ol tok i stap daunbilo:

◻ Paslain long tupela Kristen i tingting long pasim tok long marit, tupela i ken givim wanem sampela askim long ol yet?

‘Olsem wanem? Mi save gut olsem narapela i strong long ol samting bilong spirit na em i givim bel tru long God? Mitupela inap mekim wok bilong God wantaim inap oltaim? Mitupela i save gut long pasin bilong narapela narapela? Mi bilip tru olsem mitupela inap wok gut wantaim inap oltaim oltaim? Mitupela i save gut long ol samting narapela i mekim bipo na sindaun bilong narapela long nau?’​—⁠8/15, pes 31.

◻ Jisas i tingim wanem samting taim em i tokim ol disaipel bilong em: “Yupela i olsem sol bilong graun”? (Matyu 5:​13)

Taim Jisas i mekim dispela tok, em i makim olsem taim ol disaipel bilong em i autim tok bilong Kingdom bilong God long ol narapela, dispela tok inap helpim ol dispela man long i stap laip, olsem ol i no ken bagarap. Tru tumas, ol man i bihainim ol tok bilong Jisas, ol inap stap gut na mekim wok bilong God maski ol i stap namel long ol man em pasin bilong ol i nogut na ol i no tingim ol samting bilong spirit.​—⁠8/15, pes 32.

◻ Olsem wanem tupela yangpela i gat tingting long marit ol i ken abrusim ol pasin inap kirapim ol long mekim pasin pamuk?

Sapos yu tingting long maritim wanpela na yu raun wantaim em, nogut yutupela tasol i stap. Mobeta yutupela i bung wantaim ol narapela o stap long ai bilong ol man. Was gut long ol samting yupela i mekim bilong soim olsem narapela i laikim tru narapela​—⁠narapela i mas pilim tingting bilong narapela, nogut bel bilong em i gat tok.​—⁠9/1, pes 17, 18.

◻ Gutpela tingting em i wanem samting?

Man i gat gutpela tingting em inap save long as tru bilong ol samting i kamap na em i mekim wok long dispela save long stretim ol hevi, na long winim ol mak em i bin putim bilong mekim sampela wok, na long abrusim ol samting inap bagarapim em, na long helpim ol narapela long mekim olsem. (Sindaun 4:⁠1)​—⁠9/15, pes 13.

◻ Jehova i laik bai yumi mas mekim wanem samting long nau?

Bikpela samting Jehova i laik bai yumi mekim​—⁠yumi mas harim tok bilong Pikinini bilong em na bihainim pasin na tok bilong em. (Matyu 16:24; 1 Pita 2:​21)​—⁠9/15, pes 22.

◻ Husat tasol inap i stap bel isi?

Jehova em i ‘God bilong givim bel isi long yumi,’ olsem na ol man i laikim tumas God na ol i save tingim gut ol stretpela lo bilong em, ol tasol inap i stap bel isi. (Rom 15:33)​—⁠10/1, pes 11.

◻ Olsem wanem Josep i kisim dispela gutpela pasin bilong sanap strong long bihainim pasin i stret na tok nogat long meri bilong Potifar long olgeta de?

Josep i tingim pasin bilong em long pas gut wantaim Jehova em i gutpela samting tru, winim amamas bilong sotpela taim. Na tu, maski em i no stap aninit long wanpela lo bilong God, Josep i save gut long ol stretpela lo. (Stat 39:⁠9)​—⁠10/1, pes 29.

◻ Olsem wanem em i bikpela samting long lusim rong bilong ol brata?

Bilong God i ken wok yet long lusim rong bilong yumi, yumi mas lusim rong bilong ol brata bilong yumi. (Matyu 6:​12, 14; Luk 11:⁠4)​—⁠10/15, pes 17.

◻ Wanem sampela kain rong em Matyu 18:​15-​17 i tok long en? Dispela i makim wanem samting?

Ol dispela kain rong Jisas i toktok long en em ol bikpela rong, long wanem, ol dispela rong inap mekim na ol brata i mas tingim dispela man “i olsem wanpela haiden na olsem man bilong kisim takis.” Ol Juda i no save bung wantaim ol man bilong narapela lain, na ol i abrusim tru ol man bilong kisim takis. Olsem na tok bilong Matyu 18:​15-​17 i makim ol bikpela rong, na i no ol popaia o pasin kranki wanpela i bin mekim long yu na yu inap lusim dispela popaia bilong em na lusim tingting long en. (Matyu 18:​21, 22)​—⁠10/15, pes 19.

◻ Man i laikim tru Tok Bilong God, em i mas mekim wanem?

Man i laikim tumas Tok Bilong God na dispela i kirapim em long bihainim ol lo bilong en long i stap bilong em. (Song 119:​97, 101, 105) Bilong bihainim gut Tok Bilong God, long olgeta taim yumi mas wok long stretim stretim tingting na wokabaut bilong yumi.​—⁠11/1, pes 14.

◻ Yumi kisim planti samting tru long Jehova, na bai yumi bekim bek wanem samting long bikpela King na Man bilong givim ol samting?

Baibel i kamapim olsem nambawan presen tru yumi ken givim long Jehova em “yumi mas givim biknem long [em] . . . na dispela pasin i mas i stap olsem ofa yumi save givim long God.” (Hibru13:15) Bilong wanem? Long wanem, dispela ofa i bilong helpim ol man long kisim laip, na dispela em bikpela tingting bilong Jehova nau long dispela taim bilong pinis. (Esekiel 18:23)​—⁠11/1, pes 21.

◻ Solomon i tingim wanem samting taim em i tok: “Tok bilong ol saveman i olsem ol stik i gat sap, em ol wasman i holim bilong stiaim ol [“bulmakau,” NW ] long en”? (Saveman 12:⁠11)

Tok bilong ol man i gat gutpela tingting na save bilong God i kirapim ol man i kaunim o harim tok bilong Baibel long wokabaut i go na bihainim stret ol dispela gutpela tok ol i bin kaunim o harim.​—⁠11/15, pes 21.

◻ Man i laik kisim planti wok, em i mas i gat stretpela tingting long wanem samting? (1 Timoti 3:⁠1)

Bilong mekim olsem em i mas skelim gut. Nogut wanpela brata tasol i mekim planti wok na dispela i mekim na em i lusim amamas bilong em long wok bilong Jehova. Pasin bilong givim bel long wok em i samting bilong amamas long en, tasol pasin bilong givim bel long mekim wok i mas kamapim olsem man i stap daun na i “tingting gut na wokabaut.” (Taitus 2:​12; KTH 3:​15, 16)​—⁠12/1, pes 28.

◻ Olsem wanem papamama i ken winim ol hevi na mekim wok bilong ol olsem papamama?

God i tok ol papamama i mas i stap olsem gutpela piksa, gutpela poroman, man bilong toktok gut wantaim narapela, na ol tisa bilong ol pikinini. (Lo 6:​6, 7)​—⁠12/1, pes 32.