Beten na Pasin Daun i Bikpela Samting

Jisas i bin tokim ol disaipel bilong em long wanpela tok piksa na bai ol i mas beten oltaim. (Luk 11:5-13) Ating em i stap yet long Samaria o long Galili na em i tokim ol gen olsem ol i mas beten oltaim. Em i mekim narapela tok piksa olsem:

“Long wanpela taun i gat wanpela jas i stap na em i no save pret long God na em i no save rispek long man. Na i gat wanpela wido long dispela taun na em i wok long i go long dispela jas na tok, ‘Taim mi sanap long kot, yu mas stretim rong narapela i mekim long mi.’ Pastaim jas i no laik helpim em, tasol bihain em i tokim em yet, ‘Mi no save pret long God o rispek long wanpela man, tasol dispela wido i wok long givim hevi long mi, olsem na bai mi stretim rong narapela i mekim long em na bai em i no ken kam olgeta taim na mekim mi les tru.’”—Luk 18:2-5.

Jisas i kamapim insait bilong dispela stori na em i tok: “Yupela harim tok dispela jas i mekim, maski em i no stretpela man! Orait olsem wanem? Ol manmeri God i bin makim na ol i wok long krai long em long san na nait, ating God bai i no stretim rong ol arapela i mekim long ol, a? Nogat tru, em bai stretim. Na tu, em bai i no les kwik long ol.” (Luk 18:6, 7) Tok Jisas i mekim long Papa bilong em i makim wanem?

Jisas i laik tok God Jehova i no wankain olsem dispela jas nogut. Nogat. Jisas i laik bai yumi save olsem, sapos wanpela jas nogut i helpim meri i wok long krai na askim em long kisim helpim, orait yumi ken bilip tru olsem God i gat stretpela pasin i save mekim gut long ol man, na em bai harim beten bilong lain bilong em sapos ol i wok yet long beten. Yumi inap kliagut long dispela tok bilong Jisas, em i tok: “Mi tokim yupela: Kwiktaim [God] bai stretim rong ol arapela i mekim long ol.”—Luk 18:8.

Planti jas i no save mekim stretpela kot long ol man nating na ol man i no gat nem, ol i save helpim ol man i gat bikpela namba na ol maniman. Tasol God i no save mekim olsem. Long taim em yet i makim, em bai givim strafe long ol man nogut, tasol em bai givim laip oltaim long ol wokman bilong em.

Husat i gat wankain bilip olsem dispela wido? Hamas man i bilip tru olsem “kwiktaim [God] bai stretim rong ol arapela i mekim long ol”? I no longtaim Jisas i bin mekim tok piksa long pasin bilong beten oltaim. Nau Jisas i tok, em i bikpela samting long man i bilip long strong bilong beten, em i tok: “Taim Pikinini bilong man i kam, bai em i lukim trupela bilip i stap long graun o nogat?” (Luk 18:8) Dispela tok i makim olsem taim Krais i kam, sampela man tasol bai i gat dispela kain bilip.

Sampela man i harim dispela askim bilong Jisas, ol i ting ol i gat strongpela bilip, na ol narapela man nogat. Ol i bilip olsem ol i stretpela man, na ol i daunim ol arapela. Olsem na Jisas i mekim tok piksa bilong makim ol dispela man:

“Tupela man i go long tempel long beten, wanpela em Farisi na narapela em takisman. Farisi i sanap na beten long tingting bilong em yet olsem, ‘God, mi tenkyu olsem mi no olsem ol arapela man, em ol i man bilong stil, mekim pasin i no stret, na mekim pasin adaltri. Na tu, mi tenkyu olsem mi no olsem dispela takisman. Tupela taim long wik mi save tambu long kaikai na mi save givim namba 10 hap bilong olgeta samting mi kisim.’”—Luk 18:10-12.

Ol Farisi i save mekim dispela kain pasin long ai bilong ol man bambai ol i ting ol i stretpela man. Ol i save tambu long kaikai long ol de bilong bikpela maket, em olgeta Mande na Fonde, na bai planti manmeri i lukim ol. Na ol i save tilim ol liklik sayor tu long 10-pela hap na givim wanpela hap long God. (Luk 11:42) Sampela mun paslain long dispela, tingting bilong ol Farisi long ol man nating i kamap ples klia, ol i tok: “Dispela lain em ol i no save long Lo [em tingting bilong ol Farisi] ol i lain bilong bagarap tasol.”—Jon 7:49.

Jisas i mekim narapela tok piksa, em i tok: “Tasol takisman i sanap longwe na em i no laik lukluk i go antap long skai. Em i wok long paitim bros bilong em na tok, ‘God, marimari long mi, mi wanpela sinman.’” Tru tumas, dispela takisman i daunim em yet na i tokaut olsem em i sinman, olsem na Jisas i tok: “Mi tokim yupela: Dispela takisman i go daun long haus bilong en, em i kamap stretpela man moa winim dispela narapela man. Long wanem, man i litimapim nem bilong em yet, em bai kisim sem, na man i daunim em yet, em bai kisim biknem.”—Luk 18:13, 14.

Em nau, Jisas i skulim ol disaipel olsem ol i mas mekim pasin daun. Dispela i helpim ol disaipel bilong em. Long wanem, long dispela taim bipo, ol Farisi i kirapim ol man long tingim biknem na namba olsem bikpela samting. Olsem na dispela em i gutpela tok kaunsel bilong olgeta man husat i bihainim Jisas.