“Jisas Krais Em i Bikpela”—Olsem Wanem na Wanem Taim?
LONG Buk Baibel, Song 110:1 i tok: “Bikpela i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ ” Namba wan tok “Bikpela” i makim husat? Na em i toktok wantaim husat?
Sapos ol i tanim stret dispela tok olsem em i stap long tok Hibru long pastaim, kwiktaim bai yumi save: “Jehova i tokim Bikpela bilong mi olsem: . . .” Olsem na namba wan tok “Bikpela” i makim God I Gat Olgeta Strong, em Jehova yet. Sampela Baibel (olsem King James Version) i raitim namba wan tok “Bikpela” long bikpela rait (“BIKPELA”) bilong makim nem bilong God. Taim ol man i tanim Baibel tok Hibru i go long tok Grik (Septuagint) na bihain ol i raitim gen, ol tu i rausim nem bilong God long dispela ves na raitim “Bikpela” bilong makim Jehova. Bilong wanem ol i mekim olsem? Ol Juda i pret long kolim nem bilong God (YHWH), olsem na ol i haitim na ol i raitim tok “Bikpela.” Wanpela saveman (A. E. Garvie) i tok: “Ol i raitim tok ‘Bikpela’ [kyʹri·os], long wanem, taim ol Juda i kaunim Baibel insait long haus lotu bilong ol na ol i kamap long nem bilong God, em Yahveh [Jehova], ol i kolim tok ‘Bikpela.’ ”
Baibel i makim Jehova em i “God, Bikpela.” (Stat 15:2, 8; Aposel 4:24; KTH 6:10) Na Baibel i kolim em “Bikpela wanpela tasol em i God,” na “Bikpela bilong olgeta hap bilong graun.” (Josua 22:34; 3:13; KTH 11:4) Orait, husat dispela narapela “Bikpela” em Song 110:1 i tok long em, na olsem wanem God i makim em i stap “Bikpela”?
Krais Jisas em i “Bikpela”
Long fopela Gutnius ol i kolim Jisas olsem “Bikpela.” Luk na Jon i mekim planti taim. Long taim bilong ol aposel, ol i save kolim dispela tok bilong makim ol i daun long man; em i wankain olsem tok “Bikman.” (Jon 12:21; 20:15) Mak i no kolim dispela tok “Bikpela” planti taim; em i kolim Jisas, “Tisa.” (Skelim Mak 10:51 wantaim Luk 18:41.) Long rot i go long Damaskus, taim Pol i tok, “Bikpela, yu husat?” em gutpela pasin tasol bilong mekim askim. (Aposel 9:5) Tasol taim ol disaipel i save gut long Bikman bilong ol, ol i kirap long kolim em “Bikpela” bilong givim biknem long em.
Jisas i dai na kirap bek na taim em i no i go antap yet long heven, em i kamap long ai bilong ol disaipel na em i mekim narapela kain tok, olsem: “God i givim mi bikpela namba na strong bilong bosim olgeta samting long heven na long graun.” (Matyu 28:18) Long de Pentikos, long strong bilong spirit holi, Pita i kolim tok bilong Song 110:1 na em i tok: “Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai . . . God i makim em i stap Bikpela.” (Aposel 2:34-36) Jisas i stap gut long God i go inap long em i dai long diwai, olsem na em i kirap bek na em i kisim bikpela pe tru. Em i kisim nem olsem “Bikpela” long heven.
Pol i strongim tok bilong Pita, em i tok, God “i bringim em [Krais] i go sindaun long han sut bilong em long heven. Olsem na Krais i stap antap tru long olgeta kain strongpela spirit, . . . na long olgeta samting i gat strong. Em i stap antap long olgeta man i gat nem nau long dispela taim, na long taim bihain tu.” (Efesus 1:20, 21) Jisas i kamap Bikpela i winim olgeta narapela bikpela man na em bai stap olsem i go long nupela taim bihain. (1 Timoti 6:15) God i mekim Jisas “i stap antap tru,” na givim nem long em “i winim olgeta arapela nem,” na bai olgeta “i ken tokaut olsem, ‘Jisas Krais em i Bikpela.’ Na long dispela pasin ol bai givim biknem long God Papa.” (Filipai 2:9-11) Dispela i truim namba wan hap bilong Song 110:1, na “ol ensel na ol strongpela spirit na olgeta samting i gat strong, olgeta i stap aninit long em.”—1 Pita 3:22; Hibru 8:1.
Long Olpela Testamen, dispela tok ‘Bikpela i winim olgeta narapela bikpela man’ i makim Jehova tasol. (Lo 10:17; Song 136:2, 3) Tasol spirit bilong God i kirapim Pita long tok long Krais, olsem: “Jisas Krais em i Bikpela bilong olgeta man.” (Aposel 10:36) Tru tumas, em i “stap Bikpela bilong ol man i dai pinis na bilong ol man i stap laip.” (Rom 14:8, 9) Ol Kristen i save tokaut olsem Krais em i Bikpela bilong ol na ol i bilong em, na ol i daun long em, long wanem, em i baim ol long blut bilong em i dia tumas. Na kirap long de Pentikos long yia 33, Jisas i bin i stap King na Bikpela bilong lain bilong em, i winim olgeta narapela king na bikpela man. Tasol long yia 1914, God i givim bikpela namba long em bilong mekim wok olsem King, na bai ol birua “i stap aninit long em” na em i taim stret bilong em long “bosim” ol, olsem Song 110:1, 2 i tok.—Hibru 2:5-8; KTH 17:14; 19:16.
Taim Jisas i no i dai na kirap bek yet, em i tok, “Papa bilong mi em i putim pinis olgeta samting long han bilong mi.” Orait, wanem insait bilong dispela tok? (Matyu 11:25-27; Luk 10:21, 22) Dispela i no stori long wok bos God i givim long Jisas, olsem ol tok yumi stori pinis long en. Long dispela tok long Matyu na Luk, Jisas i stori long save i hait long ol saveman bilong graun, tasol God i kamapim long rot bilong Jisas, long wanem, Jisas i “save long Papa.” Taim Jisas i baptais long wara na em i kamap pikinini spirit bilong God, em inap tingim bek i stap bilong em long heven bipo na olgeta save em i bin holim long dispela taim, tasol dispela i narapela kain long taim em i kamap Bikpela long bihain.—Jon 3:34, 35.
Bikpela Krais Jisas i Narapela
Taim Nupela Testamen i kamapim hap tok bilong Olpela Testamen i stori long “Bikpela” na dispela tok “Bikpela” i makim God Jehova, long sampela Baibel dispela i no klia tumas. Skelim Luk 4:19 wantaim Aisaia 61:2. Sampela man i ting, dispela tok “Bikpela” i makim God Jehova long Olpela Testamen em i makim Jisas long Nupela Testamen, long wanem, ol i ting taim Jisas i stap man long graun em i Jehova. Tasol i no gat liklik hap tok long Baibel i helpim dispela tingting bilong ol. Baibel i makim klia olsem Jisas em i narapela na Papa em i narapela. Jisas i autim nem bilong Papa na em i stap maus bilong Papa.—Jon 5:36, 37.
Lukim ol tok bilong Olpela Testamen hia olsem Nupela Testamen i kamapim. Aposel 4:24-27 i kamapim tok bilong Song 2:1, 2 na i stori long tupela, em God Jehova na dispela man em i makim, em Krais. Rom 11:33, 34 i kamapim tok bilong Aisaia 40:13, 14 na yumi ken save, dispela tok “Bikpela” i makim God, long wanem, em i As bilong olgeta gutpela save na tingting. Pol i raitim pas long kongrigesen long Korin na em i kamapim gen dispela askim, olsem: “Husat i save long tingting bilong Bikpela?” na bihain em i tok: “Tasol tingting bilong Krais i stap long yumi.” Bikpela Jisas i kamapim tingting bilong Jehova long ol disaipel bilong em long planti bikpela samting.—1 Korin 2:16.
Sampela taim wanpela hap tok long Olpela Testamen i tok long Jehova, tasol Jehova i givim namba na strong long Jisas, na long dispela rot truim bilong dispela tok i kamap long Jisas. Olsem: Song 34:8 i tok: “Yupela yet i mas traim na lukim na bai yupela i save olsem Bikpela [Jehova] i gutpela tru.” Tasol Pita i kolim dispela tok long Bikpela Krais Jisas taim em i tok: “Yupela i traim pinis pasin Bikpela i save mekim long yumi, na yupela i save, Bikpela i gutpela tru.” (1 Pita 2:3) Pita i makim olsem dispela tok i stret long Krais Jisas tu. Ol Kristen i kisim save long God Jehova na Krais Jisas na taim ol i bihainim, tupela wantaim, em Papa na Pikinini, i mekim gut long ol. (Jon 17:3) Tasol tok bilong Pita i no makim olsem Nambawan Bikpela Jehova na Bikpela Krais Jisas i wanpela. Nogat.
Aposel Pol i makim klia olsem God Jehova i narapela na Pikinini bilong em, Krais Jisas, i narapela. Pol i tok: “Yumi gat wanpela God tasol, em God Papa. Em i as bilong olgeta samting, na yumi stap olsem ol manmeri bilong em stret. Na i gat wanpela Bikpela tasol, em Jisas Krais. Em i bin wokim olgeta samting, na yumi bin kisim laip long em.” (1 Korin 8:6; 12:5, 6) Long pas em i raitim long ol Efesus tu, em i makim klia olsem dispela “wanpela Bikpela tasol,” Krais Jisas, em i narapela long dispela “wanpela God, em i Papa bilong yumi olgeta.”—Efesus 4:5, 6.
Jehova Em i Nambawan Bikpela
Kirap long yia 1914, tok bilong Kamapim Tok Hait 11:15 i kamap tru, olsem: “Bikpela bilong yumi [God Jehova] wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.” Wanpela buk i stori olsem: “Taim Krais i pinisim olgeta samting i gat strong (1 Ko 15:25), bai em i aninit long God Papa. Olsem bai em inapim tru wok bilong em olsem Bikpela, na bai God i stap het tru bilong olgeta samting (1 Ko 15:28).” (The New International Dictionary of New Testament Theology, Volyum 2, pes 514) Krais bai bosim ol samting inap 1,000 yia na bihain bai em i bekim long Papa bikpela namba na strong em Papa, dispela God I Gat Olgeta Strong, i bin givim long em. Olsem na i stret olgeta man i mas givim biknem long God Jehova na lotuim em wanpela tasol, em i “God bilong Bikpela bilong yumi Jisas Krais.”—Efesus 1:17.
Nau Jisas i stap Bikpela i winim olgeta narapela bikpela man, tasol i no gat wanpela taim Baibel i kolim em God i winim olgeta narapela god. Jehova yet em i Nambawan Bikpela. Long dispela rot bai Jehova i stap “het tru bilong olgeta samting.” (1 Korin 15:28) Jisas i stap Bikpela, olsem na i stret em i stap Het bilong lain Kristen. Long dispela graun i gat planti man ol i kolim “bikpela” na ol i gat bikpela namba, tasol yumi bilip tru long dispela man i stap Bikpela i winim olgeta narapela bikpela man. Krais Jisas i stap Bikpela, tasol em i stap yet aninit long Papa bilong em, na bai God “i bosim olgeta samting.” (1 Korin 15:28, The Translator’s New Testament) Jisas i makim gutpela pasin daun ol disaipel bilong em i ken bihainim, na ol i ken tokaut olsem em i Bikpela bilong ol!
[Blok long pes 30]
‘Ol man bilong raitim Nupela Testamen, taim ol i toktok long God, ol i toktok long God na Papa bilong Bikpela bilong yumi Krais Jisas. Taim ol i toktok long Krais Jisas, ol i no toktok o tingting olsem em i God. Em i man God i makim, em i Pikinini bilong God, em i Save bilong God, em i Tok bilong God. Namba wan tok bilong Gutnius bilong Jon, klostu i helpim bilip ol i bin kamapim long Naisia, tasol taim yumi kaunim, yumi mas tingim ol narapela tok bilong dispela Gutnius i makim olsem Krais i aninit long Papa. Long tok Grik, dispela hap tok bilong Gutnius i no tok klia olsem Tok em i God olsem ol i mekim long tok Inglis.’—Buk “The Divinity of Jesus Christ,” bilong John Martin Creed.