Tingting Bilong Kristen Long Ol Gavman
“Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.”—ROM 13:1.
1, 2. (a) Bilong wanem Pol i kalabus long Rom? (b) Pol i singaut long Sisar na dispela i kamapim wanem ol askim?
APOSEL Pol i bin raitim dispela tok long ol Rom long yia 56 samting bihain long Krais. Sampela yia bihain em i kalabus long Rom. Bilong wanem em i kalabus? Bikpela lain long Jerusalem i bung na i laik paitim em, na ol soldia bilong Rom i kisim bek em long han bilong ol. Ol i kisim em i go long Sisaria na em i kot long ai bilong namba wan gavman Feliks. Ol Juda i sutim ol tok giaman long em long kot, tasol em i bekim gut tok. Feliks i ting Pol bai givim sampela mani long em bilong grisim em long larim Pol i go fri, olsem na em i holim Pol i stap kalabus inap tupela yia. Bihain Festus i senisim Feliks na i kamap namba wan gavman, na Pol i tokim Festus em i laik bai Sisar i mas harim kot bilong em.—Aposel 21:27-32; 24:1–25:12.
2 I stret em i ken mekim olsem, long wanem em i man bilong kantri Rom. Tasol Jisas i bin tok Satan em i hetman tru “i save bosim dispela graun,” na Pol yet i bin tok, Satan em i “god bilong dispela graun,” olsem na yu ting i stret Pol i singaut long wanpela gavman bilong dispela graun i mas helpim em? (Jon 14:30; 2 Korin 4:4) O ating dispela gavman bilong Rom i gat namba long mekim dispela wok, na i no gat rong long Pol i singaut long en bilong helpim em bambai em inap mekim ol samting i stret em i ken mekim? Paslain liklik ol aposel i bin tok: “Mipela i mas bihainim tok bilong God. Tok bilong man em i namba tu tasol.” Olsem na ating Kristen i mas bihainim olgeta tok bilong gavman sapos dispela i no brukim lo bilong God o olsem wanem?—Aposel 5:29, Nupela Testamen bilong 1978.
3. Pol i kamapim wanem stretpela tingting? Olsem wanem maus bilong bel i insait long dispela?
3 Long pas Pol i raitim long ol Rom em i helpim yumi long save long bekim bilong ol dispela askim. Em i kamapim stretpela tingting bilong Kristen long ol gavman bilong dispela graun. Long Rom 13:1-7 Pol i kamapim klia olsem Kristen i mas bihainim maus bilong bel na em i mas bihainim olgeta tok bilong Nambawan Bikpela, em God Jehova, na em i mas bihainim tok bilong “ol gavman” bilong dispela graun em ol i stap namba tu.
Dispela “Ol Gavman” i Husat?
4. Long yia 1962 ol i stretim tingting olsem wanem? Olsem na yumi gat wanem ol askim?
4 Inap sampela yia, i kam inap long yia 1962, ol Witnes Bilong Jehova i ting dispela “ol gavman” em Pol i tok long en long Rom 13:1, em God Jehova na Krais Jisas. Tasol olsem Sindaun 4:18 i makim, lait i wok long kamap strong, na ol i bin stretim dispela tingting bilong ol, olsem na ating sampela i gat askim long dispela. Olsem wanem? Tingting bilong yumi long nau i stret? I stret yumi tok dispela “ol gavman” i olsem ol king, na presiden, na praim minista, na namba wan kaunsil, na majistret, na ol narapela i holim wok gavman long dispela graun? Na i stret yumi tok, yumi mas daun long ol, tasol tok bilong ol i namba tu tasol?
5. Olsem wanem ol tok klostu long Rom 13:1 i helpim yumi long save long dispela “ol gavman”? Sampela Baibel i tanim dispela tok olsem wanem na i helpim yumi long kisim dispela stretpela save?
5 Wanpela man bilong raitim buk long yia 150 samting bihain long Krais, nem bilong Airenias, em i tok sampela man long taim bilong em i ting, long Rom 13:1 Pol i toktok long “ol ensel i stap hetman [o] ol hetman yumi no inap lukim.” Tasol Airenias yet i ting dispela “ol gavman” em “ol gavman bilong graun.” Sapos yumi skelim ol tok i stap klostu long dispela tok bilong Pol yumi inap save, tingting bilong Airenias i stret. Long ol laspela ves bilong Rom sapta 12 Pol i stori long pasin ol Kristen i mas mekim long ai bilong “olgeta man” na em i tok, ol i mas sori long ‘ol birua’ tu na mekim gut long ol. (Rom 12:17-21) Yumi save, dispela tok “olgeta man” i makim olgeta man ausait long lain Kristen. Olsem na dispela “ol gavman” em Pol i stori long ol bihain, ol tu i ausait long lain Kristen. Yumi save dispela tingting i stret, long wanem sampela Baibel i tanim namba wan hap tok bilong Rom 13:1 olsem: “Olgeta man i mas bihainim tok bilong ol gavman bilong kantri” (Baibel Today’s English Version); “olgeta man i mas daun long ol man i gat wok long bosim ol” (Baibel New International Version); “olgeta man i mas bihainim tok bilong ol gavman bilong graun.”—Baibel New Testament in Modern English, bilong Phillips.
6. Ol tok bilong Pol long tromoi kain kain takis, olsem wanem dispela tok i kamapim klia olsem dispela “ol gavman” em ol gavman bilong graun?
6 Pol i stori moa long ol dispela gavman na em i tok, ol i save singaut long kain kain takis. (Rom 13:6, 7) Lain Kristen i no save singaut long kain kain takis; na Jehova na Jisas na ol narapela “hetman yumi no inap lukim” ol tu i no singaut long takis. (2 Korin 9:7) Yumi save tromoi takis long ol gavman bilong graun tasol. Olsem na tupela tok Grik Pol i kolim long Rom 13:7 na long Baibel Pisin ol i raitim olsem “kain kain takis,” dispela tupela tok Grik i makim mani ol man i givim long gavman.a
7, 8. (a) I gat wanem ol narapela hap tok bilong Baibel i stret wantaim dispela tingting olsem ol Kristen i mas daun long ol gavman bilong dispela graun? (b) Long wanem taim tasol ol Kristen i no save bihainim tok bilong “ol gavman”?
7 Pol i tok yumi mas i stap aninit long ol gavman na dispela tok i stret wantaim tok bilong Jisas em i tok, “samting bilong Sisar, em yupela i mas givim long Sisar.” Dispela tok “Sisar” i makim gavman. (Matyu 22:21) Na dispela tok i stret wantaim ol tok Pol i givim long Taitus bihain, em i tok: “Yu mas tokim ol manmeri long ol i mas stap aninit long ol king na ol gavman, na ol i mas bihainim tok bilong ol. Na oltaim ol i mas redi long mekim olgeta kain gutpela wok.” (Taitus 3:3) Olsem na taim gavman i tok ol Kristen i mas wok wantaim ol man bilong ples na mekim sampela wok i bilong helpim ol man, i stret ol Kristen i bihainim tok na mekim dispela wok. Tasol sapos gavman i tokim ol Kristen long mekim wanpela wok olsem senis bilong wanpela wok i no stret wantaim tok bilong Baibel, o dispela wok i brukim wanpela lo bilong Baibel, olsem bilong Aisaia 2:4 samting, orait ol Kristen i no save mekim kain wok olsem.
8 Pita tu i makim olsem yumi mas daun long ol gavman bilong dispela graun, em i tok: “Yupela i mas tingting long Bikpela na bihainim tok bilong olgeta kain gavman. King i stap namba wan tru, na yupela i mas bihainim tok bilong en. Na yupela i mas bihainim tu tok bilong ol namba wan gavman bilong ol provins. King i bin putim ol i stap bilong bekim pe nogut long ol man i mekim pasin nogut, na bilong litimapim nem bilong ol man i mekim gutpela pasin.” (1 Pita 2:13, 14) Olsem na ol Kristen i mas bihainim tu ol tok Pol i bin givim long Timoti, olsem: “Orait namba wan samting yu mas mekim, em i olsem. Yu mas tokim ol manmeri long . . . beten long God na tenkyu long em na askim em long helpim olgeta manmeri. Na ol i mas askim em tu long helpim ol king na olgeta gavman. Olsem bai yumi olgeta i ken sindaun gut na i stap bel isi.”—1 Timoti 2:1, 2.
9. Taim yumi daun long ol gavman, olsem wanem dispela i no daunim biknem bilong Jehova?
9 Tasol olsem wanem? Sapos yumi daun long ol gavman, ating i olsem yumi litimapim nem bilong ol na yumi daunim biknem bilong God? Nogat. God em i antap moa, winim ol dispela gavman. Em i Nambawan Bikpela na em i “God Antap Tru.” (Buk Song 73:28; Daniel 7:18, 22, 25, 27; Kamapim Tok Hait 4:11; 6:10) Olsem na sapos yumi daun long ol gavman long pasin i stret, dispela i no makim olsem nau yumi no givim biknem olgeta long Jehova na lotu long em, em i Nambawan Bikpela. Orait, olsem wanem ol dispela gavman bilong graun i “antap”? Ol i antap long ol narapela man tasol. Na long wok ol i mekim ol i stap “antap.” Ol i gat wok long bosim ol man na lukautim ol lain man bilong ples, olsem na ol i save putim sampela tok na lo long wok bilong ol man.
“God Yet i Putim Ol na Ol i Stap”
10. (a) Pol i tok, ‘God yet i putim ol gavman na ol i stap,’ na dispela tok i kamapim klia wanem samting long namba bilong Jehova? (b) Jehova i larim wanem samting i kamap na sampela man i bin kisim wok olsem namba wan gavman o king? Na wanem traim i painim ol wokboi bilong em?
10 God Jehova i stap antap tru, winim olgeta samting, ol gavman bilong graun tu. Olsem na Baibel i tok, “God yet i putim ol [gavman] na ol i stap.” Tasol dispela tok i kamapim wanpela askim. Sampela yia bihain long taim Pol i bin raitim dispela tok, Namba Wan Gavman bilong Rom, em Nero, em i kirap mekim nogut tru long ol Kristen. Orait i gat askim olsem: God i putim Nero i stap namba wan gavman o olsem wanem? Nogat tru! I no olsem God yet i makim olgeta wan wan gavman o king na putim ol long wok bilong ol. Nogat. Sampela taim Satan i stiaim ol samting bambai wanpela hatpela man i ken kamap namba wan gavman o king, na Jehova i larim dispela samting i kamap, na em i larim ol traim tu i kamap em ol dispela hetman i putim long ol wokboi bilong em i holimpas lo bilong em.—Lukim Jop 2:2-10.
11, 12. Baibel i stori long wanem ol king o gavman, em Jehova i bin mekim na ol i kisim wok o em i rausim ol long wok?
11 Tasol Jehova yet i bin mekim sampela samting long sampela king na gavman bilong kamapim laik bilong em i antap moa. Olsem: Long taim bilong Abraham em i larim ol Kenan i stap long graun bilong Kenan, tasol bihain em i rausim ol na em i givim dispela graun long ol lain tumbuna pikinini bilong Abraham. Taim ol Israel i stap long ples wesan nating, Jehova i no larim ol i daunim ol Amon na Moap na Idom. Tasol em i tokim ol, ol i mas bagarapim ol lain bilong King Sihon na King Ok.—Stat 15:18-21; 24:37; Kisim Bek 34:11; Lo 2:4, 5, 9, 19, 24; 3:1, 2.
12 Bihain, taim ol Israel i sindaun pinis long graun Kenan, Jehova i wok yet long stiaim sampela gavman na ol i mekim sampela samting long lain bilong em. Sampela taim ol Israel i mekim rong na Jehova i larim wanpela gavman haiden i daunim ol na bosim ol. Taim ol i hevi long rong bilong ol na ol i tanim bel, em i rausim dispela gavman long graun bilong lain bilong em. (Hetman 2:11-23) Bihain em i larim ol Babilon i daunim kantri Juda na planti narapela kantri na ol i stap aninit long ol Babilon. (Aisaia 14:28–19:17; 23:1-12; 39:5-7) Ol Israel i go kalabus long Babilon na bihain Jehova i mekim tok profet long ol bikpela gavman bilong graun ol bai mekim sampela samting long lain bilong em. Ol dispela gavman bai kamap i go pinis kirap long taim bilong bikpela gavman Babilon na i kam inap long taim bilong yumi.—Daniel, sapta 2, 7, 8, 11.
13. (a) Bilong wanem Jehova i bin makim graun bilong ol lain man, olsem singsing bilong Moses i tok? (b) Bilong wanem Jehova i kisim lain Israel i go bek i stap gen long graun bilong ol?
13 Moses i mekim singsing long Jehova olsem: “God Antap Tru, em yet i bin tilim graun long ol lain manmeri na em i tokim ol long ples ol i mas sindaun long en. Na em i bihainim namba bilong ol manmeri bilong Israel na makim graun bilong ol arapela lain pipel i ken i stap long en. Tasol em i makim lain bilong Jekop bilong em yet i lukautim.” (Lo 32:8, 9; lukim Aposel 17:26.) Bilong kamapim laik bilong em, Jehova i makim wanem wanem ol lain o gavman bai stap na wanem wanem ol lain o gavman bai bagarap. Olsem bai em i ken makim wanpela hap graun bilong ol lain tumbuna pikinini bilong Abraham, na bihain em i kisim ol i go bek na ol i stap long dispela graun. Em i mekim olsem bambai Pikinini bilong promis i ken kamap olsem em i tok profet pinis long em.—Daniel 9:25, 26; Maika 5:2.
14. Planti taim dispela tok ‘God yet i putim ol gavman’ i makim wanem samting?
14 Tasol planti taim dispela tok ‘God yet i putim ol gavman’ i makim olsem Jehova i larim ol man i kisim wok gavman na ol i stap antap long ol narapela man, tasol ol i stap aninit long em. Olsem na taim Jisas i sanap long ai bilong namba wan gavman Pontius Pailat, em i tokim dispela hetman: “Sapos God i stap antap em i no bin givim strong long yu, orait yu bai i no gat strong inap long daunim mi.” (Jon 19:11) Jisas i no laik tok olsem God i bin putim Pailat i stap namba wan gavman. Nogat. Tasol God tasol i larim Pailat i holim strong inap long em i kilim Jisas i dai o larim em i stap laip.
“God Bilong Dispela Graun”
15. Long wanem rot Satan i mekim wok long strong bilong em bilong bosim dispela graun?
15 Tasol olsem wanem long tok bilong Baibel i tok Satan em i god o hetman bilong dispela graun? (Jon 12:31; 2 Korin 4:4) Na olsem wanem long tok bilong Satan long taim em i soim olgeta kingdom bilong dispela graun long Jisas? Em i hambak na i tok: “Bai mi givim yu strong bilong bosim olgeta dispela kantri, na bai yu gat biknem tru. Olgeta dispela samting ol i bilong mi pinis. Na sapos mi laik givim long wanpela man, orait mi ken givim.” (Luk 4:6) Jisas i no tok, Satan i no inap mekim. Na Pol tu i no tok olsem—em i save Satan inap mekim, olsem na taim em i raitim pas long ol Efesus bihain, em i tok: “Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.” (Efesus 6:12) Na hap bilong Baibel ol i kolim Kamapim Tok Hait i stori long Satan na i tok, “dispela snek i givim strong” long wanpela “wel animal” i makim olgeta gavman politik bilong dispela graun, na Satan “i mekim em i stap king olsem em yet, na em i givim bikpela strong long em.”—Kamapim Tok Hait 13:2.
16. (a) Olsem wanem yumi save Satan i no gat strong olgeta long bosim dispela graun? (b) Bilong wanem Jehova i larim Satan i holim strong bilong bosim ol man?
16 Satan i tokim Jisas: “Strong bilong bosim ol dispela [kingdom] . . . i bilong mi.” Tasol wanpela Baibel i raitim dispela tok olsem “ol i bin putim long han bilong mi.” (Baibel New World Translation) Dispela tok i makim olsem i mas i gat narapela man i orait long Satan i holim dispela strong, olsem “putim long han bilong em.” Tasol bilong wanem God i orait long Satan i holim dispela strong, olsem larim em i holim? Long Iden, taim Satan i sutim tok long God long ai bilong ol narapela na em i tok, God i giaman na em i no mekim stret wok bos bilong em, nau Satan i kamap olsem hetman bilong dispela graun. (Stat 3:1-6) Adam tupela Iv i bihainim Satan na sakim tok bilong God Jehova. Long dispela taim Jehova inap kilim i dai Satan wantaim dispela man na meri nau tasol ol i kirap long bihainim em, na sapos Jehova i mekim olsem bai em i mekim stretpela pasin. (Stat 2:16, 17) Tasol Satan i sutim tok long God Jehova yet. Olsem na God i larim em i stap pastaim, na em i larim Adam tupela Iv tu i stap pastaim na tupela i kamapim planti pikinini na bihain tupela i dai. Long dispela rot God i givim taim na rot bilong kamapim klia olsem tok bilong Satan i giaman.—Stat 3:15-19.
17, 18. (a) I gat wanem as na yumi ken tok, Satan em i god bilong dispela graun? (b) Olsem wanem “olgeta wok bilong gavman i kamap long han bilong God”?
17 Ol samting i bin kamap bihain long Iden i makim olsem ol tok Satan i bin sutim long God i giaman tru. Ol lain tumbuna pikinini bilong Adam i bin i stap aninit long Satan na aninit long ol man, na wok bos bilong ol i bin mekim nogut long ol man na ol i no i stap amamas. (Saveman 8:9) Tasol ol samting God i bin mekim long lain bilong em i kamapim klia olsem wok bos bilong God i gutpela na i winim tru wok bos bilong ol narapela. (Aisaia 33:22) Tasol planti tumbuna pikinini bilong Adam ol i no laik bai Jehova i stap King bilong ol; ol i no laik i stap aninit long Jehova. Olsem na maski ol i save o ol i no save—ol i stap aninit long Satan na ol i mekim wok bilong em, em i olsem god bilong ol.—Buk Song 14:1; 1 Jon 5:19.
18 I no longtaim na bai God i stretim ol bikpela tok i bin kamap long Iden. Bai Kingdom bilong God i kirap bosim tru olgeta samting bilong ol man, na bai Satan i kalabus long hul i no gat as. (Aisaia 11:1-5; Kamapim Tok Hait 20:1-6) Tasol dispela samting i no kamap yet, olsem na long dispela taim i mas i gat ol gavman bilong bosim ol man bambai ol samting i ken wok stret na i no ken paul nabaut. “God i save mekim stret olgeta wok bilong en. Em i no save mekim ol samting i paul nabaut. Em i laik bai yumi stap wanbel na wok gut wantaim.” (1 Korin 14:33) Olsem na God i larim ol gavman i kamap na ol i bosim ol lain i bin kamap long graun ausait long Iden, na em i larim ol man i mekim ol dispela wok bilong gavman. Long dispela rot i olsem “olgeta wok bilong gavman i kamap long han bilong God.”
Sampela Gavman i Bihainim Gutpela Tingting
19. Satan i bosim olgeta king na hetman bilong graun o olsem wanem?
19 Kirap long taim bilong Iden na i kam inap long nau Satan i stap olsem fri tru long mekim wok namel long ol man, olsem na em i bin stiaim ol samting hia long graun na bosim ol gavman, olsem em i bin hambak na tokim Jisas long en. (Jop 1:7; Matyu 4:1-10) Tasol i no olsem olgeta king na hetman bilong dispela graun i save aninit long Satan na em i bosim ol. Nogat. Tru sampela—olsem Nero long taim bilong ol aposel na Adolf Hitler long taim bilong yumi—ol i bihainim tru pasin bilong Satan. Tasol sampela, nogat. Namba wan gavman bilong ailan Saiprus, em Sergius Paulus, “em i man i gat gutpela tingting na save,” na “em i laik harim tok bilong God.” (Aposel 13:7) Ol Juda i birua long Pol, tasol namba wan gavman bilong provins Akaia, em Galio, em i no larim ol i subim em long mekim kot long Pol. (Aposel 18:12-17) Na planti narapela hetman na king i bin bihainim maus bilong bel na mekim gutpela wok long bosim ol man.—Lukim Rom 2:15.
20, 21. Wanem sampela samting i bin kamap long taim bilong yumi na i makim olsem sampela hetman bilong graun i no bihainim laik bilong Satan?
20 Long Kamapim Tok Hait long Baibel i gat tok profet olsem long “de bilong Bikpela,” em i kirap long yia 1914, bai Jehova i stiaim ol gavman bilong graun na bai ol i pasim wok Satan i laik mekim. Kamapim Tok Hait i stori long Satan bai kirapim ol man long mekim nogut long ol Kristen em God i bin makim ol long spirit holi na dispela pasin birua bai i kamap olsem bikpela wara. Tasol “graun i opim maus bilong en na i dringim dispela wara.” (Kamapim Tok Hait 1:10; 12:16) Sampela samting long “graun,” em ol man nau ol i stap long graun, i mas helpim lain bilong Jehova na pasin birua bilong Satan i no ken bagarapim ol.
21 Ol samting i bin kamap olsem o nogat? Tru tumas, dispela samting i bin kamap. Olsem: Namel long 1930 na 1949 bikpela hevi i bin painim ol Witnes Bilong Jehova long Amerika. Ol man i save bung bung olsem bikpela lain na paitim ol, na planti taim polis i holim ol nating. Tasol taim Sprim Kot bilong Amerika i harim kot bilong sampela Witnes na i tokaut olsem wok bilong ol Witnes i no brukim lo bilong gavman, dispela i helpim ol. Long ol narapela hap tu, sampela taim gavman i bin helpim lain bilong God. Inap olsem 40 yia bipo long kantri Aialan, bikpela lain Katolik i paitim tupela Witnes long biktaun Kork. Wanpela plisman bilong dispela hap i kam helpim tupela, na kot i givim strafe long ol man i bin paitim tupela. Na long 1989 long Fiji ol hetman bilong ples i bung na wanpela man i tok ol i mas tambuim wok bilong ol Witnes Bilong Jehova. Tasol wanpela hetman i tokaut strong na helpim ol Witnes, olsem na ol hetman i sakim dispela tok long tambuim wok bilong ol Witnes.
22. Bihain bai yumi stori long wanem ol askim?
22 Tru tumas, sampela taim wok bilong ol gavman i no helpim wok bilong Satan. Ol Kristen inap i stap aninit long ol gavman bilong dispela graun na i no olsem ol i stap aninit long Satan yet. Tru tumas, ol i mas i stap aninit long ol dispela gavman bilong graun i go inap long taim God i no larim ol i bosim graun moa. Tasol ol i mas aninit olsem wanem long ol gavman? Na ol Kristen i ken ting ol gavman i mas helpim ol olsem wanem? Tupela bikpela tok bilong stadi long en i kirap long dispela pes na long pes 24 bilong dispela Wastaua bai bekim dispela tupela askim.
[Ol Futnot]
a Ol i raitim dispela tupela tok Grik em yumi kolim olsem “takis” long narapela hap bilong Baibel tu, olsem long Luk 20:22 (pho’ros) na long Matyu 17:25 (te’los).
Bai Yu Bekim Wanem Tok?
◻ “Ol gavman” ol i husat?
◻ Olsem wanem yumi inap tok “olgeta wok bilong gavman i kamap long han bilong God”?
◻ Bilong wanem Jehova i larim Satan i holim strong bilong bosim dispela graun?
◻ Olsem wanem God i “putim” ol gavman bilong graun na “ol i stap”?
[Piksa long pes 15]
Rom i paia na bihain Nero i kirap bihainim tru pasin bilong Satan
[Piksa long pes 17]
Namba wan gavman bilong Saiprus, em Sergius Paulus, em i laik harim tok bilong God