Husat Wanpela Tasol i God Tru?
KIRAP long bipo yet i kam inap nau, ol man i gat planti god, olsem na i hatwok long save tru hamas god ol man i save lotuim long olgeta hap—tasol em planti milion.
Yumi kamapim klia pinis olsem God i stap, olsem na nau yumi askim olsem: Husat long ol god ol man i save lotuim long olgeta hap long nau na long bipo, em i God tru? I gat wanpela tasol i God tru na Baibel i kamapim klia dispela samting olsem: “Laip bilong i stap gut oltaim, em i olsem. Ol man i . . . save long yu, yu wanpela tasol yu God tru. Na ol i save long Jisas Krais, em yu bin salim i kam.”—Jon 17:3.
Nem i Makim Em
I stret yumi ken ting olsem wanpela god i gat ol pasin bilong em yet, em i mas i gat nem tru bilong makim em i narapela kain long olgeta narapela god, em ol i gat nem bilong ol yet. Dispela god yet i mas givim dispela nem long em yet, na ol man i lotuim em ol i no ken givim dispela nem long em.
Tasol i gat wanpela samting yumi no save gut long en. Olsem: Klostu olgeta lotu i stap longtaim ol i kolim wanpela nem long ol god bilong ol, tasol ol Juda na ol bikpela lotu i holim nating nem Kristen, ol i no kolim wanpela nem tru long god ol i save lotuim. Nogat. Ol i kolim biknem long god bilong ol, olsem Bikpela, God, God i Gat Olgeta Strong, na Papa.
Long wanpela nius em i bin raitim (Theology), David Clines i tok: ‘Namel long yia 450 na 150 B.C.E. samting, wanpela samting nogut i painim God—nem bilong em i lus. Ol Juda i lusim pasin bilong kolim nem bilong God olsem Yawe, na ol i kolim ol narapela nem long Yawe, olsem God, Bikpela, Nem, Man Holi, Man i Stap, na Ples. Na long ol hap bilong Baibel ol i bin raitim Yawe long en, ol man bilong kaunim Baibel ol i bin senisim dispela nem Yawe na kolim Adonai. Taim haus lotu bilong ol Juda i bagarap olgeta, wan wan taim tasol ol Juda i save kolim nem bilong God insait long lotu, tasol bihain ol i no kolim moa na ol i lusim tingting tu long kolim dispela nem olsem wanem.’ Tasol i no gat wanpela man i save long taim stret ol Juda i lusim pasin bilong kolim nem bilong God long maus na ol i kolim ol tok Hibru i makim God na Bikpela King.
Olsem na namba wan bikpela samting yumi mas mekim bilong save long husat “wanpela tasol i God tru,” em long save long nem bilong em. I no hatwok tumas long kisim save long dispela nem, long wanem, nem bilong God i Gat Olgeta Strong, em Man bilong wokim olgeta samting, em i kamap klia long Song 83:18: “Bai ol manmeri i mas save olsem yu, nem bilong yu tasol em JEHOVA, yu God Antap Tru na yu bosim olgeta hap bilong graun.”—Baibel King James Version.
Jehova o Yawe?
Maski dispela nem Jehova i stap long Baibel King James Version na sampela Baibel moa, sampela i laik kolim nem Yawe long God na Jehova, nogat. Wanem nem i stret?
Ol i bin raitim ol olpela rait bilong Baibel long tok Hibru. Long Ol Skripsa Hibru, nem bilong God i stap klostu 7,000 taim na ol i raitim long 4-pela leta—YHWH o JHVH. Ol i kolim dispela nem i gat 4-pela leta olsem Tetragramaton o Tetragram, ol i kisim long tupela tok Grik, insait bilong en i olsem “4-pela leta.” Tasol nau i gat askim long pasin bilong kolim stret dispela nem, long wanem, bipo tru taim ol man i raitim tok Hibru, ol i save lusim ol leta olsem a, e, i, o, u, em ol leta i helpim man i kaunim tok long kolim stret ol tok. Olsem na bilong kolim Tetragramaton olsem Yawe o Jehova, em samting bilong man i kaunim tok, olsem em bai putim wanem leta olsem namel long ol 4-pela leta YHWH o JHVH. Long nau planti saveman bilong tok Hibru ol i laik kolim nem bilong God olsem Yawe.
Tasol planti man i laik kolim nem bilong God olsem Jehova. Bilong wanem? Long wanem, inap planti handet yia nau dispela nem Jehova i bin kam insait pinis long tok Inglis. Ol man i no orait long yumi kolim nem bilong God olsem Jehova, ol i no ken orait long yumi kolim Jeremaia na Jisas, em tupela nem yumi bin kolim inap longtaim pinis. Ol i mas senisim dispela nem Jeremaia na kolim olsem Yir·meyahʹ o Yir·meyaʹhu, em ol nem ol Hibru i bin kolim bipo, na Jisas ol i mas kolim olsem Ye·shuʹaʽ (tok Hibru) o I·e·sousʹ (tok Grik). Planti sumatin bilong Baibel, ol Witnes Bilong Jehova tu, ol i ting planti man i save kolim dispela nem “Jehova” long tok Inglis, na ol i save kolim olsem long planti narapela tok ples, olsem na ol i mekim wok long dispela nem.
Em i Bikpela Samting?
Sampela i ting i no bikpela samting sapos yumi kolim God i Gat Olgeta Strong long wanpela nem tru o nogat, na ol i amamas long kolim God olsem Papa o God tasol. Tasol dispela tupela tok em ol biknem—ol i no nem tru, na ol dispela biknem i no makim olsem God tru i stap narapela kain long ol narapela god. Long taim bilong ol man i bin raitim Baibel, dispela tok God (ʼElo·himʹ long tok Hibru), ol i bin kolim long olgeta god—long god giaman bilong ol Filistia tu, nem bilong em Dagon. (Hetman 16:23, 24) Olsem na sapos wanpela Hibru i tokim wanpela Filistia olsem em—dispela man Hibru—i save lotuim “God,” dispela i no kamapim klia God tru em i save lotuim.
Yumi ken tingim tok bilong wanpela buk (The Imperial Bible-Dictionary) bilong 1874: ‘Long olgeta hap Jehova em i wanpela nem tru tru, na dispela nem i makim God na em wanpela tasol; tasol dispela tok Elohim i makim dispela tok God, na planti taim ol i mekim wok long dispela tok Elohim bilong makim Bikpela Man Antap. Wanpela man Hibru inap tok, dispela Elohim, olsem God tru, bilong makim olsem em i narapela kain long ol god giaman; tasol em i no save tok dispela Jehova, long wanem, Jehova em i nem bilong dispela wanpela God tasol em i God tru. Planti taim em i save tok, God bilong mi, tasol em i no save tok Jehova bilong mi, long wanem, taim em i tok God bilong mi, em i toktok long Jehova. Em i save toktok long God bilong Israel, tasol em i no save toktok long Jehova bilong Israel, long wanem, i no gat narapela Jehova—wanpela tasol. Em i save toktok long dispela God i gat laip, tasol em i no save toktok long dispela Jehova i gat laip, long wanem, long tingting bilong em, Jehova i stap laip tasol.’
Ol Pasin Bilong God Tru
Sapos yumi save long nem bilong wanpela man o meri, dispela i no makim olsem yumi save gut tru long em, nogat. Planti bilong yumi i save long nem bilong ol bikman politik. Na sampela man na meri i gat nem long ol narapela kantri, ating yumi save gut long nem bilong ol tu. Tasol maski yumi save long nem bilong ol na yumi inap kolim stret, dispela i no makim olsem yumi save tru long ol dispela manmeri o yumi save ol i wanem kain manmeri, nogat. Wankain long God tru. Bilong save tru long em, yumi mas save long ol pasin bilong em na laikim ol dispela pasin.
Tru, i no gat wanpela man bilong graun bai lukim God tru, tasol em i kamapim planti samting long Baibel i givim save long yumi long ol pasin bilong em. (Kisim Bek 33:20; Jon 1:18) God i bin givim driman long sampela profet Hibru, na ol i bin lukim ol samting bilong God i Gat Olgeta Strong long heven. Ol samting ol i stori long en i kamapim bikpela namba na biknem na strong bilong God, na tu, ol samting i stap isi, na i wok stret, na i naispela na gutpela tru.—Kisim Bek 24:9-11; Aisaia 6:1; Esekiel 1:26-28; Daniel 7:9; KTH 4:1-3.
God Jehova i bin kamapim sampela gutpela pasin bilong em long Moses, olsem i stap long Kisim Bek 34:6, 7: “Mi Bikpela, mi Bikpela. Mi God na mi as bilong marimari na sori. Na mi no save belhat kwik. Mi save laikim tru olgeta manmeri, na mi save bihainim olgeta tok bilong mi. Mi save laikim tumas planti tausen lain manmeri, olsem mi promis pinis, na mi save lusim ol kain kain sin na bikhetpasin bilong ol.” Taim yumi save long ol dispela pasin bilong God, dispela i pulim yumi i kam long em na yumi gat laik long kisim sampela save moa long em, a?
Tru, i no gat wanpela man bilong graun bai lukim God Jehova long bikpela lait em i stap long en, tasol Baibel i tok taim Krais Jisas i stap man long graun, em i kamapim klia pasin na tingting bilong God Jehova, em Papa bilong em long heven. Wanpela taim Jisas i tok: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim. Olgeta samting Papa i save mekim, em Pikinini tu i save mekim.”—Jon 5:19.
Olsem na dispela i helpim yumi long save, pasin bilong Jisas long sori long ol man, na mekim gut long ol, na isi long ol, na laikim tumas stretpela pasin na i nolaik tru long ol pasin nogut—em ol pasin Jisas i lukim long Papa bilong em, God Jehova, taim Jisas i stap wantaim em long heven na em i no kamap man yet long graun. Olsem na taim yumi save tru tru long insait bilong nem Jehova, i gat gutpela as na yumi laikim na mekim gut long dispela nem holi, na yumi litimapim dispela nem na bilip long en.
Taim yumi wok long kisim save olsem long wanpela God tru, bai yumi wok long mekim olsem i go inap oltaim, na dispela i kamap klia long Jon 17:3 long Baibel New World Translation of the Holy Scriptures. Long dispela ves ol i kamapim gut as bilong hap tok Grik, em ol i tanim olsem ‘kisim save.’ Olsem na dispela ves i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Krais Jisas.” Tru tumas, yumi mas wok oltaim long kisim save long dispela wanpela God tru, em Jehova, na long Pikinini bilong em, Krais Jisas.
God Tru i Kamap Ples Klia
Olsem na i no hatwok long save olsem God tru i narapela kain long ol god giaman, em planti bilong ol i stap. Em i Man bilong wokim olgeta samting antap wantaim graun na ol manmeri i stap long en. Jehova o Yawe em nem tru bilong em, na em wanpela tasol i holim dispela nem. Em i no wanpela God Triwan i no gat man inap save long en. Em i God bilong sori, na em i laik mekim gut long ol man em i bin wokim. Tasol em i God bilong laikim stretpela pasin tu, olsem na ol man i strong long bagarapim graun na kirapim pait na pasin birua, em i no inap larim ol i mekim olsem long olgeta taim, nogat.
Jehova i kamapim tingting bilong em olsem em bai kirap na pinisim ol pasin nogut na pen na hevi long graun, na em bai mekim graun i kamap wanpela paradais ol manmeri i gat stretpela bel ol i ken stap laip oltaim long en na i stap amamas. (Song 37:10, 11, 29, 34) God i Gat Olgeta Strong em i putim Pikinini bilong em, Jisas, i stap King pinis long Kingdom long heven, na klostu nau Jisas bai kamapim nupela taim i gat stretpela pasin i stap long en, na em bai kamapim bek Paradais long dispela graun bilong yumi.—Daniel 2:44; Matyu 6:9, 10.
Mipela bai amamas sapos nau yu no hatwok long bekim dispela askim, olsem: God i stap tru o nogat? na long save husat i God tru.
[Piksa long pes 9]
Krais Jisas i tok Jehova tasol i God tru