Ol Man i Askim
Bilong Wanem Yumi Mas Kolim Nem Bilong God Sapos Yumi No Save Long Pasin Bilong Kolim Stret?
Long nau i no gat wanpela man i save long pasin bilong kolim stret nem bilong God long tok Hibru bilong bipo. Tasol tingim gut dispela: Nem bilong God i kamap long Baibel inap olsem 7,000 taim. Taim Jisas i stap long graun em i bin kamapim nem bilong God long ol man, na em i tokim ol disaipel bilong em long beten long dispela nem i mas i stap holi. (Matyu 6:9; Jon 17:6) Olsem na yumi save, em i bikpela samting tru long ol Kristen i mas kolim nem bilong God. Orait, bilong wanem ol man bilong nau i no klia gut long kolim dispela nem olsem ol i bin kolim long pastaim tru? I gat tupela bikpela as.
Namba wan as i olsem: Inap olsem 2,000 yia i go pinis, i gat wanpela tingting kranki i kamap namel long ol Juda, olsem i gat rong long kolim nem bilong God. Taim man i ritim Baibel na em i kamap long dispela nem, em i save kolim dispela tok “Bikpela.” Em nau, inap planti handet yia ol i no kolim dispela nem, olsem na bihain ol man i lusim tingting long pasin bilong kolim stret nem bilong God.
Namba tu as i olsem: Long rait Hibru bilong bipo ol i no putim ol leta a, e, i, o, u, olsem ol i mekim long tok Inglis na sampela tok ples moa taim ol i laik sotim sampela rait long ol dispela tok ples. Taim man i ritim, em yet i save kolim nek bilong ol dispela leta. Bihain ol i tingim wanpela pasin ol i ken mekim bambai ol man i no ken lusim tingting long kolim stret ol tok Hibru. Ol i putim mak bilong ol dispela leta i go long ol wan wan tok bilong Baibel Hibru. Tasol long nem bilong God, ol i putim ol mak long tok “Bikpela” bilong kirapim ol man long kolim dispela nem ol i bin putim bilong senisim nem bilong God, o ol i no putim ol mak.
Olsem na samting i stap yet em 4-pela leta Hibru ol i kolim Tetragramaton, em wanpela buk dikseneri i stori long en olsem “4-pela leta Hibru ol i save raitim olsem YHWH o JHVH, em nem stret bilong God long Baibel.” Em nau, taim yumi putim leta a, e, o, long JHVH, em i kamap olsem “Jehova,” em nem planti manmeri i save long en.
Tasol sampela saveman bilong Baibel i ting yumi mas kolim olsem “Yawe.” Olsem wanem? Dispela i stret wantaim pasin ol i bin kolim pastaim long tok Hibru? Yumi no kliagut long dispela. Sampela saveman i kamapim sampela as na ol i no laik kolim nem bilong God long dispela pasin. Taim yumi ol lain bilong nau i kolim ol nem i stap long Baibel, ating em i no wankain long pasin ol i bin kolim bipo long tok Hibru, na ol man i no gat tok long dispela. Long wanem, ol dispela nem i kam insait pinis long tok ples bilong yumi na taim yumi kolim, kwiktaim ol man i save long en. Na i wankain tu long nem Jehova.
Ol i bin kolim ol Kristen bilong pastaim olsem lain bilong holim nem bilong God. Taim ol i autim tok long ol man ol i kamapim dispela nem long ol na ol i wok long kirapim ol long singaut long dispela nem. (Aposel 2:21; 15:14, NW; Rom 10:13-15, NW) Em nau, long God em i bikpela samting long yumi mas kamapim nem bilong em long wanem wanem tok ples yumi mekim, na yumi mas pilim tru olsem dispela nem i bikpela samting, na i stap bilong yumi i mas stret wantaim ol samting dispela nem i makim.
[Rait long pes 31]
Nem bilong God i kamap long Baibel inap olsem 7,000 taim