Mi Kisim Save Olsem Laip i Dia Tumas

EM MONINGTAIM LONG EPRIL 16, 2007. Mi sindaun i go daun tru long kona bilong wanpela ofis i stap long namba 3 plua long haus Norris Hall i stap long banis bilong skul Virginia Polytechnic Institute and State University, o Virginia Tech. Samting i kamap i mekim na mi tingim gen olsem long olgeta de yumi mas pilim tru olsem laip i dia tumas.

Mi stap long ofis bilong mi na mi redi long i go long namba 2 plua long kisim ol pas bilong mi. Wanpela profesa i kam askim mi long i go long ofis bilong em bilong helpim em long stretim hevi i kamap long kompiuta bilong em. Taim mipela i go insait long ofis bilong em, mipela i harim gan i pairap long namba 2 plua. Mipela i no save wanem samting i wok long kamap, na kwiktaim mipela i sut i go insait long ofis bilong em na lokim dua, na wet tasol long wanem samting bai painim mipela. Mi hait long kona na kamapim bel bilong mi long Jehova na beten askim em long stiaim mi long samting mi ken mekim sapos hevi i kamap long mi.

Taim mipela i wet i stap, mi tingim bek samting i bin painim mi 15 yia i go pinis. Mi mekim wok mekenik long wanpela woksop bilong ol ka. Wanwok bilong mi i holim wanpela kontena petrol na paia i kirap long en. Em i pret na tromoi dispela petrol i paia i kam stret long pes bilong mi! Em i popaia na mekim. Mi pulim hatpela win bilong petrol i paia na paia i kukim tru skin bilong mi long het na bros samting. Wanpela helikopta i kisim mi i go long wanpela haus sik i save lukautim ol man em paia i kukim ol. Mi stap long ICU inap 3 na hap mun, na mi pait strong long i stap laip. Mi bin kisim marasin na helpim inap 5-pela mun, na bihain mi go bek long haus. Mi tenkyu tru long mi stap laip. Dispela samting i bin kamap i skulim mi long tingim olsem, long olgeta de yumi mas tingim laip i dia tumas. Na tu, dispela i bin strongim tru laik bilong mi long yusim laip bilong mi long mekim wok bilong Man i givim laip long mi, em God Jehova, olsem wanpela witnes bilong em.​—Song 90:12; Aisaia 43:10.

Mi kisim bagarap olsem na mi no inap mekim wok mekenik moa. Mi kirap lainim wok kompiuta na mi kisim wok long Virginia Tech. Long dispela as mi bin stap long haus Norris Hall long dispela moning.

Taim gan i wok long pairap long plua daunbilo, mitupela i no save olsem insait long sampela minit tasol man i holim gan i wok long sutim planti man i dai. Bipo i no gat wanpela man i bin sutim planti man i dai insait long sotpela hap taim long Amerika. Dispela samting i stop taim dispela man i kilim em yet i dai. Em i bin pinisim laip bilong 32 man i no gat asua. Samting olsem 20 minit bihain long dispela samting i bin kirap, mipela i harim ol polis i kam insait long haus. Mipela i singaut long ol na ol i kam kisim mipela i go.

Dispela samting nogut i bin lainim mi olsem laip inap pinis wantu tasol, na yumi no save wanem samting bai painim yumi. (Jems 4:14) Em i bikpela samting long yumi trastim God Jehova, em Man Bilong Givim laip long yumi, na yumi mas tingim olgeta de i olsem gutpela presen i kam long em!​—Song 23:4; 91:2.

[Piksa Kredit Lain long pes 30]

AP Photo/The Roanoke Times, Alan Kim