Ripot Long Wok Bilong Kingdom

God i Mekim Drai Aiwara Bilong Em

JEHOVA i save mekim gut tru long ol man i stretim sindaun bilong ol bambai em i stret wantaim ol lo na ol tok bilong stiaim tingting i stap long Baibel. Sampela taim ol man i save hatwok long mekim ol senis long i stap bilong ol, tasol oltaim rot i op bilong kisim helpim bilong mekim olsem. (Song 84:11) Dispela ekspiriens i kam long Saut-is Esia i kamapim klia dispela samting.

Wanpela Witnes long Frans i go long malolo na long dispela taim em i toktok wantaim mama bilong wanpela stua, em Kim,a long laik bilong God long dispela graun. Em i lusim wanpela buk long Kim, em buk Yu Inap i Stap Oltaim Long Paradais Long Graun. Taim Kim i lukluk long ol pes bilong buk, em i lukim dispela tok, “Em bai i mekim drai wara i stap long ai bilong olgeta bilong ol.” (KTH 21:⁠4) Kim i tok: “Mi pilim tru dispela tok bilong Baibel. Long de olgeta taim mi stap long stua, mi save lap na toktok gut wantaim ol narapela, olsem na ol man bai hatwok long save olsem taim mi go bek long haus, mi save krai i go inap long mi slip.” Em i kamapim as na em i save bel hevi na em i tok: “Mi stap wantaim wanpela man inap 18 yia, tasol mi bel hevi, long wanem, dispela man i no laik maritim mi. Mi laik lusim em, tasol mi bin stap wantaim em inap longtaim pinis, olsem na mi no gat strong long mekim olsem.”

Bihain liklik, Kim i orait long stadi long Baibel wantaim Linh, em i wanpela Witnes Bilong Jehova. Kim i tok: “Mi amamas tru long bihainim ol tok mi lainim long Baibel. Olsem: Mi no insait moa long lotuim ol tumbuna, maski famili bilong mi i birua long mi. Na tu, mi mekim ol samting bilong stretim marit bilong mi, tasol poroman bilong mi i no laik mekim olsem. Taim mi karim dispela hevi, dispela Witnes long Frans i wok yet long salim ol buk na nius samting bilong Baibel long mi, na Linh i bin strongim tru bel bilong mi. Pasin bilong dispela tupela sista long isi long mi na sambai long mi, dispela i bin strongim mi long karim hevi inap long taim mi kisim save long pasin tru bilong dispela man. Mi painimaut olsem em i gat 5-pela ‘meri’ na 25 pikinini! Dispela samting i strongim bel bilong mi long lusim em.

“Tasol i hatwok long lusim wanpela bikpela haus em mi bin sindaun gut long en na go sindaun long wanpela liklik flet. Na tu, dispela poroman i strong long mi mas i go bek na stap wantaim em, na em i tok long bagarapim skin bilong mi long strongpela marasin asit sapos mi no laik mekim olsem. Tasol Jehova i helpim mi long mekim stretpela pasin.” Kim i wok strong long stadi na em i kisim baptais long Epril 1998. Bihain, tupela susa bilong em na yangpela pikinini man bilong em, ol tu i kirap long stadi long Baibel wantaim ol Witnes Bilong Jehova.

Kim i tok: “Bipo mi ting olsem i no gat wanpela gutpela samting bai painim mi. Tasol long nau mi stap amamas na mi no save krai moa long nait. Jehova i bin mekim drai aiwara long ai bilong mi.”

[Futnot]