Stap Strong Long Ol Samting Bilong Spirit Taim Yu Lukautim Wanblut i Sik

TAIM dokta i painim wanpela buk klostu long bun bilong baksait bilong Kim, em wanpela Witnes, dokta i tok em i gat sik kensa.a Man bilong em Steve i tok: “Taim ol dokta i rausim pinis dispela buk, ol i givim em redioterapi na kimoterapi. Dispela samting i mekim na bodi bilong em i no gat strong. Na em i hatwok tru long wokabaut.”

Ating yu inap pilim bikpela bel hevi bilong Steve taim em i lukim gutpela poroman bilong em i karim hevi bilong dispela sik nogut. Ating wanpela long famili bilong yu i gat wanpela bikpela sik o em i gat ol hevi bilong ol lapun. (Sav. 12:​1-7) Sapos olsem, orait yu mas save olsem bilong lukautim gut wanblut bilong yu, yu mas lukautim yu yet tu. Sapos strong bilong yu long ol samting bilong spirit i pinis, bel na tingting na helt bilong yu inap bagarap na ating bai yu no inap moa long helpim gut wanblut. Orait olsem wanem yu inap balensim ol wok Kristen bilong yu wantaim wok bilong lukautim wanpela wanblut i gat sik o em i lapun pinis? Ol narapela insait long kongrigesen Kristen inap mekim wanem bilong soim olsem ol i tingim ol dispela sikman?

Olsem Wanem Yu Inap Holim Stretpela Tingting?

Bilong stap strong long ol samting bilong spirit na bilong yu yet i no ken sik taim yu lukautim wanblut i gat sik, yu mas skelim gut taim na strong bilong yu long mekim ol wok na redi long senisim sampela samting. Sindaun 11:2 i tok: “Ol man i gat gutpela tingting i save daunim ol yet.” Long dispela ves, dispela tok “daunim ol yet” i makim olsem man i luksave long ol samting em i no inap mekim. Bilong was gut na bai yu no traim long mekim ol samting i winim strong bilong yu, ating yu mas skelim gut sediul bilong yu na ol wok yu mas mekim.

Steve i bihainim savetingting na long pasin daun em i skelim gen ol wok bilong em. Em i mekim wok mani, na em i kodineta bilong lain elda na wasman autim tok bilong kongrigesen bilong ol Witnes Bilong Jehova long Aialan. Na em i insait tu long lain Hospital Lieson Komiti long hap bilong em. Steve i tok: “Kim i no bin toktok planti olsem mi strong tumas long mekim ol dispela wok na mi no lukautim em gut. Tasol mi save olsem ol dispela wok mi mekim i winim strong bilong mi.” Orait Steve i mekim wanem? Em i tok: “Mi beten na tingim gut dispela samting, na nau mi pasim tok long bel olsem mi bai lusim wok kodineta. Mi mekim yet wok elda, tasol taim mi givim sampela wok bilong mi long kongrigesen long ol narapela, nau mi gat taim bilong i stap wantaim Kim na lukautim em gut.”

Bihain, sik bilong Kim i orait liklik. Steve na Kim i skelim gen i stap bilong ol, na long rot bilong sapot em Kim i givim, Steve inap kisim bek ol wok bilong kongrigesen bipo em i bin holim. Steve i tok: “Mitupela wantaim i bin lain long mekim ol wok inap tasol long mak bilong mipela. Mi tenkyu tru long Jehova long helpim em i givim na mi tenkyu tu long meri bilong mi i bin sapotim mi na i no toktok planti, maski em i gat sik.”

Tingim tu stori bilong Jerry, em wanpela wasman raun, na meri bilong em Maria. Ol i mas senisim sampela mak ol i bin putim bambai ol inap lukautim lapun papamama bilong ol. Maria i tok: “Mi wantaim man bilong mi i bin putim mak long mekim wok misineri long narapela kantri. Tasol Jerry i no gat ol bratasusa​—em wanpela tasol, na papamama i nidim wanpela long lukautim ol. Olsem na mipela i pasim tok long i stap long Aialan na lukautim tupela. Long dispela rot, mipela inap lukautim papa bilong Jerry taim em i go i stap long haus sik paslain long taim em i dai. Long nau mipela i save toktok wantaim mama bilong Jerry long olgeta de, na mipela i stap klostu na bai i no hatwok long go lukim em sapos em i nidim helpim. Kongrigesen bilong mama bilong Jerry i save helpim em gut, olsem na mipela inap mekim yet wok bilong raun.”

Ol Narapela i Ken Helpim

Taim aposel Pol i toktok long ol samting ol i mas mekim bilong helpim ol lapun wido meri, em i tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru.” Pol i tokim ol wanbilip Kristen olsem sapos ol i laik bai “God i laikim” ol samting ol i mekim, ol i mas lukautim lapun papamama na ol lapun bubu long sait bilong mani samting. (1 Ti. 5:​4, 8) Tasol ol narapela insait long kongrigesen i ken helpim ol long ol samting, na i stret ol i mas mekim olsem.

Tingim Hakan na Inger, em tupela lapun marit i stap long Swiden. Hakan i tok: “Taim dokta i tokaut olsem meri bilong mi i gat sik kensa, mitupela i kirap nogut long dispela. Bipo Inger i gat strong na em i no save sik. Tasol nau mipela i mas i go long haus sik long olgeta de bilong kisim marasin, na dispela marasin i nogutim em tru. Long dispela taim Inger i stap long haus, na mi mas i stap wantaim em bilong lukautim em.” Orait kongrigesen i bin mekim wanem bilong helpim Hakan na Inger?

Ol elda bilong kongrigesen i stretim rot na bai tupela i ken harim ol tok bilong miting Kristen long rot bilong telefon. Na tu, ol bratasista i save go lukim tupela o ringim ol. Na ol i salim ol pas na kat long tupela. Hakan i tok: “Mipela i pilim tru gutpela helpim olgeta brata na Jehova tu i givim long mipela. Dispela em i bikpela samting bilong helpim mipela long i stap strong long ol samting bilong spirit. Gutpela tru Inger i kamap orait gen, na mitupela inap i go gen long ol miting Kristen long Haus Kingdom.” Taim ol bratasista long kongrigesen i mekim ol samting ol inap mekim bilong helpim ol sikman na lapun namel long ol, ol i kamapim klia olsem ol i stap olsem ol ‘gutpela pren i save laikim yumi long olgeta taim, na olsem ol brata i save sambai long helpim yumi long taim bilong hevi.’​—Snd. 17:17.

Jehova i Amamas Long Ol Wok Bilong Yu

Wok bilong lukautim wanpela wanblut i gat sik em inap pinisim strong bilong yumi. Tasol King Devit i tok: “Man i save tingim ol rabisman na i helpim ol,” olsem ol man i gat sik na i nidim helpim, “dispela man i ken amamas.”​—Sng. 41:1.

I gat wanem as na man i lukautim sikman o man i gat pen, em i ken amamas? Sindaun 19:17 i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” Dispela God tru em i save tingim tru ol gutpela wokman bilong em i gat sik, na em i save mekim gut long ol man i mekim gut long ol. Devit, man bilong raitim song, em i tok: “Taim dispela man i gat sik, Bikpela bai i lukautim em. Em bai i mekim orait sik bilong em, na mekim em i kamap strong gen.” (Sng. 41:3) Yumi ken save tru olsem man husat i save lukautim gut wanpela wanblut i gat sik, na sapos taim nogut o hevi i painim em yet, Jehova bai i helpim em.

Yumi amamas long save olsem God Jehova i amamas na i lukim olgeta samting yumi save mekim bilong lukautim wanblut i gat sik! Tru, ating yumi mas taitim bun tru bilong mekim dispela wok, tasol Baibel i tok, “em dispela kain ofa God i save laikim tru.”​—Hi. 13:16.

[Futnot]

[Ol Piksa long pes 18]

Mekim ol wok bilong spirit na larim ol narapela i helpim yu