Yu Tingim Yet?

Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:

◻ Bilong wanem yumi ken bilip long ol man Jehova i makim ol bilong lukautim lain bilong em?

Ol man Jehova i makim ol long mekim sampela wok, ating ol i gat ol pasin inap long ol i ken stiaim lain bilong em long bihainim rot em i laik bai ol i mas bihainim long dispela taim.​—⁠8/15, pes 14.

◻ Stori bilong Jona inap skulim yumi long wanem samting?

Jona i tingting tumas long em yet, na em i no tingim ol narapela. Yumi mas larim pasin bilong Jona i skulim yumi olsem: Tingting bilong yumi yet long ol samting i mas i stap nambatu.​—⁠8/15, pes 19.

◻ Olsem wanem yumi ken tok, “nem bilong Jehova i olsem strongpela haus”? (Sindaun 18:⁠10, NW)

Taim yumi ran i go na painim ples bilong hait insait long nem bilong God, dispela i makim olsem yumi bilip long Jehova yet. (Song 20:1; 122:⁠4) Na tu, em i makim olsem yumi helpim wok king bilong Jehova, na bihainim ol lo bilong em, na yumi bilip long ol tok promis bilong em. Na em i makim tu olsem yumi lotuim Jehova wanpela tasol. (Aisaia 50:10; Hibru 11:⁠6)​—⁠9/1, pes 10.

◻ Olsem wanem pasin Pol i bihainim long autim tok long ol bikman i olsem gutpela piksa bilong yumi ken bihainim?

Taim Pol i toktok long King Agripa, em i bihainim gutpela tingting, em i kamapim gut samting em na Agripa i wanbel long en. Olsem tasol, yumi mas kamapim ol gutpela tok tru bilong gutnius, na kamapim gut ol samting yumi bilip na wet long en. (1 Korin 9:​22)​—⁠9/1, pes 31.

◻ Jehova i wet yet na dispela i helpim husat?

Jehova i wet yet na em i isi long ol man, olsem na em i givim rot long planti milion manmeri moa na bai ol i ken abrusim bagarap long ‘de bilong Jehova.’ (2 Pita 3:​9-​15) Na dispela pasin bilong Jehova long wet yet, em i givim rot long yumi na bai yumi ken ‘wok strong long painim rot bambai God i ken kisim bek yumi, na yumi mekim long pasin bilong pret na guria.’ (Filipai 2:​12)​—⁠9/15, pes 20.

◻ Olsem wanem Baibel Septuagint ol i bin tanim em i bikpela samting?

Dispela Baibel i bin mekim bikpela wok long helpim ol man long save long God Jehova na Kingdom bilong em long han bilong Krais Jisas olsem King. Na long rot bilong Baibel Septuagint wanpela bikpela wok i bin kamap bilong ol Juda i save tok Grik na ol man bilong ol narapela lain long taim bilong ol aposel, ol i ken kisim gutnius bilong Kingdom.​—⁠9/15, pes 30.

◻ Dispela tok piksa long pikinini i lusim papa, em i skulim yumi olsem wanem long God?

Namba wan samting i olsem: Jehova em i “God bilong marimari na sori, na em i no save belhat kwik; em i save laikim tru ol manmeri na em i save tok tru oltaim.” (Kisim Bek 34:⁠6, NW) Namba tu samting: Jehova i redi long lusim rong bilong ol sinman i tanim bel pinis na bai i gat as na em i ken marimari long ol. (Song 86:⁠5)​—⁠10/1, pes 12, 13.

◻ Wanem taim bai yumi lukim bel isi em Aisaia 65:​21-​25 i tok promis long en?

Ol manmeri God i bin makim na ol manmeri bilong “ol arapela sipsip” em ol i stap wanbel wantaim ol long lotuim Jehova long paradais bilong spirit, nau ol i kisim dispela bel isi God i save givim long yumi. (Jon 10:16) Na dispela bel isi bai stap tu long Paradais tru bai kamap long graun, taim laik bilong God i kamap long graun olsem i stap long heven. Long dispela taim bai yumi lukim tru tok bilong profet Aisaia. (Matyu 6:​10)​—⁠10/15, pes 24.

◻ Bilong wanem ol Kristen i save mekim kaikai samting bilong tingim de ol i bin marit, tasol ol i no orait long mekim betde?

Baibel i no tok marit em samting i no stret. Em samting bilong ol Kristen yet sapos ol i laik tingim de ol i bin marit, na long dispela de long olgeta yia ol i tingim bikpela amamas ol i bin kisim long dispela de, na ol i tingim tok ol i bin pasim long bel olsem ol bai wok strong bambai marit bilong ol i ken kamap gutpela. Tasol Baibel i stori long ol pati bilong betde em ol haiden tasol i bin wokim, na Baibel i stori long ol pasin nogut tru i bin kamap long ol dispela pati.​—⁠10/15, pes 30, 31.

◻ “Paia” long tok piksa bilong Pol long 1 Korin 3:​12, 13 i makim wanem samting? Na olgeta Kristen i mas save long wanem samting?

I gat wanpela paia i save painim yumi olgeta manmeri​—⁠em ol samting i save kamap bilong traim bilip bilong yumi. (Jon 15:20; Jems 1:​2, 3) Traim bai painim olgeta man yumi skulim ol long tok i tru. Sapos yumi no skulim ol gut, ating hevi bai kamap long dispela, na Pol i toksave olsem. (1 Korin 3:​15)​—⁠11/1, pes 11.

◻ Olsem wanem Noa i bin ‘wokabaut wantaim trupela God’? (Stat 6:⁠9)

Noa i mekim olgeta samting olsem God i bin tokim em long mekim. Noa i bin givim laip bilong em olgeta long mekim laik bilong Jehova, olsem na em i pas gut wantaim God na em i stap pren tru bilong Em.​—⁠11/15, pes 10.

◻ Yumi no save long taim stret bilong God i givim strafe long ol man nogut, olsem na rot i op long yumi ken mekim wanem?

Dispela i givim rot long yumi long kamapim long ples klia olsem yumi laikim tru Jehova na yumi laik wokabaut long rot em i makim i go inap oltaim oltaim. Na dispela i soim tu olsem yumi stap gut long God na yumi bilip olsem pasin bilong em long mekim ol samting, em i stret tasol. Taim yumi no save long de na aua, dispela i helpim yumi long was i stap na yumi no slip long ol samting bilong spirit. (Matyu 24:​42-​44)​​—⁠11/15, pes 18.

◻ Bilip “long nem bilong Pikinini Bilong God” dispela i makim wanem samting? (1 Jon 5:​13)

Dispela i makim olsem yumi bihainim olgeta lo bilong Krais, na wanpela lo bilong em i tok, yumi “wan wan i mas laikim tru ol arapela.” (Jon 15:​14, 17) Pasin bilong laikim tru ol narapela bai kirapim yumi long mekim gutpela pasin long ol. Dispela i mekim na yumi no tingim skin, o lotu, o sindaun bilong man.​​—⁠12/1, pes 7.

◻ Bilong wanem ol man i “bel nogut tru” long ol Witnes Bilong Jehova? (Matyu 10:⁠22)

Ol man i bel nogut long ol Witnes Bilong Jehova long wankain as olsem ol i bin mekim nogut long ol Kristen bilong pastaim. Namba wan as, em ol Witnes Bilong Jehova i bihainim ol bilip bilong ol long pasin em sampela man i no save laikim. Namba tu samting, ol man i bin sutim tok giaman long ol Witnes Bilong Jehova​—⁠em ol tok giaman i stap klia tru na ol i paulim tru ol tok bilong bilip bilong ol.​—⁠12/1, pes 14.