Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol askim i stap daunbilo:
• Kristen i mas mekim wanem sapos em i pilim olsem i hatwok long mekim ol samting bilong spirit na bel bilong em i no gat strong?
Yumi mas luksave long wanem samting i mekim na yumi pilim hatwok olsem. Ating i gutpela sapos yumi skelim ol samting yumi save mekim na ol samting yumi holim pinis, na rausim olgeta wok samting em yumi no mas mekim. Yumi inap putim ol mak bilong winim i stret wantaim sindaun bilong yumi yet. Em i bikpela samting long lukautim helt bilong yumi long ol samting bilong spirit, na pasin bilong beten oltaim na tingim gut long bel ol dispela i insait long en.—8/15, pes 23-26.
• Bilong wanem ol Witnes Bilong Jehova i tok namba 144,000 em i namba tru tru?
Taim aposel Jon i kisim tok long lain 144,000, bihain em i lukim “planti manmeri tru ol i bung i stap, na i no inap man i kaunim namba bilong ol.” (KTH 7:4, 9) Sapos dispela namba 144,000 em i tok piksa tasol, orait tok bilong tupela ves i no olsem narapela narapela kain, na tok bilong en i no gat strong. Jisas i toktok long ol man em ol bai mekim wok king wantaim em na em i kolim ol olsem “liklik lain sipsip.” (Luk 12:32)—9/1, pes 30.
• Bilong wanem wanpela Israel i ken salim mit bilong animal ol i no rausim blut long en i go long wanpela man bilong narapela kantri?
Wanpela man bilong narapela kantri i no bihainim lotu Juda em i no aninit long Lo. Olsem na i orait long wanpela Israel i givim o salim ol kain mit olsem long em. (Lo 14:21) Tasol man bilong narapela kantri i bihainim lotu Juda em i stap aninit long Lo na em i no inap kaikai mit ol i no rausim blut long en bilong kain animal olsem. (Wok Pris 17:10)—9/15, pes 26.
• Wanem sampela samting ol man i bin wokim long rot bilong kopim ol samting ol i lukim long graun? Bilong wanem ol Kristen i laik save long en?
Olsem: Tupela brata, Wilbur na Orville Wright, ol i bin skelim olsem wanem ol traipela pisin i flai na bihain ol i wokim wanpela balus. Olsem na pasin bilong kopim ol samting ol i lukim long graun inap kirapim ol Kristen long givim biknem long Man Bilong Wokim ol samting.—10/1, pes 9.
• Husat dispela man em 2 Korin 12:2-4 i tok God i kisim em i go long heven [“paradais,” NW ]?
Dispela tok i kamap bihain stret long ol tok Pol i bin mekim bilong kamapim olsem em i wanpela aposel tru. Baibel i no stori olsem kain samting i bin painim narapela man, na Pol yet em man i tokim yumi long dispela samting. Olsem na ating Pol tasol i lukim dispela samting.—10/15, pes 8.
• Jisas i gat wanem ol gutpela pasin i soim olsem em inap long mekim wok olsem Lida God i makim?
Jisas i stap gut olgeta long God, pasin na wokabaut bilong em i stret olgeta. Em i givim bel olgeta long mekim wok bilong God. Jisas i tingim tumas ol man na i amamas long mekim wok.—11/1, pes 6-7.
• Ol spirit nogut bai stap we long Taim Bilong Wan Tausen Yia?
Yumi ken tok olsem long Taim Bilong Wan Tausen Yia Bilong Krais i Stap King ol bai kalabus wantaim Satan. (KTH 20:1-3) Stat 3:15 i tok profet olsem Jisas bai krungutim het bilong snek, na wok bilong kalabusim Satan long hul i no gat as long Taim Bilong Wan Tausen Yia em tu i insait long dispela. Lain bilong Satan em ol ensel nogut, olsem ol spirit nogut. Ol i bin kamapim olsem ol i pret long dispela hul i no gat as na dispela i soim olsem ol i save long samting bai painim ol long bihain. (Luk 8:31)—11/15, pes 30-31.
• Bilong wanem man i mas was gut long pasin bilong dring alkohol, maski em i no dring inap long mak bilong ol narapela i ting em i spak?
Sampela man i save dring planti, tasol ol i no luk olsem ol i spak. Tasol isi isi man inap kalabus long alkohol na em i “larim wain i bosim tingting bilong [em].” (Taitus 2:3) Jisas i mekim tok lukaut olsem: “Yupela lukaut gut. Nogut yupela i dring nabaut oltaim na yupela i spak.” (Luk 21:34, 35) Sapos man i dring planti maski em i no spak, em inap mekim na em bai les long ol samting bilong skin na spirit.—12/1, pes 19-21.