Lukautim Famili—Yu Mas Lukautim Husat Tru?

“MI MAS lukautim brata bilong mi, em lo bilong mipela ol Afrika.” Wanpela man bilong Naijiria, nem bilong em S. A. Jegede, em i tok olsem. Tru tumas, long Afrika na long hap bilong Papua Niugini na long planti narapela hap tu, ol man i save helpim ol famili bilong ol; em i olsem lo o pasin bilong ol.

Planti taim ol i save tingim ol kandere na olgeta kasen-brata na ol wanples na ol wantok tu ol i olsem famili bilong ol! Tasol long nau, planti famili long Afrika i lusim ples na ol i kisim wok long ol biktaun, na dispela pasin bilong lukautim ol dispela “famili” bilong ol em inap putim bikpela hevi long ol. Planti taim ol wanblut o wanples o wantok i kam pulap long haus bilong ol na ol i mas givim kaikai long ol. Tasol i stap bilong ol long biktaun i narapela kain na sampela taim i hatwok long ol i lukautim ol dispela lain, o ol i no inap lukautim ol.

Baibel i tok: “Man i no lukautim ol wanlain bilong em yet, man i no lukaut liklik long ol wanblut tru bilong en, dispela man em i lusim bilip pinis, na em i man nogut tru. Ol haiden yet i no save mekim pasin nogut olsem.” (1 Timoti 5:8) Tasol husat ol i “wanlain” tru o “wanblut tru” bilong Kristen na Kristen i mas lukautim ol? Maski wanem wanem samting i kamap, em i mas lukautim ol o olsem wanem? O ating i olsem dispela man bilong Naijiria i tok: “Lo bilong ol Afrika na Baibel tu i no orait long olgeta lain bilong man i singaut long em i mas lukautim ol long ol samting bilong skin.”

Papamama na Ol Pikinini

Pasin bilong lukautim ol famili na kandere, dispela pasin i stap long taim bilong ol man bilong raitim Baibel. Tasol taim Baibel i tok, Kristen i mas “lukautim ol wanlain bilong em yet,” Baibel i no makim olsem em i mas lukautim olgeta kandere na kasen-brata na wanples na wantok samting. Nogat.

Baibel i tok strong olsem ol papamama i gat wok long helpim ol pikinini bilong ol. Wanpela kongrigesen i bin helpim Pol na Pol i raitim tok olsem: “Yupela i save, ol pikinini ol i no gat wok bilong painim na bungim samting bilong helpim ol papamama. Nogat. Ol papamama tasol ol i gat wok bilong bungim samting bilong helpim ol pikinini.”(2 Korin 12:14) Wanpela man i gat bikpela save long lo, nem bilong em H. B. Clark, em i tok: “I stret papa i mas lukautim pikinini bilong em, na dispela lo i stap long skin bilong em.” God i putim man i stap het bilong famili na em i wok bilong papa long lukautim famili long kaikai samting. Na sapos mama i lukautim gut haus na em i no tromoi nating mani, orait em i helpim papa long lukautim gut famili, na sapos ol i sot long mani, ating sampela taim mama tu i mas wok mani.−Lukim Provep 31:10-31.

Tasol papamama i no ken tingting tasol long painim mani. Nogat. Baibel i tok ol i mas “bungim” sampela mani bilong helpim pikinini bilong ol. Ol papamama i bihainim gutpela tingting olsem, ol inap helpim pikinini taim em i bikpela pinis na em i lusim papamama pinis. Sapos pikinini i mekim wok Kristen long olgeta de, olsem mekim wok painia samting, na papamama inap helpim em long liklik wansiling sampela taim bambai em i ken mekim yet dispela wok, em i gutpela. Tasol Baibel i no tok papamama i mas “bungim” mani bilong helpim olgeta kandere na kasen-brata na wanples na wantok samting.

“Bekim Dinau”

Sapos papamama i mekim gutpela pasin sori na lukautim gut ol pikinini bilong ol, bai ol i kisim gutpela pe. Long 1 Timoti 5:4 aposel Pol i tok: “Sapos wanpela meri [man bilong em i dai pinis] em i gat pikinini bilong en o tumbuna bilong en, orait ol i mas save gut olsem: Namba wan wok bilong ol em i wok bilong lukautim gut ol papamama bilong ol yet na bekim dinau long ol. Yes, God i laikim tumas dispela pasin.” Sapos Kristen i lukautim gut lapun papamama o tumbuna bilong em, orait dispela i stret wantaim lo bilong Baibel i tok, em i mas mekim gut long papamama na bihainim tok bilong ol.−Efesas 6:2; Eksodas 20:12.

Pol i no tok ol kandere na kasen-brata i mas lukautim ol dispela lapun meri, man bilong ol i dai pinis. Nogat. Long dispela taim bipo, sapos man bilong wanpela meri Kristen i dai pinis na i no gat sampela wanblut tru bilong lukautim em, orait Pol i tok kongrigesen i gat wok long helpim em.−1 Timoti 5:3, 9, 10.

Baibel i tok, Kristen i mas lukautim “ol wanlain” bilong em; em i mas lukautim gut meri pikinini bilong em na papamama tru na tumbuna tru bilong em. Maski ol dispela lain i no bilip o ol i gat sik samting, tasol Kristen i gat wok long lukautim ol. Em i mas lukautim ol i go inap long taim ol i dai. Na sapos Kristen i marit, ating em i mas helpim poroman bilong em long mekim gut long papamama bilong em tu. Sampela Kristen i marit ol i no bin mekim dispela wok bilong ol na poroman i kros na bikpela hevi i bin kamap insait long marit bilong ol.

Givim Wanem Samting? long Wanem Taim?

Tasol ol papamama i no ken ting ol i ken tromoi olgeta mani samting bilong ol, long wanem ol pikinini i gat wok long lukautim ol. Ol i no ken ting ol i ken singaut oltaim long ol pikinini long givim mani long ol. Nogat. Na ol i no ken strong strong na pulim bikpela hap taim tumas bilong ol pikinini long mekim ol samting bilong helpim ol, long wanem ating ol pikinini i gat meri pikinini bilong ol yet na ol i mas lukautim ol pastaim. Dispela tingting i stret wantaim tok bilong Pol, em i tok: “Ol pikinini ol i no gat wok bilong painim na bungim samting bilong helpim ol papamama. Nogat. Ol papamama tasol ol i gat wok long bungim samting bilong helpim ol pikinini.”−2 Korin 12:14.

Ating papamama inap kisim haus bilong ol yet, o ol i gat graun bilong ol yet, o ol i sevis pinis long kampani o wok bilong gavman na ol i kisim skel (pension) long dispela kampani o gavman long olgeta mun samting, olsem na ol inap lukautim ol yet taim ol i go lapun. Baibel i tok, “Mani i save lukautim man” na sapos papamama i bihainim gutpela tingting na “bungim” liklik mani samting bilong lukautim ol yet, orait ol i no ken putim hevi long ol pikinini bilong ol long bihain.−Eklisiastis 7:12, NW.

Tasol tok bilong Solomon long Eklisiastis 9:11 (NW) i kirapim tingting bilong yumi na yumi save, sampela taim ol samting yumi tingting long mekim i lus nating tasol. Solomon i tok: “Wanpela taim i save painim olgeta man, na sampela samting ol i no bin tingim, em tu i save painim ol.” Olsem wanem sapos papamama i tingting gut, tasol hevi i kamap na nau tupela i sot long samting? Orait, ol pikinini i bilip tru long God bai sori long tupela na helpim tupela inap long skel bilong ol. Ating ol i mas givim mani long papamama, o singautim tupela i kam i stap klostu long ol o i stap wantaim ol long haus, o sapos pikinini i no inap lukautim ol na i gat haus sik bilong ol lapun, em i ken stretim rot bilong putim ol long kain ples olsem. Tasol lapun papamama o tumbuna i mas tingting stret; ol i no ken strong long ol pikinini i mas givim planti samting tumas long ol, long wanem Baibel i tok: “Sapos yumi gat kaikai na laplap samting, orait yumi ken tok, ‘Em inap long mi.’”−1 Timoti 6:8.

Sampela taim i gat skel bilong kampani o gavman, o liklik mani papamama yet i bin bungim na dispela inap long lukautim lapun papamama o tumbuna. Gutpela sapos yu ken save wanem wanem samting ol lapun inap kisim, olsem long gavman samting, bilong helpim ol.−Rom 13:6.

No Ken Bihainim Tingting Bilong Ol Farisi

Jisas i krosim ol saveman bilong lo na ol Farisi, long wanem sapos papamama i sot long samting, ol i tokim ol: ‘Mani samting bilong mi em inap helpim yupela, em mi makim pinis bilong givim long God’ (Matyu 15:5) Long taim bilong Jisas, ol Juda i bihainim gut lotu ol i save makim sampela mani o graun samting bilong givim long haus lotu long bihain. Ol Farisi i kirapim ol long bihainim tingting olsem: Mani samting ol i makim pinis bilong givim long God ol i no ken mekim narapela wok long en, olsem bilong lukautim lapun papamama samting.

Krais i tok dispela tingting bilong ol Farisi i nogut na i no stret wantaim as bilong Lo bilong God. Long tingting bilong Jisas, wok bilong helpim papamama i bikpela wok na i winim wok bilong bihainim wanpela lo ol man i bin kamapim. Olsem tasol long nau, sampela Kristen i mekim wok painia o wok misineri o wok sekit samting−ol i givim laip bilong ol bilong mekim wok bilong God. Tasol taim ol i harim tok olsem papamama i sot long samting, ol i wok strong long painim rot bilong lukautim papamama na mekim yet wok painia bilong ol. Sapos i no gat rot, orait ol i no ting olsem wok painia i winim wok bilong helpim papamama. Nogat. Ol i stretim rot bambai ol inap mekim wok bilong ol long lukautim ol dispela famili tru bilong ol. Ol dispela brata sista i mekim gutpela wok.

“Mekim Gutpela Pasin long Olgeta Man”

Baibel i tok ol Kristen i gat wok long lukautim famili stret bilong ol, em ol i sot long samting: Tasol i no olsem ol i no ken sori long ol narapela famili bilong ol. Sampela lain, olsem lain bilong Papua Niugini, ol i save tingim tru kandere na smolmama o smolpapa bilong ol; na ol i save tingim ol kasen-brata bilong ol i olsem brata tru bilong ol. Baibel i. tok, yumi mas “mekim gutpela pasin long olgeta man.” (Galesia 6:10) Sapos Kristen inap helpim ol dispela lain bilong em, orait em i mas “sori” long ol. Na ating bai em i pilim olsem i stret em i mas helpim ol.−1 Jon 3:17.

Tasol namba wan wok bilong Kristen em bilong lukautim famili stret bilong em, olsem meri pikinini bilong em na papamama na tumbuna bilong em. Olsem na em i no ken kirap kwik long mekim wanpela samting bai putim hevi long em na bai em i no inap lukautim gut ol dispela famili tru bilong em long ol samting bilong skin na spirit na bilong helpim ol long i stap belgut na amamas.

Baibel i givim gutpela tok long yumi long lukautim famili. Sapos Kristen i bihainim dispela tok, bai em i no ken tingting planti; bai em i save wanem wok i namba wan wok bilong em. Na dispela bai litimapim nem bilong Jehova, em dispela Papa “olgeta lain man bilong heven na bilong graun” ol i bilong em.−Efesas 3:14, 15.

[Piksa long pes 22]

Namba wan wok bilong papamama Kristen em ol i mas lukautim pikinini bilong ol yet

[Piksa long pes 23]

Kristen i gat wok long lukautim ol pikinini bilong em, na sampela taim em i mas lukautim tu lapun papamama