Ol Yangpela i Laik Save . . .

Bilong Wanem Ol Bubu i Kam i Stap?

BIPO yu gat rum bilong yu yet na yu amamas. Nau brata o susa bilong yu i slip tu long dispela rum. Bipo yu save singautim ol pren i kam long dispela rum. Nau yu no inap mekim olsem, long wanem, ‘ol i mekim planti pairap.’ Bipo yu gat taim bilong amamas na mekim ol narapela samting. Nau ol wok bilong haus i pulim dispela hap taim. Bipo bel bilong papamama i stap isi na i no hatwok long toktok wantaim ol. Nau liklik samting tasol inap skrapim kwik bel bilong ol. Nau ol bubu bilong yu i kam i stap long haus, na ol samting i senis.

I no olsem yu no laikim ol bubu bilong yu. Tasol pasin bilong ol inap skrapim bel bilong yu. Nau yu wok long kros nating long ol liklik liklik samting. Wanpela yangpela, nem bilong em Viktoria, em i tok: “Ol lapun i gat kain kain pasin. Bubu bilong mi i save askim mi long bringim liklik sia i kam bambai em i ken putim lek antap long en, maski sia em i sindaun long en i gat samting olsem. O skin bilong mi i les taim mi kam long haus na mi gat tingting long slip, tasol bubu i laik bai mi stori wantaim em. Bubu bilong mi i save toktok taim mipela i sindaun lukim televisen. Sapos em tu i lukim televisen, em bai paulim stori bilong piksa, olsem na mipela i mas stori gen long em.”

Sapos wanpela bubu o tupela wantaim i kam i stap wantaim yupela, ating yu bel hevi liklik long dispela. Tasol stap bel isi​—famili i no laik bruk. Senis i kamap na sindaun bilong famili tu i senis. Sapos yu pilim na save olsem em wok bilong famili, na yu lain long pasin bilong “sori long olgeta man,” olsem papamama na ol bubu bilong yu, bai yu stap amamas na bel isi.​—1 Pita 3:8.

Em Wok Bilong Kristen

No ken ting olsem famili bilong yu tasol i gat dispela hevi. Nogat. Long hap bilong Amerika, planti pikinini i bikpela pinis i save helpim na lukautim ol lapun papamama bilong ol; wan wan tasol i save stap long ol haus bilong ol lapun samting.a Wanpela buk (The Intimate Environment) i tok: “Planti lapun i save telefon long ol pikinini bilong ol o ol i go lukim ol pikinini o askim ol long helpim ol long taim bilong hevi.”

Tru, long bel yumi pilim olsem yumi mas lukautim papamama, tasol yumi mas tingim dispela wok em i wanpela bikpela wok Jehova i givim long yumi. Aposel Pol i tok: “Sapos dispela meri i gat ol pikinini bilong em yet o ol tumbuna pikinini, orait yu mas helpim ol long save gut olsem, namba wan wok bilong ol long ai bilong God em wok bilong lukautim gut dispela mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin. Na harim. Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” (1 Timoti 5:​4, 8; Mak 7:​10-13) Em nau, God i tok ol pikinini na ol tumbuna pikinini ol i mas lukautim ‘wanblut tru bilong ol yet.’

Jisas yet i makim gutpela piksa yumi ken bihainim. Maski em i karim bikpela pen long pos diwai na em i laik dai, Jisas i no tingim bikpela hevi bilong em yet, nogat. Em i tingting long helpim lapun mama bilong em, olsem na Jisas i askim kasen brata bilong em Jon long lukautim mama. Maski Jon em i wanpela aposel na em i gat bikpela wok long mekim, em i kisim mama bilong Jisas i go long haus bilong em, “stat long dispela taim.”​—Jon 19:​26, 27.

Olsem na pasin bilong daun long papamama em hap wok bilong ol Kristen. (Efesus 6:2) Yumi no ken rabisim papamama bilong yumi, long wanem ol i kamap lapun pinis, nogat. (Sindaun 23:22) Baibel i tok, yumi mas daun long ol lapun, long wanem, ol i gat save na ol i bin stap longpela taim. (Wok Pris 19:32; Sindaun 16:31) God i save mekim gut long ol lapun, na em i mekim wok yet long ol long kamapim laik bilong em!​—Joel 2:28; Aposel 2:17.

‘Pastaim Mi Ting Bai i No Hatwok’

Olsem na nau yu save bilong wanem papamama i singautim ol bubu i kam i stap wantaim yupela. Ating pastaim yu no laik tingting planti long dispela samting na yu ting olsem olgeta samting bai kamap gutpela tasol, long wanem, yu save pas gut wantaim ol bubu. Yu bin save olsem sampela senis i mas kamap na i gat sampela samting yu mas lusim tu. Tasol nau ol i kam i stap wantaim yupela, na ol samting i no kamap olsem yu bin ting bai kamap.

Dispela kain samting i save kamap. Long planti hap bilong graun ol bubu, na ol papamama, na ol pikinini ol i stap long wanpela haus tasol. Pasin bilong lukautim papamama i gat sik samting, em pasin bilong ol man long sampela hap, na ol i no ting olsem dispela wok i givim hatwok long ol. Tasol long hap bilong Wes, ol pikinini na ol papamama i save stap long haus bilong ol yet, olsem na sapos ol lapun papamama i kam i stap long haus bilong pikinini, em nau, pikinini i ting dispela samting bai bagarapim sindaun bilong em. Tasol yu mas save, planti ol narapela famili i gat wankain hevi tu. Tasol ating ol papamama na ol bubu i pilim moa yet dispela hevi, winim yu.

Hevi Ol Papamama Bilong Yu i Pilim

Pastaim, tingim ol papamama bilong yu. Bai yu gat wanem kain tingting sapos yu lukim ol i kamap lapun, na skin na tingting na pasin bilong ol i senis? Bai yu pilim olsem wanem sapos ol man em bipo ol i save lukautim yu, isi isi ol i no inap lukautim skin bilong ol yet? Ating bel bilong yu bai hevi tru, a? Tingim bel bilong papamama bilong yu taim ol i lukim dispela samting i kamap long papamama bilong ol. Dispela samting i mekim na ating sampela taim ol i bel hevi liklik.

Ating papamama bilong yu i save olsem ol bubu bilong yu i no wanbel long olgeta samting ol i mekim. Planti taim ol bubu i ting papamama bilong yu ol i pikinini yet, na ol i save mekim hatpela tok samting long ol. Sampela taim ol lapun i save sutim nating tok long papamama na tok papamama i no save lukautim gut ol. Sampela lapun i save tokim ol bikpela pikinini bilong ol long pasin bilong lukautim ol liklik pikinini bilong ol. Ol i ting ol bikpela pikinini bilong ol i no strong tumas o ol i strong tumas long stretim pikinini bilong ol yet. Papamama bilong yu i save ol bubu i no laik mekim hatpela pasin long ol. Tasol ol i mekim planti samting pinis bilong helpim ol lapun, olsem na ol bai kros long dispela tok. Na taim dispela samting i kirapim papamama long mekim hatpela pasin long ol bubu bilong yu, bai papamama i sem o kros long pasin ol yet i mekim.

Ating papamama tu i no amamas long senis i kamap long sindaun bilong yupela. Ating bai famili i sot liklik long mani. Sapos papa na mama i mekim wok mani, na ol i gat wok bilong lukautim ol bubu tu, dispela inap mekim na skin bilong ol i les tru. Sapos papa o mama i ting olsem em wanpela tasol i mekim bikpela wok long lukautim ol bubu, ating kros bai kamap namel long tupela marit.

Hevi Ol Bubu i Pilim

Ating ol bubu tu i hevi long dispela samting. Baibel i tok, taim yu kamap lapun em “taim nogut.” (Saveman 12:​1-7) Bai yu hevi tu sapos yu lukim skin bilong yu i wok long bagarap na yu sik klostu klostu, a? Na taim ol i putim ol lapun bubu long wanpela nupela hap gen, dispela samting i save putim narapela hevi antap long ol. Planti lapun i no laik bai narapela i lukautim ol. Long wanpela buk (The Intimate Environment) i tok: ‘Planti lapun i laik bai ol pikinini i soim olsem ol i laikim ol na ol i laik bung wantaim ol. I no olsem ol i laik bai pikinini i givim mani long ol o lukautim ol long haus o givim ol narapela samting long ol, nogat. Planti ol lapun i no laik kisim samting, nogat. Ol i laik givim samting long pikinini o tumbuna pikinini.’

Olsem na i hatwok taim ol bubu i no stap moa long haus bilong ol yet. Bipo ol yet i save lukautim ol pikinini bilong ol, tasol nau ol pikinini yet i save lukautim ol. Olsem na no ken kirap nogut sapos i hatwok long amamasim ol long sampela taim. Inap planti yia ol i stap long haus bilong ol yet​—ol i stap bel isi na i no gat planti pairap​—na ol i amamas. Tasol nau ol i stap namel long ol yangpela, em ol i save opim redio samting na musik i go pairap strong, na ol i toktok tumas, olsem na bai ol i bel hevi liklik long dispela samting.

Bikpela samting em olsem: Yumi olgeta i mas traim long karim dispela hevi. Planti ol narapela famili Kristen i wok long painim rot bilong karim wankain hevi. (1 Pita 5:9) Bilong mekim olsem, yu mas wok strong tru long kamapim ‘ol kaikai bilong spirit’ na kamap “ol nupela manmeri.” (Galesia 5:​22, 23; Efesus 4:24; Kolosi 3:​13, 14) No ken wok long bruk bruk, tasol wok long pas gut wantaim olsem wanpela famili.

[Ol Futnot]

[Piksa long pes 20]

Taim ol bubu i kam i stap bai i no gat bikpela hap taim moa long mekim ol samting long laik bilong yu yet