Ol Yangpela i Laik Save . . .

Ol Bubu i Kam i Stap na Olsem Wanem Long Sindaun Bilong Mi?

YU BIN pren gut wantaim ol bubu bilong yu. Taim yu raun o sindaun wantaim ol, yu bin amamas. Tasol nau ol i kam i stap wantaim famili bilong yu.

Taim ol bubu i kam i stap, olgeta wan wan long haus i mas senisim sampela samting long sindaun bilong ol.a Olgeta i mas lain long pasin bilong tingim narapela narapela. Tasol i no olsem i no gat rot bilong stretim dispela samting. Sapos yu bihainim tok bilong Baibel, bai yu inap helpim famili long pas gut wantaim, i no long bruk bruk.

Strong Bilong Pasin Sori

Famili i ken stap bel isi sapos ol i bihainim tok bilong Baibel long 1 Korin 16:14. Em i tok: “Na yupela i mas givim bel bilong yupela long God na long ol man, na long dispela pasin yupela i mas mekim olgeta samting.” Na Baibel i tok tu olsem: “Pasin bilong laikim tru ol arapela, em i save karamapim planti sin.” (1 Pita 4:8) Wanpela nius (Family Relations) i soim olsem, pasin bilong laikim tru na tingim ol lapun bilong yumi em inap helpim yumi, long wanem, yumi no tingim tumas hevi na hatwok bilong lukautim ol lapun.

Tasol planti yangpela i no save sori long ol bubu bilong ol. Sampela i ting ol i lapun na ol i no inap mekim wanpela samting. Tasol ol yangpela Kristen i no save ting olsem long ol lapun. Ol i tingim tok bilong Sindaun 20:29. Em i tok: “Ol lapun i gat waitpela gras, na ol manmeri i save tingting long dispela na givim biknem long ol.” Em i stret, ol lapun i gat planti save. Sapos ol i Kristen, ol inap givim gutpela save na tingting long yu. Na ol i save laikim yu tru.​—Sindaun 17:6.

Olsem wanem? Sapos yu no bin pren gut wantaim ol bubu inap long nau, yu inap traim long stretim dispela samting? Wanpela yangpela meri i mekim olsem. Em i tok: “Mi baim soken bilong bubu mama bilong mi, mi save em bai laikim. Em i save soim dispela soken long olgeta man i kam long haus!” Bihainim wankain pasin na traim long toktok wantaim ol bubu inap sampela minit long olgeta de. O yu ken tokim ol, yu laik mekim sampela wok bilong ol. Sapos yu mekim olsem, ating dispela bai helpim yu long pas gut wantaim ol.

Planti samting inap traim pasin sori bilong olgeta. Bai i hatwok tu long ol lapun i senisim sindaun bilong ol. Ating bai ol i sik na kros klostu klostu. Na ating yu tu i hatwok long senisim sindaun bilong yu. Tasol no ken ting olsem yu tasol i pilim dispela hevi. Ol bubu tu i pilim dispela hevi. Tru tumas, em i “taim nogut” bilong ol. (Saveman 12:1) Yu mas mekim gut long ol, long wanem, ol i lukautim papamama bilong yu taim ol i yangpela yet. God i tok, sapos yumi aninit long em, yumi mas “bekim” dispela gutpela pasin sori long ol bubu bilong yumi.​—1 Timoti 5:4; Jems 1:27.

Lain Long Stretim Gut Tok

Yu inap abrusim ol hevi sapos yu tingim gut ol bubu bilong yu. (Filipai 2:4) Olsem: Ol lapun i no save laikim planti pairap; ol inap kros sapos krai bilong musik i antap tumas. (Saveman 12:4) Ating ol bai kros sapos ol pren bilong yu i kam na pairap. Ol dispela samting inap kamapim tok kros. Tasol Baibel i tok, ‘save i kam long God em i as bilong pasin wanbel, na pasin bilong harim tok bilong ol arapela man.’​—Jems 3:17.

Man i save stap wanbel wantaim ol narapela i save kamapim bel isi. Em i redi long wok strong​—maski em i lusim bikpela hap taim o mani​—long stap wanbel wantaim ol narapela. Na man bilong harim tok bilong ol narapela, em i no save bihainim tingting bilong em yet tasol, nogat. Em i save bihainim tingting bilong ol narapela tu. Tingim dispela na tok isi long ol bubu. Stretim gut tok. No ken tingim “ol laik bilong yu” yet pastaim.

Ating ol pren i ken kam lukim yu taim ol bubu i go long stua samting. O sapos ol pren i kam long apinun samting na i no long nait, ating ol bubu i no inap kros sapos yupela i mekim liklik pairap. Tasol ating yupela i no inap mekim dispela kain samting long olgeta taim. Sapos olsem, orait i gutpela sapos yu bihainim laik bilong ol bubu. Ating yu inap bungim ol pren long narapela hap o tanim musik i go daun sapos yu laik harim. I hatwok liklik, a? Em i stret. Tasol long dispela rot bel isi i ken stap long haus.

Sapos sampela pasin bilong ol bubu i save skrapim bel bilong yu, yu mas lain long stretim gut tok. Olsem: Ating sampela taim ol i laik toktok wantaim yu taim yu mekim homwok bilong yu. Tasol no ken kros long dispela samting. Ating ol i stap wanpis na ol i laik stori wantaim yu. No ken rausim ol i go o stap wanpis​—dispela bai mekim ol i bel hevi na i olsem yu no daun long ol. (Sindaun 18:1) Wanpela yangpela man, nem bilong em Kris, em i painim rot long stretim dispela samting. Em i tok: “Mi stretim tok long toktok wantaim bubu mama bilong mi taim mitupela i no gat wok.”

Skelim Gut Ol Samting

Olsem wanem sapos i gat bikpela wok long helpim na lukautim ol bubu bilong yu long olgeta taim? Maski yu laikim tru ol bubu, i no olsem yu wanpela tasol i mas mekim olgeta wok bilong lukautim ol. Baibel i kirapim ol papamama long skelim dispela wok na givim sampela long ‘ol pikinini na tumbuna pikinini’ Kristen. (1 Timoti 5:4) Olsem na ol papamama bilong yu i mas go pas long dispela wok, na ol i ken skelim ol wok em olgeta wan wan insait long famili inap mekim. Na 1 Pita 1:13 i tok, ol Kristen i mas bosim gut wokabaut bilong ol. Sapos yu mekim wok bilong ol narapela tu, sik inap painim yu na bihain bai yu bel hevi long mekim dispela wok.

Gutpela tingting na pasin Kristen bai helpim yu long skelim ol samting yu inap mekim na ol samting yu no inap mekim. Dispela bai helpim yu tu long tingim ol narapela long famili i gat sampela samting ol inap mekim na sampela samting ol i no inap mekim. Olgeta i mas wok strong long kamapim ‘ol pasin bilong spirit bilong God.’ (Galesia 5:​22, 23) Tasol maski olgeta i wok strong long mekim gutpela pasin, ating sampela taim kros bai kamap. Tasol no ken larim dispela i skrapim bel bilong yu. Baibel i tok: “Planti taim . . . yumi save popaia. Dispela kain samting i save kamap long yumi olgeta. Na sapos i gat wanpela man i stap, em i no save mekim sampela tok i no stret, orait em i gutpela man tru, na em bai inap long bosim gut olgeta hap bilong bodi bilong en.”​—Jems 3:2.

Toktok Gut Wantaim

Sapos yu toktok gut wantaim papamama, ating ol inap stretim hevi bilong yu. Baibel i tok: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela. Sapos yu no mekim olsem, bai yu hatwok nating.” (Sindaun 15:22) Olsem wanem? Ating yu kros liklik, long wanem, nau yu no gat rum bilong yu yet? O yu tingting planti, long wanem, yu kisim planti wok moa long lukautim ol bubu, winim ol narapela? No ken haitim, tokim papamama long hevi bilong yu.

Ating papamama bilong yu i pilim dispela hevi tu, na ol i no gat rot bilong senisim ol samting. Makim gutpela taim na toktok isi long ol. No ken tok strong long ol. (Sindaun 15:23) Tok tru na kamapim stret hevi bilong yu. (Efesus 4:25) Taim yu tokaut long hevi bilong yu, ating bai ol i putim yau long tok bilong yu. Na ating bai ol inap painim sampela rot bilong stretim dispela hevi.

Ating bai ol i makim wanpela rum long haus, na yu ken stadi o kaunim buk long en. O sapos yu gat ol brata o susa, ating ol i ken mekim sampela wok em pastaim yu save mekim. Long wanpela famili, ol i makim yangpela pikinini man long kaunim ol buk samting long bubu mama​—tupela i save amamas long mekim olsem. Na tupela susa bilong em i gat wok long wasim na bilasim bubu mama.

Kisim Bikpela Amamas Moa

Taim ol bubu i kam i stap long haus, ating em wanpela nupela samting tru long ol na long yu tu, a? Tasol sapos olgeta i stap wanbel, na mekim pasin sori, na givim bel long harim tok bilong narapela, olgeta inap kisim bikpela amamas tru. Rot i op nau na yu inap pas gut wantaim tupela lapun, em ol i gat planti save na ol i laikim yu tru. Dispela kain pren i winim tru ol pren bilong yu long skul samting. Dispela inap helpim yu long kamap gutpela man o meri. Wanpela yangpela meri, nem bilong em Beveli, em i tok olsem: “Taim mi helpim bubu mama bilong mi, mi save olsem ol dispela pasin mi wok long lainim inap helpim mi long bihain.”

Wanpela yangpela, nem bilong em Aron, em i kisim wankain tingting tu. Em i tok: “Mi save sindaun na toktok wantaim bubu mama na dispela i lainim mi long toktok wantaim ol lapun long kongrigesen. Pastaim mi save tok gude tasol long ol. Nau mi save lusim sampela minit long toktok wantaim ol. Na mi amamas long dispela! Nau ol i kamap olsem pren bilong mi.”

Olsem na no ken larim ol bubu i stap nating long haus. Mekim sampela samting wantaim ol. Ating bihain bai yu amamas long ol bubu i kam i stap long haus bilong yu.

[Ol Futnot]

[Piksa long pes 19]

Sapos yu pren gut wantaim ol bubu, ating bai yu kisim bikpela amamas tru