Lusim Haptaim Wantaim Famili

As na sampela i selebretim Krismas.

Lain Israel ol i tumbuna pikinini bilong wanpela man tasol em Jekop o Israel, olsem na ol i “brata tru,” ol i bilong wanpela famili. Taim ol i go bung long Jerusalem bilong tingim ol bikpela de bilong lotu, ol i “sindaun gut wantaim na i stap wanbel.” Wankain olsem ol, planti famili long nau i ting olsem long taim bilong Krismas em taim bilong bung wantaim, “sindaun gut,” na “stap wanbel.”

Bilong wanem dispela i givim hatwok?

Buk Encyclopedia of Christmas and New Year’s Celebrations i tok: “Ol liklik kros i save stap insait long famili long yia olgeta, planti taim dispela kros inap kamap olsem bikpela hevi taim famili i bung wantaim long Krismas.”

Wanem ol stiatok bilong Baibel inap helpim man?

“Mas bekim yet dinau [yu] i gat long papamama na ol tumbuna.” (1 Timoti 5:4) Wok strong long painim rot bilong go visitim ol famili planti taim. Sapos ol wanblut bilong yu i stap longwe, yu inap toktok planti taim yet wantaim ol. I gutpela yu raitim pas, ringim ol, o salim E-meil samting. Pasin bilong toktok gut wantaim planti taim, dispela i save daunim ol tingting kranki.

“Yupela yet i no gat bikpela spes long lewa bilong yupela. . . . Yupela tu i mas mekim pasin laikim bilong yupela i go bikpela moa.” (2 Korin 6:12, 13) Ol wanblut em yu save bungim wanpela taim tasol long yia inap kamap olsem ol man yu no save long ol na moa yet ol pikinini bai i no klia long ol. Sampela pikinini i pilim olsem planti samting long ol yet na long ol bubu o wanblut bilong ol i no wankain. Olsem na kirapim ol pikinini bilong yu long “mekim pasin laikim bilong [ol] i go bikpela moa” long rot bilong laikim tu ol lapun wanblut bilong yupela.a Ol pikinini husat i stap planti taim wantaim ol manmeri i bikpela pinis, ol inap kisim pasin bilong tingim tru na amamas long ol manmeri i gat bikpela krismas.

“Sapos ol man i toktok i stap na yu wetim gutpela taim na yu mekim wanpela gutpela tok long ol, orait bai yu amamas.” (Sindaun 15:23) Yu ken mekim wanem na bai tingting kranki o ol kros samting i no kamapim bikpela hevi namel long famili? Wanpela rot em long “wetim gutpela taim” long kamapim ol tingting bilong yu. Sapos pasin bilong toktok gut wantaim i strongim pasin pren bilong yupela, orait yu bai pilim olsem i isi long yu toktok wantaim wanpela wanfamili long stretim hevi i stap namel long yutupela na bai yupela i “sindaun gut wantaim na i stap wanbel” taim yupela i bung.