Baibel i Tok Wanem?
Kristen Inap Kisim Biknem Insait Long Lotu?
PLANTI taim yumi harim olsem ol i sot long ol pris pasto insait long ol lotu i gat nem Kristen, tasol ol i no sot long ol kain kain biknem. Sampela biknem i sotpela na sampela i hambak tru. Olsem:
Pris o pasto: “Reveren” [olsem Bikman].
Bisop bilong lotu Angliken: “Bikpela Reveren Bisop.”
Bisop bilong lotu Katolik (long Itali): “King i Gat Bikpela Save na Nambawan Bikpela Bikman.”
Kadinal: “Man Bilong Stap Antap Tru” (Eminens).
Pop: “Nambawan Papa Holi.”
Inap longtaim pinis ol man i mekim wok long dispela biknem “reveren” na “bisop” na nau ol man i no gat tok moa long ol dispela kain nem. Tasol olsem wanem? Baibel i orait long ol biknem olsem?
“Reveren,” “Bisop,” “Kadinal”
Long Baibel King James, dispela tok “reveren” i stap wanpela taim tasol, long Song 111:9, em i tok: ‘Nem bilong em i holi na reveren.’ Em nem bilong husat? Narapela ves i tok: ‘Mas pret long BIKPELA, dispela em i as bilong gutpela tingting.’ (Song 111:10) Long wanpela Baibel Katolik dispela tupela ves i tok: ‘Nem bilong em i holi na bikpela tru. As bilong gutpela tingting i olsem man i pret long Yawe [Jehova].’ (The New Jerusalem Bible) Em nau, Baibel i kamapim klia, yumi mas givim biknem long Jehova wanpela tasol. Olsem na i stret yumi givim dispela kain biknem long ol man?
Pol i bin tok olsem: ‘Sapos wanpela man i laik kisim wok bisop, em i laik kisim gutpela wok.’ (1 Timoti 3:1, KJ) Narapela Baibel (The New Jerusalem Bible) i tok: ‘Sapos man i gat laik long kamap wanpela elda bilong i go pas, em i laik kisim gutpela wok.’ Ol Kristen bilong pastaim i holim bikpela wok, ol i bin kolim ol olsem “elda” o “wasman.” Ol i no mekim wok long ol dispela biknem. Ol man i no bin kolim ol “Bisop Pita” o “Elda Jems.” Dispela em i as na ol strongpela man Kristen i mekim wok olsem elda insait long ol kongrigesen bilong ol Witnes Bilong Jehova i no holim dispela nem elda olsem wanpela biknem, nogat. Dispela tok “elda” na “wasman” (bisop) i bilong ol man i holim bikpela wok. Dispela nem i makim tu pasin ol i mas bihainim na ol wok ol i mekim.
Olsem wanem long dispela biknem “kadinal”? Em i stap long Baibel? Nogat. Em i no stap long wanpela Baibel. Tru tumas, Lotu Katolik yet i tok, dispela biknem i no kam long Baibel. Wanpela buk (New Catholic Encyclopedia) i tok: ‘Dispela tok i kam long tok Latin cardo, em i olsem “hinsis.” Pop Yujin Namba 4 i tok: “Olsem dua inap tanim long hinsis, olsem tasol Sios olgeta i no stap isi, tasol wok kadinal i holim na strongim.” ’ Dispela buk i tok moa, ol kadinal i amamas ol man i kolim dispela biknem ‘Eminens’ long ol. Bikpela namba bilong ol i mekim na ol inap long putim retpela saket na retpela hat. Tasol yu ting ol aposel i kisim ol ‘biknem’ olsem? Baibel i soim yumi, nogat.
“Bikpela,” “Bikman,” “Papa”
Olsem wanem? I gutpela sapos yumi kolim sampela bikpela man bilong lotu olsem “bikpela”? Ol i kolim bisop bilong lotu Angliken olsem “bikpela.” Planti taim ol i kolim ol kadinal na bisop Katolik olsem monsigno, insait bilong dispela tok i olsem “Bikman bilong mi.” Long sampela kantri ol pris pasto bilong Sios Dats Rifom i kisim nem dominee, em wanpela biknem i kam long tok Latin dominus, em i olsem “bikpela.” Tasol Jisas i skulim ol disaipel olsem: “Yupela i save, ol king bilong ol arapela lain i save bosim tru ol lain bilong ol. . . . Tasol dispela pasin i no ken i stap namel long yupela. Nogat.” (Matyu 20:25, 26) Aposel Pita tu i raitim tok olsem: “Yupela i no ken i stap olsem ol bikman . . . Nogat. Yupela i mas mekim gutpela pasin tasol, bai ol i ken lukim na bihainim.” (1 Pita 5:3) Taim Jisas i wasim lek bilong ol disaipel bilong em, em i tok: “Yupela i save kolim mi Tisa na Bikpela. Na i gutpela yupela i tok olsem.” (Jon 13:13) Olsem wanem? I stret ol man i kisim wanpela biknem bilong lotu em i bilong God tasol na Pikinini bilong em?
I stret ol i mekim wok long dispela biknem “papa”? Ol Katolik na Angliken i kolim planti taim. Planti taim ol i mekim wok tu long dispela tok, “pater,” insait bilong en i olsem “papa.” Tasol Jisas i skulim ol disaipel olsem: “Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven.” (Matyu 23:9) Bilong wanem ol bikpela man bilong lotu na ol man i bihainim ol i sakim dispela lo bilong Krais Jisas?
Planti taim ol i kolim pop bilong Rom olsem “Papa Holi.” Tasol ol lain wokman bilong em long Itali i kolim em Santissimo Padre, olsem “Nambawan Papa Holi.” Long Baibel Inglis dispela biknem “Papa Holi” i stap wanpela taim tasol. (Jon 17:11) Dispela biknem em i bilong Nambawan Bikpela God tasol. Yu ting i stret yumi kolim dispela biknem long ol sinman bilong graun?
Lotu i No Wok Stret
Plis kaunim ol tok i stap long Matyu 23:1-12. Jisas i kirap toktok long ol Farisi, em wanpela lain Juda i gat namba. Ol i strong long bihainim olgeta liklik liklik samting long lo bilong Moses. Ol i mekim ol samting i pulim ai bilong ol man na ol i hambak long lotu bilong ol, long pasin bilong ol long putim klos na kisim ol namba wan ples long taim bilong kaikai na long haus lotu na ol biknem bilong litimapim ol yet. Ol i tok ol i gat namba i winim bilong papamama. Ol i laik bai ol man i kolim ol papa. Tasol Jisas i tok klia, olgeta man i bihainim em ol i wankain, olsem brata brata. Olgeta biknem i narapela long dispela tok i makim pasin antap bilong ol man i laik pulim samting em i bilong God. Olsem na Jisas i tambuim dispela tok “papa” olsem wanpela biknem insait long ol lotu. Jisas i tok strong olsem ol disaipel bilong em i gat wanpela papa tasol, em Jehova.
Olsem wanem? Yu save olsem planti pris pasto i laik kisim biknem wankain olsem bilong God na Pikinini bilong em na ol i laik pulim gutnem bilong God i go long ol? Ol trupela Kristen bilong nau i no laik mekim wok long ol narapela kain biknem bilong ol lotu na ol i no laik litimapim ol man i go antap tru. Namel long ol Witnes Bilong Jehova, ol i kolim olgeta olsem “brata.” (2 Pita 3:15) Dispela i stret long tok bilong Jisas: “Yupela olgeta i stap brata brata.”—Matyu 23:8.
[Piksa Kredit Lain long pes 12]
The Three Bishops, by Albrecht Dürer, c. 1507