“Redi Long Mekim Olgeta Kain Gutpela Wok”

“YU MAS tokim ol manmeri long ol i mas stap aninit long ol king na ol gavman, na ol i mas bihainim tok bilong ol. Na oltaim ol i mas redi long mekim olgeta kain gutpela wok.” (Taitus 3:⁠1) Aposel Pol i tingim wanem kain gutpela wok taim em i raitim dispela tok long ol wanbilip bilong em? Wanpela saveman bilong Baibel, em E. F. Scott, i stori long wanpela gutpela wok olsem: “Ol Kristen i mas bihainim tok bilong gavman, na ol i mas redi long mekim ol gutpela wok tu. . . . Taim i gat wok long mekim olsem, ol Kristen i mas go pas long mekim ol wok bilong helpim komiuniti. Taim bikpela paia o bikpela sik o narapela kain hevi i bin kamap, ol gutpela man i bin redi long helpim ol narapela.”

Ol Kristen i save insait long sampela wok bilong helpim komiuniti sapos ol dispela wok i no kalapim lo bilong God. (Aposel 5:29) Olsem, brens-ofis bilong ol Witnes Bilong Jehova long Ebina long Japan i bihainim tok bilong dipatmen bilong paia long hap bilong ol, na long wanpela taim long olgeta yia ol i save mekim traim pasin bilong mekim dai paia. Long kain samting olsem, olgeta memba bilong famili Betel i save bung wantaim bilong harim tok wanpela wokman bilong dipatmen bilong paia i mekim.

Na tu, winim 10-pela yia nau, dispela brens-ofis i bin wok gut wantaim ol bikman bilong dispela hap long wanpela so ol dispela lain i kamapim bilong pasim paia. Long dispela so, ol kampani long dispela siti i save soim pasin bilong ol long pasim paia na bosim paia. Planti taim ol i save givim gutpela tok amamas long wok na pasin bilong ol lain long brens long wok bung wantaim. Long 2001, ol i kisim namba wan prais long dispela so. Ol i redi long mekim gutpela wok em inap helpim ol man long abrusim bagarap sapos i gat paia.

Wanpela Bikpela Wok

Tasol i gat narapela kain gutpela wok i bikpela samting moa em ol Witnes Bilong Jehova ol i laik mekim na em tu i bilong helpim ol man long abrusim bagarap. Ol i save go long haus bilong ol man i sindaun klostu long ol na autim gutnius bilong Kingdom bilong God long ol. (Matyu 24:14) Ol Witnes i save kirapim ol man long lainim na bihainim ol tok bilong Baibel long i stap bilong ol bambai ol inap sindaun gut na stap amamas nau na bilip na wet long kisim laip i stap gut oltaim long wanpela taim we i gat bel isi tru.

Sampela i no tingim gutpela wok ol Witnes Bilong Jehova i save mekim, na ol i les long ol. Tasol Jas Jean Crepeau bilong bikpela kot long Quebec, Kanada, i gat narapela tingting. Ol Witnes Bilong Jehova long dispela hap i no wanbel long wanpela lo bilong taun Blainville long Quebec, em dispela lo i tok ol i mas kisim wanpela pepa i tok orait long ol i ken autim tok long ol haus. Taim kot i pasim tok, Jas Crepeau i tok: “Wok bilong ol Witnes long raun long ol haus, em i wanpela wok Kristen bilong helpim komiuniti na . . . ol buk na nius ol Witnes i givim long ol man i gat laik long kisim ol i bikpela samting, ol i toktok long ol samting olsem lotu, Baibel, drak, alkohol, ediukesen, hevi bilong ol marit na pasin bilong brukim marit.” Na kot i tok moa: “Taim man i tok olsem wok bilong ol Witnes bilong Jehova i wankain olsem wok bilong ol bisnisman, kain tok olsem i nogutim na bagarapim gutnem bilong ol.”

Ol Witnes Bilong Jehova i helpim sindaun bilong komiuniti ol i stap long en long rot bilong helpim ol manmeri long winim ol hevi bilong wan wan de na helpim ol long bilip na wet long kisim ol gutpela samting long bihain. Baibel i helpim ol long mekim dispela wok. “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”​—⁠2 Timoti 3:​16, 17.

Yu laik save long olsem wanem ol Witnes Bilong Jehova i “redi long mekim olgeta kain gutpela wok”? Mipela i laik singautim yu long larim ol i helpim yu long kisim sampela save moa long Baibel na long dispela rot yu bai kisim helpim long dispela bikpela wok bilong helpim komiuniti ol i mekim long hap bilong yu na long olgeta narapela hap.

[Ol Piksa long pes 30, 31]

Ol Witnes Bilong Jehova ol i bihainim tok bilong gavman

[Piksa long pes 31]

Ol Witnes i gat nem long helpim ol man i stap klostu long ol