Bungim Gutpela Pasin Wantaim Bilip Bilong Yumi
“Mas wok strong tru long mekim gutpela pasin, na long mekim dispela kain pasin i stap strong olsem bilip bilong yupela.”—2 PITA 1:5.
JEHOVA i save bihainim gutpela pasin tasol. Em i mekim ol samting i stret na i gutpela. Pita i tok, God i singautim ol Kristen “long bikpela namba na strong bilong en na long gutpela pasin tru bilong en.” Ol i kisim stretpela save long gutpela pasin bilong Papa bilong ol long heven na dispela i bin lainim ol long ol samting ol i mas mekim na bai ol i ken givim bel long God.—2 Pita 1:2, 3.
2 Pol i tokim ol Kristen: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 5:1) Long olgeta taim lain bilong Jehova i mas bihainim pasin i gutpela olsem Papa bilong ol i save mekim. Gutpela pasin i wanem samting?
Gutpela Pasin
3 Ol buk dikseneri i tok, gutpela pasin i olsem ‘pasin i nambawan olgeta,’ olsem ‘pasin na tingting i stret.’ Na sampela buk i tok, man i bihainim gutpela pasin, em i save bihainim stretpela lo. God yet i kolim ol stretpela lo ol Kristen i mas bihainim, na ol dispela lo i stap long Baibel.
4 Kristen tru i save bihainim ol stretpela lo bilong God Jehova, na ol i bilip long ol gutpela tok promis bilong em, na ol i bihainim tok bilong Pita olsem: “Yupela i mas wok strong tru long mekim gutpela pasin, na . . . kisim save long God, na . . . bosim gut laik bilong bodi bilong yupela, na . . . sanap strong na karim hevi, na . . . wokabaut long pasin bilong God, na . . . i stap pren tru bilong ol arapela manmeri bilong God, na . . . givim bel bilong yupela long ol arapela.” (2 Pita 1:5-7) Ol Kristen i mas wok strong long kisim ol dispela pasin, na ol i mas wok strong olsem i go inap long olgeta taim. Yumi mas wok strong long putim gutpela pasin i go long bilip bilong yumi.
5 Saveman M. R. Vincent i tok, long bipo long tok Grik, dispela tok, “gutpela pasin” i olsem “olgeta kain gutpela pasin.” Pita i bin tokim ol Kristen long ol “i ken tokaut long olgeta gutpela pasin [God] i bin mekim long” ol. (1 Pita 2:9) Baibel i makim “gutpela pasin” i olsem strongpela laik long mekim pasin i stret, na bel i kirap tru long mekim dispela pasin. Pita i bin tingim lain bilong God i mas i gat strongpela bel na ol i mas bihainim pasin i stret long olgeta taim. Tasol sin i stap long yumi, na olsem wanem yumi inap mekim gutpela pasin long ai bilong God?
Gutpela Pasin, Maski i Gat Sin
6 Skin bilong yumi i no gutpela olgeta, na sin i stap long yumi tu, orait, olsem wanem yumi inap mekim pasin i stret long ai bilong God? (Rom 5:12) Jehova i mas helpim yumi long kisim gutpela bel na bai ol tingting na toktok na pasin bilong yumi i gutpela. (Lukim Luk 6:45.) Devit i bin trabel wantaim Batseba, tasol bihain em i tanim bel na em i beten olsem: “God, yu wokim nupela klinpela bel insait long mi . . . na bai mi bihainim yu tasol.” (Song 51:10) God i lusim rong bilong Devit na God i helpim em long kirap mekim gen gutpela pasin na i stap strong gen. Olsem na sapos yumi bin mekim bikpela rong, tasol yumi tanim bel tru na larim God na ol elda i helpim yumi, yumi inap kirap gen long bihainim gutpela pasin na i stap gut olsem.—Song 103:1-3, 10-14; Jems 5:13-15.
7 Tasol sin i stap yet long yumi, olsem na olgeta taim yumi mas wok strong long daunim laik bilong skin na bai yumi ken bihainim gutpela pasin. Na yumi mas wok strong tu na bai yumi no pundaun na larim sin i bosim yumi gen; yumi mas “i stap wokboi bilong stretpela pasin” na bai tingting na toktok na pasin bilong yumi i gutpela tasol. (Rom 6:16-23) Tasol laik bilong skin bai wok yet long pulim yumi, na dispela i pait wantaim stretpela pasin God i laik bai yumi mas bihainim. Orait, bai yumi mekim wanem?
8 Yumi mas larim spirit holi bilong Jehova i stiaim tingting bilong yumi. Pol i tok: “Larim Holi Spirit i stiaim wokabaut bilong yupela. Sapos yupela i mekim olsem, orait yupela bai i no inap bihainim laik bilong olpela bel. Yumi save, olpela bel em i laik daunim Holi Spirit, na Holi Spirit em i laik daunim olpela bel. Tupela i birua wantaim, na samting yupela i laik mekim, em yupela i no inap mekim.” (Galesia 5:16, 17) Spirit holi bilong God i strongim yumi long bihainim pasin i stret, na Baibel i lainim yumi long ol stretpela pasin yumi mas bihainim. Na oganaisesen bilong Jehova i helpim yumi, na “wokboi i gat gutpela tingting” i save givim tok long yumi bilong stretim yumi. (Matyu 24:45-47) Olsem na yumi inap bosim gut skin na daunim ol laik nogut. (Rom 7:15-25) Sapos tingting nogut i kamap long bel bilong yumi, kwiktaim yumi mas rausim, na yumi mas beten askim God long helpim yumi long sakim pasin nogut.—Matyu 6:13.
Gutpela Tingting
9 Gutpela tingting yet i kirapim yumi long bihainim gutpela pasin. Sapos yumi laik bai God i orait long pasin bilong yumi, orait, yumi mas tingting tasol long ol samting i stret na i gutpela. Pol i tok: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” (Filipai 4:8) Yumi mas putim tingting i go long ol gutpela stretpela samting tasol, na no ken laikim ol samting i no stret. Pol i tokim ol wanlotu bilong em: “Olgeta pasin mi bin skulim yupela long mekim na . . . olgeta pasin yupela i bin harim mi i autim tok long ol na yupela i bin lukim mi i mekim, . . . yupela i mas mekim oltaim.” Sapos yumi gat gutpela stretpela tingting na toktok na pasin olsem bilong Pol, dispela bai helpim ol narapela Kristen yumi save bung wantaim ol, na ol i ken lukim na ol tu i ken bihainim, na “God, em i as bilong pasin bilong bel isi, em bai i stap wantaim” yumi.—Filipai 4:9.
10 Sapos yumi laik holim gutpela klinpela tingting tasol na bai Papa bilong yumi long heven i ken amamas long yumi, orait, yumi mas tingim dispela tok bilong Pol olsem: “Ol brata, yupela i no ken i stap olsem ol pikinini long tingting bilong yupela. Nogat. Long olgeta kain pasin nogut yupela i mas i stap olsem ol liklik pikinini. Tasol tingting bilong yupela i mas i stap olsem tingting bilong ol bikpela man.” (1 Korin 14:20) Olsem na yumi ol Kristen i no ken lain long ol pasin nogut o kisim save long ol dispela samting. Gutpela sapos tingting bilong yumi i olsem bilong pikinini long ol dispela kain samting. Pasin pamuk na olgeta narapela kain pasin nogut i no stret tru long ai bilong Jehova. Sapos yumi gat strongpela laik long mekim gutpela pasin tasol, dispela bai kirapim yumi long lusim ol pilai na amamas nogut na ol narapela kain pasin nogut bilong dispela graun em Satan i bosim.—1 Jon 5:19.
Gutpela Tok
11 Sapos yumi gat gutpela tingting, dispela bai mekim na gutpela toktok tasol i kamap long maus bilong yumi, olsem ol tok i klinpela na i tru na ol toktok inap strongim ol man i harim. (2 Korin 6:3, 4, 7) Jehova em i “God bilong mekim pasin tru tasol.” (Song 31:5) Em i save mekim pasin i stret tasol na em i tok tru tasol na em i save truim ol tok promis bilong em, long wanem, em i no inap tok giaman. (Namba 23:19; 1 Samuel 15:29; Taitus 1:2) Na Pikinini bilong em Krais Jisas tu, em “pasin i tru i pulap long em.” Taim em i stap long graun em i bin autim tok i tru em i kisim long Papa bilong em. (Jon 1:14; 8:40) Jisas “i no bin mekim sin, na tu em i no bin mekim wanpela tok giaman.” (1 Pita 2:22) Sapos yumi i lain tru bilong God na Jisas, yumi mas tok tru tasol na bihainim ol pasin i stret tasol na “pasim tok tru olsem let bilong” yumi.—Efesus 5:9; 6:14.
12 Na sampela kain tok yumi mas abrusim. Pol i tok: “Mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut.” “Pamuk na . . . pasin doti, na . . . mangalim ol samting . . . tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin. Yupela i no ken mekim tok doti na tok kranki na tok pilai nogut. Dispela kain pasin em i no inap long yumi mekim. Nogat.” (Efesus 4:31; 5:3, 4) Sapos bel bilong yumi i stret na yumi abrusim ol dispela kain tok i no bilong ol Kristen, ol man bai amamas long bung wantaim yumi.
13 Yumi laik bai God i ken amamas long yumi, na dispela bai kirapim yumi long bosim gut maus bilong yumi. Yumi gat sin, olsem na sampela taim yumi save popaia. Tasol Jems i tok: “Yumi save putim hap ain long maus bilong ol hos, bilong mekim ol i bihainim laik bilong yumi na wokabaut.” Olsem tasol yumi mas wok strong long bosim maus bilong yumi na bai maus i autim ol gutpela tok tasol. Maus inap long “mekim ol kain kain pasin nogut i kamap long laip bilong yumi.” (Jems 3:1-7) Maus inap long stori long ol pasin nogut bilong dispela graun. Em inap long tok baksait, na tok giaman, na daunim man, na bagarapim nem bilong man. (Aisaia 5:20; Matyu 15:18-20) Kain tok olsem, i olsem marasin nogut bilong kilim man i dai.—Song 140:3; Rom 3:13; Jems 3:8.
14 Olsem Jems i tok, i no stret sapos sampela taim maus i “litimapim nem bilong” Jehova, na sampela taim dispela maus tasol i “mekim tok nogut bilong bagarapim” man. Sapos long miting yumi mekim ol singsing i litimapim nem bilong God, na long sampela ol narapela taim yumi sutim tok long wanbilip bilong yumi, dispela i no stret. Long wanpela paip wara yumi no inap kisim gutpela wara na wara i gat pait. Sapos yumi wokman bilong Jehova, ol man bai ting yumi mas mekim ol gutpela tok tasol, na no ken mekim tok nogut. Olsem na yumi mas klia long ol tok nogut na mekim ol tok inap strongim ol man long ol samting bilong spirit.—Jems 3:9-12.
Gutpela Pasin
15 Tingting na toktok bilong Kristen i mas gutpela, na pasin bilong em tu. Yumi mas i gat gutpela pasin na bai God i ken orait long yumi. Wokman bilong Jehova i no ken giamanim narapela man. Jehova i no ken laikim man bilong paulim narapela man. Sindaun 3:32 i tok: “Bikpela yet i no laik tru long kain man olsem. Tasol Bikpela i stap wanbel tru wantaim ol man i save wokabaut stret.” Sapos yumi laik i stap gut long God Jehova, yumi mas tingim dispela tok na bai yumi no ken tingting long mekim sampela pasin giaman bilong nogutim man na ol narapela pasin olsem. I gat 7-pela samting Jehova i nolaik tru long en, na wanpela em “pasin bilong tingting long mekim pasin nogut.” (Sindaun 6:16-19) Yumi mas klia long kain samting olsem, na yumi mas mekim ol samting inap helpim ol narapela man na inap litimapim nem bilong Papa bilong yumi long heven.
16 Long olgeta taim yumi mas bihainim stretpela pasin. (Hibru 13:18) Man i gat tupela maus, pasin em i mekim i no stret wantaim tok em i mekim. Em i no mekim gutpela pasin. Dispela tok, tupela maus, long tok Grik (hy·po·kri·tesʹ) i olsem man i giaman na makim narapela man olsem long wanpela pilai samting. Man bilong tupela maus em i no save stap gut long tok i tru. (Skelim Luk 12:46 wantaim Matyu 24:50, 51.) Na dispela tok, tupela maus, em i ken makim tu olsem pasin nogut o pasin bilong trikim man. (Matyu 22:18; Mak 12:15; Luk 20:23) Sapos man bilong tupela maus i giamanim wanpela gutpela man, na gutpela man i bilipim tok gris bilong em na dispela i paulim gutpela man, sori tumas. Tasol i gutpela tru sapos yumi inap bilip tru long tok bilong narapela Kristen na yumi save em i no man bilong tupela maus. God i save mekim gut long man i bihainim pasin i stret na i no giaman. Em i amamas long man i mekim pasin sori long narapela man, na em i save laikim “ol manmeri i bilip tru . . . na i stap klin tru long ai bilong” em. Em i no laikim man bilong giaman na man bilong tupela maus.—1 Pita 1:22; 1 Timoti 1:5.
Mekim Gutpela Pasin Tasol
17 Sapos yumi skruim gutpela pasin i go long bilip bilong yumi, na tupela i pas wantaim, dispela bai helpim yumi long abrusim ol tingting na toktok na pasin em God i no orait long en. Yumi mas kamapim ol gutpela pasin Kristen. Yumi mas mekim ol samting bilong helpim narapela man, olsem mekim gutpela pasin long ol. Gutpela pasin em i samting spirit holi bilong Jehova i save kamapim, na i no samting ol man tasol i as bilong en. Spirit bilong Jehova i as bilong en. (Galesia 5:22, 23) Taim spirit bilong Jehova i kirapim yumi long mekim gutpela pasin long ol narapela, bai yumi gat gutpela tingting long ol, na yumi tokim ol long sampela gutpela pasin bilong ol o gutpela wok ol i bin mekim, maski ol i gat sampela pasin kranki samting. Sapos ol i bin mekim wok bilong Jehova inap planti yia, orait, yumi ken litimapim dispela wok bilong ol na tokim ol em gutpela wok bilong God ol i mekim. Papa bilong ol long heven em i lukim ol gutpela wok ol i bin mekim na em i tingim, na yumi tu i mas tingim.—Nehemia 13:31b; Hibru 6:10.
18 Sapos yumi bihainim gutpela pasin, bai yumi isi long ol man na no ken les kwik long ol; mas mekim pasin sori long ol. Sapos wanpela brata o sista i sik o i gat hevi, yumi mas givim gutpela tok long em bilong oraitim bel bilong em, olsem Papa bilong yumi long heven i save mekim pasin sori long yumi na mekim gut long yumi. (2 Korin 1:3, 4; 1 Tesalonaika 5:14) Yumi save sori long brata o sista i gat hevi long wanpela bilong famili bilong em i dai pinis. Sapos yumi inap mekim sampela samting bilong helpim na strongim narapela i gat hevi, orait, gutpela yumi mekim. Gutpela tingting i mas kirapim yumi long mekim pasin sori long ol man i gat hevi long sampela samting.
19 Yumi save kolim ol gutpela pasin bilong Jehova na mekim gut nem bilong em, na olsem tasol ating ol narapela man bai mekim gut nem bilong yumi sapos yumi gat gutpela klinpela tingting na toktok na pasin. (Song 145:10) Baibel i tok: “God i save mekim gut long ol stretpela man. Tasol tok bilong man nogut i save haitim tingting nogut bilong em long bagarapim ol arapela man.” (Sindaun 10:6) Man nogut bilong kros pait em i sot long ol gutpela pasin, olsem na ol narapela i no inap laikim em. Em i karim ol hevi em yet i bin kamapim, na ol narapela i no gat laik long mekim gut long kain man olsem. (Galesia 6:7) Tasol tingting na toktok na pasin bilong ol wokman bilong Jehova i mas gutpela tasol. Olsem na bai ol narapela man i ken givim gutnem long ol na laikim ol na bilip long ol na mekim gut long ol, na Jehova tu bai mekim gut long ol.—Sindaun 10:22.
20 Gutpela tingting na toktok na pasin bilong yumi bai helpim gut lain bilong Jehova. Sapos ol wan wan i gat gutpela tingting long ol narapela, pasin bilong laikim tru ol narapela em bai stap namel long yumi. (Jon 13:34, 35) Na gutpela toktok inap strongim bel bilong ol narapela na helpim ol long i stap wanbel na wok gut wantaim. (Song 133:1-3) Na sapos yumi mekim gutpela pasin long ol narapela, dispela bai kirapim ol long mekim olsem. Na namba wan samting, sapos yumi bihainim gutpela pasin Kristen long olgeta taim, orait, Papa bilong yumi long heven, em Jehova, em bai amamas na em bai orait long yumi na mekim gut long yumi. Olsem na oltaim yumi mas tingim ol gutpela tok promis bilong Jehova, na dispela i mas kirapim yumi long bilip strong na skruim gutpela pasin i go long bilip bilong yumi.
Wanem Bekim Bilong Yu?
◻ “Gutpela pasin” em wanem samting? Yumi gat sin na yumi no gutpela tru, na olsem wanem yumi ken mekim gutpela pasin?
◻ Yumi mas i gat wanem kain tingting?
◻ Gutpela pasin i mas kirapim yumi long mekim wanem kain toktok?
◻ Yumi mas bihainim wanem kain pasin?
◻ Gutpela pasin inap kamapim wanem gutpela samting?
1, 2. Bilong wanem lain bilong Jehova i mas bihainim gutpela pasin?
[Askim Bilong Stadi]
3. Wanpela buk dikseneri i tok wanem long gutpela pasin?
4. Wanem ol pasin 2 Pita 1:5-7 i kolim na ol Kristen i mas wok strong long kisim?
5. Baibel i makim wanem samting i olsem gutpela pasin?
6. Yumi gat sin, tasol olsem wanem yumi inap mekim pasin i gutpela na i stret long ai bilong God?
7, 8. (a) Bilong bihainim gutpela pasin oltaim, yumi mas mekim wanem? (b) Wanem ol samting i ken helpim Kristen long bihainim gutpela pasin?
9. Yumi mas i gat wanem kain tingting na bai yumi ken bihainim gutpela pasin?
10. Sapos yumi laik bihainim tok bilong 1 Korin 14:20, yumi mas mekim wanem bilong holimpas gutpela pasin?
11. Maus bilong yumi i mas autim wanem kain tok? Olsem wanem Jehova na Jisas i stap olsem gutpela piksa bilong dispela samting?
12. Wanem kain toktok yumi mas abrusim?
13. Bilong wanem Kristen i mas bosim maus bilong em?
14. Olsem wanem yumi no ken stap olsem man bilong tupela maus?
15. Bilong wanem yumi no ken mekim pasin giaman?
16. Bilong wanem Kristen i no ken giamanim narapela man?
17, 18. Spirit i kirapim yumi long mekim wanem long narapela man?
19. Sapos yumi bihainim gutpela tingting na mekim ol gutpela toktok na pasin, ol narapela man inap mekim wanem long yumi?
20. Gutpela tingting na toktok na pasin bai mekim wanem long lain bilong Jehova?
[Piksa long pes 21]
Gutpela wara wantaim wara i gat pait i no inap kamap long wanpela paip wara tasol, na olsem tasol i no inap Kristen i autim gutpela tok na tok nogut wantaim