Ol Laion—Ol Bikpela Pusi Bilong Afrika

WANPELA MAN LONG KENYA I RAITIM DISPELA STORI BILONG “KIRAP!”

SAN i kam antap long ples stret bilong Serengeti long Afrika. Long moningtaim ples i kol liklik, na mipela i sindaun insait long ka bilong mipela na lukluk long ol laion meri ol i stap wantaim ol pikinini bilong ol. Braunpela gras bilong ol i lait gut na i yelo olsem gol, na ol inap hait gut insait long longpela kunai i drai pinis. Ol pikinini laion ol i pilai pilai na ol i no malolo liklik. Ol i kalap kalap na pilai klostu long ol bikpela laion meri, na i olsem ol laion meri i no tingim ol.

Wantu dispela ol laion i lusim pilai na ol i no meknais liklik. Ai bilong olgeta laion i lukluk i go longwe. Long ples antap mipela i stap long en, mipela i lukluk i go long dispela hap i gat wanpela samting i pulim ai bilong ol na mipela i lukim dispela samting. Lait bilong san i kamapim long ples klia wanpela traipela laion man. Mipela i lukluk long ai bilong em taim em i lukluk long mipela. Kol bilong moningtaim i no mekim na skin bilong mipela i guria, nogat; tasol taim mipela i luksave olsem laion man i lukluk long mipela, em nau, skin bilong mipela i guria. Laion man em i samting bilong pret long en, tasol skin bilong em i nais tru. Planti gras i raunim bikpela het bilong en, na kala bilong dispela gras i yelo olsem gol na wan wan gras i blakpela. Bikpela ai bilong en i braunpela na i was gut long ol samting. Tasol famili bilong en i pulim tingting bilong en, na isi isi em i tanim het na lukluk long ol na wokabaut i go long hap ol i stap long en.

Em i wokabaut olsem man i gat namba, olsem wanpela king. Em i no lukluk moa long mipela, na em i abrusim ka bilong mipela na wokabaut i go long ol laion meri na pikinini bilong ol. Olgeta i sanap bilong bungim em na olgeta wan wan i putim pes bilong ol long strongpela nus bilong laion man, olsem ol pusi i save mekim taim ol i bungim narapela pusi. Laion man i wokabaut i go namel long ol laion, na em i pundaun long graun na tanim i go slip long baksait bilong en, i olsem raun bilong en i bin pinisim strong bilong en. Em i slip na i no longtaim na dispela i mekim na olgeta laion i slip long lait bilong san bilong moningtaim. Mipela i lukim wanpela gutpela samting, em ol laion i stap bel isi na amamas, na kunai bilong ples stret em kala bilong en i yelo olsem gol na win i sakim nabaut i raunim ol.

Animal Bilong Pulim Tingting

Ating i no gat narapela animal i bin kirapim tingting bilong ol man olsem laion i save mekim. Long bipo yet, ol man bilong wokim piksa long Afrika, ol i wokim ol piksa bilong ol laion i painim abus long ol bikpela ston. Ol i bin bilasim ol haus bilong king na ol tempel bilong bipo long ol traipela piksa bilong laion i gat bikpela gras ol i sapim long ston. Long nau ol manmeri i save go long ol banis i gat ol animal bilong lukim ol dispela gutpela pusi. Sampela buk na piksa wokabaut ol i stori long ol gutpela samting bilong laion, olsem piksa wokabaut Born Free, em i wanpela trupela stori bilong wanpela laion i no gat papamama, na ol man i bin lukautim em na bihain ol i larim em i stap fri. Na sampela stori i save bagarapim nem bilong laion, ol i tok laion i save kaikai man​—⁠sampela hap tok bilong ol dispela stori i tru, sampela nogat. Olsem na i gat as na laion em i wanpela animal i save pulim tingting bilong ol man!

Ol laion i save pait strong, tasol sampela taim ol i isi tru na pilai olsem ol liklik pusi. Taim ol i amamas ol i save krai isi olsem pusi, tasol ol inap singaut strong na ol man i stap longwe long ol inap 8-pela kilomita, ol inap harim singaut bilong ol. Sampela taim i olsem ol i animal bilong les na slip, tasol ol inap ran spit tru. Ol man i tok laion i no inap bagarap, long wanem, em i gat strongpela bel, na ol i tok long man i gat strongpela bel em i olsem laion.

Simbaa​—⁠Pusi i Save Bung Wantaim Ol Narapela

Namel long olgeta lain pusi i no gat wanpela lain pusi i olsem ol laion, em ol i gat pasin bilong bung wantaim ol narapela laion. Ol i amamas taim ol i stap insait long bikpela famili o lain​—⁠wanpela lain inap olsem sampela laion tasol i go inap 30 laion samting. Insait long lain laion i gat sampela laion meri ol i wanblut. Ol i sindaun wantaim, painim abus wantaim, na karim pikinini wantaim. Dispela pasin bilong ol long pas gut wantaim, em i stap i go inap long taim ol i dai, na dispela em i as bilong famili laion na i helpim ol long abrusim bagarap.

Olgeta wan wan famili laion i gat wanpela o sampela bikpela laion man i was long ol na i makim hap em ol laion i sindaun long en. Kirap long blakpela nus i go inap long pinis bilong tel bilong ol, longpela bilong ol dispela gutpela animal inap olsem 3-pela mita, na hevi bilong skin bilong ol inap winim 225 kilo. Tru, ol laion man ol i bosim lain laion, tasol ol laion meri i save go pas long ol samting. Ol laion meri i save kirapim famili laion long mekim sampela samting, olsem ol i kirapim ol long i go sindaun long wanpela hap ol inap hait long en long san o kirapim ol long painim abus.

Ol laion meri i save karim pikinini long olgeta 2-pela 2-pela yia. Taim mama i karim ol pikinini, ol pikinini i no inap mekim wanpela samting. Wok bilong lukautim ol pikinini em wok bilong famili laion olgeta, na olgeta laion meri i stap insait long dispela famili ol i save lukautim na givim susu long ol pikinini laion. Ol pikinini laion i go bikpela hariap. Taim ol i gat 2-pela mun, ol i save ran na pilai. Olsem ol liklik pusi ol i save tantanim, na pait, na kalap antap long narapela narapela, na kalap nabaut long longpela gras. Ol i laikim olgeta samting i save flai o wokabaut, na ol i save kalap na bihainim bataplai, raunim ol binatang, na pait wantaim ol stik na rop bilong diwai samting. Ol i laikim tru tel bilong mama i save go i kam, na mama i save mekim olsem bilong kirapim ol long pilai.

Olgeta wan wan famili laion i save sindaun long wanpela hap ol i bin makim gut, na bikpela bilong dispela hap em inap olsem planti hekta. Ol laion i save laikim ol hap i stap antap na i gat planti wara long en, na i gat ples bilong hait long en long san bilong belo. Ol i stap wantaim ol elefan, jiraf, bafalo, na ol narapela animal bilong ples stret. Long ol wan wan de laion i save slip inap planti aua, na inap sotpela hap taim em i raun bilong painim abus na poroman bilong kamapim pikinini. Tru tumas, ol laion i save malolo, o slip, o sindaun nating inap 20 aua long wanpela de. Taim ol i slip, i olsem ol i stap bel isi na ol i no inap bagarapim man. Tasol yu no ken larim dispela samting i giamanim yu​—⁠laion em i wanpela wel animal i save pait strong, winim planti narapela wel animal!

Animal Bilong Painim Abus

Long apinun, ples kunai em san i bin hatim i wok long go kol liklik. Tripela laion meri bilong dispela famili laion mipela i bin lukluk long en, ol i kirap na lusim malolo bilong ol. Ol i hangre, olsem na ol dispela pusi ol i kirap wokabaut, na ol i smelim win taim ol i lukluk i go long ples kunai. Nau em taim bilong wanpela kain antelop ol i kolim wildibis long wokabaut i go longwe bilong stap long narapela hap, na long hap saut bilong ples mipela i stap long en, planti tausen bilong dispela kain antelop ol i stap isi na kaikai gras. Nau tripela laion i wokabaut i go klostu long dispela hap. Ol i bruk, na long pasin hait ol i wokabaut isi i go long dispela hap. Namel long longpela gras, ol antelop i no inap lukim ol dispela braunpela pusi, olsem na ol inap i go klostu long lain antelop inap 30 mita. Long dispela taim stret ol laion i kirap mekim sampela samting. Kwiktaim tru ol i spit i go namel long lain antelop. Lain antelop i kirap nogut na ol i ran nabaut long olgeta hap, na ai bilong ol i op stret taim ol i ran strong bilong abrusim bagarap. Planti handet lek bilong ol i krungutim graun na mekim retpela das i kamap. Taim das i go pinis, mipela i lukim 3-pela laion meri i sanap i stap na ol i sotwin stret. Ol i no bin kisim abus bilong ol. Ating long nait rot bai op gen long ol i ken painim abus, o nogat. Tru, ol laion i save spit tru, tasol taim ol i go painim abus, inap sampela taim tasol (30 pesen) ol i kisim abus. Olsem na hangre em i wanpela bikpela hevi i wok long bagarapim ol laion. Laion i bikpela pinis, em i gat bikpela strong tru.

Ol laion i save wok wantaim bilong painim abus, na ol man i tok ol laion inap pulim na kilim ol animal em hevi bilong ol i winim 1,300 kilo. Taim ol i kirap raunim animal ol laion inap spit tru, inap 59 kilomita long wanpela aua, tasol ol i no inap spit olsem inap longpela taim. Olsem na ol i gat pasin bilong hait na redi i stap bilong kisim abus. Ol laion meri i save mekim bikpela wok tru bilong painim abus, tasol taim ol i kirap kaikai, ol bikpela laion man i save kisim bikpela hap bilong abus. Taim no gat planti abus, ol laion i hangre tru na dispela inap mekim na ol i pasim ol pikinini bilong ol long kisim abus.

Ol Man i Painim Em

Long bipo yet, laion i raun long olgeta hap bilong Afrika, na long sampela hap bilong Esia, Yurop, India, na Palestain. Em i animal bilong painim abus, olsem na em i resis wantaim man. Laion i laik bagarapim ol bulmakau sipsip samting na ol man tu, olsem na em i kamap wanpela animal ol man i save sutim wantu tasol taim ol i lukim em. Ol manmeri i go planti hariap, na dispela i mekim na i no gat planti hap bilong bus ol laion i ken sindaun long en. Ol laion i stap yet long Afrika, tasol long nau i gat sampela handet laion tasol i stap long bikbus samting bilong ol narapela kantri. Long nau ol laion inap i stap gut na man i no ken kilim ol sapos ol i stap insait long ol bikpela pak bilong lukautim ol animal bilong bus.

Tasol gutpela tru, i gat sampela senis bai painim dispela gutpela animal. Baibel i stori long bihain laion bai stap wanbel wantaim ol man. (Aisaia 11:​6-9) I no longtaim na gutpela Man bilong wokim yumi em bai kamapim dispela samting. Long dispela taim gutpela pusi bilong Afrika i gat bikpela gras, em bai stap wanbel na bel isi wantaim olgeta narapela samting God i bin wokim.

[Futnot]

[Blok long pes 27]

Taim Laion i SINGAUT

OL LAION i gat nem long singaut strong tru, na ol man i stap longwe inap planti kilomita ol inap harim singaut bilong ol. Ol man i tok, singaut bilong laion em i wanpela ‘narapela kain singaut tru, winim singaut bilong planti animal samting.’ Ol laion i save singaut long taim bilong tudak na long taim san i kam antap. Ol laion man na ol laion meri ol i save singaut, na sampela taim olgeta bai singaut strong wantaim.

Ol saveman bilong kisim save long ol samting bilong laion ol i tok, pasin bilong singaut i save mekim sampela samting bilong helpim laion. Olsem: Ol laion man bai singaut bilong toksave long ol mak bilong hap ol i sindaun long en, na bilong kamapim kros bilong ol​—⁠i olsem ol i mekim tok lukaut long ol narapela laion man i laik kam insait long hap bilong ol. I stret Baibel i stori long ol king bilong Asiria na Babilon ol i olsem “ol laion” i save singaut. Baibel i tok olsem, long wanem, ol king bilong Asiria na Babilon ol i gat pasin bilong pait na pasin antap, na ol i bin mekim nogut tru long lain bilong God na bagarapim ol.​—⁠Aisaia 5:​29; Jeremaia 50:⁠17.

Taim wanpela laion i lusim lain bilong en o long taim bilong tudak, singaut bilong laion i save helpim em long painim ol narapela laion. Taim ol i kilim wanpela animal pinis, dispela singaut i toksave long ol narapela laion bilong dispela lain long wanem hap kaikai bilong ol i stap long en. Baibel i stori long dispela pasin bilong ol laion na i tok: “Sapos wanpela yangpela laion i stap insait long hul bilong ston na em i no kaikai abus, bilong wanem bai em i singaut?”​—⁠Amos 3:⁠4.

Tasol taim ol laion i painim abus, ol i no save mekim wok long singaut bilong ol bilong pretim animal ol i laik kisim. Long buk bilong em (The Behavior Guide to African Mammals) Richard Estes i tok, i “no gat wanpela samting i kamapim klia olsem laion i save singaut bilong raunim animal em i laik kisim (mi lukim olsem ol animal em laion i save raunim, ol i no save tingim singaut bilong laion).”

Olsem na bilong wanem Baibel i kolim Satan olsem ‘wanpela laion i singaut strong, na oltaim em i save raun bilong painim ol manmeri bilong kaikai’? (1 Pita 5:⁠8) Tru, i olsem ol wel animal i no save pret long singaut bilong laion, tasol ol man na ol bulmakau sipsip samting ol i save pret. Strongpela singaut bilong laion long nait bai pretim olgeta lain man i no stap insait long wanpela haus samting. Long bipo yet, wanpela man i tokaut stret olsem: “Taim man i harim laion i singaut strong, ating dispela man i no inap pret, a?”​—⁠Amos 3:⁠8.

Satan i gat save long pasin bilong pretim man bambai man i daun long em. Tasol gutpela tru, lain bilong God i gat wanpela strongpela Man bilong helpim ol. Ol i bilip strong olsem Jehova bai helpim ol, olsem na ol inap sakim dispela strongpela “laion.” Gutpela sapos ol Kristen “i stap strong long bilip na sakim em.”​—⁠1 Pita 5:⁠9.