Bilong Wanem Ol i Save Bung Wantaim?

LONG olgeta yia inap planti tausen Witnes Bilong Jehova long olgeta hap bilong graun ol i save bung long ol kibung. Long ol dispela kibung, ol i save amamas long bung wantaim na harim planti gutpela tok bilong skulim ol long Baibel. Sampela Witnes i save wok strong tru bilong i go long ol dispela kibung. Olsem: Long yia i go pinis, long Malawi, tupela marit i gat 65 krismas samting na pikinini man bilong ol wantaim meri bilong em na liklik pikinini, ol i raun long wilwil inap 80 kilomita bilong i go long wanpela kibung. Ol i lusim ples bilong ol long siks klok long moningtaim na inap 15 aua bihain ol i kamap long ples kibung.

Long Mosambik, sampela lain i raun long wilwil inap 3-pela de bilong i go long wanpela kibung. Wanpela nait taim ol i slip long wanpela kem ol i wokim, ol i harim ol laion i singaut klostu. Ol i tromoi ol paiawut long hap ol laion i stap long en, tasol ol laion i stap long dispela hap inap long moningtaim. Narapela Witnes i go long wankain kibung, em i bungim stret wanpela laion long rot. Em i sanap isi tasol na i no meknais liklik inap long laion i go. Long taim bilong kibung ol dispela Witnes i amamas tru long stori long olsem wanem ol i bin abrusim bagarap “long maus bilong laion.”​—⁠2 Timoti 4:​17.

Planti Witnes Bilong Jehova i save wok strong tru long i go long ol kibung na ol miting bilong kongrigesen i save kamap long olgeta wik bilong lotuim God. Bilong wanem ol i mekim olsem? Ol stori i kamap bihain long dispela bai helpim yu long save bilong wanem na pasin bilong bung wantaim i bikpela samting tru.