Kam Long Ol “Kingdom i Kamap Bikpela” Kibung Distrik Bilong 1984/85

GOD Jehova i save ol wokboi bilong em long graun ol i mas bung long ol bikpela kibung. Olsem na em i bin stretim rot bambai lain bilong em long bipo, em Isrel, ol inap bung tripela taim long yia long ples em i bin makim, em Jerusalem. Taim ol i bung ol i harim ol man i kaunim ol lo bilong God Jehova, na dispela samting i strongim ol. Na ol i amamas toktok wantaim na stori long ol samting God Jehova i bin mekim bilong helpim ol.—Eksodas 23:14-17; 34:23; Diuteronomi 16:16, 17; 2 Kronikel 8:13.

Ol Isrel i save bung long ol narapela taim tu. Olsem long taim King Solomon i mekim Bikpela bung bilong dediketim haus lotu em i bin wokim. Long dispela taim ol i bung inap 14 de olgeta. Na long taim bilong Niemaia, taim ol i wokim gen banis bilong Jerusalem, ol i amamas na mekim bikpela bung.—1 King 8:65, 66; Niemaia 12:27-43.

Baibel i stori long ol bung lain bilong Jehova i bin mekim long bipo, olsem na i stret lain Witnes bilong Jehova long nau i mekim ol kibung. Kirap long yia 1879 na i kam inap long nau, winim 100 yia pinis, ol i bin mekim ol kibung. Inap 37 yia pinis yumi bihainim pasin bilong ol Isrel long bipo na yumi mekim kibung tripela taim long olgeta yia. Yumi save bung tupela taim long yia bilong mekim kibung sekit na wanpela taim bilong mekim kibung distrik o kibung intenesenel samting.

Mipela harim tok olsem ol brata i amamas tru long ol tok i kamap long ol “Stap Wanbel long Kingdom” Kibung Distrik.a Ol brata i pilim olsem ol i stap wanbel wantaim ol brata sista bilong ol narapela narapela hap bilong graun. Long planti kantri, lain i bung long ol dispela kibung i winim lain i bin bung long ol narapela kibung long bipo. Long wanpela kantri long Afrika, em Sambia, i gat 57,034 pablisa, tasol inap olsem 417,122 i bin bung long 24 kibung distrik bilong ol. Long olgeta fiftin fiftin manmeri i stap long Sambia, wanpela i bin i kam long kibung. Olsem wanem? Taim yu harim kain stori olsem, dispela samting i kirapim yu na yu laik i go long ol “Kingdom i Kamap Bikpela” Kibung Distrik?

Bilong Wanem Yumi Mas Bung Wantaim?

Bilong wanem yumi mas bung wantaim inap tripela de hap na kisim strong long spirit? Pita i tok: “Orait, ol dispela samting bai i pinis olsem. Tasol yupela i mas i stap olsem wanem? Yupela i mas wokabaut long pasin holi na bihainim olgeta pasin bilong God. Long dispela pasin yupela i mas wetim.De bilong God, na yupela i mas wok strong long hariapim dispela De bai i kamap.”—2 Pita 3:11, 12.

Long olgeta yia, kain kain samting i save kamap bilong pulim yumi bambai yumi lusim “pasin holi.” Pasin pait, pasin nogut, pasin sem, ol dispela pasin i kamap bikpela. Pasin bilong ol man i wok long i go moa nogut long olgeta taim. Taim yumi harim tok long redio o televisen o yumi kaunim ol nius, yumi save long dispela samting. Na sapos yu mekim wok mani o yu go long skul, ating bai yu pilim olsem oltaim ol samting i laik pulim yu bambai yu no bihainim moa ol gutpela pasin.

I gat planti samting bilong pulim yumi na bai yumi no “bihainim olgeta pasin bilong God.” I gat tupela wok yumi mas mekim, em wok bilong autim tok bilong Kingdom na wok bilong kamapim ol disaipel! Tasol ol wok bisnis long nau i laik pulim yumi na kirapim yumi long tingim tumas mani—ol i kirapim yumi long givim taim na strong samting bilong yumi long kisim ol samting bilong graun bambai yumi no gat taim bilong mekim ol wok bilong God. Singsing na ol piksa wokabaut long nau, dispela samting tu inap pulim yumi. Jisas i tok yumi mas was gut long dispela samting, em i tok: “Tasol yupela lukaut gut. Nogut yupela dring nabaut oltaim na yupela i spak. Nogut yupela i wari long samting bilong bodi. Sapos pasin olsem em i karamapim yupela, orait bai dispela de bilong Bikpela em i painim yupela wantu tasol, olsem spia i save painim abus. . . . Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na . . . bai yupela i sanap long ai bilong Pikinini Bilong Man.”—Luk 21:34-36.

Ol tok i kamap long ol “Kingdom i kamap Bikpela” Kibung Distrik em i bilong helpim ol wokman bilong God bambai ol inap bihainim stretpela lo bilong God long olgeta wokabaut bilong ol. Na ol dispela tok i bilong helpim ol bambai ol i ken autim gut tok bilong Kingdom na kamapim ol disaipel.

Redi Nau

Kibung em i bilong tripela de hap, kirap! long Fonde long belo bek. Long dispela yia bai yumi autim tok long Fraide long belo bek. Sapos yumi skelim hamas man bung long Fonde wantaim hamas man i bung long Sande, ating yumi mas tingting gut na wok strong bambai yumi inap stap long kibung long olgeta de bilong kibung, kirap long namba wan de. Wanpela gutpela tok yumi bin harim long namba wan de bilong “Stap Wanbel long Kingdom” Kibung Distrik em i stori long “Ol Singsing i Litimapim Nem Bilong Jehova.” Yumi amamas, long wanem yumi harim tok olsem bai yumi kisim nupela buk singsing, na yumi bin harim sampela musik bilong ol dispela nupela singsing.

Ating yumi planti i gat taim bilong lip long olgeta yia. Gutpela sapos yumi tingting long kisim lip long taim bilong kibung bambai yumi inap i go long kibung, a? O gutpela sapos yumi tokim bos na inap tupela de samting yumi no ken wok. Tru bai yumi no kisim pe, tasol sapos yumi go long kibung bai yumi kisim planti kaikai bilong spirit, a? Long Honduras, sampela brata i tokim bos ol i laik malolo long wok bambai ol inap i go long kibung, na bos i rausim ol long wok. Wanpela sista long dispela hap i tokim bos bilong em em i laik malolo inap tupela de bambai em inap i go long “Stap Wanbel long Kingdom” Kibung Distrik. Bos i tok, sapos em i mekim olsem, orait em bai rausim sista long wok. Wanpela loya, meri bilong em i wanpela Witnes, em i harim tok long bos i bin rausim dispela sista long wok, olsem na taim kibung i pinis em i painim wanpela wok sista inap mekim, na sista i kisim bikpela pe, winim bilong bipo.

Yearbook bilong 1984 i tok 27,000 brata sista bilong Spen na Potyugal i go long kibung long Beljam. Ol i no inap mekim kibung long ples bilong ol. Dispela Yearbook tu i stori long ol hevi i painim ol brata sista long Alaska taim ol i go long Kibung. Wanpela brata bilong Samoa i laik i go long wanpela kibung long Fiji na dispela Yearbook i stori long em olsem: “Em i no yangpela man, em i lapun; em i no gat strong, em i gat sik; lek bilong em i no strong, em i lek nogut; em i no inap lukluk gut, wanpela ai bilong em i tudak. Em i laik i go long kibung, tasol pastaim em i mas painim mani bilong baim rot i go long kibung. Olsem na em i bungim kokonas bambai em inap kisim mani. Em i save karim 15 kokonas i go longwe inap tupela mail na rausim skin na mit bilong kokonas na wokim kopra, Bihain em i baim dispela kopra i go long narapela man na kisim mani.” Em i mekim olsem inap 4-pela wik bambai em inap kisim mani bilong i go long Kibung. Gutpela sapos yumi olgeta i bihainim pasin bilong dispela brata na givim bel tru long painim rot bilong i go long kibung!

Yumi save, ol kibung i strongim yumi long spirit, na taim ol man i lukim gutpela pasin yumi mekim, dispela inap helpim ol long kisim save long tok i tru. Lukim dispela tok wanpela man i bin raitim long wanpela nius bilong ol Grik (Galaxias) bilong Novemba 1983. Em i stori long “Stap Wanbel long Kingdom” kibung distrik i kamap long Atens. Em i stori gut long ol samting i bin kamap long olgeta de bilong kibung na bihain em i tok:

“Maski yu gat wankain bilip olsem ol Witnes Kristen bilong Jehova o nogat, tasol sapos yu bin i go long ‘Apolo’ Stediam taim ol Witnes Kristen bilong Jehova i mekim kibung, bai yu pilim tru ol samting yu lukim na harim. . . . Bilip bilong ol i bosim olgeta wokabaut bilong ol. Ol i givim bel tru long bihainim lotu bilong ol. Ol i laikim tumas God na ol i laikim tumas ol narapela man.”

Olgeta witnes Kristen bilong Jehova na ol narapela man i laikim tok i tru na ol i laik bihainim stretpela pasin, gutpela sapos ol i wok strong tru bambai ol inap i go long ol “Kingdom i Kamap Bikpela” Kibung Distrik. Gutpela sapos ol i stap long ples kibung taim kibung i kirap long Fonde i go inap long taim Kibung i pinis long Sande.

[Blok long pes 29]

Ol “Kingdom i Kamap Bikpela” Kibung Distrik

DET PLES TOKPLES

Janueri 3-6 Pot Mosbi Tok Inglis,

tok Pisin,

tok Motu

Janueri 10-13 Rabaul Tok Pisin

Janueri 10-13 Lae Tok Pisin

Janueri 17-20 Madang Tok Pisin

Janueri 18-20 Popondetta Tok Motu

Janueri 18-20 Savaiviri Tok Motu

Janueri 18-20 Daru Tok Motu

Janueri 25-27 Kerema Tok Motu

Janueri 25-27 Boboa Tok Motu

Janueri 25-27 Arawa Tok Pisin

Janueri 25-27 Klinwara Tok Pisin

Februeri 1-3 Kavieng Tok Pisin

Februeri 1-3 Wirwir Tok Pisin

Februeri 1-3 Kikori Tok Motu

Februeri 1-3 Agi Tok Motu

Februeri 8-10 Wewak Tok Pisin

[Futnot long pes 27]