Mi Amamas Long Jehova Maski Ol Traim i Painim Mi

Em Stori Bilong George Scipio

Long Disemba 1945, mi slip long haus sik, na olgeta skin bilong mi i dai, han na lek daunbilo tasol i stap gut. Mi ting olsem dispela sik bai stap sotpela taim, tasol sampela i ting bai mi no inap wokabaut gen. Man! Em bikpela hevi tru bilong wanpela yangpela man i gat 17 krismas! Mi no laik bilip olsem mi no inap wokabaut moa. Mi gat tingting long mekim planti samting, na mi laik i go raun long Inglan wantaim bos bilong mi long yia antap.

SIK polio i bin kisim planti man long ailan bilong mipela, em Sen Helina, na mi wanpela bilong ol man i bin kisim dispela sik. Dispela sik i bin kilim 11-pela man i dai na skin bilong planti man i bagarap. Taim mi slip long bet, mi gat bikpela hap taim long tingting bek long dispela sotpela taim mi stap laip na ol samting bai mi mekim bihain. Taim mi tingim ol dispela samting, mi kisim save olsem maski mi gat dispela sik, i gat as na mi inap amamas.

Kirap Nupela

Bipo papa bilong mi, Tom, em i wanpela plisman na wanpela dikon bilong lotu Baptis, na long 1933, taim mi gat 5-pela krismas, em i kisim sampela buk long 2-pela Witnes Bilong Jehova. Ol dispela Witnes em ol man i save autim tok long olgeta de, olsem painia, em ol i bin kam raun long ailan inap sotpela taim tasol.

Nem bilong wanpela buk em The Harp of God. Papa bilong mi i mekim wok long en bilong stadi long Baibel wantaim mipela famili na ol arapela i gat laik long harim tok. Buk i gat ol strongpela tok long en, na mi no bin kisim gut ol tok bilong en. Tasol mi save makim long Baibel bilong mi olgeta skripsa mipela i stori long en. I no longtaim na papa bilong mi i kisim save olsem samting mipela i stadi long en em tok i tru na em i narapela kain long tok em i save autim long ol man long lotu Baptis. Papa i kirap long tokim ol narapela long dispela na em i kirap autim tok long pletfom olsem i no gat god triwan, i no gat bikpaia, na man i no gat tewel. Dispela i mekim na bikpela toktok i kamap long haus lotu.

Bilong stretim dispela tok, ol i wokim wanpela miting bilong lotu. Ol i mekim wanpela askim olsem: “Husat i laik stap yet long lotu Baptis yupela sanap.” Planti tru i sanap. Ol i mekim narapela askim gen olsem, “Husat i laik stap long lain bilong Jehova, yupela sanap.” Inap olsem 10-pela o 12-pela i sanap. Ol i askim ol dispela lain long lusim haus lotu.

Em nau, dispela em kirap bilong nupela misin long Sen Helina. Papa bilong mi i raitim pas i go long hetkota bilong Sosaiti Was Taua long Amerika na askim ol long salim wanpela pikap bilong putim ol tok bilong Baibel long en i stap long plet olsem plet singsing na bai ol man i ken harim. Ol i tokim em olsem dispela pikap i bikpela tumas long salim i kam long Sen Helina. Ol i salim wanpela liklik pikap i kam, na bihain ol brata i baim tupela moa. Ol brata i karim pikap i go raunim ailan long lek na long donki na kisim gutnius i go long ol man.

Taim gutnius i go long olgeta hap bilong ailan, pasin bilong birua long gutnius tu i go bikpela. Long skul bilong mi, ol pikinini i save singsing olsem: “Olgeta man i kam harim, olgeta man i kam harim, pikap bilong Tommy Scipio!” Mi skulmanki na dispela samting i kamap i olsem wanpela bikpela traim long mi, long wanem, mi laik mekim ol samting bambai ol wanskul i mas orait long mi. Olsem wanem mi bin sanap strong?

Famili bilong mipela i bikpela​—⁠i gat 6-pela pikinini​—⁠na mipela i save mekim Baibel-stadi bilong famili long olgeta taim. Mipela i save kaunim Baibel wantaim paslain long kaikai long moningtaim. Dispela samting mipela i mekim i bin helpim tru mipela famili long stap strong yet long tok i tru inap planti yia. Mi bin laikim tru Baibel kirap long taim mi yangpela yet, na inap planti yia, mi bin bihainim pasin bilong kaunim Baibel long olgeta taim. (Song 1:​1-3) Taim mi gat 14 krismas na mi lusim skul, tok i tru i pas strong long bel bilong mi, na pasin bilong pret long Jehova i stap long bel bilong mi. Dispela i bin mekim na mi amamas long Jehova maski ol traim i bin painim mi.

Sampela Traim Moa na Ol Amamas

Taim mi slip long bet long haus sik, mi tingting i go bek gen long taim bipo na ol samting bai kamap bihain, na olsem mi bin lainim long stadi bilong mi long Baibel, mi save olsem dispela sik mi kisim em i no wanpela traim o strafe God i givim long mi. (Jems 1:​12, 13) Tasol dispela sik polio em i bikpela traim tru, na bagarap em dispela sik i kamapim bai stap wantaim mi long olgeta taim mi stap laip.

Taim sik i pinis, mi mas lain long wokabaut gen. Sampela masol insait long han bilong mi i no wok. Mi bin pundaun planti taim tru long olgeta de. Tasol mi beten oltaim na wok strong long wokabaut, na long 1947, mi inap holim stik na wokabaut.

Long dispela taim mi kirap laikim wanpela yangpela meri, em Doris, em tu i gat wankain bilip olsem mi. Mipela i yangpela tumas long marit, tasol em i kirapim mi long lain yet long wokabaut. Mi lusim wok mani bilong mi, long wanem, pe mi kisim i no inap long helpim mi na meri long taim mi marit. Mi kirapim wanpela haus sik bilong stretim tit bilong ol man, na dispela haus sik i wok inap tupela yia. Mitupela i marit long 1950. Long dispela taim mi bungim inap mani bilong baim wanpela liklik ka. Nau mi inap kisim ol brata i go long ol miting na long autim tok.

Wok Bilong God i Kamap Bikpela Long Dispela Ailan

Long 1951, long namba wan taim Sosaiti i salim wanpela brata i kam lukim mipela. Dispela brata em Jacobus van Staden, wanpela yangpela man bilong Saut Afrika. Nau tasol mipela i go sindaun long wanpela gutpela haus, olsem na mipela inap givim ples slip long em inap wanpela yia. Mi gat liklik bisnis, olsem na mi autim tok planti taim wantaim em, na mi kisim planti gutpela skul long em.

Jacobus, em mipela i save kolim em Koos, em i stretim rot bilong wokim ol miting bilong kongrigesen, na mipela olgeta i amamas long go long en. Mipela i gat hevi long ka, long wanem, namel long olgeta man i laik harim tok, i gat 2-pela ka tasol. Dispela ples i nogut na i gat planti maunten, na ol rot i no gutpela long dispela taim. Na i hatwok long kisim olgeta i go long ol miting. Sampela i kirap long moningtaim tru na wokabaut. Mi save kisim 3-pela long liklik ka bilong mi na i go lusim ol long wanpela hap long rot na ol i kirap wokabaut gen. Mi tanim i go bek na kisim 3-pela moa i go lusim ol long wanpela hap long rot, na mi go bek gen. Mi mekim mekim olsem, inap olgeta i kam long miting. Bihain long miting, mipela i bihainim wankain pasin bilong kisim olgeta i go bek long haus.

Koos i lainim mipela tu long pasin bilong kamapim gut ol tok long haus bilong ol man. Mipela i kisim planti gutpela ekspiriens na sampela i no gutpela tumas. Tasol amamas mipela i kisim long wok autim tok i mekim na mipela i no tingim tumas ol hevi em ol birua i kamapim bilong pasim wok autim tok bilong mipela. Wanpela moningtaim mi wok wantaim Koos. Taim mipela i kamap long wanpela haus, mipela i harim wanpela nek insait long haus. Wanpela lapun man i wok long kaunim strong Baibel. Mipela inap harim em i kaunim hap bilong Baibel em mipela save gut long en, em Aisaia sapta 2. Taim em i kaunim i go na kamap long ves 4, mipela i paitim dua. Em i gutpela lapun man i gat pasin pren na em i singautim mipela i go insait, na mipela i mekim wok long tok bilong Aisaia 2:4 long stori long em long gutnius bilong Kingdom bilong God. Mipela i kirapim Baibel-stadi wantaim em, maski em i save sindaun long wanpela ples i hatwok long i go long en. Mipela i mas go daun long maunten, na wokabaut antap long ol ston na brukim liklik wara, na i go antap long narapela maunten, na bihain i go daun long haus bilong em. Dispela hatwok i kamapim gutpela samting. Dispela lapun i gat pasin daun em i kisim tok i tru na i kisim baptais. Bilong i go long ol miting, em i save holim 2-pela stik na wokabaut i go long hap mi inap kisim em long ka i go long ol miting. Em i bin stap olsem gutpela Witnes i go inap long taim em i dai.

Bikman bilong polis i birua long wok bilong mipela na planti taim em i laik rausim Koos i go bek long kantri bilong em. Wanpela taim long olgeta mun em i save singautim Koos i go bilong givim sampela askim long em. Koos i save kisim ol tok bilong Baibel na bekim stret ol askim bilong em na dispela i mekim em i belhat moa yet. Long taim Koos i go lukim em, oltaim em i save tokim Koos long no ken autim tok, tasol long olgeta taim Koos i go lukim dispela bikman bilong polis em i save autim tok long em. Maski bihain Koos i lusim Sen Helina, dispela bikman bilong polis i wok yet long birua long wok autim tok. Dispela bikman em bikpela na strongpela man, tasol bihain em i kisim sik na em i kamap bun nating. Ol dokta i no inap painim as bilong sik bilong em. Olsem na em i lusim dispela ailan.

Baptais na Wok i Go Bikpela Isi Isi

Koos i bin stap long ailan inap 3-pela mun, na bihain em i pilim olsem i stret em i mas mekim wanpela tok bilong baptaisim ol man. I hatwok long painim wanpela gutpela wara bilong kisim baptais. Mipela i pasim tok long digim wanpela bikpela hul, na wokim simen long en na kisim wara i kam pulimapim. Long nait paslain long tok bilong baptais, ren i pundaun, na long moningtaim long de bilong baptais mipela i amamas long lukim olsem wara i pulap long dispela hul.

Long Sande moningtaim long dispela wik Koos i mekim tok bilong baptais. Taim em i askim ol man bilong kisim baptais long sanap, mipela 26 olgeta i sanap na bekim askim ol i save mekim bilong ol man i laik kisim baptais. Mipela i namba wan lain Witnes long kisim baptais long dispela ailan na em i gutpela samting tru. Dispela de em wanpela de mi bin amamas nogut tru long en, winim olgeta narapela de long i stap bilong mi, long wanem, mi save bel hevi olsem nogut Armagedon i kam na mi no kisim baptais yet.

Bihain mipela i kamapim tupela kongrigesen, wanpela long Levelwut na narapela long Jemstaun. Long olgeta wik mipela 3-pela o 4-pela i save raun 13 kilomita bilong i go long wanpela kongrigesen na mekim Skul Bilong Wok Autim Tok na Miting Bilong Wok long Sarere apinun. Bihain long autim tok long Sande moningtaim, mipela kam bek gen na mekim wankain miting na Stadi Wastaua long kongrigesen bilong mipela yet long apinun na long nait. Mipela i save mekim wok bilong Kingdom long ol Sarere Sande na mipela i amamas tru. Mi gat laik long mekim wok autim tok long olgeta de, tasol mi gat famili mi mas lukautim. Olsem na long 1952, mi mekim wok gen wantaim gavman olsem wanpela dentis long dispela hap.

Long 1955, Sosaiti i kirap salim ol wasman bilong raun, olsem wasman sekit, i kam raun long ailan long olgeta yia, na taim ol i kam, ol i save slip long haus bilong mi inap sampela de. Taim ol i stap wantaim mipela dispela i helpim tru famili bilong mi. Long dispela taim yet, mi tu mi mekim gutpela wok na mi go raunim ailan na soim 3-pela piksa bilong Sosaiti long ol ples long ailan.

Laik Bilong God Kibung i Gutpela Tru

Long 1958, mi laik i go long Laik Bilong God Kibung Intenesenel long Nu Yok, olsem na mi pinis long wok long gavman. Dispela kibung i bikpela samting long i stap bilong mi​—⁠dispela i mekim na i gat bikpela as tru na mi amamas long Jehova. Mipela i bin lusim ailan inap 5-pela mun na hap, long wanem, i no gat rot o ples balus long dispela ailan long mipela i ken go bek hariap. Mipela i mekim kibung inap 8-pela de, na program i kirap long 9 klok long moningtaim na pinis long 9 klok long nait. Tasol skin bilong mi i no les liklik, na mi redi long harim ol tok long ol wan wan de. Mi stap olsem maus bilong ol lain long Sen Helina na inap 2 minit mi bin stori liklik long wanpela program. Mi bel sut stret taim mi toktok long bikpela lain manmeri i bung long Yanki Stediam na Polo Graun.

Dispela kibung i strongim mi long mekim wok painia. Pablik-tok, ‘Kingdom Bilong God i Kamap​—⁠Ating Dispela Graun i Laik Pinis?,’ i bin strongim mi tru. Bihain long kibung, mipela i go lukim hetkota bilong Sosaiti long Bruklin na mipela i raun long faktori. Mi toktok wantaim Brata Knorr, em presiden bilong Sosaiti Was Taua long dispela taim, long ol wok i kamap long Sen Helina. Brata Knorr i tok em i laik kam raun long ailan sampela taim bihain. Mipela i kisim ol kaset i gat ol tok bilong kibung na planti piksa wokabaut bilong soim long famili na ol pren.

Mi Winim Mak Mi Putim Bilong Kamap Painia

Taim mi kam bek, ol i laik givim dispela wok gen long mi olsem mi bin mekim bipo, long wanem, i no gat wanpela dentis long ailan. Tasol mi toksave long ol olsem mi laik mekim wok bilong autim tok long olgeta de. Mipela i toktok i go i go na ol i orait long mi ken wok 3-pela de long wanpela wik, tasol mi bai kisim pe i antap moa, winim pe mi i bin kisim long taim mi wok 6-pela de long wanpela wik. Tok bilong Jisas i kamap tru: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:​33, Nupela Testamen na Ol Sam) Lek bilong mi i no gutpela, olsem na mi hatwok long wokabaut long ol rot i gat maunten long ailan. Tasol maski olsem, mi mekim wok painia inap 14 yia na mi helpim planti man bilong ailan long lainim tok i tru na dispela i givim bikpela amamas tru long mi.

Long 1961 gavman i laik salim mi i go long ailan Fiji bilong kisim trening inap 3-pela yia na bai mi kamap wanpela dentis inap tru long mekim dispela wok. Ol i laik salim famili bilong mi tu i go wantaim mi. Mi inap i go kisim trening, tasol mi skelim gut na bihain mi tok mi no inap i go. Mi no laik lusim ol brata na i go stap inap longtaim olsem, na mi no laik lusim tu gutpela wok bilong mi long wok wantaim ol. Dispela namba wan dokta i bin stretim dispela raun em i bel hevi stret. Em i tok: “Yu inap mekim wok yet long mani yu bai kisim long nau, maski yu ting pinis i klostu.” Tasol mi sanap strong.

Long yia bihain Sosaiti i singautim mi i go long Saut Afrika bilong i go long Skul Bilong Wok Kingdom, em wanpela kos bilong ol wasman bilong kongrigesen. Mipela i kisim gutpela skul i helpim mipela long mekim gut wok mipela i kisim long kongrigesen. Bihain long skul, mi kisim sampela skul moa taim mi wok wantaim wasman bilong raun. Na mi mekim wok long dispela 2-pela kongrigesen long Sen Helina inap 10-pela yia olsem helpim bilong wasman sekit. Na bihain i gat ol narapela brata inap mekim dispela wok na mipela i senis senis long mekim.

Bihain, mipela i lusim Jemstaun na i go i stap long Levelwut. Long dispela hap i gat bikpela wok bilong helpim kongrigesen, na mipela i stap inap 10-pela yia. Long dispela taim mi mekim planti wok tru na mi no malolo gut​—⁠mi mekim wok painia, na mi wok 3-pela de long wanpela wik wantaim gavman, na mi lukautim liklik stua bilong mipela. Na tu, mi mekim wok bilong lukautim kongrigesen, na mi wantaim meri bilong mi mekim bikpela long 4-pela pikinini. Bilong winim dispela hevi, mi lusim wok mi save mekim long 3-pela de, na mi salim stua, na mi kisim famili bilong mi i go long Kep Taun, long Saut Afrika, na malolo inap 3-pela mun. Bihain mipela i go long ailan Asensen na i stap long dispela hap inap wanpela yia. Long dispela taim mipela i helpim planti long kisim stretpela save long tok i tru bilong Baibel.

Taim mipela i go bek long Sen Helina, mipela i go sindaun gen long Jemstaun. Mipela i stretim wanpela haus ol i bin skruim wantaim Haus Kingdom. Bilong lukautim mipela yet long ol samting bilong skin, mi na pikinini bilong mi John i stretim wanpela ka Fod na wokim i kamap wanpela bas bilong karim ol ais-krim. Mipela i salim ol ais-krim inap 5-pela yia. Bihain liklik long taim mi kirapim dispela bisnis, mi kisim bagarap long dispela bas. Bas i kapsait na lek bilong mi i pas insait. Dispela i mekim na ol rop aninit long skru bilong lek i dai, na inap 3-pela mun i lus na em i orait gen.

Gutpela Blesing Long Bipo na Long Bihain

Inap planti yia, mipela i bin kisim planti blesing​—⁠em sampela as moa bilong amamas. Wanpela em dispela raun bilong mipela i go long Saut Afrika long mekim kibung nesenel long 1985 na raun bilong mipela i go long haus Betel, em long taim ol i wokim yet. Narapela em dispela naispela Haus Kibung ol i wokim klostu long Jemstaun, em mi na pikinini bilong mi John i bin helpim ol long wokim. Na tu, mipela i amamas long 3-pela pikinini man bilong mipela i mekim wok elda, na wanpela tumbuna pikinini i wok long Betel long Saut Afrika. Na mipela i kisim bikpela amamas long helpim planti long kisim stretpela save long Baibel.

Teritori bilong mipela long autim tok i no bikpela, i gat olsem 5,000 manmeri tasol long en. Tasol maski mipela i mekim wok long wankain teritori planti planti taim, dispela i bin kamapim gutpela samting. Wan wan manmeri tasol i save kros na i no mekim gutpela pasin long mipela. Ol man bilong Sen Helina i gat pasin pren, na ol bai tok gude long yu long olgeta hap yu go long en​—⁠taim yu wokabaut long rot o draiv long ka. Mi kisim save olsem sapos yu toktok gut wantaim ol man na kisim save long ol, orait bai i no hatwok long autim tok long ol. Maski sampela pablisa i go long ol narapela kantri, mipela i gat 150 pablisa long nau.

Mitupela meri bilong mi i marit inap 48 yia pinis na olgeta pikinini i bikpela pinis na ol i no stap moa wantaim mipela​—⁠mitupela tasol i stap. Pasin bilong em long stap gut long mi na helpim mi inap planti yia, dispela i mekim na mi amamas yet long mekim wok bilong Jehova maski i gat ol traim i painim mi. Strong bilong mitupela i wok long pinis, tasol long olgeta de strong bilong mitupela long ol samting bilong spirit i wok long kamap nupela. (2 Korin 4:​16) Mi wantaim famili bilong mi na ol pren i wet tasol long lukim wanpela gutpela taim long bihain, em long taim skin bilong mi bai kamap gutpela na i winim long taim mi gat 17 krismas. Bikpela laik bilong mi em long kamap gutpela olgeta long skin na tingting, na bikpela laik tru bilong mi em bilong mekim wok bilong God bilong pasin sori na God bilong tingim ol narapela, em Jehova, na King em i bin makim, Krais Jisas, inap oltaim oltaim.​—⁠Nehemia 8:⁠10.

[Piksa long pes 26]

George Scipio na 3-pela pikinini man bilong em, olgeta i mekim wok elda

[Piksa long pes 29]

George Scipio na meri bilong em, Doris