Olsem Wanem Kristen i Ken Helpim Ol Lapun
“MIPELA i no save slek long mekim wok bilong God. Tru, bodi bilong mipela i laik bagarap. Tasol bel bilong mipela i save kamap nupela gen long olgeta de . . . Yumi no save lukluk i go long ol samting yumi inap lukim long ai. Nogat. Yumi save lukluk strong long ol samting yumi no inap lukim long ai, long wanem, samting yumi save lukim long ai, em bai i stap sotpela taim tasol. Tasol ol dispela gutpela samting yumi no inap lukim long ai, ol bai i stap oltaim oltaim.” Aposel Pol i bin tok olsem long ol Korin.—2 Korin 4:16-18.
Long bipo, ol man bilong bilip ol i save tingim ol samting bai kamap bihain, em ol samting God Jehova i bin tok promis long kamapim. Pol i bin litimapim nem bilong ol man i bin stap strong i go inap long ol i dai—sampela ol i lapun tru na ol i dai. Pol i tok: “Ol dispela manmeri ol i bilip long God i go inap long taim ol i dai. . . . Ol i no kisim ol dispela gutpela samting God i bin promis long givim ol. Nogat. I olsem ol i sanap na lukluk i go long ol dispela samting i stap longwe tru long ol, na ol i amamas long lukim.”—Hibru 11:13.
Klostu nau bai God i kamapim ol dispela gutpela samting em i bin tok promis long kamapim, tasol sampela sikman na lapun bilong yumi ol i ting, nogut ol i dai pastaim na ol i no inap lukim dispela pasin nogut bilong graun i pinis. Na ating sampela bai dai na ol i no lukim truim bilong sampela tok promis tu bilong God, tasol ol i ken amamas long dispela tok bilong Pol long 2 Korin 4:16-18.
Jehova i no save lusim tingting long olgeta man i bin stap gut long em, maski sampela i sik o i lapun. (Hibru 6:10) Baibel i givim gutnem long ol lapun i stap gut long Jehova, na Lo bilong Moses i tok, yumi mas litimapim nem bilong ol lapun. (Wok Pris 19:32; Song 92:12-15; Sindaun 16:31) Na ol i bin litimapim nem bilong ol lapun Kristen bilong bipo tu. (1 Timoti 5:1-3; 1 Pita 5:5) Na long hap bilong Rut long Baibel i gat gutpela stori long wanpela yangpela meri, nem bilong em Rut, em i daunim laik bilong em yet na bai em i ken lukautim tambu mama bilong em.
Em i Givim Bel
Lapun Naomi i bel hevi long i stap bilong em. Long taim bilong hangre em wantaim famili bilong em i mas ranawe na lusim graun bilong em na ol pren long Juda na go i stap long Moap long narapela hapsait bilong wara Jordan. Man bilong Naomi i dai, na tupela pikinini man tasol bilong em i stap. Tupela i kamap bikpela, na ol i marit, tasol bihain tupela tu i dai. Nau i no gat sampela wanblut i stap bilong lukautim em.
Naomi i lapun pinis na em i no inap marit gen na kamapim pikinini, na em i bel hevi i stap. Tasol em i no tingim em yet; em i tingim tupela tambu meri bilong em, em Orpa na Rut. Em i laik salim ol i go bek long mama bilong ol na bai ol i ken marit gen, na Naomi wanpela bai go bek long ples bilong em. Long nau tu sampela lapun i bel hevi, long wanem, ol pren o famili bilong ol i dai pinis. Ol i olsem Naomi, na i mas i gat sampela bilong lukautim ol, tasol ol i no laik givim hevi long ol.
Tasol Rut i no lusim tambu mama bilong em. Rut i laikim tru dispela lapun, na em i laikim Jehova tu, em God bilong Naomi. (Rut 1:16) Olsem na em i go bek wantaim Naomi long Juda. Lo i tok, taim ol man i kisim pinis kaikai bilong ol long gaden, ol manmeri i rabis ol i ken kisim wanem liklik hap kaikai i stap yet. Rut i laik mekim olsem, na em i wok strong na dispela kaikai em inap long tupela.—Rut 2:2, 17, 18.
Rut i mekim gutpela pasin, na em i laikim tumas Jehova, na dispela i strongim bel bilong Naomi, na nau em i no bel hevi tumas. Em i save gut long pasin bilong ples na long lo bilong Jehova, na em i stiaim tingting bilong Rut na bai Rut inap marit long brata o kasen brata bilong man bilong Naomi na kamapim pikinini man na bai graun bilong famili bilong Naomi i no ken lus. (Rut sapta 3) Rut i makim gutpela pasin ol manmeri i lukautim sikman na lapun ol i ken bihainim. (Rut 2:10-12) Long nau tu, insait long kongrigesen i gat planti samting yumi ken mekim bilong helpim ol sikman na lapun. Bai yumi mekim olsem wanem?
Stretim Rot Bilong Helpim Ol
Long bipo, ol kongrigesen Kristen i gat lista bilong ol meri em man bilong ol i dai pinis na kongrigesen i mas helpim ol long ol samting bilong skin. (1 Timoti 5:9, 10) Na long nau tu, sapos ol elda i laik, ol i ken wokim lista bilong sampela sikman o lapun yumi mas helpim ol. Sampela kongrigesen i save makim wanpela elda bilong lukautim dispela wok. Sampela lapun i no laik askim sampela long helpim ol, olsem na dispela elda i mas skelim ol samting na tingting gut taim em i mekim dispela wok. Em i ken tingim ol samting olsem: I gat ol samting long Haus Kingdom bilong helpim ol lapun? Olsem wanem long ol lata? Ol i laikim wilsia? Toilet i stret long ol? Ol i laikim yaufon na bai ol i ken harim gut tok? Na sia i stret long ol? Na sapos ol i no inap kam long miting, em i ken mekim ol samting na bai ol i ken harim ol samting bilong miting long kaset o long telefon.
Na ating elda i mas helpim ol sikman na lapun long i kam long ol miting na kibung. Wanpela brata i save kisim wanpela lapun sista i go oltaim long miting, tasol wanpela taim brata i no inap, na sista i telefon planti taim bilong painim sampela i ken helpim em, na bihain wanpela i kisim em, tasol em i pilim olsem em i putim hevi long ol brata. Sapos wanpela elda i ken lukautim dispela wok, kain hevi olsem i no inap kamap.
Na dispela elda i ken askim narapela narapela famili long i go lukim ol lapun. Olsem bai ol pikinini i ken save, wanpela wok bilong ol Kristen, i bilong lukautim ol lapun. Na ol pikinini yet i ken lain long mekim dispela wok. (1 Timoti 5:4) Wanpela wasman sekit i tok: “I no planti pikinini em ol yet i save go lukim ol lapun.” Ating ol i no tingim, o ol i no save ol bai helpim lapun olsem wanem o ol bai tok wanem long ol. Papamama i ken lainim ol long dispela samting.
Na ol lapun i laik save wanem taim wanpela pren i laik kam lukim ol, na nau ol i ken amamas long tingim wanpela i laik kam. Sapos pren i kisim sampela kaikai samting i kam, gutpela sapos bihain em i klinim ol pipia na bai lapun i no gat wok long mekim olsem. Long olgeta wik tupela lapun i gat strong yet ol i save putim sampela kaikai long basket na ol i save raun lukim ol lapun bilong kongrigesen, na ol dispela narapela lapun i amamas long dispela samting.
Long sampela kongrigesen i gat Buk-Stadi bilong ol lapun tasol, na ol i wokim long san. Long wanpela kongrigesen ol elda i askim sampela famili na sampela singel long go long wanpela Buk-Stadi olsem, na bai ol yangpela i ken lain long tingim ol lapun. Ol i mekim olsem, na wanpela Buk-Stadi i kamap, i gat ol lapun na ol yangpela tu.
Na i no ol elda tasol i mas tingting long mekim gut long ol lapun. Yumi olgeta i mas save long ol hevi bilong ol sikman na lapun na olsem wanem yumi ken helpim ol. Yumi ken tok amamas long ol long taim ol i kam long Haus Kingdom, na yumi ken toktok wantaim ol. Yumi ken singautim ol i kam long haus bilong yumi o long pati samting, o kam long wanpela kaikai o kam wantaim yumi long taim yumi malolo long wok na yumi raun i go long wanpela hap. Wanpela Witnes i save kisim ol lapun pablisa long ka long taim em i laik lusim taun na mekim sampela wok long narapela hap. Ol i mas pilim olsem ol i insait long ol wok bilong yumi, nogut ol i ting ol i stap nating. Pastaim Naomi i bin ting olsem. Tasol dispela pasin bai mekim na skin na tingting bilong lapun bai bagarap hariap.
Na yumi mas helpim ol yangpela tu i gat sik. Wanpela brata i gat 3-pela pikinini i gat bikpela sik, na tupela i dai pinis. Brata i tok: “Sapos kongrigesen i mas lukautim sikman inap longpela taim, dispela bai putim hevi long kongrigesen. Ol yangpela i ken stori long teks bilong de wantaim pren bilong ol i gat sik. Ol i ken senis senis long mekim olsem, na ol painia tu i ken mekim.”
Sapos Sikman i Laik Dai
Long bipo na i kam inap nau, lain bilong Jehova i bin strongim bel taim ol i save olsem dai i laik painim ol long rot bilong sik o long han bilong ol birua. Taim sikman i pilim em bai i dai, em i gat kain kain tingting. Na taim em i dai pinis, famili bai bel hevi i go inap long sampela taim, tasol ol i mas lain long karim, na wok long lusim dispela hevi. Olsem na sapos sikman i laik i dai, i gutpela sapos em i no haitim; em i ken toktok long dispela samting na kamapim long ples klia olsem Jekop na Devit na Pol i bin mekim.—Stat, sapta 48 na sapta 49; 1 King 2:1-10; 2 Timoti 4:6-8.
Wanpela dokta Witnes i tok: “Yumi no ken haitim dispela samting long man i laik i dai. Toktok gut wantaim em na kamapim long ples klia. Sapos yumi haitim, dispela i no ken helpim sikman.” Tasol yumi mas save long tingting bilong sikman yet. Em i laik save o nogat, na wanem taim em i laik save. Sampela sikman i tokaut olsem ol i laik i dai, na yumi ken harim tingting bilong ol long dispela samting. Tasol sampela sikman i gat strongpela tingting olsem ol bai orait gen, na ol pren bilong ol tu i ken tingting olsem.—Lukim Rom 12:12-15.
Sapos sikman i laik i dai, ating skin bilong em i les o tingting bilong em i no wok gut, olsem na i hatwok long em i beten. Tasol em i ken amamas long tok bilong Rom 8:26, 27 i tok, God i save harim sikman i “krai long bel tasol.” Jehova i save sikman i no inap beten na kolim gut long maus bilong em.
Sapos inap, i gutpela yumi ken beten wantaim sikman. Wanpela brata i tok: “Taim mama i laik i dai, em i no inap toktok, tasol em i makim long han olsem em i laik bai mipela i ken beten wantaim em, na taim mipela beten pinis, mipela singsing long wanpela singsing bilong Kingdom, long wanem, mama i bin laikim musik. Pastaim mipela i makim nek tasol bilong singsing, na nau mipela i singsing isi na kolim tok bilong en. Mama i amamas. Ol dispela singsing i kolim ol samting i save painim ol Witnes Bilong Jehova na i kamapim tingting bilong ol long ol samting, na yumi no inap kamapim long toktok bilong yumi—singsing tasol i kamapim gut.”
Taim yumi toktok wantaim man i laik i dai, yumi mas sori long em na tingim gut tok yumi mekim. Kolim ol samting bilong strongim bilip bilong em, na maski toktok long hevi bilong sampela man. Na no ken i stap longpela taim tumas. Sapos tingting bilong em i dai, ating em inap harim yet ol tok, olsem na yu mas tingim gut ol tok yu mekim.
Em Wok Bilong Yumi
Wok bilong lukautim ol sikman na lapun em i bikpela samting, na i gat hatwok bilong en. Kongrigesen i mas tingim ol man i mekim dispela wok, na helpim ol. Ol i lukautim sampela bilong famili ol i gat sik, o narapela wanbilip, na ol i mekim gutpela wok, maski ol i mas lusim sampela miting o ol i no autim tok planti taim. (Lukim 1 Timoti 5:8.) Sapos kongrigesen i save long wok ol i mekim, dispela bai strongim ol. Sampela brata o sista i ken helpim ol long sampela taim na bai ol i ken i go long miting o kisim amamas long raun autim tok.
Tasol sapos yu yet yu sikman o lapun, i gat ol samting yu tu yu ken mekim. Yu no ken bel hevi i stap. Yu no ken larim sik o lapun bilong yu i daunim yu na bagarapim bel bilong yu. Mas pren gut wantaim ol narapela. Tok amamas long ol long taim ol i helpim yu long sampela samting, na no ken sakim tok bilong ol. (1 Tesalonaika 5:18) Tingim ol narapela sikman na lapun tu, na beten askim Jehova long helpim ol long karim pen na hevi bilong ol. (Kolosi 4:12) Tingim ol gutpela tok i tru bilong Baibel, na kamapim long ol man i kam lukim yu. (Song 71:17, 18) Save gut long ol samting oganaisesen bilong Jehova i wok long mekim. (Song 48:12-14) Na yu ken amamas long wok bilong Jehova i go bikpela. Yu ken tingim ol dispela samting na dispela bai strongim bilip bilong yu. Olsem bai yu ken kisim wanpela kain amamas ol man inap kisim long taim ol i lapun pinis.
Yumi olgeta i mas wok strong long holimpas tingting long gutaim bai kamap bihain, na dispela tingting bai i stap olsem hat kapa bilong lukautim yumi long taim bilong hevi. (1 Tesalonaika 5:8) Tingim taim bilong ol man i dai pinis bai kirap bek. Dispela bilip i gat as tru bilong en. Tingim taim bilong bihain, em ol man i no ken sik o go lapun o dai moa. Olgeta man bai i stap strong na stap amamas tasol. Ol man i bin dai ol bai kirap bek. (Jon 5:28, 29) Yumi no inap lukim ol dispela samting long ai tru, tasol yumi lukim long ai bilong bilip na long bel. No ken lusim tingting long en. Mas tingim long olgeta taim.—Aisaia 25:8; 33:24; KTH 21:3, 4.