Sapta 1
Yumi Inap Tru Long i Stap Oltaim
1, 2. Bilong wanem planti man i hatwok long bilip olsem yumi inap i stap oltaim long graun na i stap amamas?
STAP AMAMAS long graun—ating yumi no inap i stap olsem. Long wanem sik, lapun, hangre, pasin nogut, na ol narapela hevi, i save bagarapim sindaun bilong yumi. Olsem na sapos wanpela man i tok, yumi inap i stap oltaim na i stap amamas long gutpela ples paradais long graun, ating bai yu ting olsem dispela man i driman tasol na dispela samting i no inap kamap tru.
2 Planti man i gat wankain tingting olsem bilong yu. Olsem na i gat wanem as na yumi ken bilip tru olsem yu inap i stap oltaim long paradais long graun?
AS BILONG DISPELA BILIP
3. I gat wanem samting na yumi ken save, God i laik bai yumi stap amamas long graun?
3 Yumi inap bilip olsem, long wanem Nambawan Strongpela God em i redim dispela graun na putim olgeta samting long en inap tru long ol man. Na em i wokim man na meri i gutpela tru bambai ol inap i stap amamas—na i stap oltaim long graun!—Sam 115:16.
4. Ol saveman i kisim wanem save long skin bilong man na yumi ken save, God i wokim skin bilong yumi bilong i stap oltaim?
4 Ol saveman bilong graun i save pinis skin bilong yumi i gat strong bilong kamap nupela gen long olgeta taim. Ol liklik hap bilong skin i save senis senis, na nupela i helpim olpela. Long dispela rot skin bilong man inap i stap oltaim. Tasol yumi no save stap oltaim. Yumi save dai. Ol saveman i no save bilong wanem yumi go lapun na yumi dai. Ol i tok, sapos olgeta samting i stret bai yumi inap i stap oltaim.—Sam 139:14.
5. Baibel i tok God i gat wanem laik long dispela graun?
5 Tasol tru God i laik bai yumi stap amamas na yumi stap oltaim long graun? Sapos olsem, orait bai yumi inap tru long i stap oltaim! Baibel i tokim yumi long ol laik bilong God na Baibel i tok God em i “Man bilong wokim graun, em i Man bilong putim gut dispela graun.” Na Baibel i tok moa, olsem: “Em i no wokim [graun] bilong i stap nating; nogat; em i wokim bilong man i ken i stap long en.”—Aisaia 45:18, NW.
6. (a) Wanem kain pasin i stap long graun long nau? (b) God i laik bai kain pasin olsem i stap?
6 Olsem wanem? I stap bilong yumi long nau i wankain olsem God i laikim? Tru, ol manmeri i stap long olgeta hap bilong graun. Tasol yu ting ol i stap wanbel na amamas? Ol i stap gutpela olsem Man bilong wokim ol i laik bai ol i stap? Nogat, a? Ol i bruk bruk. Pasin birua i stap. Pasin nogut i stap. I gat pait. Planti planti manmeri ol i hangre na ol i gat sik. Planti ol i gat hevi long painim haus na wok na mani bilong baim kaikai samting. Dispela i no litimapim nem bilong God, a? Olsem na yumi ken save, i stap bilong yumi i no wankain olsem God i laikim.
7. Taim God i wokim namba wan man na meri em i gat wanem laik long graun?
7 God i wokim namba wan man na meri na em i putim tupela long gutpela ples long graun. Em i laik bai ol i ken i stap oltaim na i stap amamas. Em i laik bai ol i mekim olgeta hap graun i kamap olsem gutpela ples o paradais. Em i tok: “Yutupela karim planti pikinini, na bai ol i go sindaun long olgeta hap bilong graun na bosim olgeta samting i stap long en.” (Jenesis 1:28) God i laik bai stretpela lain man ol i ken i stap long graun na bosim olgeta hap, na ol i ken i stap wanbel na amamas.
8. Namba wan man na meri i bikhet long God, tasol olsem wanem yumi ken save God i no senisim laik bilong em long graun?
8 Namba wan man na meri i bikhet long God, olsem na tupela i no inap i stap oltaim. Tasol God i no senisim laik bilong em. Laik bilong em i mas kamap! (Aisaia 55:11) Baibel i tok, ol stretpela man bai i kisim graun, “na bai ol i stap oltaim long en.” (Sam 37:29) Baibel i kamapim planti tok long ol samting God i mekim bambai ol manmeri i mekim wok bilong em ol i ken i stap oltaim.—Jon 3:14-16, 36; Aisaia 25:8; Revelesen 21:3, 4.
YU LAIK I STAP WE?
9. (a) Ol manmeri i gat wanem laik? (b) Wanem insait bilong dispela tok bilong Baibel olsem ’God i putim tingting bilong laip oltaim long bel bilong man’?
9 Yumi ken amamas long wanem God i laik bai yumi stap oltaim. Yu tingting: Sapos yu inap makim de bilong yu i dai, bai yu makim wanem de? Yu no inap makim, a? Na yu no laik bai yu i dai, a? God i putim laik long bel bilong yumi na yumi gat laik long i stap laip. Baibel i tok: ‘God i putim tingting bilong laip oltaim long bel bilong man.’ (Eklisiastis 3:11) Wanem insait bilong dispela tok? Olsem: Yumi gat laik long i stap oltaim. Dispela laik i stap long bel bilong ol man, olsem na planti man ol i bin wok strong long painim rot bambai ol i no ken i go lapun na ol i no ken i dai; ol i ken i stap oltaim.
10. (a) Ol manmeri i laik i stap oltaim we? (b) Bilong wanem yumi ken bilip tru olsem God bai wokim rot bambai yumi inap i stap oltaim long graun?
10 Manmeri i laik i stap oltaim we? Ol i laik i stap oltaim long graun. God i wokim yumi bilong i stap long graun, na em i wokim graun bilong yumi ken i stap long en. (Jenesis 2:8, 9, 15) Baibel i tok, God i bin ‘putim dispela graun i stap strong olgeta na i no inap surik liklik.’ (Sam 104:5) God i wokim graun bilong i stap oltaim, olsem na ol man tu i bilong i stap oltaim. God em i Man bilong pasin sori na em i wokim ol man i gat laik long i stap oltaim. Olsem na em i mas givim rot long ol bambai ol inap i stap oltaim, a? Tru tumas, na em i bin mekim olsem.—1 Jon 4:8; Sam 133:3.
YU LAIK KISIM WANEM KAIN SINDAUN?
11. Baibel i tok wanem na yumi ken save, ol man inap i stap oltaim na i stap gutpela olgeta long graun, no gat sik?
11 Lukim piksa hia. Yu laik kisim gutpela sindaun olsem bilong dispela man na meri? Tru tumas! Tupela i winim pinis planti tausen yia long graun, tasol skin bilong ol i stap gutpela olsem bilong yangpela man na meri. Tupela i no i go lapun. Baibel i tok, ol lapun bai kamap yangpela gen, na ol sikman bai orait bek. Ol lek nogut, aipas, yaupas, mauspas, ol bai orait bek. Taim Jisas i stap long graun em i oraitim sik bilong planti manmeri na dispela i makim ol samting bai kamap long gutpela taim bihain. Bai olgeta manmeri i stap gutpela olgeta.—Jop 33:25; Aisaia 33:24; 35:5, 6; Matyu 15:30, 31.
12. Yumi lukim wanem ol gutpela samting long dispela piksa?
12 Lukim dispela gutpela ples. Em gutpela ples paradais tru olsem Krais i tok promis long en. Em i wankain olsem dispela paradais i bin lus taim namba wan man na meri i bikhet. (Luk 23:43) Lukim ol manmeri bilong olgeta kain skin ol i stap wanbel wantaim, olsem wanpela lain tasol. Ol i stap bel isi tru. Ol animal tu i stap gut wantaim ol. Lukim dispela pikinini i holim laion. Em i no ken pret, long wanem God i tok: “Lepat bai slip klostu long pikinini meme, na pikinini bulmakau na yangpela laion na patpela animal tu wantaim; na wanpela liklik manki bai bosim ol. . . . Na laion bai kaikai gras olsem bulmakau. Na pikinini i stap yet long susu em bai pilai long hul bilong snek.”—Aisaia 11:6-9, NW.
13. Taim God i kamapim pinis laik bilong em long graun, wanem ol samting bai pinis?
13 Long dispela gutpela ples paradais God i laik kamapim bai olgeta manmeri i stap amamas tasol. Bai planti gutpela kaikai i stap. No gat wanpela man bai hangre. (Sam 72:16; 67:6) Pait, pasin nogut, bagarapim man, bel nogut, pasin bilong ol man long tingim ol yet tasol—ol dispela pasin bilong bipo bai pinis olgeta! (Sam 46:8, 9; 37:9-11) Yu bilipim dispela tok?
14. Olsem wanem yu inap save God bai pinisim pen na hevi?
14 Orait, yu tingim: Sapos yu gat strong inap long yu pinisim olgeta pen na hevi bilong ol man na givim gutpela sindaun long ol, bai yu mekim, a? Tru tumas, bai yu mekim. Na gutpela Papa bilong yumi long heven em bai mekim olsem tasol. Bai em i givim olgeta samting long yumi em yumi mas kisim na yumi laik kisim. Sam 145:16 i tok: “Em i save givim kaikai samting long olgeta inap long ol i stap gut.” Tasol wanem taim bai dispela samting i kamap?
LIKLIK TAIM OL GUTPELA SAMTING BAI KAMAP
15. (a) Taim pasin bilong graun i pinis, olsem wanem long graun tru? (b) Olsem wanem long ol man nogut? (c) Olsem wanem long ol manmeri i save bihainim laik bilong God?
15 Bilong kamapim ol dispela gutpela samting long graun God i tok promis long pinisim pasin nogut wantaim ol man i save mekim pasin nogut. Tasol em bai lukautim ol man i mekim wok bilong em. Baibel i tok: “Pasin bilong graun bai i pinis, na aigris bilong en tu wantaim. Tasol man i bihainim tok bilong God, em bai i stap oltaim.” (1 Jon 2:17) Bikpela senis tru bai kamap! Tasol i no olsem graun tru bai pinis. Nogat. Ol man nogut na pasin nogut bai pinis, olsem long taim bilong Noa. Tasol ol man i mekim wok bilong God ol i no ken bagarap. Ol bai stap long graun taim graun i kamap klinpela, na bai i no gat man moa bilong mekim nogut long ol.—Matyu 24:3, 37-39; Provep 2:21, 22.
16. Wanem ol samting i mas kamap long “las taim” olsem Baibel i tok profet long en?
16 Tasol ating sampela man bai tok, ‘Ol samting i wok long i go nogut, i no kamap gutpela. Olsem wanem yumi ken save dispela gutpela senis liklik taim bai kamap?’ Jisas i tok profet long planti samting bai kamap na yumi ken save, God i laik pinisim pasin bilong dispela graun. Jisas i tok, long las taim bai ol bikpela pait i kamap long graun, na hangre, na bikpela bikpela guria, na pasin nogut bai i go bikpela, na planti man bai lusim pasin bilong sori. (Matyu 24:3-12) Em i tok, “Bel bilong olgeta lain man bai i bagarap tru na ol i pret.” (Luk 21:25) Na Baibel i tok: “Long las taim bai planti hevi nogut tru i kamap.” (2 Timoti 3:1-5) Nau ol dispela hevi i painim yumi, a?
17. Ol man i save skelim ol samting i kamap long graun, ol i tok wanem long nau?
17 Planti man ol i skelim ol samting i kamap na ol i tok, bikpela senis i laik kamap. Bos bilong wanpela nius bilong Amerika (Miami Herald) em i tok: “Maski man i gat liklik hap tingting tasol em inap save, ol bikpela hevi bilong nau i makim bikpela senis i laik kamap. . . . Em bai senisim sindaun bilong ol man inap long olgeta taim bihain.” Na narapela man bilong Amerika (Lewis Mumford) em i tok: “Pasin bilong ol man i go nogut. . . . Bipo, taim pasin bilong wanpela lain i go nogut, dispela i bagarapim dispela lain tasol. . . . Tasol nau yumi gat balus na telefon samting na olgeta lain man i stap olsem wanpela lain tasol. Olsem na sapos pasin bilong ol man i go nogut, bai olgeta lain wantaim i bagarap.”
18. (a) Ol samting i kamap long graun long nau i makim wanem samting i mas kamap long bihain? (b) Wanem samting bai senisim ol gavman bilong nau?
18 Olgeta samting i kamap long graun long nau i makim pasin bilong dispela graun i laik pinis. Liklik taim tasol na bai God i bagarapim ol man i bagarapim graun. (Revelesen 11:18) Bai em i pinisim ol gavman bilong nau, na bai stretpela gavman bilong em tasol i bosim graun. Krais i bin lainim ol disaipel long beten askim God long kamapim dispela Kingdom o gavman bilong Em.—Danyel 2:44; Matyu 6:9, 10.
19. Sapos yumi laik i stap oltaim yumi mas mekim wanem?
19 Sapos yu laik tumas long i stap laip na i stap oltaim aninit long gavman bilong God, orait, kwiktaim yu mas kisim stretpela save long God na long laik bilong em na ol lo bilong em. Krais Jisas i beten long God na em i tok: “Laip i stap gut oltaim em i olsem: ol i save long yu, yu wanpela tasol yu God tru, na ol i save long Jisas Krais, em yu bin salim i kam.” (Jon 17:3) Olsem na yumi ken amamas, long wanem yumi inap tru long i stap oltaim! Tasol yumi mas save long wanpela birua em i laik pasim yumi long kisim dispela gutpela samting God i laik givim long yumi, em laip i stap oltaim.
[Piksa long pes 8, 9]
Yu ting God i laik bai ol kain pasin olsem i kamap long graun?
[Piksa i karamapim pes olgeta long pes 11]