Yumi Mas i Gat Baibel, o . . . ?
OKSANA em yangpela meri bilong Rasia, na long taun Mosko em i bungim wanpela man i gat wok long baim ol buk i go long ol man, na em i gat wanpela Baibel tu, na Oksana i lukim na em i amamas na i laik kisim. Poroman bilong em Jon i lukim dispela samting. Long kantri bilong em i gat planti Baibel, tasol Jon i no save bilip long God. Tasol em i lukim Oksana i laikim wanpela Baibel, na em i baim dispela bilong givim long Oksana. Pastaim Oksana i no laik kisim, tasol bihain em i kisim.
I gat planti manmeri i gat wankain laik olsem bilong Oksana; ol i laik kisim wanpela Baibel. Sampela kantri i bin tambuim Baibel inap planti yia. Lain bilong wokim dispela magasin Wastaua ol i wok strong long wokim ol Baibel bilong ol man em bipo gavman komyunis i bin bosim ol, tasol nau nogat. Na planti ol narapela lain tu i laik kisim Baibel. Nau rot i op na bai ol inap kaunim Baibel na kisim save long en. Planti man i laikim gutpela tok bilong en.
Sampela i No Laikim Baibel
Tasol sampela man i no laikim tumas Baibel. Long noten Yurop i olsem. Ol i gat Baibel, tasol ol i putim i stap na ol i no opim liklik o kaunim. Ol i tok, “Em i samting bilong ol man bilong bipo, na tok bilong en i no stret long ol man bilong nau.” Na sampela misin tu ol i daunim tok bilong Baibel. Wanpela nius (The Star) bilong Saut Afrika i tok, asbisop Desmon Tutu bilong lotu Angliken i tok: “Sampela tok bilong Baibel i no inap helpim yumi long olgeta taim.” Kain tok olsem i mekim na nau planti man i no bilip moa long Baibel.
Mas i Gat Helpim
Man i bilip na man i no bilip i mas save, ol man bilong graun i no inap stretim ol hevi. Long wanpela buk (Future Shock) Alvin Tofla i tok: “Ol samting i wok long senis, na ol man i mas lain na bai ol tu i ken senis. Sapos nogat, bagarap bai painim ol.” Dispela hevi i wok long kamap bikpela tru long nau.
Yia 2,000 i klostu pinis, tasol maski ol saveman bilong graun i kisim bikpela save moa long wokim ol samting, ol i no bin stretim liklik ol hevi bilong graun. Ol i bin toktok long kamapim nupela lo na pasin long graun, tasol ol i no kamapim. Ol i toktok tasol. Olsem na nau ol man i les, na ol i mas i stap olsem tasol na hatwok long painim kaikai na ol narapela samting bilong skin, nogut ol i dai.
I gat ol maniman, na i gat ol rabisman, na tupela lain i stap narapela narapela. Sampela man tasol i bosim ol samting bilong mani, olsem na i gat planti pait na hangre na sik na pasin nogut i pulap long graun. Ol rabisman i no amamas long ol bikman i holim planti samting bilong skin, na ol yet i sot long ol dispela samting. Ol i stap bel nogut na bel hevi, na ol i no gat gutpela sindaun olsem ol maniman i gat. Na ol famili tu i wok long bruk na bagarap.
Planti man i gat wankain tingting olsem bilong Tofla, ol i tok, em i samting bilong ol man yet long painim rot bilong stretim ol hevi, tasol ol man i sot long save long olsem wanem ol i ken kamapim dispela senis. Ol i no gat strong inap long mekim olsem.
I Gat Wanpela Rot Tasol
Lain bilong God i bin kirap long raitim ol tok bilong Baibel 3,500 yia bipo, na dispela tok i stap olsem yet na i no bin senis liklik na nau tu i no save senis liklik. Tok em God i bin kirapim Jeremaia long raitim long bipo, olsem yumi lukim long Jeremaia 10:23, em i stret long yumi ol man bilong nau tu, na i tok: “[Jehova], mi save, mipela man i no inap bosim wokabaut bilong mipela yet na bihainim ol rot mipela i laikim.” Orait, sapos ol man yet i no inap save wanem rot ol i mas bihainim, husat inap save long dispela samting? Baibel i tok: “Mi God [Jehova], Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
Long rot bilong Baibel, God Jehova i lainim yumi long pasin bilong lukautim gut yumi yet. Tok bilong Baibel i stiaim yumi long rot yumi mas bihainim. Tok bilong en i stret long dispela taim bilong nau. Narapela tok bihain bai stori long olsem wanem Baibel i gutpela bilong helpim ol man bilong nau. Em i toktok long pasin bilong lukautim skin bilong yumi na bai yumi no ken sik tumas, na long ol samting bilong mani na long painim kaikai samting, na pasin ol famili i mas bihainim bilong pas gut wantaim, na stretpela pasin yumi wan wan i mas bihainim. Em bai helpim yumi long i stap strong, maski i gat planti hevi long graun.
[Piksa long pes 4]
Tok bilong Baibel inap helpim yumi long i stap strong, maski i gat planti hevi