Sapta 15
Jehova i Bosim Lain Bilong Em Olsem Wanem?
LONG rot bilong Baibel, Jehova i helpim yumi long save long gutpela lain o oganaisesen bilong em long heven. (Ais. 6:2, 3; Esi. 1:1, 4-28; Dan. 7:9, 10, 13, 14) Yumi no inap lukim ol dispela ensel, tasol God i soim yumi olsem wanem wok bilong ol ensel i helpim ol Kristen tru hia long graun. (Jen. 28:12, 13; 2 Kin. 6:15-17; Sam 34:7; Mt. 13:41, 42; 25:31, 32) Baibel i stori tu long lain bilong God long graun na i helpim yumi long save olsem wanem Jehova i bosim dispela lain o oganaisesen bilong em. Sapos yumi pilim tru ol dispela samting bilong spirit, dispela inap helpim yumi long ‘wokabaut olsem man tru bilong God na bai em i laikim olgeta pasin bilong yumi.’—Kl. 1:9, 10.
Husat Ol i Lain Bilong God Long Graun?
2 Inap 1,545 yia lain Isrel ol i stap “kongrigesen” (“sios”) bilong God. Tasol ol i brukim kontrak bilong Lo na ol i sakim Pikinini bilong God yet. Olsem na Jehova i kamapim nupela “kongrigesen” na em i wokim nupela kontrak wantaim ol. Baibel i kolim dispela lain olsem “meri bilong Pikinini Sipsip.” Em ol 144,000 manmeri God i makim ol bilong i stap wantaim Pikinini bilong em long heven. (Ef. 5:22-32; Re. 14:1; 21:9, 10) Long Pentikos, 33 C.E., spirit holi i makim ol namba wan manmeri bilong dispela lain. Long rot bilong spirit holi Jehova i soim ol man, em i kisim dispela lain bilong mekim wok bilong em.—Hi. 2:2-4.
3 Long nau liklik hap lain bilong ol 144,000, ol i stap yet long graun, olsem lain remnan. Tasol ‘bikpela lain’ i kam bung na wok wantaim ol, olsem Baibel i tok profet long en. Krais Jisas em i Gutpela Wasman bilong ol sipsip na em i bungim ol dispela “arapela sipsip” wantaim lain remnan na ol i kamap “wanpela lain sipsip tasol,” na i gat “wanpela wasman tasol” bilong ol, em Krais Jisas. (Jon 10:11, 16; Re. 7:9, 10) Dispela tupela lain wantaim i olsem lain bilong God long graun long nau.
God i Bosim
4 Baibel i kolim dispela lain olsem “lain bilong God,” olsem na yumi inap save husat i bosim dispela lain. God i bosim. Em i bosim ol long rot bilong dispela man Em i bin makim bilong i stap het bilong kongrigesen, em Krais Jisas, na long rot bilong Baibel.—1 Ti. 3:14, 15; Ef. 1:22, 23; 2 Ti. 3:16, 17.
5 Yumi inap save God i bin bosim ol Kristen bilong pastaim, long wanem spirit bilong Em i kirapim ol long mekim ol bikpela wok long Pentikos, 33 C.E. (Ap. 2:1-4, 32, 33) Na yumi save God i bosim ol, long wanem ensel bilong Em i stiaim ol samting bambai tok bilong Kingdom i go kamap long hap bilong Afrika. (Ap. 8:26-39) Na i olsem tu taim maus bilong Jisas i tokim ol Kristen long ol samting ol i mas mekim taim Sol bilong Tasas i kamap Kristen; na wanpela maus i kamap long heven em i kirapim ol long autim tok long ol man bilong ol narapela lain. (Ap. 9:3-7, 10-17; 10:9-16, 19-23; 11:12) Tasol bihain i no gat ol dispela narapela kain samting i kamap. Ol i no harim moa maus i kamap long heven; ol i no lukim moa ol ensel; ol i no kisim moa strong bilong spirit bilong mekim ol bikpela wok, olsem oraitim sik samting. Tasol Jisas i tok promis long ol gutpela disaipel bilong em olsem: “Harim: Mi stap wantaim yupela olgeta de, inap long dispela taim i pinis.” Na em i truim dispela tok na em i stap wantaim lain bilong em inap long nau. (Mt. 28:20; 1 Ko. 13:8) Ol Witnes Bilong Jehova i daun long Jisas, em Het bilong ol, na ol i save sapos em i no bin stap wantaim ol, orait, taim ol birua i mekim nogut tru long ol, bai ol i no inap wok yet long autim tok bilong Kingdom.
6 Paslain liklik long taim Jisas i dai, em i tokim ol disaipel long wanpela ‘gutpela wokboi’ bai kamap. Bosman bilong en, em Jisas, em bai givim bikpela wok long dispela “wokboi.” Dispela “wokboi” bai stap taim Bikpela Jisas i go bek long heven na em bai stap yet taim Jisas i kam bek. Yumi save i no gat wanpela man bilong graun em i bin i stap longtaim olsem! Olsem na dispela tok i makim lain bilong Krais, em olgeta Kristen spirit holi i bin makim ol. Jisas i save em i mas baim bek ol long blut bilong em yet na em i kolim dispela lain olgeta olsem “wokboi” bilong em. Em i givim wok long ol bilong kamapim ol disaipel na lainim ol. Ol i mas givim “kaikai [bilong spirit] long ol long taim bilong en.” Long Pentikos 33 C.E., spirit i kam daun long ol na makim ol i stap “wokboi” bilong Krais.—Mt. 24:45-47; 28:19, 20; 1 Ko. 6:19, 20; lukim tu Aisaia 43:10.
7 Taim Bosman bilong dispela “wokboi” i kam bek, sapos ol i bin lukaut gut long wok bilong ol, bai Bosman i givim bikpela wok moa long ol. Ol i mas autim tok bilong Kingdom long olgeta hap, na bai ‘bikpela lain’ i kam bung na lotuim Jehova na ol inap winim taim bilong “bikpela hevi tru.” (Mt. 24:14; Re. 7:9, 10) Ol tu i mas kisim kaikai bilong spirit. Dispela lain ol i olsem ‘gutpela wokboi’ bilong Krais, em olgeta Kristen spirit holi i makim ol, bai ol i givim dispela kaikai bilong spirit long ‘bikpela lain.’ Yumi mas harim ol tok Jehova i givim long yumi long rot bilong dispela lain, na yumi mas bihainim ol dispela tok bambai Jehova i ken amamas long yumi.
8 Taim i gat askim long bilip o pasin ol Kristen i mas bihainim, orait ol i mas mekim wanem? Aposel sapta 15 i stori long askim i kamap long wanpela pasin bilong ol Juda olsem: Ol man bilong ol narapela lain i kamap Kristen ol i mas bihainim dispela pasin o nogat? Taim dispela askim i kamap, ol i givim long ol aposel na ol hetman long Jerusalem bilong stretim. Ol i olsem lain bilong bosim ol Kristen long bipo. Ol dispela hetman i no nambawan olgeta; sampela taim ol i popaia. (Lukim Galesia 2:11-14.) Tasol God i givim wok long ol. Ol i skelim ol tok Baibel i mekim long dispela samting, na ol i tingim wok bilong spirit bilong God long singautim ol man bilong ol narapela lain, na bihain ol i pasim tok long ol samting ol Kristen i mas mekim. Jehova i blesim dispela pasin bilong stretim tok. (Ap. 15:1-29; 16:4, 5) Dispela lain long Jerusalem i salim sampela man i go bilong helpim wok bilong autim tok, olsem Jisas i tok ol i mas mekim.—Ap. 8:14; Ga. 2:9.
9 Lain Bilong Bosim Ol Witnes long nau em ol brata spirit holi i bin makim ol na ol i bilong ol narapela narapela hap. Ol i stap long namba wan ofis bilong ol Witnes Bilong Jehova. Ol i wok strong long helpim wok bilong trupela lotu aninit long Krais Jisas, em i Het bilong ol. Ol dispela brata i gat wankain tingting olsem Pol—taim Pol i salim sampela tok long ol brata Kristen, em i tok: “I no olsem mipela i bosim bilip bilong yupela. Nogat. Long bilip yupela i sanap strong pinis. Olsem na mipela i save wok wantaim yupela bilong kamapim amamas bilong yupela.”—2 Ko. 1:24.
10 Ol Witnes Bilong Jehova long olgeta hap ol i daun long dispela pasin bilong God long bosim ol. Olgeta kongrigesen i wok gut wantaim Lain Bilong Bosim Ol Witnes. Dispela lain i save makim ol elda na wokman bilong helpim ol kongrigesen long mekim gut wok bilong ol. Ol i tingim wanem samting na ol i makim ol dispela elda na wokman? Baibel i kolim ol pasin olsem mak ol brata i mas winim bambai ol i ken kamap elda o wokman bilong kongrigesen. Taim ol elda i tingim sampela brata inap kisim wok wasman, ol i mas skelim gut, na ol brata i gat namba long makim ol i kamap wasman, ol tu i mas skelim gut. Ol i gat bikpela wok long ai bilong God long bihainim ol mak Baibel i kolim. (1 Ti. 3:1-10, 12, 13; 5:22; Ta. 1:5-9) Kongrigesen i no eleksen na vot na makim ol dispela brata. Nogat. Ol wasman i gat wok long tingim ol brata inap kisim wok na dispela lain i gat wok long makim ol, ol i bihainim pasin bilong ol aposel taim ol i mekim dispela wok. Ol i beten askim God long givim spirit bilong em long ol, na ol i skelim gut ol tok bilong Baibel bilong givim tingting long ol. (Ap. 6:2-4, 6; 14:23; lukim tu Sam 75:6, 7.) Sapos yumi bihainim gut ol tok bilong ol elda, bai yumi soim olsem yumi pilim gutpela pasin Krais i mekim, em i givim ol dispela man long yumi olsem “presen” bilong helpim yumi bambai “yumi olgeta i kamap wanbel tru long bilip.”—Ef. 4:8, 11-16.
11 Baibel i tok ol man tasol i ken holim wok wasman long kongrigesen. Dispela tok i no daunim ol meri. Nogat. Sampela meri bai mekim wok king wantaim Krais long Kingdom bilong heven. Ol meri Kristen i bihainim pasin daun na stretpela pasin na lukautim gut famili bilong ol, ol i helpim kongrigesen long kisim gutnem. (Ta. 2:3-5) Ol i save mekim bikpela wok bilong painim ol nupela man na kisim ol i kam bung wantaim lain bilong Jehova. (Sam 68:11) Tasol wok tisa insait long kongrigesen em wok bilong ol man tasol, em ol brata i bin kisim wok wasman. (1 Ti. 2:12, 13) Sapos long wanpela miting bilong kongrigesen i no gat brata inap long lukautim dispela miting, orait sista i ken mekim dispela wok na mekim beten, tasol em i mas karamapim laplap samting long het.a Sapos em i mekim olsem em i bihainim lo bilong Jehova. Em i mekim pasin daun olsem Jisas i mekim long Papa bilong em, na em i makim gutpela pasin olgeta Kristen i mas bihainim.—1 Ko. 11:3-16; Jon 8:28, 29.
12 Taim ol man bilong ausait i kisim bikpela wok, ol narapela man i save tingim ol i bikpela man. Tasol insait long lain bilong Jehova i no olsem. Baibel i tok: “Man i olsem liklik tru namel long yupela olgeta, em i namba wan.” (Luk 9:46-48; 22:24-26) Olsem na Baibel i tok, ol elda i mas was gut, ol i no ken mekim pasin antap. Ol i no ken i stap olsem bikpela man na daunim ol brata. Ol i mas i stap olsem gutpela piksa bilong soim rot long ol sipsip bilong God. (1 Pi. 5:2, 3) Olgeta Witnes, ol man na meri wantaim, ol i olsem maus bilong Nambawan Bikpela King bilong heven na graun. Olgeta i wok long mekim pasin daun na autim tok long nem bilong Em na Kingdom bilong Em long ol man bilong olgeta hap.
13 Gutpela sapos yumi askim yumi yet, olsem: ‘Mi pilim tru rot bilong Jehova long bosim lain bilong em? Tingting na toktok na pasin mi mekim i kamapim dispela samting?’ Orait, nau yu ken tingim ol dispela askim hia na bai yu inap skelim tingting na pasin bilong yu:
Sapos yumi daun tru long Krais, em Het bilong kongrigesen, bai yumi mekim wanem, olsem ol dispela skripsa i tok? (Mt. 24:14; 28:19, 20; Luk 21:34-36; Jon 13:34, 35)
Olgeta Kristen i laik bai wok bilong ol i karim kaikai ol i mas wetim God na Krais i mekim wanem? (Jon 15:5; 1 Ko. 3:5-7)
Taim ol elda i laik stretim tingting bilong sampela brata bambai ol i gat wankain tingting olsem ol narapela insait long oganaisesen, yumi mas pilim dispela i pasin sori bilong husat? (Ef. 4:7, 8, 11-13; 2 Ko. 13:11)
Taim yumi amamas long kisim ol samting bilong helpim yumi long spirit em i kam long ‘gutpela wokboi’ long rot bilong Lain Bilong Bosim ol, i olsem yumi daun long husat? Tasol olsem wanem sapos yumi toknogutim ol dispela samting? (Luk 10:16; lukim tu 3 Jon 9, 10.)
Bilong wanem i no stret yumi toknogutim ol brata ol i makim ol i stap elda? (Ap. 20:28; Rom 12:10)
14 Long nau Jehova i bosim yumi long rot bilong oganaisesen bilong em long graun na em i makim Krais i stap Het bilong en. Olsem na tingting bilong yumi long dispela oganaisesen i kamapim bel bilong yumi, yumi laikim husat i stap bos bilong yumi. (Hi. 13:17) Seten i tok yumi tingting long helpim skin bilong yumi yet tasol. Tasol sapos yumi givim skin bilong yumi bilong mekim wok bilong God na yumi no mekim sampela tok o pasin bilong litimapim nem bilong yumi yet, yumi kamapim ples klia olsem Seten em i man bilong giaman. Sapos yumi laikim tru “ol hetman” na harim gut tok bilong ol na “bihainim pasin bilong bilip bilong ol,” na yumi no ‘grisim’ ol bilong helpim yumi yet, yumi mekim Jehova i belgut. (Hi. 13:7; Jut 16) Sapos yumi tingim gut oganaisesen bilong Jehova na givim bel long mekim ol wok em i tokim yumi long mekim, orait, Jehova bai stap God bilong yumi na bai yumi wanbel long lotuim em.—1 Ko. 15:58.
[Ol Futnot]
a Taim sista i autim tok em i no ken karamapim samting long het, long wanem dispela wok em wok bilong olgeta Kristen. Tasol sapos em i mekim Baibel-stadi na man bilong em i stap (maski em i no Kristen, em i het bilong meri) orait sista i mas karamapim samting long het bilong em. Na sapos wanpela taim wanpela brata i dediket pinis em i stap taim sista i mekim stadi, orait, sista i mas karamapim samting long het na dispela brata i mas mekim beten.
Stori Gen Long Ol Dispela Tok
● Husat ol i lain bilong God long graun long nau? Dispela lain i gat wanem wok?
● God i makim husat i stap het bilong kongrigesen? God i sori long yumi na em i putim wanem samting long graun bilong soim rot long yumi?
● Yumi mas i gat wanem stretpela tingting long ol wok na ol man insait long oganaisesen?
Bilong wanem yumi mas save long dispela?
[Askim Bilong Stadi]
1. Baibel i tok wanem long lain o oganaisesen bilong Jehova?
2. Kirap long Pentikos 33 C.E. husat ol i olsem “kongrigesen” bilong God?
3. Husat long nau ol i lain bilong Jehova long graun?
4. Husat i bosim dispela lain? Olsem wanem em i bosim?
5. (a) Wanem samting i kamap long kongrigesen Kristen bilong pastaim na yumi save, God i bosim? (b) Olsem wanem yumi ken save Jisas i stap het yet bilong kongrigesen?
6. (a) Husat ol i olsem ‘gutpela wokboi’ bilong Krais? Bilong wanem i olsem? (b) Jisas i givim wanem wok long dispela “wokboi”?
7. (a) Long nau dispela “wokboi” i kisim wanem bikpela wok moa? (b) Bilong wanem i bikpela samting yumi mas harim ol tok yumi kisim long rot bilong dispela lain?
8, 9. (a) Taim ol Kristen bilong pastaim i gat askim long samting bilong bilip o bilong bosim wok bilong autim tok, ol i mekim wanem? (b) Long nau tu i gat wanem wankain pasin?
10. (a) Ol elda na wokman bilong kongrigesen i kisim dispela wok olsem wanem? (b) Bilong wanem yumi mas wok gut wantaim ol dispela brata?
11. (a) Ol meri i mekim wanem gutpela wok insait long lain bilong Jehova? (b) Wanem taim sista i mas karamapim samting long het bilong em? Bilong wanem em i mas mekim olsem?
12. (a) Baibel i tok ol elda i mas ting olsem wanem long wok o namba ol i kisim? (b) Yumi olgeta i ken insait long wanem gutpela wok?
13. Kamapim ol skripsa hia na toktok wantaim long ol askim i stap long dispela paragraf.
14. (a) Sapos yumi tingim gut dispela oganaisesen God i bosim, wanem laik bilong yumi i kamap ples klia? (b) Yumi inap mekim wanem na bai yumi kamapim ples klia tok giaman bilong Seten na mekim Jehova i belgut?