Tingim Taim i Sot Pinis na Wok Hariap
WANEM samting tru, em God i orait long en, bai strongim yumi long givim bel yet long wok bilong Jehova? Olsem: Long bel yumi mas pilim tru olsem taim i sot pinis na yumi mas wok hariap. Bilong givim bel olgeta long mekim wok bilong God, yumi mas wok strong na mekim olgeta samting em i tokim yumi long mekim.
Profet Moses i kamapim klia dispela samting taim em i tokim lain Israel: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” (Lo 6:5) Sampela handet yia bihain Krais Jisas i kolim gen dispela lo, olsem: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) Aposel Pol i tingim dispela lo taim em i tokim ol Efesus: “Bel bilong yupela i mas amamas long bihainim laik bilong God.” Na long ol Kolosi em i tok: “Olgeta samting yupela i mekim, yupela i mas wok strong na mekim.”—Efesus 6:6; Kolosi 3:23.
Tasol sapos yumi no pilim olsem taim i sot pinis na yumi mas wok hariap, o sapos pastaim yumi bin pilim olsem, tasol nau nogat, ating bai yumi hatwok liklik long givim bel na strong olgeta bilong yumi long mekim wok bilong God. Dispela taim nau yumi stap long en, em i sot pinis na yumi mas wok hariap; no gat narapela taim bipo i wankain olsem.
Sampela Taim Bipo
Paslain long taim bilong ol Kristen, i gat sampela taim i bin kamap na ol man i mas wok hariap. Kain taim olsem i bin kamap long taim bilong Noa, na taim bagarap i laik painim Sodom na Gomora. (2 Pita 2:5, 6; Jut 7) Taim Bikpela Tait i no yet, yumi ken ting olsem Noa wantaim lain bilong em ol i bin wok hariap. Tru, ol i no save wanem de stret Bikpela Tait bai kamap, tasol ol i “bilip long God,” olsem na yumi ken save, ol i no bin surikim taim bilong mekim wok—ol i wok hariap.—Hibru 11:7.
Na i wankain tu long taim Sodom na Gomora i laik bagarap. Ol ensel i “hariapim Lot” na tokim em: “Yupela ranawe kwik, nogut yupela i dai”! (Stat 19:15, 17) Ol stretpela manmeri long dispela taim tu ol i hariap mekim ol samting, na long dispela rot ol i abrusim bagarap. Sampela handet yia bihain, God i tokim ol Juda i stap kalabus long Babilon: “Yupela olgeta i mas lusim Babilon na i kam. Na lukaut gut, nogut yupela i pas long ol samting i no klin long ai bilong God.” (Aisaia 52:11) Long yia 537 paslain long Krais, 200,000 Juda ol i kirap bihainim dispela tok na ol i hariap lusim Babilon.
Ol dispela lain bilong bipo ol i bilip tru olsem taim i sot pinis na ol i mas taitim bun, na dispela i bin kirapim ol long givim bel olgeta long mekim wok.
Long Taim Bilong Ol Kristen
Planti taim Ol Skripsa Grik tu i kamapim tok i makim olsem taim i sot pinis na ol man i mas wok hariap. Bilong kirapim lain bilong em long tingim olsem taim i sot pinis, Krais Jisas i tokim ol long “lukaut”, “was i stap,” “was gut.” (Matyu 24:42-44; Mak 13:32-37) Na tu, tok piksa em i mekim bilong 10-pela yangpela meri, na wokboi nogut, na ol wokboi i kisim mani, na ol sipsip na meme, ol dispela tok piksa i bin kirapim lain bilong em long tingim taim i klostu na ol i mas wok hariap.—Matyu 25:1, 14, 15, 32, 33.
Jisas i no toktok tasol—em i wok hariap, na dispela i bin strongim tok bilong em olsem taim i sot pinis. Wanpela taim ol bikpela lain manmeri i laik pasim em, na em i tokim ol: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Luk 4:42, 43) Na tu, em i kirapim ol disaipel bilong em long ol i mas beten askim Papa bilong gaden long salim sampela wokman moa i go bungim kaikai, long wanem, “planti kaikai tumas i mau pinis long gaden, tasol i no gat planti wokman i stap bilong kisim.” (Matyu 9:37, 38) Kain beten olsem inap kirapim ol long pilim tru olsem taim i sot pinis.
Taim i Sot Pinis o Nogat?
Ating sampela i laik save: Sapos taim bilong “bikpela hevi tru” i stap longwe yet olsem planti handet yia, bilong wanem ol man long taim bilong Jisas ol i mas ting olsem dispela taim i klostu na ol i mas wok hariap?—Matyu 24:21.
Yumi ken save, Jisas i no tokim ol disaipel long was i stap long wanem em i laik kirapim ol long wok strong long autim tok na lainim ol man. Nogat. Jisas i laikim tru ol disaipel bilong em, na em i save long tingting bilong Jehova long ol yia samting; dispela tupela samting i as na Jisas i tokim ol disaipel long ol i mas was i stap. Krais Jisas i save, bilong kamapim laik bilong Jehova, ol disaipel i mas tingim olsem taim i klostu na ol i mas wok hariap. Na tu em i save, sapos ol disaipel i was i stap inap long taim em i kam bek, dispela bai helpim ol long ol samting bilong spirit.
Krais Jisas i tokaut klia olsem wanpela bikpela wok bilong autim tok bai kamap long olgeta hap bilong graun insait long wanpela liklik hap taim tasol. (Matyu 24:14; Mak 13:10) Taim ol samting i wok long kamap long dispela wok, isi isi lain bilong Jisas i kisim save long en. Tasol bilong inapim tru olgeta wan wan samting bilong dispela wok, lain bilong Jisas i mas tingim olsem taim i sot pinis na ol i mas wok hariap. Jisas i makim olsem i gat sampela samting i mas kamap pastaim long dispela wok na i gat sampela samting i mas kamap bihain. Em i tok: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) I kam inap nau, ol samting i bin kamap olsem tasol. Dispela i mekim na i gat sampela samting ol wokboi bilong God i bin kirap nogut long en, na i gat sampela samting ol i mas stretim tingting bilong ol long en.
Pasin ol Kristen i bihainim long tingim taim i sot pinis na ol i mas wok hariap, Jehova i bin mekim wok long dispela samting bilong kamapim laik bilong em. Dispela i bin helpim ol disaipel bilong Krais long inapim tru ol wok ol i mas mekim long taim stret olsem Jehova i makim pinis. Yumi long nau, taim yumi tingting i go bek inap 2,000 yia, yumi save gut long as bilong ol dispela samting God i bin mekim.
Ol disaipel i bihainim pasin Kristen long wok hariap na dispela i bin helpim ol long mekim tru wok autim tok long Jerusalem na Judia na Samaria, na long ol Juda i stap nabaut paslain long yia 36—long dispela yia pasin bilong God long mekim gut long ol Israel tasol, em i pinis. (Daniel 9:27; Aposel 2:46, 47) Pasin bilong wok hariap i bin helpim tu dispela kongrigesen bilong bipo long toksave long olgeta Juda, olsem liklik taim na pasin bilong lain Juda bai pinis. (Luk 19:43, 44; Kolosi 1:5, 6, 23) Dispela samting i bin kamap long wanpela taim ol i no tingim, olsem long yia 70, na pasin bilong wok hariap i helpim ol witnes bilong Krais long bipo long tokaut long planti man long rot bilong kisim laip long heven, na ol i autim dispela tok taim pasin bilong bikhet na lusim bilip olsem Baibel i tok profet long en na tudak bilong spirit i no kamap yet. (2 Tesalonaika 2:3; 2 Timoti 4:2) Kirap long dispela taim i go inap long yia 1300 samting, sampela liklik lain Kristen i kain olsem wit ol i wok yet long autim tok bilong Kingdom, olsem Krais Jisas i bin tok profet long en. (Matyu 13:28-30) Na las tru, long taim Jehova i makim pinis, em i kamapim wanpela lain bilong nau, em ol i wok strong, long wanem, ol i tingim toksave bilong God long kot bai painim ol man bilong dispela taim nau.—Matyu 24:34.
Olsem Daniel bilong bipo, ol Witnes bilong God long nau em ol i stap gut long em, ol i no save tokim God: “Yu laik mekim wanem samting?” (Daniel 4:35) Ol i bilip olsem Jehova i save tru long olgeta samting ol i mas mekim bilong inapim wok bilong em long taim stret bilong en. Olsem na ol i no gat tok long pasin bilong Jehova long stretim ol wok, nogat; ol i amamas God i bin givim rot long ol long wok wantaim em nau long dispela bikpela taim.—1 Korin 3:9.
Narapela Samting Bilong Kirapim Yumi Long Wok Hariap
Narapela samting bilong kirapim yumi long wok hariap, em olsem: Yumi no save long wanem de na wanem aua stret, taim bilong bikpela hevi tru bai kamap. Krais Jisas i bin tokaut klia olsem i no gat wanpela man long graun i save long dispela de na aua God i makim pinis bilong kamapim dispela bikpela hevi. (Matyu 24:36) Bihain, Jisas i tokim ol aposel bilong em: “Em i no samting bilong yupela bai yupela i save long ol taim na ol de Papa i makim. Nogat. Em yet i bosim dispela ol samting.” (Aposel 1:7) Tru, yumi save wanem ol bikpela samting bai kamap, tasol ol liklik liklik samting bilong en i no samting bilong yumi long save long en.
Aposel Pol i gat stretpela tingting long pasin bilong tingim taim i sot pinis na yumi mas wok hariap. Taim em i raitim pas long ol Tesalonaika na stori long Jisas i kam bek i stap, ating em i tingim tok bilong Jisas, na em i tok: “Ol brata, mipela i no inap raitim tok bilong tokim yupela long wanem de na wanem taim dispela ol samting bai i kamap.” (1 Tesalonaika 5:1) Em i raitim dispela pas inap olsem 17 yia bihain long taim Jisas i tok: “Yupela bai i autim tok bilong mi . . . i go inap long olgeta hap bilong graun.” (Aposel 1:8) Long dispela taim, Pol i no inap raitim sampela tok moa, long wanem, God i no bin kamapim klia sampela save moa. Tasol maski ol i no gat planti save long dispela samting, ol inap bilip tru olsem, De bilong Jehova bai kam “olsem stilman i kam long nait,” long taim ol Kristen i wok strong yet long autim tok.—1 Tesalonaika 5:2.
Yumi ken ting olsem planti taim ol Kristen bilong bipo ol i bin tingim dispela tok, olsem na ol i no ting De bilong Jehova i stap longwe olsem planti handet yia. Tru, ol i save long tok piksa Jisas i mekim long wanpela king i go long wanpela longwe ples, na tok piksa bilong wanpela man i wokabaut i go long longwe ples. Na tu ol i save, “bihain” bai dispela king i kam bek, na “longpela taim i go pinis, na bihain,” dispela man i wokabaut i go bai em i kam bek. Tasol ating ol i laik save long insait bilong ol dispela tok olsem, “bihain” na “longpela taim i go pinis, na bihain.” Hamas yia i mas lus pastaim? Tenpela yia? Twenti yia? Fifti yia? O planti yia moa? (Luk 19:12, 15; Matyu 25:14, 19) Ating planti taim ol i tingim tok bilong Jisas: “Yupela tu i mas redi. Pikinini Bilong Man bai i kam long wanpela taim yupela i no ting em bai i kam.”—Luk 12:40.
Pasin Bilong Wok Hariap i Helpim Yumi Olsem Wanem
Tru tumas, God i bin kirapim ol Kristen long taim bilong ol aposel long tingim taim i sot pinis, na dispela i bin helpim ol long wok strong long wok bilong autim tok na lainim ol man—dispela wok i bikpela tru, winim olgeta narapela wok. Pasin bilong tingim taim i sot pinis em i wok long strongim yumi tu long planti samting, olsem: Yumi no ting ol samting bai stap olsem tasol na yumi ken “slek long mekim wok,” nogat. (Galesia 6:9) Na yumi no insait tumas long ol samting bilong graun na larim ol mani kago bilong en i pulim yumi. Yumi wok long tingim “dispela laip em i laip tru.” (1 Timoti 6:19) Bikpela Jisas i tok, ol disaipel bilong em bai ol i olsem “sipsip i go namel long ol weldok,” na em i save, yumi mas tingting strong na putim tingting i go long mekim wok bilong God, bambai strong bilong dispela graun i no ken daunim yumi. Tru tumas, pasin Kristen bilong tingim taim i sot pinis na yumi mas wok hariap, dispela i bin lukautim gut yumi.—Matyu 10:16.
God Jehova i bihainim gutpela tingting bilong em na long olgeta taim em i bin givim hap save long ol wokboi bilong em inap long kirapim ol long tingim taim i sot pinis na ol i mas wok hariap. Em i strongim bilip bilong yumi olsem yumi stap long “taim bilong las de” bilong dispela taim nogut. (2 Timoti 3:1) Oltaim yumi kisim tok bilong kirapim tingting bilong yumi long yumi mas i stap olsem lait i go inap long dispela lain bilong nau i pinis long taim bilong bikpela hevi tru, laspela hap bilong en, em Armagedon.—Filipai 2:15; KTH 7:14, NW; 16:14, 16.
Tru tumas, pasin bilong tingim taim i sot pinis na taitim bun, em i insait long pasin bilong givim bel olgeta long mekim wok bilong Jehova. Dispela i helpim ol wokboi bilong God long sakim ol samting Satan i mekim long ol na bai ol i “les long sanap strong.” (Hibru 12:3) Inap long olgeta taim bihain, pasin bilong givim bel olgeta long Jehova bai kirapim ol wokboi bilong em long bihainim ol tok bilong em; tasol long nau, taim Armagedon i no yet, pasin bilong tingim taim i sot pinis na yumi mas wok hariap, em i wanpela bikpela samting i insait long dispela pasin bilong givim bel olgeta long Jehova.
Mipela i laik bai God bilong yumi Jehova i ken helpim yumi olgeta long tingim taim i sot pinis na yumi mas wok hariap, na oltaim yumi mas tingim tok bilong aposel Jon: “I tru. Bikpela Jisas, yu kam.”—KTH 22:20.