Sapta 16
Harim Gut Tok Bilong Stretim Yu
BAIBEL i tok: “Planti taim yumi olgeta i save popaia long kain kain samting.” Em i stret, a? (Jems 3:2) Planti taim yumi no bihainim gut ol pasin Baibel i tok yumi mas bihainim na yumi laik bihainim. Olsem na yumi save Baibel i tok stret olsem: “Sapos yu larim man i skulim yu na givim gutpela tingting long yu, orait bihain bai yu gat gutpela tingting na save.” (Pro. 19:20) Yumi save ol narapela man i mas helpim yumi olsem. Yumi bin lainim tok bilong Baibel na stretim wokabaut bilong yumi. Tasol taim yumi no bihainim gutpela tingting, sapos narapela Kristen i givim sampela tok long yumi long dispela samting, orait yumi mekim wanem? O sapos em i laik givim sampela tingting long yumi bilong mekim gut wanpela wok bilong yumi, orait yumi mekim wanem?
2 Pastaim ating bai yumi bel hevi, long wanem em pasin bilong yumi ol sinman. Tasol yumi mas tok tenkyu long em, na yumi mas wok long bihainim dispela tok. Sapos yumi mekim olsem, dispela bai helpim yumi. (Hi. 12:11) Tasol taim narapela man i laik stretim yumi ating yumi kirap mekim sampela tok bilong karamapim rong bilong yumi, o yumi tok i no bikpela rong, o em asua bilong narapela man. Yu bin mekim olsem? Yu bel nogut long man i bin givim tok long yu bilong stretim yu? O yu sutim tok long em long sampela pasin kranki bilong em yet o long pasin bilong em long stretim yu na long dispela rot yu laik karamapim pasin kranki yu yet yu bin mekim? Baibel inap helpim yumi long sakim kain tingting olsem?
Baibel i Stori Long Sampela Man Pasin Bilong Ol Inap Lainim Yumi
3 Baibel i givim planti gutpela tok long yumi long dispela samting na Baibel i stori long sampela man em ol narapela man i bin givim tok long ol long sampela pasin bilong ol. Planti taim dispela tok em i bilong stretim ol, bilong kirapim ol long stretim tingting o pasin bilong ol. Orait, lukim ol askim daunbilo na skelim pasin ol dispela man i bin mekim na dispela inap lainim yumi olgeta:
SOL, PIKININI MAN BILONG KIS: Em i no bihainim gut tok bilong God. Taim em i pait wantaim ol Amalek, em i no kilim i dai King bilong Amalek na ol gutpela bulmakau sipsip bilong ol Amalek. (1 Sml. 15:1-11)
Samuel i stretim Sol, tasol Sol i tok wanem na yumi save em i laik mekim olsem dispela rong i no bikpela rong? (1 Sml. 15:20) Em i tok em asua bilong husat? (1Sml 15 Ves 21) Bihain, em i kamapim rong bilong em, tasol em i tok wanem bilong karamapim dispela rong? (1 Sml 15 Ves 24) Em i tokaut pinis long em i mekim rong, tasol wanem samting i bikpela samting yet long tingting bilong em? (1 Sml 15 Ves 25, 30)
ASAIA: Em i go insait long haus holi bilong Jehova na kukim smok smel. Tasol God i makim ol pris tasol bilong mekim dispela wok. (2 Kro. 26:16-20)
Taim hetpris i laik pasim King Asaia, bilong wanem king i belhat? (Lukim 2 Kronikel 26:16.) Wanem samting i kamap? (2 Ch 26 Ves 19-21)
4 Bilong wanem i hatwok long Sol tupela Asaia i harim tok bilong stretim ol? Long wanem tupela i gat pasin antap. Ol i ting ol yet i namba wan. Planti man long nau i gat kain pasin olsem na hevi i painim ol. Ol i ting ol i gat nem, long wanem ol i gat bikpela krismas o ol i holim wanpela wok samting na ol i no laik harim tok narapela man i givim long ol bilong stretim ol. Ol i pilim olsem dispela i semim ol o i bagarapim nem bilong ol. Tasol as tru bilong dispela tingting bilong ol i olsem: Ol i no gat pasin daun. Tru, long nau planti man i gat pasin antap na ol i no laik harim tok bilong stretim ol. Tasol yumi no ken bihainim tingting bilong ol na sakim ol tok bilong stretim yumi. Em wanpela rot bilong Seten long paulim tingting bilong yumi na bai yumi sakim ol gutpela tok bilong helpim yumi, em ol gutpela tok Jehova i givim long yumi long rot bilong Baibel na oganaisesen bilong em long graun. Jehova i toksave long yumi, olsem: “Pasin bilong hambak na litimapim nem bilong yu yet bai i mekim yu pundaun na bagarap.”—Pro. 16:18; lukim tu Rom 12:3; Pro. 16:5.
5 Tasol Baibel i stori tu long sampela man ol i harim gut tok bilong stretim ol. Pasin bilong ol inap lainim gut yumi. Yu tingim:
MOSES: Tambu papa bilong Moses i givim gutpela tok long em. Em i tokim Moses long gutpela rot bilong mekim bikpela wok bilong em na bai skin bilong em i no ken les nogut. Moses i harim dispela tok na kwiktaim em i bihainim. (Eks. 18:13-24)
Moses i gat bikpela namba, tasol bilong wanem em i redi long harim dispela gutpela tok? (Lukim Nambas 12:3.) I bikpela samting yumi mas i gat wankain pasin? (Sef. 2:3)
DEVIT: Devit i trabel long meri marit, na bihain em i tingim rot bambai man bilong dispela meri i ken kisim bagarap na Devit i ken maritim meri na haitim rong bilong em. Sampela mun bihain Jehova i salim Netan i go stretim Devit. (2 Sml. 11:2–12:12)
Olsem wanem? Devit i kros long dispela tok bilong stretim em? Em i tok em i liklik rong tasol? Em i tok em asua bilong narapela man? (2 Sml. 12:13; Sam 51:het-tok antap na Sam 51 ves 1-3) Jehova i lusim rong bilong Devit, long wanem Devit i pilim tru rong bilong em na tanim bel. Tasol yu ting dispela rong i no kamapim sampela hevi long Devit wantaim lain bilong em? (2 Sml. 12:10, 11, 14; Eks. 34:6, 7)
6 King Devit i save, sapos em i harim gut ol tok bilong stretim em dispela inap helpim em. Olsem na em i tenkyu long God long dispela man God i salim bilong givim tok long em. (1 Sml. 25:32-35; lukim tu Provep 9:8.) Yumi bihainim pasin olsem? Sapos olsem, bai yumi was gut na yumi no mekim tok o pasin bihain bai yumi hevi long en. Tasol sapos yu mekim sampela samting na yu mas kisim strafe o strongpela tok bilong stretim yu olsem Devit i kisim long rong em i mekim wantaim Batsiba, yu mas save, dispela i makim olsem Jehova i gat sori long yu na em i laik helpim yu long kisim laip i stap oltaim.—Pro. 3:11, 12; 4:13.
Ol Gutpela Pasin Yumi Mas Kisim
7 I gat sampela gutpela pasin yumi mas kisim bambai yumi inap i stap gut wantaim God na ol brata Kristen bilong yumi. Jisas i skulim ol disaipel long wanpela pasin olsem. Em i sanapim wanpela pikinini namel long ol na em i tok: “Sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven.” (Mt. 18:3, 4) Ol disaipel i mas senisim sampela pasin bilong ol. Ol i mas lusim pasin antap na kisim pasin daun.
8 Bihain aposel Pita i raitim pas long ol brata na em i tok: “Yupela olgeta i mas kisim pasin bilong daunim yupela yet na i stap aninit long ol brata. Yumi save, ‘God i save sakim ol man bilong bikhet, tasol em i save marimari long ol man i daunim bel bilong ol yet.’ ” (1 Pi. 5:5) Yumi save yumi mas aninit long God, tasol dispela ves i tok yumi mas aninit tu long ol brata. Sapos yumi daunim yumi yet na i stap aninit long ol brata bai yumi no kros taim ol i givim sampela gutpela tok long yumi bilong helpim yumi. Bai yumi amamas long harim dispela tok. (Pro. 12:15) Na sapos ol brata i mas givim strongpela tok long yumi bilong stretim yumi, bai yumi save Jehova i gat sori long yumi na long dispela rot em yet i stretim yumi, na yumi no ken bel nogut na sakim dispela tok. Bai yumi harim gut.—Sam 141:5.
9 Yumi mas kisim pasin daun na yumi mas kisim tu pasin bilong tingim gut ol narapela man na helpim ol i stap gutpela. Ol samting yumi mekim em inap helpim o nogutim narapela man. Aposel Pol i givim tok long ol Kristen bilong Korin na bilong Rom na em i tok, ol i mas tingim gut maus bilong bel bilong narapela man. Em i no tok ol i mas sakim olgeta laik bilong ol yet, tasol nogut ol i mekim wanpela samting na dispela i bagarapim tingting bilong narapela man na em i pundaun na mekim rong na em i bagarap long spirit. Pol i mekim gutpela tok bilong stiaim tingting bilong yumi long dispela samting. Em i tok: “Wanpela man i no ken lukaut long em yet tasol i stap gut. Nogat. Olgeta man i mas lukaut long arapela man i stap gut. . . . Olsem na sapos yupela i kaikai na dring, o yupela i mekim narapela samting, yupela mas mekim dispela olgeta samting bilong litimapim nem bilong God. Yupela i mas ting long ol Juda, na ol Grik, na ol manmeri bilong sios bilong God, na yupela i no ken mekim pasin i save sutim lek bilong ol na ol i pundaun long sin.”—1 Ko. 10:24-33; 8:4-13; Rom 14:13-23.
10 Olsem wanem? Yu save tingim gut ol narapela man na putim laik bilong ol i go pas long laik bilong yu? I gat planti rot bilong mekim olsem. Orait, tingim dispela rot: Laik bilong yu na yu ken pasim wanem kain bilas yu laikim. Sapos dispela bilas i stret long pasin bilong Kristen na i klinpela, no gat tok. Tasol sapos yu save ol manmeri long hap yu stap long en ol i tingting planti long bilas yu pasim, olsem na ol i no laik harim tok bilong Kingdom, bai yu lusim ol dispela kain bilas? Bai yu lusim ol samting em inap pundaunim ol na yu tingting long helpim ol long kisim laip? o bai yu strong long bihainim laik bilong yu?
11 Taim ol dispela gutpela pasin yumi bin toktok long en i kamap pasin tru bilong yu, orait nau yu kirap long kisim tingting bilong Krais. Krais i mekim pasin daun tru na em i stap olsem gutpela piksa bilong yumi. (Jon 13:12-15; Fl. 2:5-8) Em i no tingim laik bilong em; em i tingting long helpim ol narapela man. Em i makim gutpela pasin yumi mas bihainim.—Rom 15:2, 3.
No Ken Sakim Tok Bilong Jehova Long Stretim Yumi
12 Yumi olgeta yumi gat pekato na yumi mas senisim sampela tingting na tok na pasin bilong yumi bambai yumi ken bihainim ol gutpela pasin bilong God. Yumi mas kamap “nupela man.” (Kl. 3:5-14; Ta. 2:11-14) Gutpela tok bilong skulim na stretim yumi i helpim yumi long save long ol tingting na pasin bilong yumi em yumi mas stretim na olsem wanem yumi ken mekim.
13 Baibel em i as tru bilong ol kain gutpela tok olsem. (2 Ti. 3:16, 17) Na long rot bilong ol buk na nius bilong Baibel na ol miting oganaisesen bilong Jehova i putim, Jehova i helpim yumi long save olsem wanem yumi ken bihainim ol dispela gutpela tok bilong Baibel. Olsem wanem? Bai yumi mekim pasin daun na harim gut ol dispela tok—maski yumi bin harim bipo—na oltaim bai yumi wok strong long stretim moa pasin bilong yumi?
14 Taim yumi gat wanpela pasin o tingting yumi hatwok long stretim, Jehova i no lusim yumi. Em i sori long yumi na i wokim rot bilong helpim yumi. Em i helpim pinis planti milion manmeri long rot bilong Baibel-stadi. Ol papamama i gat bikpela wok long skulim na stretim ol pikinini bilong ol bambai ol i no ken mekim sampela pasin bihain bai ol i gat hevi long en. (Pro. 6:20-35; 15:5) Insait long kongrigesen tu ol elda samting i gat wok long kamapim ol tok bilong Baibel bilong helpim na stretim ol narapela. Tasol ol i mas mekim long pasin isi. (Ga. 6:1, 2) Long ol dispela rot Jehova i givim tok long yumi bilong skulim na stretim yumi bambai yumi ken i stap wanbel na lotuim Em.
STORI GEN LONG OL DISPELA TOK
● Jehova i sori long yumi na helpim yumi olsem wanem bambai yumi ken save long ol pasin na tingting yumi mas stretim?
● Bilong wanem planti man i hatwok long harim tok narapela man i givim long ol bilong stretim ol? Dispela pasin i nogut olsem wanem?
● Wanem ol gutpela pasin tru inap helpim yumi long harim gut tok bilong stretim yumi? Jisas i mekim wanem na em i olsem gutpela piksa bilong ol dispela pasin?
[Askim Bilong Stadi]
1. (a) I gat wanpela man namel long yumi em i no save popaia na i no gat wok long givim tok long em bilong stretim em? (b) Tasol gutpela sapos yumi tingim wanem ol askim?
2. (a) Taim wanpela man i givim gutpela tok long yumi bilong stretim yumi, bilong wanem yumi mas tok tenkyu long dispela? (b) Yumi no ken mekim wanem?
3. (a) Baibel i mekim wanem na dispela inap helpim yumi long kisim stretpela tingting long ol tok narapela man i givim long yumi bilong stretim yumi? (b) Lukim ol askim na stori long ol samting Sol na Asaia i mekim taim narapela man i laik stretim ol.
4. (a) Bilong wanem i hatwok long Sol tupela Asaia i harim tok bilong stretim ol? (b) Olsem wanem na planti man long nau tu ol i gat wankain hatwok?
5. Skelim ol askim long dispela paragraf na tingim wanem ol pasin bilong Moses na Devit inap lainim yumi.
6. (a) Devit i ting olsem wanem long ol man i givim gutpela tok long em bilong stretim em? (b) Sapos yumi harim gut kain tok olsem bilong stretim yumi, dispela inap helpim yumi olsem wanem? (c) Sapos ol i givim strongpela tok o strafe long yumi, yumi no ken lusim tingting long wanem samting?
7. Jisas i tok yumi mas i gat wanem kain pasin na bai yumi inap go insait long Kingdom?
8. (a) Yumi mas aninit long husat? Bilong wanem yumi mas mekim olsem? (b) Sapos yumi gat pasin daun olsem, orait, taim narapela man i givim tok long yumi bilong stretim yumi, bai yumi mekim wanem?
9. (a) I gat wanem narapela pasin yumi mas kisim na i bikpela samting olsem pasin daun? (b) Bilong wanem yumi mas tingim ol samting pasin bilong yumi i mekim long narapela man?
10. Wanem samting inap makim olsem yumi bihainim dispela tok bilong Baibel o nogat?
11. Olsem wanem yumi save, sapos man i laik tru long kamap Kristen em i mas kisim ol dispela gutpela pasin?
12. (a) Yumi olgeta yumi mas senisim wanem samting na bai yumi kisim pasin God i save laikim? (b) Wanem samting inap helpim yumi?
13. (a) Long wanem rot Jehova i save givim tok long yumi bilong stretim yumi? (b) Yumi mas mekim wanem long ol dispela tok?
14. Jehova i mekim wanem samting moa bilong helpim yumi olgeta wan wan?