Bai Yu Larim Sori Bilong Jisas i Kirapim Yu Long Wok?
“Krais i bin givim bel bilong en long mipela, na dispela i save kirapim mipela long wok.”—2 KORIN 5:14.
1. Yumi ken stori olsem wanem long sori bilong Jisas?
TRU TUMAS, pasin sori bilong Jisas i wanpela gutpela samting tru! Taim yumi tingim bikpela pen moa yet em i bin karim taim em i givim ofa bilong baim bek yumi, em dispela samting tasol inap helpim yumi long kisim laip oltaim, bel bilong yumi i pilim tru na yumi laikim em tru! I no olsem yumi bin laikim God Jehova na Jisas yet pastaim. Nogat. Tupela i bin laikim yumi pastaim, maski yumi manmeri bilong mekim sin. (Rom 5:6-8; 1 Jon 4:9-11) Aposel Pol i tok, sapos yumi save long “pasin bilong Krais long laikim tru” ol man, dispela save “i winim olgeta save.” (Efesus 3:19) Tru tumas, sori bilong Jisas i winim tru save ol man inap skul na kisim na i stap long het tasol. Sori bilong Jisas i moa yet na i winim tru olgeta samting ol man i bin lukim, na olgeta samting ol i gat save long en.
2. Jisas i laikim yumi tru, na wanem ol samting i no inap pasim dispela laik o sori bilong em?
2 Pol i raitim pas long ol Kristen long Rom na em i tok: “Krais i save laikim yumi moa yet, na i no gat wanpela samting inap pasim dispela laik bilong en i kamap long yumi wan wan. Sapos hevi i kamap long yumi, o sapos yumi karim pen, o sapos ol man i mekim nogut long yumi, o sapos yumi hangre, o sot long klos, o sapos samting nogut i laik bagarapim yumi, o sapos pait i kamap long yumi, ating dispela olkain samting bai i pasim laik bilong Krais? Nogat tru.” Na Pol i tok moa olsem: “Mi bilip tru olsem, . . . Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim [sori] bilong God, em dispela [sori] em i givim yumi long Krais Jisas, Bikpela bilong yumi.”—Rom 8:35-39.
3. Wanem samting tasol inap mekim na Jisas wantaim Papa bilong em i no laikim yumi moa?
3 Em nau, sori bilong God Jehova wantaim Jisas i strong tru olsem—tupela i laikim yu tru. I gat wanpela samting tasol inap mekim na tupela i no ken laikim yu moa, em pasin bikhet bilong yu yet, olsem yu no laik mekim ol samting tupela i tokim yu long mekim na i olsem yu givim baksait long sori bilong tupela. Wanpela profet bilong God long bipo i bin tokim wanpela king bilong Juda: “Sapos [yu] stap klostu long Bikpela, orait bai em i stap wantaim [yu]. Na sapos [yu] wok long painim em, orait bai [yu] inap i kam klostu long em. Tasol sapos [yu] givim baksait long em, orait bai em i givim baksait long [yu].” (2 Stori 15:2) Tasol yumi no laik givim baksait long God Jehova na Krais Jisas, a? Tupela i gutpela pren tru bilong yumi na tupela i save sori na marimari long yumi.
Sori Bilong Jisas i Mas Kirapim Yumi Long Mekim Wanem?
4, 5. (a) Sori bilong Jisas i mas kirapim yumi long mekim wanem kain pasin long ol narapela man? (b) Jisas i laikim tru yumi na dispela i mas kirapim yumi long laikim tru em yet na husat moa?
4 Orait, dispela bikpela pasin sori bilong Jisas i mekim wanem long yu? Em i mas kirapim yu long mekim wanem? Jisas i tok, pasin em i makim i mas kirapim yumi long mekim wankain pasin olsem long ol narapela man. Em i mekim pasin daun na wasim lek bilong ol aposel na bihain em i tok: “Mi soim pasin long yupela, na yupela tu i mas mekim wankain pasin olsem nau mi mekim long yupela.” Na em i tok moa olsem: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” (Jon 13:15, 34) Ol disaipel i kisim save long pasin bilong Jisas, na dispela i kirapim ol long wok long mekim wankain pasin olsem em i mekim. Aposel Jon i tok: “Jisas i lusim laip bilong em yet na i dai bilong helpim yumi, na dispela pasin bilong en i soim yumi pinis long pasin bilong laikim tru ol arapela. Na yumi tu yumi mas lusim laip bilong yumi bilong helpim ol Kristen brata.”—1 Jon 3:16.
5 Sapos pasin bilong Jisas i kirapim yumi long mekim pasin sori long ol narapela man na long helpim ol, em gutpela, tasol pasin na wok bilong Jisas i mas kirapim yumi long mekim sampela samting moa. Jisas i laikim tru yumi na dispela i mas kirapim yumi long laikim em na long laikim Papa bilong em, em i bin lainim Jisas long olgeta samting Jisas i save long en. Olsem wanem? Bai yu larim sori bilong Krais i kirapim yu long laikim em tru na mekim wok bilong Papa bilong em olsem em i bin mekim?—Efesus 5:1, 2; 1 Pita 1:8, 9.
6. Jisas i sori long Pol na dispela i kirapim Pol long mekim wanem?
6 Tingim aposel Pol. Pastaim Pol i gat narapela nem, em Sol, na long dispela taim em i mekim nogut long Jisas—em i strong “long bagarapim ol disaipel bilong Bikpela na kilim ol i dai.” (Aposel 9:1-5; Matyu 25:37-40) Taim Pol i kisim save pinis long Jisas, em i amamas tru long Jisas i lusim rong em i bin mekim, na nau em i redi long karim hevi na i dai tu bilong mekim wok bilong Jisas. Em i tok: “Mi hangamap pinis long diwai [pos] wantaim Krais na mi dai wantaim em na mi kisim nupela laip. Tasol dispela laip em i no laip bilong mi yet. . . . nau olgeta pasin na wok mi mekim long dispela graun, em mi mekim long rot bilong bilip. Mi bilip long Pikinini Bilong God em i bin laikim mi tru na em i lusim laip bilong em yet bilong helpim mi.”—Galesia 2:19, 20.
7. Sori bilong Jisas i mas kirapim yumi long mekim wanem?
7 Pasin sori Jisas i mekim long yumi em i wanpela strongpela samting bilong kirapim bel bilong yumi! Pol i bin tokim ol Korin olsem: “Krais i bin givim bel bilong en long mipela, na dispela i save kirapim mipela long wok, . . . [olsem na yumi] no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu. Yumi ken tingting long em na wokabaut.” (2 Korin 5:14, 15) Yumi mas tenkyu tru long Jisas, long wanem, em i bin lusim laip bilong em bilong helpim yumi, na dispela i mas kirapim yumi long mekim olgeta samting em i tokim yumi long mekim. Long dispela rot tasol bai yumi inap kamapim klia olsem yumi laikim em tru. Jisas i tok: “Sapos yupela i laikim mi tru, orait yupela bai i bihainim gut ol tok bilong mi. Man i kisim lo bilong mi na i bihainim gut, dispela man em i laikim mi tru.”—Jon 14:15, 21; lukim tu 1 Jon 2:3-5.
8. Sori bilong Jisas i bin mekim wanem long pasin na wokabaut bilong planti man bilong mekim rong?
8 Sampela man long taun Korin, bipo ol i bin pamuk, o trabel long maritmeri, o mekim pasin i gat sem wantaim ol arapela man, o stil, o spak, o pulim samting bilong ol narapela man, tasol taim ol i kisim save long ol lo bilong Jisas, sori bilong em i kirapim ol long lusim ol dispela pasin nogut. Pol i tokim ol: “God i wasim yupela pinis na mekim yupela i kamap [klin] . . . Na long nem bilong Bikpela Jisas Krais . . . God i mekim yupela i kamap stretpela manmeri long ai bilong en.” (1 Korin 6:9-11) Long nau tu planti tausen manmeri i pilim tru sori bilong Jisas, na dispela i kirapim ol long tanim bel na senisim pasin bilong ol. Wanpela man bilong raitim stori bilong bipo (em John Lord) em i bin tok: “Ol man i bilip long lotu Kristen ol i kamap gutpela man, na dispela i litimapim nem bilong dispela lotu. I gat planti samting na yumi ken save long gutpela pasin bilong ol, em ol i no gat asua long wanpela samting, na ol i save wokabaut stret, na bihainim ol lo bilong gavman, na mekim ol gutpela pasin Kristen.” Ol man i bilip long ol tok bilong Jisas, ol dispela tok i bin kirapim ol long senisim tru pasin bilong ol!
9. Yumi mas mekim wanem na bai yumi “harim tok” bilong Jisas?
9 Sapos yumi kisim save long ol pasin na wok bilong Krais Jisas, i no gat narapela samting long nau yumi ken kisim save long en i winim dispela. Aposel Pol i tok strong olsem: “Yumi mas lukluk i go long Jisas, . . . Yupela tingim gut [em].” (Hibru 12:2, 3) Na long taim skin bilong Jisas i kamap narapela kain, God i tok, ol man i mas “harim tok” bilong Pikinini bilong em. (Matyu 17:5) Tasol yumi mas mekim wanem na bai i olsem yumi “harim tok” bilong em? Nogut yumi harim nating tok bilong em. Yumi mas mekim sampela samting moa. Yumi mas bihainim tok bilong em—yumi mas mekim ol samting em i bin mekim, na yumi mas bihainim pasin bilong em long mekim. Sapos yumi larim sori bilong Jisas i kirapim yumi long wok, bai yumi bihainim pasin em i makim—bai yumi bihainim gut lek bilong em.
Ol Samting Jisas i Laik Bai Yumi Mekim
10. Jisas i bin lainim husat? Em i lainim ol long mekim wanem wok?
10 God i givim wok long Jisas bilong autim tok bilong Kingdom bilong Em, na Jisas i lainim ol disaipel bilong em long mekim dispela wok. Em i tokim ol disaipel em i bin singautim long pastaim, olsem: “Yumi go long ol arapela taun i stap klostu. Mi laik autim tok long ol tu, long wanem, em dispela wok tasol mi kam bilong mekim.” (Mak 1:38; Luk 4:43) Em i lainim gut 12-pela aposel, na bihain em i givim tok long ol, olsem: “Yupela go na autim tok olsem, ‘Kingdom bilong heven em i kam klostu pinis.’ ” (Matyu 10:7) Sampela mun bihain, taim em i lainim pinis sampela man moa, inap olsem 70 samting, em i salim ol tu i go. Em i tokim ol: “Yupela i mas autim tok long ol olsem, ‘Kingdom bilong God i kam klostu pinis long yupela.’ ” (Luk 10:9) Jisas i kamapim klia dispela wok ol disaipel i mas mekim—em i laik bai ol i autim tok na lainim ol man.
11. (a) Olsem wanem ol disaipel bilong Jisas i mekim ol bikpela wok i winim wok bilong Jisas? (b) Taim ol birua i kilim pinis Jisas, dispela i mekim wanem long ol disaipel?
11 Jisas i wok i go long lainim ol disaipel long mekim dispela wok. Long laspela apinun paslain long em i dai, em i mekim sampela tok bilong strongim bel bilong ol, em i tok: “Tru tumas, mi tokim yupela, man i bilip long mi, bai em tu i mekim olkain wok mi save mekim. Na bai em i mekim ol bikpela wok i winim wok mi bin mekim.” (Jon 14:12) Ol disaipel bai mekim ol bikpela wok i winim bilong Jisas, long wanem, ol bai autim tok long planti man moa, na long planti hap moa, na long bikpela hap taim moa. Tasol taim ol birua i kilim pinis Jisas, ol disaipel i pret nogut tru na ol i no mekim wanpela samting. Ol i hait na ol i no mekim dispela wok Jisas i bin lainim ol long mekim. Sampela i go bek gen long wok bisnis bilong kisim pis. Tasol Jisas i mekim wanpela samting i kirapim tru tingting bilong ol 7-pela aposel i bin mekim olsem, na ol i no inap lusim tingting long dispela wok em i laik bai ol yet na ol narapela disaipel i mas mekim.
12. (a) Jisas i wokim wanem mirakel long Raunwara Galili? (b) Wanem insait bilong tok bilong Jisas em i tokim Pita, ‘Ating yu laikim mi moa yet, winim ol dispela?’
12 Jisas i tanim i kamap man na em i kamap long ai bilong ol klostu long Raunwara Galili. Ol dispela 7-pela aposel i stap long bot. Long nait olgeta ol i bin painim pis na ol i no bin kisim wanpela. Jisas i sanap i stap long nambis na em i singaut long ol na i tok: “Yupela tromoi umben long han sut bilong bot, na bai yupela i kisim sampela.” Nau em i wokim mirakel na ol pis i pulap tru long umben na umben i laik bruk. Ol lain long bot i lukim dispela samting na ol i save, em Jisas i stap long nambis, na ol i hariap i go long em. Jisas i givim kaikai long ol, na bihain ating em i lukim ol dispela planti pis na em i tokim Pita, ‘Saimon, pikinini bilong Jon, ating yu laikim mi moa yet, winim ol dispela?’ (Jon 21:1-15) I olsem Jisas i laik tok, ‘Pita, yu laikim moa yet wok bilong autim tok em mi bin lainim yu long mekim, o yu laikim moa yet wok bilong kisim pis?’
13. Jisas i mekim wanem bilong helpim ol disaipel long tingim gut dispela wok, em sori bilong em i mas kirapim ol long mekim?
13 Pita i bekim tok olsem: “Bikpela, yu save, mi laikim yu.” Orait, nau Jisas i tokim em: “Yu lukautim ol pikinini sipsip bilong mi.” Namba 2 taim Jisas i tokim em: “Saimon, pikinini bilong Jon, ating yu laikim mi, o nogat?” Pita i bekim tok na ating em i tok strong moa, olsem: “Yes, Bikpela, yu save, mi laikim yu.” Na Jisas i givim wankain tok gen long em, olsem: “Yu was long ol sipsip bilong mi.” Namba 3 taim Jisas i tok: “Saimon, pikinini bilong Jon, ating yu laikim mi?” Nau Pita i bel hevi tru. Sampela de bipo em i bin tok 3-pela taim em i no save long Jisas, na ating nau em i tingting planti, nogut Jisas i ting em i no laikim em. Olsem na namba 3 taim Pita i bekim tok ating em i mekim olsem em i krai long Jisas i mas bilipim tok bilong em. Pita i tok: “Bikpela, yu save long olgeta samting. Yu save, mi laikim yu.” Na Jisas i tok: “Yu lukautim ol sipsip bilong mi.” (Jon 21:15-17) Long dispela rot Jisas i kamapim klia tru ol samting em i laik bai Pita na ol poroman bilong em i mas mekim. Em i helpim ol yet—na ol disaipel bilong em long nau tu—long tingim gut dispela wok em sori bilong em i mas kirapim ol long mekim, olsem: Sapos ol i laikim em tru, bai ol i insait long wok bilong kamapim ol disaipel!
14. Long ol narapela taim tu, olsem wanem Jisas i makim dispela wok em sori bilong em i mas kirapim ol disaipel long mekim?
14 Jisas i toktok wantaim ol dispela aposel long nambis, na sampela de bihain em i kamap long 500 samting disaipel bilong em long wanpela maunten long Galili. Em i tokim dispela bikpela lain i bung wantaim na ol i amamas, olsem: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:19, 20; 1 Korin 15:6) Olaman! Ol man na meri na pikinini, olgeta wantaim i gat wok long kamapim ol disaipel! Bihain liklik, taim Jisas i laik go antap long heven, em i tokim ol disaipel: “Yupela bai i autim tok bilong mi . . . long olgeta hap bilong graun.” (Aposel 1:8) Jisas i givim olgeta dispela tok long ol, olsem na sampela yia bihain Pita i tok: “[Jisas] i tokim mipela long autim tok long ol manmeri na tokaut klia.”—Aposel 10:42.
15. Yumi no gat tupela tingting long wanem samting?
15 Yumi no gat tupela tingting long ol samting sori bilong Jisas i mas kirapim yumi long mekim, a? Olsem em i tokim ol aposel: “Sapos yupela i bihainim gut ol lo na tok bilong mi, orait yupela bai i stap insait long [sori] bilong mi, . . . Na sapos yupela i mekim olsem mi bin tokim yupela, orait yupela i stap pren bilong mi.” (Jon 15:10-14) Tasol olsem wanem long yu? Bai yu kamapim klia olsem yu pilim tru sori bilong Jisas—bai yu bihainim tok bilong em na insait long wok bilong kamapim ol disaipel? Tru, ating i gat sampela samting i mekim na i hatwok long yu long mekim dispela wok. Tasol Jisas tu i gat hatwok long wok em i bin mekim. Tingim ol samting em i mas lusim na ol bikpela senis i bin painim em.
Bihainim Pasin Jisas i Makim
16. Jisas i makim wanem gutpela pasin tru yumi ken bihainim?
16 Long heven dispela wanpela Pikinini bilong God i gat bikpela namba na biknem, winim olgeta ensel. Em i gat planti samting tru! Tasol long laik bilong em yet em i lusim olgeta dispela samting na em i kamap wanpela man long graun. Em i kamap insait long wanpela famili ol i stap rabis, na em i stap namel long ol manmeri i gat sik na ol i save dai. Em i mekim dispela samting bilong helpim yumi, olsem aposel Pol i tok: “Yupela i save pinis long marimari bilong Bikpela bilong yumi Jisas Krais. Em i gat planti samting, tasol em i kamap olsem rabisman tru, bai em i ken . . . helpim yupela long kisim planti samting.” (2 Korin 8:9; Filipai 2:5-8) Em i makim gutpela pasin tru yumi ken bihainim! Em i mekim bikpela pasin sori tru! No gat wanpela man i bin lusim planti samting o karim planti hevi bilong helpim ol narapela, winim Jisas. Na i no gat wanpela man i bin mekim wok bilong helpim ol man wankain olsem Jisas i bin mekim—em i opim rot bambai ol inap kisim planti gutpela samting—bai ol inap kamap gutpela olgeta na kisim laip i stap oltaim!
17. Yumi ken bihainim pasin bilong husat? Sapos yumi mekim olsem, wanem samting bai kamap?
17 Yumi ken bihainim pasin bilong Jisas, na bai yumi helpim ol man olsem em i bin mekim. Planti taim Jisas i wok long kirapim ol man long kamap disaipel bilong em. (Mak 2:14; Luk 9:59; 18:22) Na Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Bai yu larim sori bilong Krais i kirapim yu long mekim wok bilong Papa bilong em olsem em i bin mekim, maski yu mas karim pen tu? Sapos yu mekim olsem, dispela inap helpim tru ol narapela! Tru tumas, sapos yumi bihainim pasin Jisas i makim, olsem yumi bihainim tru ol tok em i bin kisim long Papa bilong em, orait, “long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.”—1 Timoti 4:16.
18. (a) Jisas i gat wanem kain tingting long ol man na em i makim gutpela pasin yumi ken bihainim? (b) Gutpela pasin bilong Jisas i kirapim ol man long mekim wanem?
18 Bilong helpim tru ol man, yumi mas sori long ol olsem Jisas i bin mekim. Wanpela tok profet i makim Jisas i tok: “Em i save sori long ol manmeri i no gat strong na i stap rabis.” (Buk Song 72:13) Ol disaipel bilong em inap lukim olsem em i ‘laikim tumas’ ol manmeri em i toktok wantaim ol na em i laik tru long helpim ol. (Mak 1:40-42; 10:21) Baibel i tok: “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Ol man i bin mekim bikpela rong, ol tu i pilim sori bilong em na dispela i pulim ol i go long em. Nek bilong em, na lukluk bilong em, na pasin bilong em long skulim ol man, dispela i mekim na ol i stap bel isi. Olsem na ol man bilong kisim takis na ol meri pamuk tu i wok long painim em, long wanem, ol i no pret long i go klostu long em.—Matyu 9:9-13; Luk 7:36-38; 19:1-10.
19. Pol i mekim wanem kain pasin long ol man olsem Jisas i bin mekim? Sapos yumi mekim kain pasin olsem, wanem samting bai kamap?
19 Ol disaipel bilong Jisas long pastaim ol i bin bihainim gutpela pasin sori olsem em yet i bin mekim. Pol i raitim pas long sampela em i bin helpim ol na em i tok: “Taim mipela i stap wantaim yupela, mipela i stap isi tru . . . olsem meri i givim susu long ol pikinini bilong en. . . . mipela i bin mekim wankain pasin long yupela olsem papa i save mekim long ol pikinini bilong en.” (1 Tesalonaika 2:7-11) Yu save sori olsem long ol manmeri i stap long hap yu autim tok long en? Yu mekim wankain pasin long ol olsem papamama i save mekim long ol pikinini, em ol i laikim ol tumas? Sapos nek bilong yu, na lukluk long pes bilong yu, na pasin bilong yu i kamapim klia olsem yu sori long ol, dispela bai pulim ol manmeri i kain olsem sipsip na bai ol i laik tru long harim tok bilong Kingdom.
20, 21. I gat wanem ol stori long sampela man long nau ol i bihainim pasin sori bilong Jisas?
20 Wanpela taim long Spen i kol nogut tru na tupela meri Witnes i bungim wanpela lapun meri long haus bilong em, em i save wokabaut wantaim stik. Haus bilong em i kol olgeta, long wanem, paiawut i pinis. Em i wetim pikinini man bilong em i kam bek long wok na bai em i brukim sampela paiawut moa. Tupela i sori long lapun na ol i brukim paiawut bilong helpim em, na tupela i givim sampela nius long em bilong em i ken kaunim. Taim pikinini man i kam bek, em i pilim tru gutpela pasin sori tupela Witnes i bin mekim long mama bilong em, olsem na em i kaunim ol nius ol i bin lusim long mama, na em i kirap long stadi na lainim ol tok bilong Baibel, na em i bin kisim baptais, na liklik taim bihain em i kirap mekim wok painia.
21 Long Ostrelia tupela Witnes i go long haus bilong wanpela man, na em wantaim meri bilong em i tokim tupela, ol i no gat mani bilong baim kaikai bilong famili. Tupela Witnes hia, em man wantaim meri bilong em, i lusim haus i go baim sampela kaikai na ol i baim tu sampela loli bilong ol pikinini. Taim ol i go bek na givim long dispela man na meri, tupela i pilim tru na tupela i krai. Tupela i tok, ol i lus olgeta long mani na ol i pilim olsem ol i no gat rot na ol i bin tingting long kilim i dai skin. Tupela i kirap long stadi na lainim ol tok bilong Baibel, na nau meri i baptais pinis. Wanpela meri long Amerika em i no laikim ol Witnes, tasol em i bungim wanpela Witnes, na bihain em i stori olsem: “Mi no tingim ol samting mitupela i bin toktok long en, tasol mi tingim gutpela pasin em i bin mekim long mi, na em i bin singautim mi i go long haus bilong em, na em i gat pasin daun tru. Gutpela pasin em i mekim i kirapim mi long laikim em. Na inap long nau em i stap gutpela pren bilong mi na mi laikim em tru.”
22. Yumi skelim pinis ol samting Jisas i bin mekim na yumi ting olsem wanem long em?
22 Taim yumi larim sori bilong Jisas i kirapim yumi long mekim dispela wok em i bin mekim, na yumi bihainim pasin bilong em long mekim, yumi save kisim ol gutpela blesing tru! I gat planti samting tru i kamapim long ples klia olsem Jisas em i nambawan man tru. Dispela i kirapim yumi long mekim tok wankain olsem bilong Pontius Pailat, olsem: “Lukim. Em hia dispela man”! Tru tumas, “dispela man” em i nambawan man tru i winim olgeta narapela man i bin i stap long graun.—Jon 19:5.
Bai Yu Bekim Wanem Tok?
◻ Sori bilong Jisas i bikpela olsem wanem?
◻ Sori bilong Jisas i mas kirapim yumi long laikim husat? Na sori bilong em i mas kirapim yumi long mekim wanem?
◻ Jisas i laik bai yumi mekim wanem wok?
◻ Olsem wanem Jisas i gat planti samting? Bilong wanem em i lusim ol dispela samting na kamap olsem rabisman?
◻ Yumi mas mekim wanem bilong helpim ol man olsem Jisas i bin mekim?
[Piksa long pes 15]
Jisas i sori long ol man na makim pasin yumi mas bihainim
[Piksa long pes 17]
Jisas i makim gut ol samting ol disaipel i mas mekim bilong kamapim klia olsem ol i laikim em