As Bilong Wanpela Tok Hait Bilong God i Wok Long Kamap Ples Klia
“As tok bilong pasin bilong [givim bel long] God em i bikpela samting tru.”—1 TIMOTI 3:16.
1. Long 1 Timoti 3:16 Baibel i stori long wanem tok hait?
OLSEM WANEM? Yu laik save long ol samting i stap hait? Ating yumi olgeta i laik save long kain samting olsem, a? Orait, nau yumi ken toktok long wanpela gutpela samting tru, tok bilong en i bin stap hait insait long Baibel inap planti tausen yia, na dispela tok hait i bikpela samting long yumi long nau na long bihain. Em 1 Timoti 3:16 i kolim olsem “as tok bilong pasin bilong God.” Yumi ken tenkyu tru long Jehova, em i Man bilong kamapim long ples klia ol samting i stap hait, na nau em i kamapim dispela bikpela tok hait na insait bilong en tu!—Daniel 2:28, 29.
2. (a) Wanem namba wan taim Jehova i tokaut long wanpela tok hait? Long dispela taim em i bin mekim wanem tok promis? (b) I gat wanem ol askim yumi mas save long bekim bilong en?
2 Long ples Iden Satan i paulim Iv, na Adam i bihainim Iv long mekim pasin bikhet, na nau God i tokaut long wanpela tok hait. Em i tok, wanpela “lain” o pikinini bai krungutim het bilong Snek, em Satan. (Stat 3:15) Dispela Pikinini em husat? Em bai daunim Satan olsem wanem? Em bai mekim ol tok na laik bilong God long dispela graun i kamap tru, o nogat?
3. Sampela tok profet bilong God i kamapim long ples klia wanem samting bilong dispela Pikinini na ol wok em bai mekim long bihain?
3 Bihain sampela tok profet bilong God i kamapim long ples klia dispela Pikinini na ol wok em bai mekim long bihain: Em bai kamap insait long lain tumbuna pikinini bilong Abraham, na em bai bosim kingdom bilong Devit, na em bai kisim nem olsem King Bilong Kamapim Gutpela Sindaun, na ‘wok king bilong em bai go bikpela, na gutaim i no ken pinis.’ (Aisaia 9:6, 7; Stat 22:15-18; Buk Song 89:35-37) Tasol Rom 16:25 i tok, dispela tok hait “i bin i stap hait long olgeta taim bipo.”
Painim As Bilong Dispela Tok Hait
4. Olsem wanem ol samting bilong dispela tok hait i wok long kamap ples klia long yia 29?
4 Orait, 4 tausen yia i go pinis, na nau ol samting i wok long kamap ples klia! Dispela i kamap olsem wanem? Long yia 29 Jon i baptaisim Jisas bilong Nasaret long wara Jordan, na maus bilong God long heven i tok: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:17) Em nau, Jisas hia em dispela Pikinini em God i bin tok promis long kamapim! Long dispela taim, dispela tok hait wantaim ol gutpela samting bilong en na pasin bilong givim bel long God, ol dispela samting i wok long kamap ples klia.
5. Wanem insait bilong dispela tok “givim bel long God”? Ol manmeri i givim bel long God, ol i save mekim wanem?
5 Dispela tok, “givim bel long God,” long Nupela Testamen long tok Pisin ol i kolim olsem “pasin bilong God,” na em i kamap inap 20 taim, na Pol i kolim planti taim long tupela pas em i bin raitim long Timoti. Wanpela buk (Insight on the Scriptures) i tok, insait bilong dispela tok em i olsem “daun long God na laikim tumas em na lotuim em, na mekim wok bilong em, na stap gut long em, em i King bilong heven na graun.” Sapos yumi tingim God i save stap long olgeta taim, na em i wokim planti gutpela samting, na yumi amamas long ol gutpela samting bilong skin na bilong spirit em i bin givim long yumi, ol dispela samting bai kirapim yumi long givim bel long God na litimapim nem bilong em. Tru tumas, yumi olgeta wan wan i save givim bel long God yumi inap tok olsem Buk Song 104 ves 1 i tok: “Mi mas litimapim nem bilong [Jehova]. God, Bikpela bilong mi, yu antap tru. Yu nambawan king na yu gat biknem.”
6. (a) Ol man i lotuim Jehova, olsem wanem ol i narapela kain long ol man bilong ol narapela lotu ol i kolim Kristen, em ol i sindaun nating tasol na harim lotu? (b) Pol i tok wanem long Rom 11:33, 34? I gat wanem ol askim?
6 Yumi givim bel long God, na dispela i kirapim yumi long mekim sampela samting. Olsem na yumi ol man i lotuim God tru, em Jehova, yumi narapela kain stret long ol man bilong ol narapela lotu ol i kolim Kristen, em lain bilong ol i wok long i go liklik. Ol dispela man i save sindaun nating tasol long haus lotu na harim lotu. Na planti man i ting, sapos ol i gat lotu, dispela bai mekim ol i holi o gutpela long ai bilong ol man, maski pasin bilong ol i wankain olsem pasin nogut bilong ol man bilong dispela graun. Ol i no save God em i husat. Ol i mas tingim tok bilong Aposel 17:23, em i bin tokim ol man bilong Atens ol i save lotuim wanpela god ol i no save long em, na Pol i tokim ol: “Dispela God yupela i no save long en na yupela i lotu nating long en, nau mi laik autim tok bilong en long yupela.” Pol i stori long dispela gutpela God long Rom 11:33, 34, em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en. Olsem tok i stap long buk bilong God, ‘Husat i save pinis long tingting bilong [Jehova]? Husat i bin givim tingting long em?’ ” Orait, olsem wanem yumi ken save long ol pasin bilong God? Yumi ken save sapos yumi lain long dispela ‘tok hait bilong pasin bilong givim bel long God.’ Tasol yumi ken lain olsem wanem?
7. Bilong wanem yumi ken tok, ‘as tok bilong pasin bilong givim bel long God em i bikpela samting tru’?
7 Long Namba Wan Timoti sapta 3, pastaim aposel Pol i kolim ol samting ol wokman bilong lain bilong God i mas mekim. Long ves 15 em i tok, “Yumi ol lain bilong God, yumi stap [kongrigesen] bilong God bilong i stap oltaim, na dispela [kongrigesen] i olsem strongpela pos i karim tok tru.” Na nau long ves 16 Pol i tok: “As tok [olsem tok hait] bilong pasin bilong [givim bel long] God em i bikpela samting tru.” Em i bikpela samting tru, long wanem Jehova i salim dispela wanpela Pikinini bilong em i kam long graun bilong kamapim as bilong dispela tok hait na bilong kamapim long ples klia pasin tru bilong givim bel long God, em bikpela samting bambai ol man i ken lotu tru long God. Taim Jisas i stap long graun, ol samting em i bin mekim i kamapim pasin bilong givim bel long God. Yumi olgeta manmeri i laikim tumas Jehova, yumi mas bihainim bilip na pasin bilong Krais long givim bel long God. Orait, yumi laik save, Jisas i mekim wanem na em i kamapim long ples klia dispela ‘tok hait bilong pasin bilong givim bel long God’?
Sikspela Samting
8. (a) Kolim ol 6-pela samting bilong dispela tok hait, olsem Pol i stori long en long 1 Timoti 3:16? (b) Husat dispela “Em” i kamap man tru na ol manmeri i lukim em?
8 Spirit bilong God i bin kirapim Pol long mekim tok na dispela i bekim dispela askim bilong yumi. Long 1 Timoti 3:16 yumi ken lukim 6-pela samting bilong dispela tok hait. Pol i tok: “Em i [1] kamap man tru, na ol manmeri i lukim em. [2] Holi Spirit i soim olsem pasin bilong en em i stret olgeta, na [3] ol ensel i lukim em. [4] Ol man i go autim tok bilong en long olgeta lain man. [5] Ol manmeri bilong graun i bilip long em. [6] God i bringim em i go antap na em i kisim biknem tru.” Husat dispela “Em” i bin kamap man? Em dispela Pikinini tasol, em God i bin tok promis long salim em i kam long graun, na em i kam bilong mekim laik bilong God. Em i namba wan samting insait long dispela tok hait, olsem na dispela tok hait em i “bikpela samting tru.”
9. I gat wanem samting na yumi ken save i no stret ol i raitim 1 Timoti 3:16 olsem ‘God i kamap man tru’?
9 Ol man bilong bilip long god triwan ol i paulim dispela tok bilong Pol long 1 Timoti 3:16. Ol i tok, long dispela ves “em” i makim God yet, long wanem, wanpela olpela Baibel Inglis (King James) i tok, “God i kamap man tru.” Tasol planti olpela rait Grik bilong bipo i tok “em” long dispela ves na i no tok “God.” Ol saveman i tok, sampela man yet ol i raitim “God” long dispela hap na i no stret ol i mekim olsem. Olsem na planti Baibel bilong nau (American Standard Version, The New English Bible, New World Translation) i raitim stret na i tok, “Em i kamap man.” I no God “i kamap man”; nogat. Em dispela namba wan Pikinini bilong God i kamap man, em God i laikim em tumas na em i namba wan samting God i bin wokim. Aposel Jon i tok: “Tok em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em.”—Jon 1:14.
“Em i Kamap Man Tru, na Ol Manmeri i Lukim Em”
10. (a) Olsem wanem namba wan samting bilong dispela tok hait i kamap long taim Jisas i kisim baptais? (b) Bilong wanem Jisas i kamap olsem ‘namba tu Adam’?
10 Namba wan samting bilong tok hait i kamap long taim Jisas i kisim baptais. Long dispela taim Jisas “i kamap man tru, na ol manmeri i lukim em” i Pikinini bilong God na God i kapsaitim spirit bilong em long em. God Jehova i kisim laip bilong Jisas long heven na putim long bel bilong Maria na bai Jisas i ken kamap man long graun na em i gutpela olgeta. Long dispela taim em i kamap ‘namba tu Adam’ o “Adam i kamap bihain tru,” olsem 1 Korin 15:45-47 i tok, na em i gutpela olgeta na i wankain stret olsem Adam bilong pastaim. Dispela samting i mas kamap, na as bilong en em 1 Timoti 2:5, 6 i kolim na i tok, “em dispela man Krais Jisas. . . . Krais i bin givim laip bilong em yet bilong baim bek olgeta manmeri.” Jisas i givim gutpela skin bilong em olsem ofa na bai nupela kontrak i ken kamap long 144,000 man na bai ol i ken kamap wanwok bilong em long Kingdom bilong em.—Kamapim Tok Hait 14:1-3.
11. Ofa bilong Jisas bai helpim husat moa?
11 Na dispela ofa bilong Jisas bai helpim sampela moa tu! Long 1 Jon 2:2 Baibel i tok, Krais Jisas “i bin mekim wok bilong tekewe sin bilong yumi [em sin bilong ol Kristen em God i makim ol pinis, olsem Jon]. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.” Olsem na ofa bilong Jisas i no helpim lain 144,000 tasol, nogat; em i karamapim olgeta man. Em bai helpim “planti manmeri tru” nau ol i stap, na em bai helpim planti bilion manmeri ol bai kirap bek na i stap laip long taim Paradais i kamap long graun. Ol bai bilip long ofa bilong Jisas, olsem na ol i ken i stap laip oltaim. Kamapim Tok Hait 7:9, 10 i tok, dispela bikpela lain manmeri i putim waitpela klos—dispela i makim olsem ol i bilip long blut bilong Pikinini Sipsip, em Krais Jisas, em i bin kapsaitim. Nau ol i kamap olsem pren bilong God, na long ai bilong em ol i kamap olsem stretpela man. Ol i amamas long save long ol samting bilong dispela tok hait na ol i givim bel long God olsem Jisas i bin mekim!
Sampela Samting Moa Bilong En
12. Olsem wanem spirit holi “i soim olsem pasin bilong [Jisas] em i stret olgeta”?
12 Orait, olsem wanem long namba 2 samting long 1 Timoti 3:16? Em i tok, spirit holi “i soim olsem pasin bilong [Jisas] em i stret olgeta.” Truim bilong dispela i kamap olsem wanem? Em i kamap taim Jehova i kirapim bek Jisas long matmat na em i kamap spirit, na i olsem Jehova i tokaut long Jisas i stretpela olgeta na em inap kisim sampela bikpela wok moa. Rom 1:4 i tok, “Taim God i kirapim em long matmat, Holi Spirit bilong God i soim yumi olsem, em i strongpela Pikinini Bilong God.” Pita i helpim dispela tok, na long 1 Pita 3:18 em i tok: “[Krais ] i stretpela man, tasol em i kisim ples bilong ol manmeri nogut, na em i dai bilong tekewe sin, na bilong bringim yupela i kam long God. Em i dai wanpela taim tasol, na em i no inap i dai moa. Long graun em i stap man, na ol i kilim em i dai, tasol em i kirap bek na em i stap spirit long heven.” Olsem wanem? Pasin bilong Jisas long givim bel long God, dispela i bringim yu i kam long God?
13. Taim Jisas i kirap bek, husat ol dispela ensel i lukim em? Em i autim wanem tok long ol?
13 Orait, yumi lukim narapela hap tok long l Timoti 3:16, em namba 3 samting bilong dispela tok hait: Pol i tok, “ol ensel i lukim em.” Husat ol dispela ensel? Long dispela taim Jisas i stap spirit, na Pita i tok long 1 Pita 3:19, 20: “Em i stap spirit na em i go autim tok long ol spirit i stap long ples kalabus. Dispela ol spirit em ol spirit i bin sakim tok bilong God long taim bilong Noa.” Na Jut ves 6 i tok, ol dispela spirit em ol ensel “ol i no laik i stap gut long dispela wok God i bin givim ol, na ol i lusim ples bilong ol” long heven. Ol i kam daun long graun na tanim i kamap man bilong graun na bai ol i ken pamuk wantaim ol meri. Na taim Bikpela Tait Wara i kam ol i mas tanim i kamap spirit gen, tasol God i putim bikpela tambu long ol na nau ol i stap olsem kalabus. (2 Pita 2:4) Taim Jisas i kirap bek long spirit em i autim tok long ol dispela ensel tasol, na em i no givim gutpela tok long ol long ol samting ol i ken mekim na bai ol i ken i stap laip, nogat! Em i krosim ol, long wanem, ol i bin mekim bikpela rong—ol i no bin givim bel liklik long God. Sapos i gat sampela long lain bilong God long nau na ol i save mekim pasin sem samting, ol i mas tingim strafe bai kisim ol dispela ensel hia!
14. Olsem wanem “ol man i go autim tok bilong [Jisas] long olgeta lain man”?
14 Namba 4 hap bilong 1 Timoti 3:16 i tok, “Ol man i go autim tok bilong [Jisas] long olgeta lain man.” Olsem wanem long truim bilong dispela? Taim ol birua i no holim yet Jisas, em i tokim ol aposel: “Tru tumas mi tokim yupela, man i bilip long mi, bai em tu i mekim olkain wok mi save mekim. Na bai em i mekim ol bikpela wok i winim wok mi bin mekim, long wanem, mi go long Papa.” (Jon 14:12) Jisas i tok olsem, na bihain liklik, olsem long Pentikos long yia 33, Jisas i kapsaitim spirit holi long ol disaipel bilong em, na nau ol i kirap autim tok long ol Juda na tokim ol olsem “dispela man Jisas, God i kirapim em pinis long matmat.” Bihain ol i autim tok long ol Samaria na ol tu i bilip na kisim spirit holi. (Aposel 2:32; 8:14-17) Na bihain moa, olsem long yia 36, Pita i autim tok long Kornilius na long sampela man moa ol i no bilong lain Juda, em ol i bung long haus bilong Kornilius. Em nau, “ol man i go autim tok bilong [Jisas] long olgeta lain man,” olsem long ol narapela lain ol i no bilong lain Juda, na God i kapsaitim spirit holi long sampela bilong dispela lain tu.
15. Olsem wanem yumi ken save, ol Kristen bilong pastaim i save gut long dispela tok hait, olsem long pasin bilong givim bel long God?
15 Na Aposel 12:24 i tok: “Tok bilong [Jehova] i kamap strong na i go long planti ples.” Na Aposel 17:6 i stori long samting i kamap long hap bilong not long kantri Grik, em ol birua i singaut long Pol tupela Sailas, olsem ol i save mekim yet long dispela hap, na ol i tok: “Dispela ol man i save raun na mekim pasin nogut i kamap long olgeta hap bilong graun, na nau ol i kam i stap hia.” Taim Jisas i kirap bek, na 30 yia bihain moa, Pol i stap long Rom, na olsem yumi lukim long Kolosi 1:23, em i tok, “Mipela i bin autim [gutnius] long olgeta manmeri i stap long graun.” Long dispela taim ol Kristen i save gut long pasin bilong givim bel long God na ol i wok strong long bihainim dispela pasin! Na yumi tu i mas kisim save long dispela pasin na bihainim nau long dispela bikpela taim bilong autim tok bilong Kingdom!
16. Wanem namba 5 samting bilong dispela tok hait? Ol i mekim wanem wok na nau dispela namba 5 samting kamap?
16 Ol dispela Kristen bilong bipo i autim tok olsem, na nau namba 5 samting bilong tok hait i kamap, olsem 1 Timoti 3:16 i kolim, em i tok: “Ol manmeri bilong graun i bilip long [Jisas].” Ol manmeri i bilip olsem, long wanem, ol misineri, olsem Pol na Timoti, ol i bin bihainim pasin bilong Krais na ol i bin givim bel long God na ol i wok strong long autim tok. Ol i bringim gutpela tok i go long Esia Maina na Yurop na ating inap long Spen. Na wanpela man bilong Itiopia i bin kisim baptais em i bringim gutpela tok i go long Is Afrika, na Pita i bringim i go long Babilon.
17. Olsem wanem na ol manmeri bilong nau i bilip long Jisas?
17 Na olsem wanem long nau? Kirap long yia 1919 lain remnan i bin givim bel tru long God. Ol i bin kamapim gutpela Wok, na as bilong en em dispela bilip Jisas i bin kirapim. Na kirap long yia 1935 ol i bin mekim wok bilong bungim bikpela lain manmeri ol i tingting long winim dispela bikpela hevi i mas kamap na bai ol i ken stap amamas oltaim long paradais long graun. (Kamapim Tok Hait 7:9, 14) Tru tumas, nau “ol manmeri bilong graun i bilip long” gutpela tok long Jisas. Bikpela lain Witnes Bilong Jehova, winim 3,700,000, ol i givim bel long God na ol i autim tok bilong Kingdom na lain bilong ol i kamap bikpela moa!
18. Olsem wanem Jisas i bin ‘go antap long heven na kisim biknem’?
18 Na i gat wanpela samting moa 1 Timoti 3:16 i kolim, em namba 6 samting bilong dispela tok hait. Em i tok: “God i bringim [Jisas] i go antap na em i kisim biknem tru.” Jisas i bin dai, tasol God i kirapim bek em na em i stap spirit, na inap 40 de em i bin tanim i kamap man na i kamap long ai bilong ol disaipel bilong em “na em i tokim ol long kingdom bilong God.” Bihain em i go antap long heven. (Aposel 1:3, 6-8) Olsem na God i harim pinis beten bilong em taim em i bin beten olsem yumi lukim long Jon 17:1-5, na em i tok: “Papa, . . . yu ken givim biknem long Pikinini bilong yu, olsem na bai Pikinini i ken givim biknem long yu. . . . Mi bin soim biknem na strong bilong yu long ol manmeri bilong dispela graun. . . . Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen.”
19. Taim Jisas i go bek long heven, ating wanem samting i bin kamap?
19 Ating bikpela amamas i bin kamap long heven taim Jisas i go bek! Jop 38:7 i stori long taim Jehova i bin wokim graun long bipo na i tok, long dispela taim olgeta lain bilong God long heven i bin “amamas na singaut.” Tasol taim Jisas i go bek long heven ol dispela ensel i mas amamas moa long kisim bek dispela Gutpela Man i save litimapim wok king bilong Jehova!
20. Bilong wanem Jisas i kisim nem i gutpela tru? Taim em i stap long graun, em i mekim wanem?
20 Long Hibru 1:3, 4 Pol i toktok long dispela Jisas i winim pinis planti hevi na i stap gut long God, na Pol i tok: “Em i pinisim wok bilong en bilong lusim ol sin na mekim ol manmeri i kamap klin, orait em i sindaun long han sut bilong Namba Wan King i stap antap. Papa i givim nem long Pikinini bilong en, na dispela nem i gutpela tru na i winim tru nem bilong ol ensel. Olsem tasol em i mekim Pikinini i kamap Bikpela bilong ol ensel, na ol i aninit long em.” Krais i kisim dispela “nem i gutpela tru,” long wanem, em i winim pinis ol pasin nogut—em i no bihainim liklik. Tru tumas, taim dispela Pikinini bilong God i bin stap long graun em i soim rot long ol man na ensel long pasin bilong givim bel long God. Na em i makim rot olgeta man i ken bihainim bambai ol i ken kisim laip oltaim. Taim Jisas i kisim biknem na i stap long han sut bilong God long heven, olgeta samting bilong dispela tok hait i kamap pinis, olsem ol samting bilong pasin bilong givim bel long God.
Bai Yu Bekim Wanem Tok?
◻ Wanem dispela ‘pasin bilong givim bel long God’?
◻ Olsem wanem Jisas i bin “kamap man tru, na ol manmeri i lukim em”? Na olsem wanem spirit holi i soim yumi “em i stret olgeta”?
◻ Husat ol dispela ensel i bin lukim Jisas? Em i autim wanem tok long ol?
◻ Olsem wanem “ol man i go autim tok bilong [Jisas] long olgeta lain man” na ol manmeri bilong graun i bilip long em?
◻ Wanem taim Jisas i “go antap na em i kisim biknem tru”? Pastaim em i bin mekim wanem long pasin bilong givim bel long God?