Buk Bilong Baibel Namba 10—2 Samuel

Man Bilong Raitim: Gat na Natan

Ples Ol i Bin Raitim: Israel

Raitim Pinis: 1040 B.C.E. samting

Taim: 1077–1040 B.C.E. samting

1. Wanem samting i bin kamap na nau ol i raitim tok bilong 2 Samuel? Stori long ol tok bilong en.

LAIN Israel i pret, long wanem, hevi i bin painim ol long Gilboa, na ol Filistia i wok yet long daunim ol na winim pait. Ol hetman bilong Israel wantaim ol yangpela man ol i dai pinis. Long dispela taim, dispela yangpela man Jehova i bin makim, em Devit, pikinini bilong Jesi, em i wok long kisim biknem long ai bilong ol manmeri. (2 Sml 19:21) Dispela tok em kirap bilong stori bilong 2 Samuel, na yumi ken tok em i buk bilong Jehova na Devit. Dispela buk i stori long planti samting. Em i stori long ol narapela lain i daunim ol Israel, na i stori tu long taim ol Israel i daunim ol birua bilong ol. Em i stori long taim hevi i painim ol na ol i stap nogut na ol i bruk bruk nabaut, na i stori tu long lain Israel i pas gut wantaim. Em i stori long taim Devit i yangpela na em i gat strong, i go inap long taim em i lapun na em i gat bikpela save. Em i stori gut long olgeta samting i bin painim Devit, taim em i givim bel olgeta long bihainim tok bilong Jehova.a Dispela stori i mas kirapim yumi olgeta long skelim bel bilong yumi yet, bambai yumi inap pas gut moa yet wantaim dispela Man i bin wokim yumi.

2. (a) Olsem wanem na ol i givim nem 2 Samuel long dispela buk? (b) Husat i raitim ol tok bilong en? Olsem wanem yumi save ol i gat namba bilong raitim ol dispela tok? Ol i tingting tasol long raitim wanem ol tok?

² Nem bilong Samuel i no stap long rait bilong 2 Samuel. Tasol ating ol i givim nem 2 Samuel long dispela buk, long wanem, pastaim 1 Samuel na 2 Samuel em i wanpela buk tasol. Profet Natan na Gat ol i bin raitim ol laspela tok bilong 1 Samuel, na ol i raitim tu ol tok bilong 2 Samuel. (1 Sto 29:29) Ol i gat save long mekim dispela wok. Gat i bin i stap wantaim Devit, taim Sol i ranim em, na long namba 40 yia bilong Devit i mekim wok king, Gat i poromanim yet Devit. Gat i toksave olsem Jehova i no amamas long Devit, long wanem, Devit i bin mekim rong na kaunim namba bilong ol manmeri bilong Israel. (1 Sml 22:5; 2 Sml 24:​1-25) Natan i bin i stap laip long taim bilong Gat, tasol taim Gat i dai, Natan i stap laip yet. Natan i mekim wok olsem profet, na em tu i wanpela gutpela poroman bilong Devit. Natan i kisim wok bilong tokaut long kontrak Jehova i wokim wantaim Devit, em dispela kontrak long wok king i no ken lusim lain bilong Devit. Na taim Jehova i tokim em long i go kamapim bikpela rong Devit i bin mekim wantaim Batseba, em i strongim bel na mekim olsem, na em i tokaut tu long pe bilong dispela rong. (2 Sml 7:​1-17; 12:​1-15) Insait bilong nem bilong Natan em “God i Bin Givim,” na insait bilong nem bilong Gat em “Gutpela Samting Bai Kamap.” Olsem na Jehova i mekim wok long Natan na Gat long raitim ol tok bilong 2 Samuel, em ol tok i kam long Jehova yet, na em i gutpela bilong helpim man. Dispela tupela man i no stori liklik long ol yet o long ol tumbuna bilong ol, long wanem, ol i no laik litimapim nem bilong ol yet bambai ol manmeri i ken tingim ol i bikpela man. Ol i tingting tasol long raitim ol tok God i bin givim long ol, bambai dispela tok inap helpim ol manmeri i kamap bihain, em ol i gat laik long lotuim Jehova.

3. Ol tok bilong 2 Samuel i stori long ol samting i bin kamap insait long wanem hap taim? Ol i raitim pinis ol tok bilong en long wanem taim?

³ Ol tok bilong 2 Samuel i stori long ol samting i kamap bihain long taim Sol, em namba wan king bilong Israel, em i dai, na i stori i go inap long taim Devit i bin mekim wok king klostu 40 yia pinis. Olsem na em i stori long ol samting i kamap namel long yia 1077 B.C.E. na i go inap long yia 1040 B.C.E. Dispela buk i no stori long i dai bilong Devit, olsem na yumi save ol i raitim pinis ol tok bilong en long yia 1040 B.C.E., o paslain liklik long taim Devit i dai.

4. Bilong wanem yumi inap tok, i stret ol tok bilong 2 Samuel i stap long Baibel?

⁴ Ol samting mipela i stori long en long 1 Samuel bilong makim olsem ol dispela tok em i hap tru bilong Baibel, ol dispela tok i stret tu long 2 Samuel. I no gat wanpela man inap tok, dispela tok em i no tok bilong God. Em i kolim stret olgeta samting i bin kamap, na i no haitim ol rong na popaia bilong King Devit, na dispela samting i helpim yumi long save, olgeta tok bilong en i tru.

5. Wanem samting i helpim yumi long save, ol tok bilong 2 Samuel em i tok tru bilong God?

⁵ Tasol wanpela samting bilong helpim tru yumi na yumi save i stret ol tok bilong 2 Samuel i stap long Baibel, em olsem: Yumi lukim pinis truim bilong ol tok promis i stap long 2 Samuel, olsem dispela tok promis long kontrak bilong Kingdom bilong Devit. God i tok promis long Devit, olsem: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.” (7:16) Taim kingdom bilong Juda i laik bagarap, Jeremaia i stori long dispela tok promis God i bin mekim long lain bilong Devit, na em i tok: “Mi Bikpela, mi tok olsem, oltaim ol lain bilong Israel bai i gat king i kamap long lain bilong Devit.” (Jer 33:⁠17) Dispela tok profet i kamap tru, long wanem, Jehova i mekim na Krais Jisas i kamap long lain Juda, “em i bilong lain bilong Devit,” olsem Baibel i tok.​—⁠Mt 1:⁠1.

HELPIM YUMI OLSEM WANEM?

28. Namba Tu Samuel i tok yumi mas was gut long wanem ol samting?

²⁸ Planti tok bilong 2 Samuel inap helpim tru ol man i kaunim dispela buk long nau! Dispela buk i stori gut long pasin na tingting bilong ol man. Dispela i helpim yumi long abrusim ol pasin olsem: ol laik nogut bilong kisim biknem na namba samting, na bekim rong bilong narapela (3:​27-30); na mangalim poroman marit bilong narapela (11:​2-4, 15-17; 12:​9, 10); na putim brata o pren long han bilong ol birua (15:​12, 31; 17:23); na bihainim laik bilong skin tasol (13:​10-15, 28, 29); na skelim kwik pasin bilong narapela (16:​3, 4; 19:​25-30); na tok nogut long pasin bilong narapela long mekim lotu.​—⁠6:​20-23.

29. Namba Tu Samuel i stori long wanem ol stretpela pasin i olsem gutpela piksa bilong yumi ken bihainim?

²⁹ Tasol sapos yumi bihainim ol gutpela na stretpela pasin bilong ol man em 2 Samuel i stori long en, dispela inap helpim yumi tru. Pasin bilong Devit i helpim yumi olsem: Em i save lotuim Jehova wanpela tasol (7:22); em i mekim pasin daun long God (7:18); em i litimapim nem bilong Jehova (7:​23, 26); taim hevi i kamap em i bihainim gutpela tingting (15:25); taim em i mekim sin em i sori tru na tanim bel (12:13); em i bihainim ol tok promis bilong em (9:​1, 7); em i tingting gut taim traim i painim em (16:​11, 12); olgeta taim em i wetim Jehova bai helpim em (5:​12, 20); na em i tingim gut ol samting na ol man Jehova i makim pinis (1:​11, 12). Olsem na ol i tok, Devit i “wanpela gutpela man i save bihainim pasin [Jehova] i laikim”!​—⁠1 Sml 13:⁠14.

30. Namba Tu Samuel i stori long wanem ol lo bilong Baibel?

³⁰ Long hap bilong 2 Samuel, yumi painim planti lo ol man i bin bihainim. Sampela i olsem: Pasin wanpela man i mekim na lain olgeta bilong em i gat asua (2 Sml 3:29; 24:​11-15); sapos man i ting samting em i mekim i gutpela, dispela i no inap senisim ol lo em God i putim pinis (6:​6, 7); mas stap aninit long ol man em Jehova i makim bilong mekim wok bos (12:28); ol man i mas ting blut em i samting holi (23:17); sapos man i gat asua long blut em i mas mekim samting bilong stretim dispela rong (21:​1-6, 9, 14); gutpela tingting bilong wanpela man inap helpim planti long abrusim bagarap (2 Sml 20:​21, 22; Sav. 9:15); na pasin bilong stap gut long oganaisesen bilong Jehova na ol man em i makim bilong mekim wok, em i bikpela samting, maski ol man i kilim yumi i dai.​—⁠2 Sml 15:​18-22.

31. Olsem wanem 2 Samuel i tokaut long sampela samting bilong Kingdom bilong God, olsem Ol Skripsa Grik i soim yumi?

³¹ Bikpela samting tru em 2 Samuel i stori long en, em ol samting Kingdom bilong God bai mekim, em dispela Kingdom God bai kamapim long rot bilong “pikinini bilong Devit,” em Krais Jisas. (Mt 1:⁠1) Jehova i tok promis long Devit olsem, kingdom bilong em bai i stap oltaim (2 Sml 7:16), na Aposel 2:​29-36 i tok dispela i makim Jisas. Hibru 1:5 i kamapim klia olsem dispela tok profet, “bai mi stap papa bilong em na em bai i stap pikinini bilong mi” (2 Sml 7:14) i makim Jisas. Jehova i truim dispela tok taim em i singaut long heven olsem: “Dispela em i Pikinini bilong mi. Mi laikim em tumas. Bel bilong mi em i amamas long em.” (Mt 3:​17; 17:⁠5) God i wokim kontrak bilong Kingdom wantaim Devit na bihain Gebriel i toktok long en taim em i tokim Maria olsem: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit.” (Lu 1:​32, 33) Taim yumi lukim truim bilong dispela tok promis bilong Pikinini bilong Kingdom i kamap isi isi, yumi amamas tru, a?

[Futnot]